Nehemiah 1
1
1Hi sia in Hacaliah ii tapa Nehemiah ii a zawsa nasep teng tepteena ahi hi.
Nehemiah ii Jerusalem A thinbotna
Artaxerxes ii Persia kumpilian a sep a kum kul kum, Kislev tha in Susa khuapi ah keima Nehemiah ka om hi. 2Ka suapui khat ahi, Hanani sia midang pawlkhat taw Judah pan hong theng a, amate tungah Jerusalem khuapi thu le Babylon saltanna pan a cia kik Jew mipuite thu ka dongh hi. 3Amate in, kei tungah a nungta lai teng a khua a tui a zot uh ciang haksatna lianpi a thuaknate le a kiim a paam a teang ngamdangmite ii a nomuna thu teng hong ko uh hi. Amate in Jerusalem luphungte a cimhtham in om lai a, kongpite a kihaltum pan kipan a kivawt kik ngawl laina thute zongh hong son uh hi. 4Hi thu teng ka zaak ciang to suk in ka kap hi.
Ni tam mama khuangai in ka mau a an ka ne bua hi. Pathian tungah thu ka ngen a, 5“Vantung ah a mang Topa Pathian awng! Nang na lian a, nangma kiita in ka om uh hi. Nangma hong itte le na thupiak a zuite tungah na thuciamna thumaan takin na len hi. 6Topa awng, hong en ta'n a, Israel mi na naseamte atu a sun a zanin ka thungetna hong ngai ta'n. Koma Israel mite mawna khialna teng hong pualaak khi hi. Ka taanghpupite le keima ka maw zo uh hi. 7Seksol ngamtatna taw nang kong langpan zo uh a, nong thupiakte ka zui bua uh hi. Na naseampa Moses tungtawnin nong piak thukhamte ka zui bua uh hi. 8Nangma ii Moses tungah: ‘No Israel mite ka tungah nong thumaan bua uh le minam dangte sungah kong thethaang tu hi. #Thiam 26:33 9Ahizong ka kungah hong zuan kikin kong thupiakte na zui uh le, leimong dongin kithethaang zo na hi uh hangin keima nong biak natu in ka tealsa munah kong paipui kik tu hi,’ na ci thute tu in phawk kik ta'n. #Thkna 30:1-5
10“Topa awng, hite in nangma mi, na naseamte ahi uh hi. Na vaangletna le na thahatna taw amate na suatak hi. 11Tu in ka thungetna le nangma hong patoai nuam na naseam dangte theampo ii thungetnate hong ngai ta'n. Tuni in taangtutna hong pia ta'n a, kumpilianpa in hong hesuaksak ta'n.”
Tua hun lai in keima in kumpilianpa sapittui a pia pa ka hi hi.
Currently Selected:
Nehemiah 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016