Joel 1
1
1Hi sia in Pethuel tapa Joel tungah Topa ii thupuak ahi hi.
Lo An Lal hu in a Mite Khuangai
2Khanghaamzawte awng,
nadon vun;
Judah ngamsung a om
mihing theampo awng ngai vun.
Hi bang thu peuma noma khan sung ahizong
na taanghpupi te khan sung ahizong a piang ngei ziam?
3Na tate tungah tua thu son vun;
amate in a tate tungah sonsawn tu hi,
tuate in a khang kikte tungah sonsawn tu hi.
4Khaumaw honkhat zawkciang
honkhat in lo ante topha hi;
Hon khat ii nusiat sate hon dang
khat in khawng tum hi.
5No zu khamte awng,
khanglo vun a kap vun;
no sapittui nete awng,
kap vun;
sapittui thak vawt natu
sapitngate kisusia zo hi.
6Khaumaw ngalkaphonpi khat in ih ngam hong sim hi;
tuate thahatin tam leih a, kisim zo ngawl hi;
a hate tawpi ha bangin hiam hi.#Tpl 9:8
7Amate in ih sapitkungte
susia zo a,
ih theikungte khimtham zo hi.
Amate in thingbaakte
a kaang dongin a haw khok keak hi.
8No mite awng, a teenpui tu pa a thi ciang
ngaknu khat a khuangai bangin kap vun.
9Biakinnpi sungah piak tu antang ahibuale
sapittui om ngawl hi;
Topa biakpiak natu bangma nei ngawl ahikom thiampite khuangai hi.
10Lote kolh hi;
leitangte khuangai hi
banghang ziam cile ankungte kisusia in sapitngate kikosak a,
olive kungte kivulsak hi.
11No, lothote awng, khuangai vun;
sapithuan cingte awng kap vun,
banghang ziam cile zungtaangte, mangtaangte,
ankung theampo kisusia hi.
12Sapitkungte le theikungte kongaw zo hi;
thingnga kungte theampo vulin thi zo hi.
Mite ii lungdamna bo hi.
13No, biaknatau ah naseam thiampite awng,
khau-ip puan silhin kap vun!
Biakinnpi sungah tumin,
zankhuateak khuangai vun!
Na Pathian na piak tu uh
antang, ahibuale sapittui om ngawl hi.
14Antan natu thupia vun;
kikhoppi khat sam vun!
Lampuite le Judah mi theampo
Topa na Pathian Biakinnpi sungah
khawmtua in, ama ko in au vun!
15 Topa ni nai hi;
Vaanglianbelpa ii siatna hong tunsak tu ni ahi hi.
Tua ni in bangza launa piang tu ziam! #Is 13:6
16Ih ante a suksiat ciang
cimaw in ih en lel hi.
Ih Pathian Biakinnpi sungah
lungdamna om ngawl hi.
17Anciite leiko sungah thi hi.
Khol tu antang om ngawl hi;
tua ahikom ansaal hawmte lalcip hi.
18Khuite ngilkialin haam uh hi,
banghang ziam cile a tat natu lohing mun om ngawl hi;
tuuhonte zongh in thuak uh hi.
19 Topa awng, nang kong ausan hi,
banghang ziam cile mei ii halthap bang keakin
nganthana le thingkungte kongaw hi.
20Luituite kang ahikom
ngamsate ngawngawn in nang hong ko uh hi.
Currently Selected:
Joel 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016