Galatia te 1
1
1Mihingte kung pan hi ngawl, mihingte ii piansak thu zongh hi ngawl, thina pan Jesus a tho kiksak Pa Pathian le Jesus Christ kung pan sapna a nga sawltak ahi keima Paul ii tung pan laithak ahi hi. 2Hi sungah a om suapuite theampo in Galatia ngam pawlpite tungah kimuana kam kong thaak khawm uh hi:
3Ih Pa Pathian le Topa Jesus Christ in thuthiamna le thinnopna hong pia tahen.
4Tu a hunpha ngawl sia panin ih suatak natu in ih Pa Pathian ii deina a zuina taw, Christ in eite ii mawna hangin ama le ama hong kipia hi. 5Pathian tungah minthanna a tawntung a tawntungin om tahen! Amen.
Khatbek ahi Lungdamna Thu
6Note lamdang kong sa hi! Christ ii thuthiamna taw note hong sam pa, tawmvei no sungin na taisan uh a, tuaciang lungdamna thu a dang khat na saang uh hi. 7A tatakin, “lungdamna thu a dang” om tuan ngawl hi, ahihang hi bang a kong ci theina in mihing pawlkhat in Christ ii lungdamna thu laih tu in hanciam uh a, na thin uh hong nawngkaisak hi. 8Ahihang kote ka hi uh zong, ahibuale vantunglalang khat keak ahihialzong, note tungah kong hil sa lungdamna thu taw a kitumdangin hong hil a om le tua mi sia hell khuk sungah kivawk tahen! 9Tu masia zonghin kong ci zo uh hi, tu zonghin kong ci kik hi. Khat po in na saansa uh lungdamna thu sia taw a kitumdang khat hong hil le tua pa sia hell khuk sungah kivawk tahen!
10Hi bang a ka awsua sia mihingte ii diksak tu hi na sa uh ziam? Hi ngawl het hi! Pathian ii diksak tu bek ka deina hi! Mihingte maipha nga nuamin a hanciam ka hi ziam? Tuabangin hanciam lai ka hile Christ ii naseam khat ka hi buatu hi.
Paul Sawltak A Suana Daan
11Ka suapuite awng, ka hil lungdamna thu in mihing tung pan a piang thu hi ngawl hi ci sia kong son nuam hi. 12Mihing khat pawpo tung panin ka nga hi ngawl hi, kuama ii hong hil zongh ahi bua hi. Kei tungah hong pualaak sia Jesus Christ ama mama ahi hi.
13Jew te biakna sungah ka kipiak laitakin, kei sia bangbangin a nungta mi hi a, bangbangin Pathian ii pawlpi hesuakna nei ngawlin vawtsia a, a siasak tu in ka hi thei za in hanciam khi ziam, ci teng sia no tung ah hong kisonsa ahi hi.#Sawl 8:3; 22:4-5; 26:9-10 14Jew te biakna ka zui sung teng in ka khanngualte a tamzaw mai ah ka madawk a, ih pute ii taangh ngeinate sungah amate sangin a nasia zawin a kipia pa ka hi hi.#Sawl 22:3
15Ahihang, Pathian in ka pian ma ngawngawnin a thuthiamna taw hong teal a, ama ii na a seam tu in hong sam hi. Ama ii a khensat hun hong cing a, #Sawl 9:3-6; 22:6-10; 26:13-18 16Gentile te tungah ama huvau Lungdamna Thupha ka hil thei natu in a Tapa kei tungah hong pualaak ciang, ngaisutna pha ngenin kuama kungah ka pai bua a, 17kei mai a, sawltak a seamte taw kimu tu zonghin Jerusalem ah ka pai bua hi. Tua taangin, Arabia ah thakhatin ka pai a, tua zawkciang Damascus ah ka heak kik hi. 18Tua zawk kum thum ciangin Peter tung pan thu za tu in Jerusalem ah ka pai a, nipi nii sung, ama kungah ka taam hi.#Sawl 9:26-30 19Topa ii suapuipa James simngawl sawltak dangte ka mu bua hi.
20Kong at teng thumaan hi. Leilot ngawl ka hi sia Pathian in hong he hi!
21Tua zawkciangin Syria le Cilicia ngamsung mun tuatuam ah ka pai hi. 22Tua hun laitakin Judea pawlpite sungah a om pawlpi mite in kei hong he tatak bua uh hi. 23Midangte ii hi bang a, a pau teng bekma a he uh hi: “Eite hong vawtsia ngei mipa in khatvei lai a lalsak tu in a hanciamh upna sia, tu in thuhilna in nei hi.” 24Tuabangin amate in kei hu in Pathian pok uh hi.
Currently Selected:
Galatia te 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016