Esther 1
1
Vashti Kumpinu in Xerxes Kumpipa Thu nial
1-2Persia ngam khuapi Susa khua kumpi tokhum tung panin Xerxes kumpipa in India pan Ethiopia dong ngamke 127 uk hi. #Ezra 4:6
3Kumpi a sep a kum thum kumin a uliante theampo le zum ukte atu in anneakpoai khat vawt hi. Tualai ah, Persia le Media ngalkaphonpite, ngamuk mangte le kumpi uliante om hi. 4Kumpipa in a ngam haunate le kumpi zum ii vaang neina, nasiatna taw a thupiziate tha luk sung bup lak hi.
5Tua zawkciang kumpipa in Susa khuapi sungah a om pasal theampo a hau, a zawng a kibangin anneakpoai khat vawtsak hi. Tua poai nipi khat sung bup kumpi inn huante sungah kivawt hi. 6Tua mun a suumsung sia patpuankhai vancii le a kaangte taw kizeam a, tua puankhakte a ci pha puanneal sandup khaute taw marble suangkaang khuamte tungah ngunnkualte taw kikhii hi. Tua suumsung teng marble suang a kaang, a san, a tee keptang le vancii meal suangmanpha bangte kipha in, a tungah khamh le ngunn taw a kivawt tokhumte kikoi hi. 7Sapittui te khat le khat a kibang ngawl khamh hai taw kihawm vazia a, kumpipa in a kumpi sapittui te ciil vawt ngawl hi. 8Sapittui neak tu za ciangtan om ngawl a; a kuama po in a du za a neak natu in kumpipa in kumpi inn sung naseamte thupia hi.
9Tua poai hun sungin Vashti kumpinu in kumpi inn sungah numeite atu in anneakpoai khat vawtsak hi.
10A poaikhaam ni sali ni in kumpipa sapittui ne in nuamsa ahikom ama aituam naseam, numei uk cilnge sa pasal sali Mehuman, Biztha, Harbona, Bigtha, Abagtha, Zethar le Carkas te sam hi. 11Kumpipa in amate tungah Vashti kumpinu a kumpilukhu khu in ama kungah a paipui natu in thupia hi. Kumpinu sia numei mealpha khat hi a, kumpipa in uliante le a leangnate theampo tungah kumpinu mealhoina lak nuam hi. 12Ahizong a naseamte in kumpipa thupiakna Vashti kumpinu tungah a son uh ciang kumpinu in nialin pai nuam ngawl hi. Tua hu in kumpipa thinso hi.
13Tu in upadi zui natu ngeina huvau thudokna a pian ciang, ama in a pil a thiamte ngaisutna a dok tu sia kumpi ngeina ahikom ama in bang vawt tu ci a he, ngaisutna a piate sam hi. 14Ama ii ngaisutna a dok tawntung belte sia Carshena, Shethar, Admatha, Tarshish, Meres, Marsena le Memucan — Persia le Media ngam ulian salite hi a, kumpi ngam sungah zum lianbelte uk uh hi. 15Ama in hi uliante tungah, “Keima Xerxes kumpipa in ka naseamte sawlin Vashti kumpinu ka samsak a, ahizong ama in ka thu hong nial hi! Ama tungah ih vawt tu sia upadi in bang ci ziam,” ci hi.
16Tuasia ciang Memucan in kumpipa le a uliante tungah: “Vashti kumpinu in kumpipa bek hi ngawlin, a uliante — a tatakin ci leang kumpi uk sungah a om pasal theampo hong zawngsak hi! 17Kumpinu ngamtatna a zaak pawpo ciang, kumpi uk sungah a om numei theampo in amate ii pasal tek nomu paih tu hi. Amate in, ‘Xerxes kumpipa in Vashti kumpinu sia ama kungah a pai natu thupia napi a thu nial hi,’ ci tu uh hi. 18Persia le Media ngamsung uliante ii zite in kumpinu ngamtatna teng a zaak po ciang nitum ma in tua thu a pasalte tungah son tu uh hi. Mun theampo ah zite in a pasalte zakta nawn ngawl tu a, a pasalte sia a zite tungah thin uuk tu uh hi. 19Kumpipa na lung a kim le, Vashti sia kumpipa mai ah a kilak kik ngei nawn ngawl natu in kumpi thu thansakna khat vawt in. Tuasia a kilaih kik thei nawn ngawl tu in Persia le Media te upadi sungah a ki at natu thupia in. Tua zawkciang ama kumpinu dinmun ah numei phazaw khat koi in. 20Na thu thansakna sia a lian mama hi kumpi ukna ngam theampo ah a kiheak ciang numei theampo in amate ii pasalte hau kale zawng kale pha takin zatak vawt tu uh hi,” ci hi.
21Kumpipa le a uliante in hi ngaisutna pha sa a, Memucan ii ngaisutna a piak bangin kumpipa ngamta hi. 22Zi neisa pasal theampo sia amate ii bangkua tek ii topa hi tu a, a thuneibel hi tu hi ci in, ama in tua kumpi ukna ngam sim ah a kampau tek le a lai tek taw thu zaaksakna khat puak hi.
Currently Selected:
Esther 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016