Matthew 28
28
Thaw kikna
(Mark 16:1-10; Luke 24:1-12; John 20:1-10)
1Sabbath zawkciang, Nipi ni khua hong vak ciangin, Mary Magdalene le Mary dangkhat thaan vil tu in pai uh hi. 2Thakhatin nasia tak zinliing hi. Topa vantunglalang khat van pan hong tuaksuk a, thaan kong hukna suangtum liikkeak in a tungah to hi. 3Ama meal sia khualeng taw kibangin, a puansilh sia vuuk bangin paak hi. 4A cingte lau mama ahikom, liingin mithi sate taw kibang uh hi.
5Vantunglalang in numeite paupui hi. “Lau heak vun. Thinglamtee tungah a kithat Jesus sia zong nu hi ci in kong he hi. 6Ama in hi sungah om ngawl hi! Ama hong sonsa bangma in kitho kiksak zo hi. Hi sungah hong pai tavun a, a lupna hong en tavun. 7Tu in manlangin pai tavun a, a nungzuite munah, ‘Ama sia thina pan kithosak zo a, tu in ama in note mai Galilee ah pai tu hi; tua munah ama na mu tu uh hi!’ ci tavun. Kong son sate ciamtee tavun,” ci hi.
8Tua ahikom amate in, thaan sia manlang takin nusia a, lau kawm si lungdamna taw kidim si in, nungzuite kungah thupuak tu in tai uh hi.
9Thakhatin Jesus in amate taw kisi a, “Thinnopna na nga tavun,” ci hi. Amate in ama kungah hong neak uh a, a peang koai in bia uh hi. 10Jesus in, “Lau heak vun; Pai tavun a, ka suapuite tungah, Galilee ah pai tu in sawl tavun, tua munah amate in kei hong mu tu hi,” ci hi.
Thaancing Ngalkapte Thukona
11Numeite sia amate pai natu ah a pai laanin, thaancing ngalkapte pawlkhat khuapi sungah heak kikin, thiampi liante tungah thupiang theampo ko uh hi. 12Thiampi liante in upate taw kisi in, kikupna khat nei uh hi. A ngalkapte sum tam mama pia uh a, 13tuaciangin, “Zan ka mut lanin nungzuite hong pai a, a luang hong ngu hi, na ci tu uh hi. 14Tuaciangin ngamuk mangpa in hi thu a za tha le, note mawna a hi ngawl hunlam ka na son tu uh hi, bangma thinngim natu om ngawl hi,” ci uh hi.
15Ngalkapte in sum la in, a kisawl na bangin vawt uh hi. Tua hi a, tua thupuakna sia tuni dong Jew te sungah kizel hi.
Jesus A Nungzuite Munah Kilak
(Mark 16:14-18; Luke 24:36-49; John 20:19-23; Sawltak 1:6-8)
16Nungzui sawm le khat te in Galilee ngam mual tungah Jesus sawl bangin pai uh hi.#Mt 26:32; Mk 14:28 17Ama a mu ciangin, pawlkhat in um tak ngawl ahitazong, amate in bia uh hi. 18Jesus in amate kung nai neakin, “Vantung le leitung ah thunei theina theampo a vekpi in kei hong kipia zo hi. 19Tua ahiciang pai tavun, mun theampo ah mihing theampo ka nungzui suaksak tavun: Pa, Tapa le Thaa Thiangtho min taw tui na phum tavun, #Sawl 1:8 20tuaciang ka thu piakte theampo a zui natu hil tavun. Tuaciang hun bo dongin note taw kong omkhawm tawntung tu hi,” ci hi.
Currently Selected:
Matthew 28: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016