Matthew 23
23
Jesus in Thukham hil Syate le Pharisee te pan Kidop natu Hil
(Mark 12:38-39; Luke 11:43,46; 20:45-46)
1Tuaciang Jesus in mipite tung le nungzuite tungah thu son hi. 2“Thukham hil syate le Pharisee te sia Moses Thukham a pheen thei tu, thu neite ahi hi. 3Tua ahikom amate in vawt a hong sawl peuma ni in zui vun; ahihang amate ngamtatnate zui heak vun, banghang ziam cile amate in a hil uh bangin ngamta ngawl uh hi. 4Mihingte ii nungzaang ah vanhngit a puak hakte sia tua mite ma ii sot to ahi hi, ahihang amate in tua vanhngitte puakpui tu in, a khutme dawn zongh a tung nuam bua uh hi. 5Mihingte mu tu in amate in na theampo seam uh hi. Amate talki tung le a baante tungah laithiangtho kammal a ki at savun pheakte bangza in beak ziam, en vun! A laktong puasilh mong a teapkaaite zongh bangza in sausak ziam!#Mt 6:1; Mi 15:38 6Poai sungah amate tona a nuambelte tungah ahizong, synagogue sungah a kikhaam sa tonate tungah ahizong amate in to nuam saap a; 7amate in vanhzuakna munah ngual ii paupui tu thangai a, ‘Syapa’ ci in a sap tu uuk uh hi. 8Note sia ‘Syapa’ kici ngawl tu nu hi, banghang ziam cile note sia unau khat vive hi a, Sya khat bek na nei uh hi. 9Tuaciangin hi leitung ah kuama ‘Pa awng’ ci heak vun, banghang ziam cile vantung a Pa khat bekma na nei uh hi. 10‘Lampuipa awng,’ zongh na kicisak heak vun, banghang ziam cile Messiah khat bek ma na lampui uh ahi hi. 11No sungah a lianbel sia in note naseam hi tu hi.#Mt 20:26-27; Mk 9:35; 10:43-44; Lk 22:26 12Akua po ama le ama a kiliansak sia kiniamsak tu a, a kuama po a kiniamkhiak sia, thupi in kikoi tu hi.#Lk 14:11; 18:14
Jesus in Amate Kihi theamsaknate Mawsiat
(Mark 12:40; Luke 11:39-42,44,52; 20:47)
13“Thukham hil syate le Pharisee te awng! Note atu in bangza in lauhuai ziam? No a kihitheamsakte awng! Ngual mai panin, vantung Ngam kongkha khaktan nu hi, tuaciang noma mama in a sungah na tum bua uh a, tum nuam in a hanciamte zongh, a tum tu na oai bua uh hi! 14Thukham hil syate le Pharisee te awng! No atu in bangza lauhuai ziam? A kihitheamsakte awng! Meingongte na zothaw uh a, a inn uh na phuul uh hi. Tua zawkciang na thunget a sau mama in na kivawt tawm uh hi! Tua hu in daan na thuak tu sia nasia mama tu hi!
15“Thukham hil syate le Pharisee te awng! No a kihitheamsakte awng! No atu in bangza in lauhuai ziam? Noma upna sungah mihing khat na nga thei natu in, tuipi tungah pai a, ngam theampo kaantan in pai nu hi; tuaciang tuabangin nungzui khat na nga zawk uh ciang, noma sangin hell ngam sungah a zaa nii in theng tu in a kilawm suaksak nu hi.
16“Mittaw ngual lamlakte awng! No atu in bangza in lauhuai ziam? ‘Biakinn taw a kiciamte a kamciam a peal hangin phamaw ngawl hi; ahihang Biakinn sungah khamhte taw a kiciamte sia a kamciam bangin a vawt uh kul hi,’ na ci uh hi. 17Mittaw mawmawte awng! koisia thupi zaw ziam, khamh hi zaw ziam, khamh a thiangthosak Biakinn sia hi zaw ziam? 18Na kihil thua lai na uh pan, ‘Biaknatau taw a kiciamte sia a ciampeal hangin phamaw ngawl hi; ahihang biaknatau tung a om nate taw a kiciamte sia a kamciam bangin tung tu hi,’ ci nu hi. 19Na mit uh bangza in taw ziam! Biakpiak natu in a kikoi nate thupi zaw ziam maw, tua nate a thiangthosak biaknatau sia thupi zaw ziam? 20Tua ahikom mihing khat in biaknatau taw a kiciam le, tua biaknatau le a tung a om na theampo taw ama kiciam ahi hi; 21tuaciang Biakinn taw kiciam ciangin tua Biakinn le a sung a teang Pathian taw zongh kiciam hi si a, 22tuaciang khat po in vantung taw a kiciam le Pathian tokhum le a tungah a to pa taw kiciam ahi hi.#Is 66:1; Mt 5:34
23“Thukham hil syate le Pharisee te awng! A kihitheamsakte awng! No atu in bangza lauhuai ziam? An mee sungah hel thei lonamsia, masala le thing namtuite dongin, see sawm sua see khat sia Pathian na pia uh hi, ahihang Thukham sungah a kihil a thupi tatak ahi, thukhaikimna, hesuakna le thumaannate na awlmaw bua uh hi. Hite zongh na zak tu uh hi a, a dangte zongh na awlmawk ngawl tu hisaap ngawl hi.#Thiam 27:30 24Mittaw ngual lamlakte awng! Na dawn tu uh tui sung pan tho khat po sia nasia takin na chit uh hi; ahihang kalaoh khat na lopvalh uh hi!
25“Thukham hil syate Pharisee te awng! A kihitheamsakte awng! No atu in bangza lauhuai ziam? Hai le kuang sia a puasang teng na sil uh hi, ahizong sungsang sia zawthawk thu le duhopna taw na nga uh nate taw kidim hi. 26Pharisee mittawte awng! Hai sia a sungsang sil phot le uhte a puasang zongh thiang tu hi.
27“Thukham hil syate le Pharisee te awng! A kihitheamsakte awng! No atu in bangza lauhuai ziam? No sia suangkaangtui taw a kizut thaankul taw kibang nu hi, tuate sia a puasang hoi ahihang a sungsang ah mithi ngu le mithi muat taw kidim hi.#Sawl 23:3 28Tuasia bangma in no sia a pua sang panin a kuama po ii muna ah a hoi bang na hi uh hi, ahihang na sungsang uh ahile kihi thepsakna le mawna taw kidim nu hi.
Jesus in A Daan Thuak tu uh Sonkhol
(Luke 11:47-51)
29“Thukham hil syate le Phariseete! A kihitheamsakte awng! No atu in bangza lauhuai ziam? Kamsaangte atu in thaankuul sia a et hoi tu in na vawt uh a, miphate atu in, tepteena khan sia na zepsak uh hi; 30Tuaciangin ka taanghpupite khan lai in, a nungtate hi le ung amate ii septe seam buan ci ung, kamsaangte that buan ci ung, ci nu hi. 31Tua ahikom kamsaangte a thatlumte ii suante na hi uh hunlam noma pauna panin kipholaak na hi uh hi. 32Tua ahiciang na taanghpupite ii patsa nate na zaw dong seam vet tavun! 33Ngul le ngul ii suante awng, hell sungah hong kikhiak suk natu panin, bangbangin suakta tu in ki um nu ziam! #Mt 3:7; 12:34; Lk 3:7 34Tua ahikom, kamsaangte, mihing ciimte le syate sia note kungah kong paisak tu hi; tuate pawlkhat na thatlum tu uh a, pawlkhat thinglamtee tungah na kilh tu a, pawlkhat sia synagogue inn sungah na vel tu uh a, khuapi khat pan khuapi khat ah na delkot tu uh hi. 35Tua hu in mawna nei ngawl Abel pan a kipan, sangaw na biaknatau le Biakinn kilaklaw a na thalup uh Berechiah tapa Zechariah le mawna nei ngawl bul a na thalup uh theampo hangin thuak tu daan sia note tungah hong tung tu hi.#Pian 4:8; 2 Khang 24:20-21 36A tatakin kong ci ciang mihing that theampo hangin na thuak uh daan sia tu hun mihingte ii tungah hong tung tu hi!
Jesus ii Jerusalem A itna
(Luke 13:34-35)
37“Jerusalem, Jerusalem awng! Nang in kamsaangte na thatlum a, Pathian kamtaite suangtum taw na hua hi. Akpui in aknote a thakhui nuai ah a uap bangin, bang tanvei na mihingte angvan nuam khi ziam? ahihang na oai bua hi! 38Tua ahikom Biakinn sia kitaisan tu a, a hawm in om tu hi.#Jer 22:5 39Hong ci khi hi; tu pan kipan, ‘Topa min taw hong pai pa sia Pathian in thupha pia tahen,’ na ci uh mateng in, kei nong mu kik nawn buatu hi.” a ci hi.#Ps 118:26
Currently Selected:
Matthew 23: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016