Joshua 7
7
Achan ii Mawna
1A kisusia tu na khat pawpo Jericho pan a laak ngawl natu Topa ii thupiakna kizui ngawl hi. Achan a kici pasal khat in tua thupiak sia ni ngawl hi, tua ahikom Topa sia Israel te tungah a thin so hi. (Achan sia Carmi ii tapa, Zabdi ii tupa hi a, Zerah ii bee le phung, Judah nam sungah a kihel khat ahi hi.)
2Joshua in mihing pawlkhat Jericho pan Ai khua ah paisak hi, tua khuapi sia Bethel ii nisuana sangah om a, Bethaven taw kinai hi, tua munah ngam vil tu in sawl hi. Amate in a sawl teng a sep zawk uh ciang 3Joshua tungah hi bangin thu puak kik hi: “Ai khua sim natu in mihing theampo kuan kul ngawl hi. Pasal tulnii, tulthum khawng bek kuansak lel in. A sim tu in ngalkap hon bup puak heak in; a khua sia khuapi lian hi ngawl hi.” 4Tua ahikom Israel te 3,000 khawng in sim uh a, ahizong amate hong nungkin kik kul hi. 5Ai mite in amate sia khuapi kongpi panin suangkhuk pawlkhat omna dong uum uh a, mihing 36 khawng mual tung pan del suk in thatlum uh hi. Tuasia ciang Israel te sia a thin letna bo a, lau uh hi.
6Joshua le Israel lampuite hee a, a puansilh lai te baltham in, Topa ii Thuciamna Thingkuang mai ah leiliik uh a, khuangaina lakna in a lu tungah leivui kithe in, tua munah nitak sang dong lum uh hi. 7Tuaciang Joshua in, “Vaanglianpipa Topa awng! Banghang peuma in Jordan ngun hong kaantansak ni ziam? Amor mite khut sungah hong aap tu in maw? Hong mot tu in maw? Banghangin Jordan ngun langkhat ah om po ngawl ka na khu ziam? 8Tu in Israel te sia ngalmai pan nungkin zo ci leang bang son thei nawn tu khi ziam, Topa awng. 9Canaan mite le ngam sungah om midang theampo in hi thu za tu hi. Amate in hong kiim uum tu a, kote hong that siat tu hi. Tuasia ciangin nangma min kihuk natu in bang vawt tu ni ziam?” ci hi.
10 Topa in Joshua mun ah, “Thoto in! Banghangin hi bangin lei ah lum ni ziam? 11Israel te in mawna vawt zo hi! Amate ii let tu in ka thupiak, kei taw thukimna sia len ngawlin paltan zo hi. Suksiat tu in a kiningkhiin na pawlkhat amate in la zo hi. Amate in ngu a, tuate huvau iim in amate ii vanh taw koi khawm hi. 12Hi sia hu in Israel te in a ngalte nang zo ngawl hi. Tuate ii mai pan amate nungkin hi, banghang ziam cile amate mama sia tu in a lalcip tu in kinil zo hi! Laak ngawl tu in thu a kipiak vanhte na suksiat cip uh mateng no taw omkhawm nawn ngawl tu khi hi. 13Thoto in! Mipite thiansua in a, ka mai ah hong pai tu in kingingsak in. Zing ciang a kinging kholsa in a om natu son in, banghang ziam cile Kei, Israel ii Topa, Pathian in hi teng son tu ka nei hi: ‘Israel awng, suksiat tu a thu kong piak vanh pawlkhat la nu hi! Hi nate na suksiat uh mateng na ngalte na zo buatu uh hi.’ 14Tua ahikom zingsang ciangin amate sia nam khat zawkciang nam khat, mai ah a kipaipui tu sia son in. A nam ka teal sia phung khat zawkciang phung khat mai ah hong pai tu uh hi. A phung ka teal sia innkuan khat zawkciang khat mai ah hong pai tu uh hi. Innkuan ka teal sia pasal khat zawkciang khat mai ah hong pai tu uh hi. 15Pasal khat kiteal in a kiningkhiin vanhte taw kiman pa sia a innkuanpuite le a neisa theampo taw kihal tu hi, banghang ziam cile ama in a kiitakhuai mama maizumna Israel te tungah tungsak a ka thuciam paltan hi.
16A zing ciang zingtuungin Joshua in Israel te nam khat zawkciang nam khat mai ah a paisak ciang Judah nam kitealtuam hi. 17Ama in Judah namte, mai ah paisak a, phung khat zawkciang phung khat a paisak ciang Zerah bee le phung kitealtuam hi. Tua zawkciang ama in Zerah beeta sung innkuan khat zawkciang innkuan khat, mai ah a paisak le Zabdi ii innkuan kitealtuam hi. 18Tua zawkciang ama in Zabdi ii innkuan pan pasal khat zawkciang khat mai ah paisak a, Zabdi ii tupa, Carmi ii tapa Achan sia tealtuam hi. 19Joshua in ama mun ah, “Ka tapa awng Topa Israel te ii Pathian mai, hi sungah thumaan son in a pualaak in. Tu in na vawt teng hong son ta'n. Kei kung panin phualseal tu hanciam heak in,” ci hi.
20Achan in, “Topa Israel te ii Pathian tungah maw peu khi hi, tuaciang ka ngam tatna sia hi bang teng hi. 21Vanh ih mat te sungah Babylon te puantungsilh hoi mama khat, ngunn kilogramme nii tu khawng le khamh tawn kilogramme lang vaal ka mu hi. Tuate dei leilam ka hikom ka la hi. Ka tuipuan buk sungah kiphumin a ngunn teng sia a tawbel ah na mu tu hi,” ci in zo hi.
22Tua ahikom Joshua ii sawl pasal pawlkhat tai in tuipuan buk sung, tualai ah a kiningkhiin vanhte kiphumin om takpi a, ngunnte a taw nungbel ah om hi. 23Amate in tua vanhte puanbuk pan la in Joshua le Israel mi theampo ii kung Pathian mai ah lui uh hi. 24Joshua le Israel mi theampo in Achan, ngunnte, a puantungsilh, khamh tawn teng le Achan ii tapate, tanute, a khui, a laa, a tuu le a tuipuanbuk, tuaciang a neisa dang teng theampo man uh hi; tuaciang amate in tuate a vekpi in Ngimna Leikuam ah paipui uh hi. 25Joshua in, “Banghangin tazata ngimna ko tungah hong tungsak ni ziam? Topa in tu in nang ngim hong pia tu hi!” ci hi. Mi theampo in Achan sia suangtum taw deanglum hi; amate in a innkuanpuite le a neisa theampo zongh deangin haltum uh hi. 26Amate in ama luang tungah suangtum khawlpui khat seng uh hi, tuasia tu ni dongin om hi. Tua hu in tua mun sia Ngimna Kuam kici lai hi.
Tuasia ciang Topa a thinso nawn ngawl hi.
Currently Selected:
Joshua 7: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
Joshua 7
7
Achan ii Mawna
1A kisusia tu na khat pawpo Jericho pan a laak ngawl natu Topa ii thupiakna kizui ngawl hi. Achan a kici pasal khat in tua thupiak sia ni ngawl hi, tua ahikom Topa sia Israel te tungah a thin so hi. (Achan sia Carmi ii tapa, Zabdi ii tupa hi a, Zerah ii bee le phung, Judah nam sungah a kihel khat ahi hi.)
2Joshua in mihing pawlkhat Jericho pan Ai khua ah paisak hi, tua khuapi sia Bethel ii nisuana sangah om a, Bethaven taw kinai hi, tua munah ngam vil tu in sawl hi. Amate in a sawl teng a sep zawk uh ciang 3Joshua tungah hi bangin thu puak kik hi: “Ai khua sim natu in mihing theampo kuan kul ngawl hi. Pasal tulnii, tulthum khawng bek kuansak lel in. A sim tu in ngalkap hon bup puak heak in; a khua sia khuapi lian hi ngawl hi.” 4Tua ahikom Israel te 3,000 khawng in sim uh a, ahizong amate hong nungkin kik kul hi. 5Ai mite in amate sia khuapi kongpi panin suangkhuk pawlkhat omna dong uum uh a, mihing 36 khawng mual tung pan del suk in thatlum uh hi. Tuasia ciang Israel te sia a thin letna bo a, lau uh hi.
6Joshua le Israel lampuite hee a, a puansilh lai te baltham in, Topa ii Thuciamna Thingkuang mai ah leiliik uh a, khuangaina lakna in a lu tungah leivui kithe in, tua munah nitak sang dong lum uh hi. 7Tuaciang Joshua in, “Vaanglianpipa Topa awng! Banghang peuma in Jordan ngun hong kaantansak ni ziam? Amor mite khut sungah hong aap tu in maw? Hong mot tu in maw? Banghangin Jordan ngun langkhat ah om po ngawl ka na khu ziam? 8Tu in Israel te sia ngalmai pan nungkin zo ci leang bang son thei nawn tu khi ziam, Topa awng. 9Canaan mite le ngam sungah om midang theampo in hi thu za tu hi. Amate in hong kiim uum tu a, kote hong that siat tu hi. Tuasia ciangin nangma min kihuk natu in bang vawt tu ni ziam?” ci hi.
10 Topa in Joshua mun ah, “Thoto in! Banghangin hi bangin lei ah lum ni ziam? 11Israel te in mawna vawt zo hi! Amate ii let tu in ka thupiak, kei taw thukimna sia len ngawlin paltan zo hi. Suksiat tu in a kiningkhiin na pawlkhat amate in la zo hi. Amate in ngu a, tuate huvau iim in amate ii vanh taw koi khawm hi. 12Hi sia hu in Israel te in a ngalte nang zo ngawl hi. Tuate ii mai pan amate nungkin hi, banghang ziam cile amate mama sia tu in a lalcip tu in kinil zo hi! Laak ngawl tu in thu a kipiak vanhte na suksiat cip uh mateng no taw omkhawm nawn ngawl tu khi hi. 13Thoto in! Mipite thiansua in a, ka mai ah hong pai tu in kingingsak in. Zing ciang a kinging kholsa in a om natu son in, banghang ziam cile Kei, Israel ii Topa, Pathian in hi teng son tu ka nei hi: ‘Israel awng, suksiat tu a thu kong piak vanh pawlkhat la nu hi! Hi nate na suksiat uh mateng na ngalte na zo buatu uh hi.’ 14Tua ahikom zingsang ciangin amate sia nam khat zawkciang nam khat, mai ah a kipaipui tu sia son in. A nam ka teal sia phung khat zawkciang phung khat mai ah hong pai tu uh hi. A phung ka teal sia innkuan khat zawkciang khat mai ah hong pai tu uh hi. Innkuan ka teal sia pasal khat zawkciang khat mai ah hong pai tu uh hi. 15Pasal khat kiteal in a kiningkhiin vanhte taw kiman pa sia a innkuanpuite le a neisa theampo taw kihal tu hi, banghang ziam cile ama in a kiitakhuai mama maizumna Israel te tungah tungsak a ka thuciam paltan hi.
16A zing ciang zingtuungin Joshua in Israel te nam khat zawkciang nam khat mai ah a paisak ciang Judah nam kitealtuam hi. 17Ama in Judah namte, mai ah paisak a, phung khat zawkciang phung khat a paisak ciang Zerah bee le phung kitealtuam hi. Tua zawkciang ama in Zerah beeta sung innkuan khat zawkciang innkuan khat, mai ah a paisak le Zabdi ii innkuan kitealtuam hi. 18Tua zawkciang ama in Zabdi ii innkuan pan pasal khat zawkciang khat mai ah paisak a, Zabdi ii tupa, Carmi ii tapa Achan sia tealtuam hi. 19Joshua in ama mun ah, “Ka tapa awng Topa Israel te ii Pathian mai, hi sungah thumaan son in a pualaak in. Tu in na vawt teng hong son ta'n. Kei kung panin phualseal tu hanciam heak in,” ci hi.
20Achan in, “Topa Israel te ii Pathian tungah maw peu khi hi, tuaciang ka ngam tatna sia hi bang teng hi. 21Vanh ih mat te sungah Babylon te puantungsilh hoi mama khat, ngunn kilogramme nii tu khawng le khamh tawn kilogramme lang vaal ka mu hi. Tuate dei leilam ka hikom ka la hi. Ka tuipuan buk sungah kiphumin a ngunn teng sia a tawbel ah na mu tu hi,” ci in zo hi.
22Tua ahikom Joshua ii sawl pasal pawlkhat tai in tuipuan buk sung, tualai ah a kiningkhiin vanhte kiphumin om takpi a, ngunnte a taw nungbel ah om hi. 23Amate in tua vanhte puanbuk pan la in Joshua le Israel mi theampo ii kung Pathian mai ah lui uh hi. 24Joshua le Israel mi theampo in Achan, ngunnte, a puantungsilh, khamh tawn teng le Achan ii tapate, tanute, a khui, a laa, a tuu le a tuipuanbuk, tuaciang a neisa dang teng theampo man uh hi; tuaciang amate in tuate a vekpi in Ngimna Leikuam ah paipui uh hi. 25Joshua in, “Banghangin tazata ngimna ko tungah hong tungsak ni ziam? Topa in tu in nang ngim hong pia tu hi!” ci hi. Mi theampo in Achan sia suangtum taw deanglum hi; amate in a innkuanpuite le a neisa theampo zongh deangin haltum uh hi. 26Amate in ama luang tungah suangtum khawlpui khat seng uh hi, tuasia tu ni dongin om hi. Tua hu in tua mun sia Ngimna Kuam kici lai hi.
Tuasia ciang Topa a thinso nawn ngawl hi.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016