John 3
3
Jesus le Nicodemus
1Nicodemus a kici Jew te lampui khat om a, Pharisee pawlmi ahi hi. 2Zan khat Jesus kungah ama pai in, “Rabbi awng, nang sia Pathian ii sawl sya khat hi ci in kong he uh hi. Pathian in hong ompui buale, na vawt nalamdang laknate, kuama in vawt thei ngawl tu hi,” ci hi.
3Jesus in, “Thumaan hong son khi hi: niivei a suak kik buale, kuama in Pathian Ngam mu thei ngawl tu hi,” ci in zo hi.
4“Bangbangin mihing a khanthin sa khat sia niivei suak kik thei tu ziam? A nu ngil sungah tumin niivei suak kik thei ngawl het tu hi!” Nicodemus in ci hi.
5Jesus in “Thumaan hong son khi hi. Tui le Thaa taw a suak buale, Pathian Ngam sungah kuama tum thei ngawl tu hi. 6Nu le pate sung panin a suak mihing khat sia cii le sa mi hi a, ahihang Thaa sung panin a suak sia in thaa mi ahi hi. 7Note theampo na sua kik uh kul tu hi kong cina hangin, lamdang na sa heak in. 8Vui in a uukna po ah va hi; a vak ciang a nging na za hi, ahihang koisung pan hong pai a, koisung zuan ziam ci na he bua hi. Thaa taw a suak mihing simin, tuabang ma ahi hi,” ci in zo kik hi.
9Nicodemus in, “Bangbangin hi thu suak thei tu ziam,” ci in dongh hi.
10Jesus in, “Nang sia Israel ngamsung sya thupi khat na hi hi, hi thu tel ngawl ni ziam? 11Keima in nang tungah thumaan hong son khi hi: ka heak uhte kong son a, ka mu uhte hong ko khu hi, tua hi napi kuama in ko ii thupuak sia saang nuam ngawl nu hi. 12Hi leitung nate ii thu kong son ciangin, hong um ngawl nu hi, tua ahile vantung nate ii thu kong son ciang, bangbangin hong um thei thong tu nu ziam? 13Tuaciangin vantung pan a hong paisuk Mihing Tapa simngawl kuama vantung ah kaato ngeingawl hi,” ci in zo hi.
14Sennealngamsung thingkhuam tungah Moses ii taau ngul a khai bangma in Mihing Tapa zongh kikhai tu hi, #Mi 21:9 15tuasia in ama a umte theampo ii tawntung nuntakna a nga thei natu ahi hi. 16Pathian in leitung mite hong it mama ahikom, khat bek a nei a Tapa hong pia a, ama a um peuma in thi nawn ngawlin tawntung nuntakna a nga natu ahi hi. 17Banghang ziam cile Pathian in a Tapa sia leitung ii a thukhenpa tu hi ngawl a, a hunpa tu in leitung ah hong paisak hi.
18Tapa a umte thukhenna thuak ngawl hi; a um ngawlte ahile thukhenna a thuaksa hi zo hi, banghang ziam cile amate in, Pathian ii Tapa khat bek sia a um bua uh hi. 19Hisia in thukhenzia hi: khuavak sia leitung ah hong pai zo hi, ahihang mihingte in, khuavak sangin khuazing deizaw uh hi, banghang ziam cile amate ii ngamtatnate sia hi. 20A sia a vawt theampo in khuavak ngaimaw a, khuavak sungah hong pai ngawl tu hi, banghang ziam cile amate ii a tatsiatnate kilanghsak nuam ngawl hi. 21Ahihang thumaan a seamte in, amate ii ngamtatna sia Pathian thunitna ahi hunlam tua khuavak in a lak thei natu in khuavak sungah a pai hi.
Jesus le John
22Tua zawkciang, Jesus le a nungzuite in, Judea ngamkhen sungah hong pai uh a, tua munah amate taw hun zangh khawmin, tuiphumna pia hi. 23Salim pan a kikhuala ngawlna Aenon ah tui tam ahikom John in tui sungah tuiphumna pia hi. Mihingte in ama zuan uh a, tuaciang ama in, tuiphum hi. 24(Hisia in thong sungah John a kikhum ma hun ahi hi.)#Mt 14:3; Mk 6:17; Lk 3:19-20
25John ii nungzui pawlkhat in Jew te khat taw a zeksa kisilna huvau kam kinial uh hi. 26Tua ahikom amate John kungah pai in, “Syapa awng, Jordan ngun nisuana sangah nang taw a om ngei ama thu na sawson sia, na ciamtee lai ziam? Tu in ama zongh in, tuiphum a, a kuama po in, ama kung zuan tek uh hi!” ci hi.
27John in, “Pathian in a pia buale kuama in, bangma nga thei ngawl hi. 28‘Kei Messiah hi ngawl khi hi, ahihang ama mai ah, kei hong kipaisak khol hi’ ka ci ciang noma tatak ma keima ii tetti te na hi uh hi, #Jn 1:20 29Mo ahile zineipa ii neisa hi. Ahihang a kungah a ding thu ngai in a om zineipa ii lawmpa in zineipa aw a zaak ciangin a lungdam hi. Hisia in keima lungdamna a pawlcinna ahi hi. 30Ama hong thupi vaial tu a, kei sia thupi ngawl vaial tu khi hi,” ci in zo hi.
Vantung pan Hong pai Pa
31Tungsang pan hong pai sia in, a kuama theampo sangin, lian zaw hi. Leitung pan hong pai sia in, leitung neisa hi a, leitung nate thuson in nei hi. Ahihang vantung pan hong pai sia in, a kuama theampo ii tungsia ahi hi. 32Ama in a mu sate le a zaaksate son hi, ahihang ama ii thu hong puak sia kuama in saang ngawl hi. 33Ahihang ama ii thupuak a saang pawpo in Pathian thumaan hi, ci thu kipsak hi. 34Pathian ii sawlpa in, Pathian ii kammalte pau hi, banghang ziam cile Pathian in ama Thaa taw kidimsak hi. 35Pa in a Tapa it a, na theampo ama ii vaangletna sungah koi hi.#Mt 11:27; Lk 10:22 36Tapa a um pawpo in, tawntung nuntakna nei hi; Tapa ii thu a ni ngawl po sia nuntakna a nei buatu a, Pathian ii daan piakna nuai ah om lai tu hi.
Currently Selected:
John 3: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016