Abharuumi 10
10
1Abhahiiri bhaani kuimani, ndeenda kwa omutima gwani gonsego ega, Abhaisiraeri bhonsego bhatuuribhwe. Kiyo nkyo ndabhasabhira bhukongʼu ku Waryubha. 2Ndabhakeerya bheenyu ega, abhantu bhayo, bhaana ekituunyo okumutuna Waryubha, kora ego bhatamanyiri kya ego Waryubha areenda bhamutune. 3Bheeki bhataagwata enjira inú Waryubha arabharira abhantu okubha abhaheene, kwa okubha bhataaringa bhaimanyiri, kweki bhaatunanga okunyoora obhuheene bhwabho abheene, kwa enjira ya okugwata amaragiriryo ga Musa. 4Kiristu yaakunaanʼya amaragiriryo gonsego ga Musa, naho abhantu bhonsego bhanú bharamwikirirya weeki, bhabharirwe okubha abhaheene embere ya Waryubha.
Abhantu bhonsego bharatura okutuuribhwa
5Musa yaangʼoora eguru ya okubharwa okubha omuheene embere ya Waryubha, kwa enjira ya okugwata amaragiriryo, ega, “Omuntu unú arigwata gonsego ganú garagambwa mumaragiriryo, aribhanga areekara kwa okugwata gayo.”#10:5 Maaha mukitabho kya Abharaawi 18:5. 6Nawe, eguru ya okubharwa okubha omuheene embere ya Waryubha, kwa enjira ya eimani, Musa yaagamba ega, “Muteebhuurya mumitima gyenyu ega, ‘Niwi aratura okuriina okuhikira murwire?’” Okugamba ego, n-kya okumusabha Kiristu yeetuume mukyaro hanu. 7“Kasi ega, ‘Niwi aratura okwituuma hansi okuhikira mukyaro kya abhaku?’” Okugamba ego, n-kya okwenda okumuhyukya Kiristu. 8Nawe, kinú kiragambwa mu Mangʼoore Amarabhu niiga, “Eringʼana rya Waryubha riringi haangʼi na uuwe, riringi mumunwa gwaho, na mumutima gwaho.”#10:6-8 Maaha mukitabho kya Obhuhiituki bhwa Amaragiriryo 9:4, 30:12-14. Bhoono, eringʼana riyo, ndyo amangʼana ganú turaraarika eguru ya okumwikirirya Yeesu Kiristu. 9Amangʼana gayo niiga, hanú oraagambe kwa omunwa gwaho omwene ega, “Yeesu m-Mukuru,” na okwikirirya mumutima gwaho ega, Waryubha yaamuhyukya okurwa mubhaku, orituuribhwa na Waryubha. 10Omuntu akaamwikirirya Yeesu Kiristu kwa omutima gwaye gonsego, nho arabharwa okubha omuheene embere ya Waryubha. Akaagamba kwa omunwa gwaye ega, aramwikirirya, nho aratuuribhwa. 11Amangʼoore Amarabhu garagamba ega, “Omuntu wowonse unú aramwikirirya, atarisuuka.”#10:11 Maaha mukitabho kya Isaaya 28:16. 12Amangʼana gayo, garoorokya ega, kitariho ekisorooro gati ya Abhayahudi na bhanú bhataringi Abhayahudi. Ariho Omukuru oumwi ego, kubhantu bhonsego. Weeki m-muserenʼya bhukongʼu, kubhantu bhonsego bhanú bharamusabha. 13N-kya ego Amangʼoore Amarabhu garagamba ega, “Kira omuntu unú arasabha kwa okwisigira eriina rya Omukuru, arituuribhwa.”#10:13 Maaha mukitabho kya Joeri 2:32.
14Bhoono, abhantu bharatura egaki okumusabha unú bhataakamwikiriirye? Kweki bharatura egaki okumwikirirya, nyoore bhataakageegwiri amangʼana gaaye? Na bharatura egaki okwigwa amangʼana gaaye, nyoore bhataakaraarikiirwe? 15Kweki abhantu bharatura egaki, okugya okuraarika amangʼana gayo, nyoore bhataakatumirwe? N-kya ego Amangʼoore Amarabhu garagamba ega, “Okuhika kwa omuntu unú arareeta Amangʼana Amajomu, kuribha kurajomera abhantu!”#10:15 Maaha mukitabho kya Isaaya 52:7.
16Kora ego, etaringi ega, Abhaisiraeri bhonsego bheekirirya Amangʼana Amajomu gayo, abhaaru bhaagaanga. Omurooti Isaaya yaagamba ega, “Omukuru Waryubha, niwi unú yeekirirya amangʼana geetu?”#10:16 Maaha mukitabho kya Isaaya 53:1. 17Kwa ego, abhantu bharatura okumwikirirya Kiristu nyoore bheegwiri amangʼana eguru yaaye. Nawe, bharatura okwigwa nyoore amangʼana gayo garaaraarikwe kubheene.
18Mbe, nyoore niigo, tiga mbuurye ega, Abhaisiraeri bhataakageegwiri amangʼana gayo? M-maheene ega, bheegwa, kwa okubha Amangʼoore Amarabhu garagamba ega,
“Amangʼana gaabho gaanyaragana mukyaro kyonsego,
na amangʼana gaabho gakahika kora kubhuteero bhwa ekyaro.”#10:18 Maaha mukitabho kya Egijabhuri 19:4.
19Tiga mbuurye eribhuuryo erindi kweki, hanú Abhaisiraeri bheegwa amangʼana gayo, bhataagamanya? M-maheene ega, bhaagamanya, kwa okubha eribhaga rya Musa, Waryubha yaabhakeerya Abhaisiraeri ega,
“Ndibhakora mubhamaahire erihari
abhantu bhanú bhataringi abhantu bhaani.
Na abhantu bhanú bhatamanyiri kyokyonse,
ndibhakora mubhenga murabhajimira bhukongʼu.”#10:19 Maaha mukitabho kya Obhuhiituki bhwa Amaragiriryo 32:21.
20Kweki, omurooti Isaaya yaagamba amangʼana ga Waryubha kwa obhuhaari ega,
“Abhantu bhanú bhatakuntuna,
mbo bhanduuji.
Na abhantu bhanú bhatakubhuuririrya amangʼana gaani,
mbo niyorokerye kubheene.”#10:20 Maaha mukitabho kya Isaaya 65:1.
21Nawe, eguru ya Abhaisiraeri, Waryubha yaagamba ega,
“Orusiku orugima, neendanga okugwatana na abhantu bhaani,
nawe, m-bantu bhanú bhataringi abheegwa,
kweki m-bantu bhanú bharanjeema.”#10:21 Maaha mukitabho kya Isaaya 65:2.
Currently Selected:
Abharuumi 10: Kabwa
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
