Amakorwa ga Abhatumwa 8

1-2Hanú bhaamara okumwita, abhasaaja bhanú bhaamwigwanga Waryubha, bhakamubhiika Sitefano, kimwi bhakamukuurira bhukongʼu.

Orusiku runú Sitefano yeetwa, abheekirirya bha mumugi gwa Yerusaremu, bhakaamba okunyankibhwa bhukongʼu. Abhaaru gati yaabho bhakakenya, bhakanyaragana, mukyaro kyonsego kya Yudea na Samaria. Abhatumwa bha Yeesu abheenego, mbo bhaasaaga Yerusaremu. 3Eribhaga riyo, Sauri wonse akaamba okusikya abheekirirya bha Yeesu. Weeki yaasohanga muginyumba gyabho, arangʼuura abhasaaja na abhakari, akabha arabhabhoha mwigereja.

Firipo areehigirya amangʼana ga Yeesu mumugi gwa Samaria

4Abheekirirya bhanú bhaanyaragana, bhakabha bhareehigirya abhantu Amangʼana Amajomu ga Yeesu, kira hanú bhaagyanga. 5Firipo#8:5 Firipo. Firipo yaaringa oumwi wa abhagabhi bha ebhyakurya muhungati bharya bhaaringa bhasorerwe. Maaha mukitabho kya Amakorwa ga Abhatumwa 6:5. wonse, akahiringita mumugi gwa Samaria, akaamba okubharaarikira abhantu bha muyo, eguru ya Kiristu Omutuurya. 6Emiganda gya abhantu, bhaaringa bharamwitegeerera kwa obhwangarariri bhukongʼu, bheegwanga na okurora ebhimanyiiriryo bhinú yaaringa arakora. 7Yaaringa arakenyia ebhihwi ebhibhiibhi okurwa kubhantu abhaaru. Ebhihwi bhiyo, bhyaringa bhirabharwa-mo enu bhirakuura kwa eriisi erinene. Na yaaringa arahwenʼya abharweri bha omujimu abhaaru na abhabheeru abhaaru. 8Kwa ego, bhukabha-ho obhujomerwa bhukongʼu mumugi gurya.

Petero aramukemera Simoni omuturutumbi

9Mbe, mumugi gwa Samaria guyo, yaaringa-mo omuturutumbi umwi. Omuturutumbi uyo, yaabhirikirwanga Simoni. Kwa eribhaga eritambi, yaaruguuryanga abhantu bha omugi guyo, kwa obhuturutumbi bhwaye. Yeegungyanga ega, weeki m-muhika. 10Abhantu bhonsego, abhake kora abhakuru, bhaaringa bharamwitegeerera kwa obhwangarariri bhukongʼu, enu bharagamba ega, “Omuntu unu, ngʼo obhuturo bhwa Waryubha, bhunú bhurabhirikirwa ega, ‘Obhuturo Obhukuru bhwa Waryubha’!” 11Abhantu bhayo, bhaagendereryanga okumwitegeerera, kwa okubha yaabharuguurya kwa obhuturutumbi bhwaye, kwa eribhaga eritambi.

12Nawe, Firipo hanú yaabharaarikira amangʼana amajomu eguru ya obhukama bhwa Waryubha, na eguru ya eriina rya Yeesu Kiristu, bhakeekirirya. Kimwi abhasaaja na abhakari, bhakabhatiijwa. 13Kora Simoni omwene akamwikirirya Yeesu, akabhatiijwa, akabha arasoorana na Firipo kira ahasi. Hanú yaarora ebhika na ebhimanyiiriryo ebhinene bhinú Firipo yaakoranga, akaruguura bhukongʼu.

14Mbe, abhatumwa bhanú bhaaringa Yerusaremu erya, hanú bheegwa ega, abhantu bha Samaria bheekiriirye eringʼana rya Waryubha, bhakabhatuma-yo Petero na Yoana. 15Hanú bhaahika, bhakabhasabhira abheekirirya bhayo, naho bhanyoore Omutima Omurabhu. 16Eribhaga riyo, ataaringa-ho kora oumwi gati yaabho, unú yaaringa yeetuumiirwe na Omutima Omurabhu. Bhaaringa bhabhatiijiibhwe kwa eriina rya Omukuru Yeesu eryenego. 17Petero na Yoana bhakabhatuurira amabhoko abhantu bhayo, bhakanyoora Omutima Omurabhu.

18Simoni omuturutumbi urya, hanú yaarora ega, abhantu bhanyooreri Omutima Omurabhu kwa okutuurirwa amabhoko ga abhatumwa, akabhareetera egimbirya Petero na Yoana, aragamba ega, 19“Mungʼaane oni nonse obhuturo bhuyo, naho kira omuntu unú ndaamutuurirenga amabhoko gaani, anyoore Omutima Omurabhu.”

20Nawe, Petero akamukyukya ega, “Egimbirya gyaho gisike hamwi na uuwe, kwa okubha oramanya ega, omutuho gwa Waryubha#8:20 Omutuho gwa Waryubha. Omutuho gwa Waryubha gunú guragambwa hanu, m-Mutima Omurabhu wa Waryubha. guratuuka kwa egimbirya! 21Uuwe, otarisanga ahasi hohonse kumirimu ginu gya Waryubha, kwa okubha omutima gwaho gutaringi gwa heene mumeeso gaaye. 22Bhoono, otige obhubhiibhi bhwaho na omusabhe Omukuru Yeesu, hamwi akaakwabhira ameetegeerero amabhiibhi mumutima gwaho. 23M-buheene ndakurora, wijwiri orungʼeera bhukongʼu kya obhururu bhwa endurwe, na kweki oringi omubhohwa wa obhusarya.” 24Kimwi Simoni wonse akamukyukya ega, “Bheenyu munsabhire ku Mukuru Yeesu, naho ritannyoora kora eringʼana erimwi kugayo mugambiri.”

25Petero na Yoana hanú bhaamara okuruusya obhwimiririri eguru ya Omukuru Yeesu, na okwihigirya abhantu bha omugi guyo amangʼana gaaye, bhakaamba orugendo rwa okuhunjuka mumugi gwa Yerusaremu. Eribhaga bhaaringa bharahunjuka, bhaahitiranga mubhijiji ebhyaru bhya Abhasamaria bhararaarikira abhantu Amangʼana Amajomu gayo.

Firipo na omukuru umwi wa ekyaro kya Ethiopia

26Mbe, maraika wa Omukuru Waryubha akakeerya Firipo ega, “Imuka ogende orubhaara rwa taragweta ohitire enjira inú ereetuuma okurwa mumugi gwa Yerusaremu, erabhata mumugi gwa Gaja.” Enjira iyo, erahita kukibhara. 27Nho, Firipo akeemuka, akaamba orugendo kunjira iyo. Hanú yaaringa aragenda, akasikana na omukuru umwi wa ekyaro kya Ethiopia. Omukuru uyo, yaaringa omujigaru.#8:27 Omujigaru. Kuginsiku giyo, abhasaaja bhanú bhaasorwanga okukora emirimu nyabhurebhe, owa omukama, bheehwanga. Weeki, yaaringa omwimiririri omukuru wa egimbirya wa Kandake, omukama omukari wa ekyaro kya Ethiopia. Yaaringa agiiri Yerusaremu okumusyengera Waryubha. 28Na kwibhaga riyo, yaahunjukanga iika, yeekeeri mumukokoteeni gwaye gwa okurutwa na egifaraasi, enu arasoma mukitabho kya omurooti Isaaya.

29Omutima Omurabhu akamukeerya Firipo ega, “Genda osuntarire omukokoteeni guyo, ogendanʼye nago.” 30Firipo akaikenyerera. Hanú yaahika, akamwigwa, arasoma mukitabho kya omurooti Isaaya. Nho, Firipo akamubhuurya ega, “Amangʼana gayo orasoma, oragamanya?” 31Wonse akamukyukya ega, “Ndatura egaki okumanya, nyoore atariho omuntu wa okunyonjoorera?” Kimwi omukuru uyo, akamugenihya Firipo ariine mumukokoteeni gwaye bheekare hamwi. 32Amangʼoore Amarabhu ganú omukuru uyo yaaringa arasoma, n-ganu,

“Yaakangatibhwa kya eringʼondi rinú riragya okugoogwa.

Yaaringa akiriri kiri, kya ego eringʼondi rirakira hanú rirakebhwa amabhuri.

33Bhaamujabhura na bhaamubhuturira ekiina bira obhuheene.

Atariho omuntu unú aratura okuhairira orwibhuro rwaye,

kwa okubha yeetirwa mukyaro hanu.”#8:32-33 Maaha mukitabho kya Isaaya 53:7-8.

34Omujigaru uyo, akamubhuurya Firipo ega, “Ndasabha unkeerye, amangʼana ga omurooti gayo, ni-guru yawi? Ni-guru yaaye omwene, kasi ni-guru ya omuntu oundi?” 35Nho, Firipo akaamba na amangʼoore gayogayo okumwihigirya Amangʼana Amajomu eguru ya Yeesu.

36Eribhaga bhaaringa bharagendererya na orugendo kunjira iyo, bhakahika ahasi hanú haana amanji. Omujigaru uyo, akakeerya Firipo ega, “Maaha, amanji n-ganu! N-kintu-ki kinú kirandibhira okubhatiijwa?” [37Firipo akamukeerya ega, “Oraamwikirirye Yeesu Kiristu kwa omutima gwaho gonsego, oratura okubhatiijwa.” Wonse akamukyukya ega, “Ndeekirirya ega, Yeesu Kiristu ngʼo Omwana wa Waryubha.”]#8:37 Amangʼana mumabhano ganu […] gataringi mumangʼoore agandi ga akare aga Ekiyunani. 38Kimwi akeemirirya omukokoteeni. Nho, bhabhiri bhonsego bhakeetuuma okurwa mumukokoteeni, bhakasoha mumanji, Firipo akamubhatiija. 39Hanú bhaarwa mumanji, Omutima Omurabhu wa Omukuru Waryubha akamusaka Firipo. Omujigaru uyo, ataamurora kweki, nawe, akagendererya na orugendo rwaye, ajomeerwe. 40Firipo akeetakya aringi mumugi gwa Ajota, yaahitanga mumigi gyonsego araraarika Amangʼana Amajomu ga Yeesu, okuhikira mumugi gwa Kaisaria.

Currently Selected:

Amakorwa ga Abhatumwa 8: Kabwa

Highlight

Copy

Compare