Amakorwa ga Abhatumwa 27

Pauro arahirwa mumugi gwa Ruumi

1Eribhaga erindi ekaamurwa ega, tugye kwa obhwato mukyaro kya Itaaria. Pauro na abhabhohwa abhandi, bhakagwatibhwa kumukuru umwi wa abhasirikare. Omukuru uyo, yaabhirikirwanga Yurio, wa omuganda gwa abhasirikare gunú gwabhirikirwanga ega, “Omuganda gwa Kaisari Agosto.” 2Tukariina mubhwato bhunú bhwarwanga mumugi gwa Aduramitio. Obhwato bhuyo, bhwaringa bhureenda okugya kubhigobho bhinú bhiringi kumurambo gwa ekyaro kya Asia. Tukaamba orugendo rwetu hamwi na Aristariko, omuntu wa okurwa mumugi gwa Tesaronike mukyaro kya Makedonia.

3Ejo wendeko, tukagobha kumurambo gwa mumugi gwa Sidoni. Yurio akamukorera Pauro amajomu, kwa okumwikiririrya agye okumaahana na abhasaani bhaaye, naho bhamuhaane-ko ebhintu bhinú yeendanga. 4Okurwa erya, tukahita embarika wa eriginga rinú ryabhirikirwanga Kipuro, kwa okubha omuyaga gwaringa omuhaari bhukongʼu. 5Tukaambuka enyanja, orubhaara rwa ekyaro kya Kirikia na Pamufiria, tukahika mumugi gwa Miira mukyaro kya Rikia. 6Eyo, omukuru wa abhasirikare uyo, akanyoora obhwato bhwa mumugi gwa Arekisandiria. Obhwato bhuyo, bhwagyanga Itaaria, kimwi akaturiinʼya muyo.

7Tukagya ngʼorangʼora kwa eribhaga rya eginsiku eginjaru na kwa enyanko bhukongʼu, tukahika haangʼi na omugi gwa Nido. Hanú tweendanga okuhita, omuyaga omuhaari gukaturibhira, gukakora twinaare orubhaara rwa taragweta rwa eriginga rya Kirete, haangʼi na kumusoma gunú gwabhirikirwanga, Sarimone. 8Tukabharama embarika kwa enyanko bhukongʼu, tukahika ahasi hanú haabhirikirwanga ega, “Ebhigobho Ebhijomu,” haangʼi na omugi gwa Rasea.

9Twaringa tumariri eginsiku eginjaru kunyanja. Kwibhaga riyo orugendo rwaringa rwa engʼanga, kwa okubha ryaringa eribhaga rya omuyaga omuhaari na embeho.#27:9 Kwa okubha ryaringa eribhaga rya omuyaga omuhaari na embeho. Ekiyunani kiragamba ega, kwa okubha orusiku rya okwiyima ebhyakurya rwaringa rumariri okuhita. Orusiku ruyo rwaringa rurakoreka kumweri gwa kenda kasi gwa ekumi. Kumyeri giyo enyanja yaaringa erasarika bhukongʼu. Ekakora Pauro akabhakemera abharikyaye bhayo ega, 10“Bhamure, ndarora ega, orugendo rwetu runu, rwakatureetere engʼanga kubhwato, kumijigo na kubheetu abheene.”

11Nawe, omukuru wa abhasirikare uyo, ateekirirya obhutongeri bhwa Pauro, akarora ega, bhutaana obhwera, akeekirirya amangʼana ga omugobhi wa obhwato na omwene obhwato. 12Mbe, ekigobho kirya bhaaringa-ko, kitaaringa na omweya omujomu gwa okwikara, kwibhaga rya embeho enduru. Abhantu abhaaru gati yaabho bhakeekiriranʼya okwimuka erya, bhagye okwikara Foinike. Foinike n-kigobho kinú kyaringa kwiginga rya Kirete, kyaringa orubhaara rwa goosi ya bhuturira-ryubha na taragweta ya bhuturira-ryubha.

Pauro na abharikyaye bharanyanka munyanja

13Mbe, omuyaga omujomu gukaamba okuhuuta, okurwa orubhaara rwa taragweta. Ekakora abheene obhwato bhakanye ega, bharatura okuhikira ameetegeerero gaabho. Kimwi bhakeeha enanga, bhakagendererya na orugendo rwabho, bhakabharama na omurambo gwa eriginga rya Kirete. 14Nawe, eribhaga ekego, ekiibhumbe ekinene kinú kyabhirikirwanga “Eurakiro,”#27:14 Eurakiro. Ensonga yaaye niiga, omuyaga gwa taragweta. kikatiimuka okurwa kwiginga rya Kirete. 15Ekiibhumbe kiyo, kikabha kiratematema orubhaara rwa obhwato, tukasakya okusongana nakyo, nawe kikatuhiga. Tukatiga kituhire bhuribha.

16Tukahita enyuma ya eriginga eriike rinú ryabhirikirwanga Kauda, kikaturibhira hake ekiibhumbe kiyo. Hayo, tukanagya kwa enyanko, okuhyura obhwato bhwa okutuurya abhantu, bhunú bhwaringa bhurahiringitibhwa na amanji. 17Hanú abhakori bha emirimu bha mubhwato bhaamara okubhusohya munsi, bhakeenaarya obhwato bhonsego orugoye, bhakabhoha bhukanaga. Bhoobhohanga ega, bhakeegwatirye mumusenyi gwa enyanja ya ekyaro kya Ribhia. Okoobhoha kuyo, kukakora bhakeetuumya amatanga, bhakatiga obhwato bhusukumwe na ekiibhumbe.

18Amabhooka gakagendererya okutema obhwato bhuyo kwa eginguru. Ejo wendeko, abhakori bha emirimu bhayo, bhakaamba okwesa emijigo munyanja. 19Orusiku rwa kasatu, bhakaamba okwesa ebhintu bhya mubhwato kwa amabhoko gaabho abheene. 20Gikahita eginsiku eginjaru eryubha na eginjota bhitakurobhoka, na enyanja ekabha eragenderya okusarika. Ekakora tukwe omutima ega, tutakuhona.

21Eginsiku eginjaru hanú gyahita bira okurya ekintu, Pauro akeemirira gati yaabho, akagamba ega, “Bheenyu abhasaaja, mweenderwanga okunyigwa, na okutiga okwimuka okurwa Kirete erya. Nyoore mukaanyigwiri, ganu gonsego gataari garatunyoora. 22Bhoono ndabhakomererya ega, mutakwa omutima, kwa okubha atariho kora oumwi weenyu unú araakwe. Nawe obhwato bhunu mbo bhuraanyamuke. 23Ndagamba ego, kwa okubha oni ngʼ-wa Waryubha na ngʼo ndasyengera. Obhutiku bhwa reero maraika waaye yaanyibhukiiri, 24yaankeerya ega, ‘Pauro tiga okoobhoha! Oreenderwa okwimirira embere ya Kaisari. Na omanye ega, Waryubha aribhatuurya kwa eriruguto ryaye, bhonsego bhanú muringi hamwi kurugendo.’ 25Mbe bhoono, oni nonse ndabhakeerya ega, mutakwa omutima! Oni ndeekirirya ega, ganú Waryubha yaankeererye, garikoreka. 26Nawe, twakasukumirwe kwiginga nyabhurebhe.”

Pauro na abharikyaye bhareetuurya

27Tukamara eginsiku ekumi na ena, turasukumwa na omuyaga omuhaari okugya enu na enu, munyanja ya Adiria. Orusiku rwa ekumi na ena ruyo, obhutiku gati, abhakori bha emirimu bha obhwato, bhakeeyigwa muna bharingi haangʼi na ekyaro ekyomu. 28Kwa ego, bhakarenga obhutambi bhwa amanji, bhakanyoora amakubha mirongo ebhiri. Kimwi bhakasuntara embere hake, bhakarenga kweki, bhakanyoora amakubha ekumi na gataanu. 29Bhakoobhoha ega, obhwato bhukeetemeri kumagina, ekakora bhakeemirira, bhakarekera eginanga ena mumanji, enyuma ya obhwato. Kimwi bhakasabha bhukye bhwangu.

30Abhakori bha emirimu bha obhwato bhayo, bhakeenda okwibhisa bhatige obhwato. Kwa ego, bhakeetuumya mumanji obhwato bhwa okutuurirya abhantu, bhakeekorya ega, bhararekera eginanga egindi, orubhaara rwa embere rwa obhwato. 31Rumwigo, Pauro akakeerya omukuru wa abhasirikare uyo, hamwi na abhasirikare bhaaye ega, “Abhakori bha emirimu bhanu, nyoore bhataatigare mubhwato munu, mutakuhona!” 32Kwa ego, abhasirikare bhayo, bhakabhutura egingoye ginú gyaringa gibhoheri obhwato bhwa okutuurirya abhantu bhuyo, bhakabhutiga bhugegwe na amanji.

33Hanú bhwaringa haangʼi okukya, Pauro akaamba okubhakomererya abharikyaye bhayo, bharye ebhyakurya aragamba ega, “Reero n-dusiku rwa ekumi na ena, okurwa mugwatwe na enkubhi na bira okurya ekintu. 34Bhoono, ndabhakomererya murye, naho mutakwa na omweko. Murye, kwa okubha kora orutuukya rwa kumutwe gwa oumwi weenyu rutaribhura.”

35Hanú yaamara okugamba ego, akagega omukaate, akamukumya Waryubha embere yaabho bhonsego, akagusuunura, akaamba okurya. 36Nho bhonsego bhakaterema, bhakaamba okurya. 37Bhonsego bhanú twaringa mubhwato bhuyo, twaringa muna magana gabhiri, mirongo muhungati na esansabha (276). 38Hanú bheeguta, bhakeesa egingano munyanja, naho okusuuhya obhurito bhwa obhwato.

39Nyenkyo, abhakori bha emirimu bha mubhwato bhayo, bhataamanya ekyaro kirya, nawe bhaarora omusoma na omweya gwa okugobha kumurambo. Bhakaamura okugya okugobhya eyo obhwato bhwabho nyoore ekaaturikeeni. 40Ego, bhakabhutura egingoye gya eginanga, bhakagitiga munyanja. Kweki bhakanyoonyoogya egingoye ginú gyaringa gibhoheri egingai gya okugenderya obhwato. Bhakatimbya eritanga eriike embere ya obhwato, naho riijurye omuyaga, bhakagya kumusoma. 41Nawe, obhwato bhuyo hanú bhwasuntara embere hake, bhakahika mukiyunga. Orurimi rwa obhwato rukeesindirira mumusenyi kwa eginguru, bhukaangira-mo. Engobhero ekatemwatemwa na amabhooka, okuhikira ekaamba okubhaaruka mabhaara mabhaara.

42Kimwi, abhasirikare bhakeenda okwita abhabhohwa bhonsego, naho bhataaja okwerema bhatoroke. 43Nawe, omukuru wa abhasirikare uyo, yeendanga okumutuurya Pauro, kwa ego, akabharibhira bhatakora ego. Akaamura ega, bhanú bharanagya okwerema, bheereme okuhikira kumurambo, 44na abhandi bhanú bhatamanyiri okwerema, bhagwate egimbaau na ebhintu ebhindi bhya obhwato. Kwa okukora ego, abhantu bhonsego bhakahika kibhara abhahoru.

Currently Selected:

Amakorwa ga Abhatumwa 27: Kabwa

Highlight

Copy

Compare