Amakorwa ga Abhatumwa 25

Pauro embere ya omwanangwa Fesito

1Eribhaga Fesito yaaringa amariri eginsiku esatu ego gya obhutungi mukyaro kya Yudea, akarwa mumugi gwa Kaisaria, akariina okugya mumugi gwa Yerusaremu. 2Eyo, abhasyengeri abhakuru na abhakaruka bha Ekiyahudi abhandi, bhakamuseeta bhakamukeerya gonsego ganú bhaamujongeranga Pauro. Bhakabha bharakomererya bhukongʼu 3ega, abhaserenʼye kwa okubhahunjukirya Pauro Yerusaremu hayo. Bhaamukomereryanga kwa okubha bhaaringa bhakoreri eniku kweki ya okumwitira kunjira. 4Fesito akabhakyukya ega, “Pauro araangararirwa Kaisaria erya, na oni omwene ndahunjuka-yo bhwangu hanu. 5Kwa ego, tugende hamwi na abhakuru bheenyu abhandi, bhagye bhamujongere eyo, nyoore yaasarya eringʼana ryoryonse.”

6Fesito hanú yaamara okwikara nabho, kwa muna eribhaga rya eginsiku munaane kasi ekumi, akahiringita okugya Kaisaria. Ejo wendeko, akaraarika eribharaja, akeekara kukitumbi kyaye kya okubhuturira ekiina, akaamura ega, Pauro areetwe. 7Pauro hanú yaahika hayo, Abhayahudi bhanú bhaaringa bharwiri Yerusaremu, bhakeemirira kwa okumwinaara, bhakaamba okumujongera amangʼana amaaru amarito. Nawe, bhaatamwa okoorokya obhuheene bhwa amangʼana gayo.

8Nho, Pauro wonse akaamba okwibhagirira, ega, “Oni ntaasarya eringʼana ryoryonse eguru ya amaragiriryo ga Abhayahudi, kasi eguru ya erisyengerero rya Waryubha, kasi eguru ya Kaisari.”#25:8 Kaisari. Maaha eringʼana rinu mu Moonjooro eguru ya Amangʼana Amakongʼu.

9Fesito, kwa okwenda okwijomya ku Bhayahudi, akamubhuurya Pauro ega, “Oreekirirya okugya Yerusaremu, obhuturirwe ekiina eyo, embere yaani, kumangʼana gayo?”

10Pauro akamukyukya ega, “Nimiriiri gati ya abhabhuturi bha ekiina bhanú bhaasorwa na Kaisari, na nho hanu ndeenderwa mbuturirwe ekiina. Uuwe omwene omanyiri bhujomu ega, ntaabhasarirya Abhayahudi ekintu kyokyonse. 11Mbe bhoono, nyoore naasarya eringʼana rinú rireenderwa nkwe, ntakwanga okukwa. Nawe, nyoore amangʼana ganú Abhayahudi bhanu bharanjongera gataringi ga maheene, atariho unú aranagya okuntuura mumabhoko gaabho! Ndasabha ega, amangʼana ganu gabhuturirwe ekiina na Kaisari omwene!”

12Mbe, Fesito hanú yaamara okuhaira na abhantu bha eribharaja, akaraarika ega, “Osabhiri ega, Kaisari ngʼo akubhuturire ekiina. Mbe bhoono, oragya ku Kaisari!”

Omwanangwa Fesito aramutonderaomukama Herode Agiripa eguru ya Pauro

13Hanú gyahita eginsiku nkego, omukama Herode Agiripa#25:13 Herode Agiripa. Maaha Herode Agiripa wa kabhiri mu Moonjooro eguru ya Amangʼana Amakongʼu. hamwi na Bhenike omuhara waabho, bhakahika Kaisaria, naho okumukeeranʼya omwanangwa Fesito. 14Bheekara hayo, eginsiku eginjaru. Orusiku rumwi, Fesito akamutondera omukama Agiripa amangʼana eguru ya Pauro, aragamba ega, “Aringi hanu omuntu oumwi, yaatigwa mwigereja na omwanangwa Feriki. 15Hanú naaringa Yerusaremu, abhasyengeri abhakuru, hamwi na abhakaruka bha Ekiyahudi, bhaankeerya amangʼana ganú bhaaringa bharamujongera. Bhakansabha ega, mmubhuturire ekiina. 16Nkabhakyukya ega, kubheetu Abharuumi, tutakubhuturira ekiina omuntu atareebhagirira embere ya abhajongeri bhaaye. 17Kwa ego, nkahunjuka hanu, hamwi na abhajongeri bha Pauro bhayo. Ejo wendeko, ntaatigita, nkeekara kukitumbi kyani kya okubhuturira ekiina, nkaamura ega, Pauro areetwe. 18Hanú yaareetwa, abhajongeri bhaaye bhakeemirira, bhakaamba okumujongera, nawe amangʼana ganú bhaamujongera, gataaringa amabhiibhi kya ego naakanyanga. 19Bhaaringa bharahakaananʼya na Pauro eguru ya edini yaabho abheene, na eguru ya omuntu oumwi unú yaabhirikirwanga Yeesu. Omuntu uyo, yaamara okukwa, nawe Pauro weeki arakomererya ega, m-muhoru. 20Na oni, ntaamanya kya ego nkaakoreri okwikomya obhuheene bhwa amangʼana gayo. Mbe, nkamubhuurya Pauro nyoore akeenderi okugya mwibharaja rya Yerusaremu erya, eguru ya amangʼana ganu. 21Nawe, Pauro akasabha ega, ekiina kyaye kiyo, kibhuturirwe na Kaisari. Kwa ego, nkaamura yaangararirwe, okuhikira hanú ndimuhira eyo.”

22Nho, Agiripa akakeerya Fesito ega, “Oni nonse, nkeenderi okumwitegeerera omuntu uyo.” Fesito akamukyukya ega, “Wakamwitegeerere ejo.”

Pauro arareetwa embere ya omukama Agiripa

23Hanú bhwakya, Agiripa hamwi na Bhenike, bhakaaja kwa okwiheema bhukongʼu. Bhakasoha mukinyumba kya eribharaja, hamwi na abhakuru bha abhasirikare, na abhakuru bha mumugi. Kimwi omwanangwa Fesito akaamura, Pauro akareetwa. 24Mbe, Fesito akagamba ega, “Omukama Agiripa, na bheenyu bhonsego bhanú muringi hamwi na bheetu hanu, muramurora omuntu unu! Egihamati gyonsego gya Abhayahudi bha Yerusaremu na Kaisaria hanu, bhanyenderi mbabheere okumubhuturira ekiina, enu bharakora ekituri ega, atakwenderwa agendererye okubha omuhoru.

25“Nawe oni naarora ega, atakoreri ekintu kyokyonse kinú kiraakore yeetwe. Na kwa okubha yaansabha ega, amangʼana ganu gabhuturirwe ekiina na Kaisari, naamura ega, ahirwe mumugi gwa Ruumi. 26Oni ntamanyiri obhuheene bhobhonse eguru ya omuntu unu, bhwa okumungʼoorera omutungi weetu omukuru. Kwa ego, mmureeteri embere yeenyu hanu, ekinene kuuwe omukama Agiripa, naho hanú turaamare obhwikomya bhunu, nnyoore ekintu kya okungʼoora eguru yaaye. 27Oni ndarora ega, etaringi bhwaheene, okuhira eyo omubhohwa, bira okoorokya amangʼana ganú bharamujongera.”

Currently Selected:

Amakorwa ga Abhatumwa 25: Kabwa

Highlight

Copy

Compare