RUTHAX 1
1
Elimaliet Hu Haktiex Mawbax
1Baux yam kwang cao prawng see haktiex yam an, sibhawm praix lih koe daux meung Isarelax heue. Simex tix kaux khaing veng Bieliehiem meung Yudax, viex moeng mai kawn simex tix ra kaux hu ot meung Mawbax heue. 2Ceu kaux nawh mawh Elimaliet, ceu kaux moeng nawh mawh Nawmix, ceu kaux kawn simex nawh ra kaux mawh Mahalon mai Khilon, kix mawh ru Epharax pa ot ka daux veng Bieliehiem meung Yudax mai kix hu haktiex Mawbax mai ot tan heue. 3Khaix an Elimaliet mex Nawmix hoik yum, deuk moeng nawh mai kawn simex nawh ra kaux heue. 4Kawn simex nawh ra kaux teei ti moeng bun haktiex Mawbax, ceu kaux kiex mawh Awrapax mai Ruthax, kix ot tan kao num. 5Khaix an Mahalon mai Khilon yum khawm ra kaux, Nawmix ang lai koe mex koe kawn heue.
Ruthax Mai Nawmix
6Nawmix jah ti deeh ing mai mun tix khankiex khaing meung Mawbax, mawh kheu mhong nawh yuh nin daux Meung Mawbax, Siyiex hoek ti kia ngien mai tawx pa ih son pui Nawh. 7Mawh kheu nan nawh lih khaing dee ot tix tau mai mun tix khawm ra kaux mai lih hu krax, sonsang deeh ing ka meung Yudax. 8Nawmix ah nin ka mun tix khawm ra, “Deeh ing ka nyiex miex tix, kaux mawx kaux an, kieh Siyiex koe krax caux rhawm ka piang pax, awm hoik yuh pax bwanson ka piang pui yum mai ka piang aux heue.” 9“Kieh Siyiex teem ka piang pax, sonsang yaox pax ti laux lee tix, daux nyiex mex khraox tix, kaux mawx kaux an.” Khaix an nawh ngheet ka kiex mai kiex yiiem riag heue. 10Mai kiex deeh ah nin ka nawh, “Yiex tak deeh ing tau mai maix ka ceu pui maix khankix tete heue.” 11Nawmix deeh ah nin, “Kawn bun aux eue, deeh ing heue, pax sang ing tau mai aux yuh ka mawx? mawh kawn koe kawn simex daux vaig aux, sonsang mawh mex pax lie?” 12“Kawn bun aux eue, deeh veeh ti ing mai hu daux krax sang hu pax, mawh kheu aux hoik kuad, ang lai baox khaw ti koe mex, phan aux ah kawn koe krax pa keud pot jun pot tix mai phan aux baox koe mex, ka daux sawm in mai baox keh kawn simex kawx, 13mawh sang pon pau pax tom hoik ting lhaong kix lie? mawh kawn sang pon krox jun pax tix ang koe mex lie? Kawn bun aux eue, paw yuh nan liak. Au pon pa nu pa cien son pax, ceu an kied mawh pa kin pa nu ka rhawm aux, taix Siyiex hoik yuh ka aux tom hoek mee in heue.” 14Khaix an kiex baox yiiem riag, Awrapax ngheet ka Nawmix mai deeh ing, viang mawh nan Ruthax kawn koe rhawm ti ot mai Nawmix heue. 15Mai Nawmix ah nin, “O maix hoik deeh ing ka pui ceu tix mai ka siyiex tix, deeh ing hawt o maix heue.” 16Viang mawh nan Ruthax pawk ah nin,
“Paw lai krai lox sonsang
prah aux maix,
phan ang mawh nan
sonsang deeh ing aux,
can dee hu maix,
aux tak sang hu,
pan maix dee mawx,
aux tak paung tan,
ceu pui maix tak mawh
ceu pui aux,
Siyiex maix tak mawh
Siyiex aux heue.
17Yum maix dee mawx
aux tak yum tan,
mai sipaung aux tan,
lheu khaing krax yum
phan aux gwieh tix khaing maix
kieh Siyiex yuh pa nie
lheu khaing an ka piang aux heue.”
18Yam yaox Nawmix
ka hoik tat Ruthax rhawm tix
sonsang hawt nawh,
nawh yawg tix ka heue.
19Khaix an kiex lih hu mai hoek ka veng Bieliehiem. Yam hoik kiex ka veng Bieliehiem, pui veng khawmuik hoek simeem kiex ah nin, “Ang in mawh Nawmix lie?” 20Nawh deeh ah nin ka kix,
“Paw lai kok aux mawh Nawmix,
deeh kok aux mawh Mara”
mawh kheu Cao pa ting siawp sibrawm
hoik tawx krax
pa kied kin kied song ka aux heue.”
21Aux hoik lih hu
mai pa grum naog,
Siyiex deeh viex aux
hoek mai pa yi,
Siyiex yuh pa nu pa khawm
hoek piang aux,
Cao pa ting siawp sibrawm
hoik kieh aux hoek krax
kha rhawm, yuh ka
mawx pex kok
aux mawh Nawmix?”
22Mawh kheu nan Nawmix mai mun nawh Ruthax ceu pui Mawbax ing tau mai nawh khaing haktiex Mawbax. Kiex hoek ka veng Bieliehiem, yam jah pui ti vawg nghox ca heue.
Currently Selected:
RUTHAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012