PHILEMON 1
1
Lox Nawb Bwan
1Pawlux, pa mawh pui pa hoik laung son Yesux Khrit mai puxaik ex Timose, tawx ka Philemon pa moh ex mai pa mawh pui rom ti yuh kaing tau mai ex, 2ka Appix nan ex mai ka Akippux#Kaw 4:17 pa mawh pa rom ti mawh pui naing tau mai ex, ka ceu cao daux nyiex maix heue. 3Kieh maix koe bwanson mai pa nhim pa kaoh khaing Siyiex Keeing ex mai Yesux Khrit heue.
Krax Moh Mai Krax Yum Rhawm Philemon
4Aux yaog yaw ka bwanson Siyiex aux jheung jheung mai simawd maix ka daux pa rawg aux bwan, 5Mawh kheu mhong aux grawng krax moh maix, krax yum rhawm pa koe maix plak Yesux Khrit mai khawm plak pui singax khawmuik heue. 6Kheu ceu pa yuh paox pie, ka krax yum rhawm maix, tak sang koe bwanson, ka daux krax tawng yung ka ceu pa mhawm kuceu, pa koe ka daux maix, ka son Cao Khrit heue. 7Grawh grawng nawh aux hoik kied koe krax gaux rhawm mai pa nyawm rhawm ka daux krax moh maix, mawh kheu rhawm rhi pui pa singax khankix hoik pon ti nyawm rhawm kheu maix, puxaik eue.
Khyox Khaw Son Awnesimux
8Mawh kheu nan viang aux koe rhawm kwa daux Cao Khrit nie khin maix yuh ceu pa khaw, 9Aux Pawlux pa hoik kuad mai pa mawh khawm pui pa hoik laung son Yesux Khrit yam in, nie lheu koe rhawm ti sang khyox khaw ka maix ka daux krax moh krax rhawm heue. 10Aux khyox khaw ka maix son kawn aux Awnesimux,#Kaw 4:9 pa hoik pon hoik kieh aux keh, ka daux pa phyawk aux in. 11Kaw pa ang koe bwanson son maix nhaox, viang mawh nan yam in koe bwanson ka maix mai ka aux heue. 12Aux deeh ploi tokaux nawh ing ka maix, pa mawh rhawm rhi aux tete, rieb ti teei nawh liak. 13Viang aux simie ti kawn kieh nawh ot tau mai aux, son sang teem nawh ti kia ngien ka aux, ka daux pa phyawk son lox bwan gaux rhawm, 14Phan aux ang nyang pon lox maix ang aux rhawm yuh tix ceu kawx, yuh ka mawx ceu pa mhawm pa sang yuh maix ka aux tak ang mawh pa khin ti kieh yuh, son sang mawh pa lak keud maix ti yuh hawt alo tix tiru heue. 15Ha kox hoik kieh nawh gwieh hu khaing maix tix vong, yuh ka mawx maix tak sang pon nawh son ku jheung jheung, 16Ang baox mawh awm siliex, mawh pa nie lheu khaing siliex, pa mawh puxaik pa moh, pa moh aux kah, nie lheu mawh ka maix miex ding, ka daux nex nham mai khawm ka daux Simiang heue. 17Phan maix een aux mawh paox pie, rieb ti teei nawh, awm sang rieb ti teei ka tokaux aux heue. 18Phan nawh hoik lud ka maix, phan ang mawh nan phan nawh ceuk ka maix tix ceu ceu, deuh mawh cie aux. 19Aux Pawlux tiiem lai in ka taix tix, “Aux tak sang deeh plud kah heue.” Aux ang lai krai grawng maix ceuk khawm tokaux maix ka aux heue. 20Mawh heue, pux eue, kieh aux koe krax gaux rhawm khaing maix ka daux Simiang. Kieh rhawm aux nyawm rhawm daux Cao Khrit liak.
21Mawh kheu yum rhawm aux ka grawng pa chix cu nghiet maix, aux tom tiiem hu ka maix, Kheu tawng aux grawng maix sang nie lheu yuh khaing pa ah aux heue. 22Lheu khaing an, viang mawh dee ot kawx, cox son aux liak, mawh kheu koe aux krax keud pot jun pot, grawng sang deeh tawx aux ka maix, kheu rawg maix bwan heue.
Lox Ghoik Mai Lox Nawb Bwan
23Epaphrax, #Kaw 1:7, 4:12pa mawh paox aux, ka daux pa laung son Yesux Khrit nawb ka maix, 24Makux#Cau 12:12, 25, 13:13, 15:37-39; Kaw 4:10 Aritakhux #Cau 19:29, 27:2; Kaw 4:10 Demax #Kaw 4:14; 2Ti 4:10 Lukax, #Kaw 4:14; 2Ti 4:11 pa mawh paox yuh kaing aux khankix kawx, nawb ka maix heue.
25Kieh bwanson Simiang ex Yesux Khrit ot tau mai khuan maix liak! Amen.
Currently Selected:
PHILEMON 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012