YAWBAX 1
1
Nyiex Ma Yawbax
1Koe pui tix kaux pa kaux Yawbax pa ot daux haktiex Uzax pui an mawh pui grum naog mai pa rahsee mai nawh mawh pui pa lhat graung ka Siyiex mai via khaing pa caox caig heue. 2Nawh koe kawn simex aliah kaux mai kawn bun loe kaux heue. 3Sinngao nawh khankix mawh yung aliah rheng, kala-uk loe rheng, mawie tang phwan yieh, la shiang phwan yieh mu mai pui daux nyiex ma nawh khankix kied haoh hun heue. Mawh kheu nan, pui in mawh pui pa kied ting lhaong khaing sinax ceu pui baoh haktiex plak lih singaix khawmuik heue. 4Yam hoek bawg yam singaix keh kawn simex nawh khankix, kix yuh pawie krax khan kheu ka daux nyiex cao kix mai kix ploi pui hu ghaok ka nan kix loe kaux hoek tix ih nyaux tau mai kix heue. 5Mawh kheu nan yam hoik naog kix pawie pa yuh tix, Yawbax kok kix hoek sonsang yuh kix singax mai nawh yaog ti kaoh caocao daux ponngawb mai hu tan krax tan pa gleeing khankix, awm hoik koe carang kix khawmuik heue. Grawh grawng nawh, Yawbax hoik keud yuh nin, “Kawn simex aux khankix hoik lud mai jhax lawg ka Siyiex ka daux rhawm kix heue.” Mawh kheu nan, Yawbax yuh awm an sijheeng heue.
Satan Yuh Yawbax Laux Leeing
6Ka daux an tix ngaix yam hoek kawn simex Siyiex tix khrawm paox tix hoek ka plak sivoe Siyiex mai satan kawx rom ti hoek ka daux sinax kix heue. 7Siyiex ah nin ka satan, “Mawh kaoh maix khaing dee mawx?” Satan deeh pawk lox ka Siyiex ah nin, “Aux kaoh khaing lailing ti hu piang haktiex mai hu jee hu blaong sonsang simi ti jhak piang ceu an kix heue.” 8Khaix an Siyiex ah nin ka satan, “Mawh hoik sax keud maix ti yaox ka grawng kawncau Aux Yawbax, pui pa awm nawh ang lai koe ka piang ca haktiex, pa mawh pui pa ang koe dee deuh phimap pa grum naog mai pa rahsee, nawh mawh pui pa lhat graung ka Siyiex mai pa via khaing pa caox caig lie?” 9Khaix an satan deeh pawk lox ka Siyiex ah nin, “Phan Yawbax ang pon bwanson khaing Maix Cao nawh sang lhat graung ka Maix Cao lie? 10Ang hoik mawh Maix Cao pa hoik yuh hawt vung viang nawh mai hawt vung viang daux nyiex nawh khankix ku daog ang mawh lie? Maix Cao hoik nawb bwanson piang kaing jhaw pa yuh nawh ka taix tix khankix mai kraung khrai sinngao nawh khankix, hoik haok hwan ka daux haktiex in heue. 11Viang mawh nan yam in nyeu plawng taix Maix Cao mai teeh ka can pa koe nawh khawmuik mai nawh tak jhax lawg ka Maix Cao ka plakngai Maix Cao tete heue.#Jhi 12:10 12Mawh kheu nan Siyiex deeh ah nin ka satan, “Jhak heue, can pa hoik koe nawh khankix koe ka daux sibrawm maix, paw kieh ngie taix tix teeh piang nawh khaing. khaix an, satan lih hu khaing ka plak sivoe Siyiex heue.
Yawbax Som Sin Ngao Mai Kawn Praix
13Yam an ka daux tix ngaix, yam kawn ih kawn nyaux kawn simex kawn bun nawh khankix rawm plix siiet, ka daux nyiex puxke ting kix, 14cao cau tix kaux hoek ka Yawbax ah nin, yam kawn thai mawie kaung mai la kawn sawm rib hawt praok kix, 15pui Shebax khankix hoik puing ka kix mai viex kix hu dee singai mai kix hoik pah ti tik kawncau khankix ka vaig, mawh aux nong nong tix kaux pa klawd sonsang krai ka maix heue. 16Yam kawn tak sikah nawh, pui tang kaux baox hoek ah nin, “Ngu Siyiex hoik cod khaing raoma mai hoik gleeing ka yung mai cao pau yung khankix proe uik mai mawh aux nong nong tix kaux pa klawd sonsang deeh ing krai ka maix heue.” 17Yam kawn tak sikah nawh, pui tang kaux baox hoek ah nin, ceu pui Kaladie loe cub, hoik rhim ka cub kala-uk an khankix mai viex kix hu dee singai, mai kix hoik pah cub kawncau khankix ka lawm vaig mai mawh aux nong nong tix kaux pa klawd deeh ing krai ka maix heue. 18Yam kawn tak sikah nawh, pui tang kaux baox deeh hoek ah nin, kawn simex maix mai kawn bun maix khankix kawn ih kawn nyaux rawm plix siiet ka daux nyiex puxke ting kix, 19bhaung ting hoek sijaox khaing daux tiag mai hoik klah ka nyiex an khawm pon daog mai nyiex an hoik grhup piang pui awn ju an khankix mai kix hoik yum mai mawh aux nong nong tix kaux pa klawd sonsang deeh ing krai ka maix heue. 20Khaix an Yawbax kaoh mai riah ka sibex lang jung ceep tix mai khlao hauk kaing tix mai nawh goh gup tix krub piang tiex heue. 21Nawh ah nin, aux hoik lih khaing daux vaig miex tix ka daux pa ang tix viex kraung ceep mai aux tak deeh ing tau mai pa ang tix viex kraung ceep, Siyiex mawh pa tawx mai Siyiex kawx deeh teei hu, kieh ceu kaux Siyiex koe bwanson heue. 22Ka grawng ceu in khawmuik, Yawbax ang yuh phimap mai ang lud ka Siyiex heue.
Currently Selected:
YAWBAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012