PINGNYAP 1
1
Grawng Laig Haktiex Khanan
1In mawh lox pa hoik krai Mose ka pui Isarelax daux tiag hawt praok rawm klawng Yawdan, daux lung toi veng Suphax, sinax veng Paran, veng Tawphelax, veng Laban, veng Hazarot mai veng Izahat khankix. 2Jah khaing Hawrax, gawng Sina mai hoek ka Kadesha Bana koe kao tix ngaix krax. 3Ka daux tixpon num, khix kao tix, tix ngaix, Mose krai lox tawm pingnyap pa dex mai pui Isarelax, awm pa tawm Simiang Siyiex ka nawh khawmuik, 4khaix hoik pex nawh Sihon simiang Amawrix, #Si 21:21-30 pa ot daux veng Heshabon mai Awgax simiang Bashan, #Si 21:31-35 pa ot daux Ashatarot mai ka veng Edarix. 5Mose jah tix nih nai krai lao lox tat jhawm prawng plak lih singaix rawm klawng Yawdan ka haktiex Mawbax ah nin. 6“Simiang Siyiex hoik sikah ka ex baoh Hawrax ah nin, pex hoik ot piang gawng in tom rheung bawg yam, 7Veeh pex mai deeh hu krax mai hu piang gawng Amawrix, dee dex hawt an, daux lung, piang gawng mai daux ngawd, plak seh mai praok rawm sigrit sigra, daux meung Khanan mai daux Lebanon, tom hoek dee singai rawm klawng ting Yufrethix. 8Jhak heue, Aux hoik deuh haktiex an sivoe pex, laig ka haktiex an mai teei ti cie haktiex pa hoik tiextu Simiang Siyiex ka keeing pex, Abraham, Icak mai Yakop, sonsang tawx ka kix mai doeh ru pa plud khaix kix.
Laug Cao Kaing Doeh Ru
(Lih 18:13-27)
9“Aux hoik krai ah nin ka pex yam an, aux ang pon klawm beeh glawm ka son pex nong nong, 10Simiang Siyiex pex, hoik kieh pex haoh hun, ka daux in ngaix pex hoik haoh hun awm simuing ka raoma. 11Kieh Simiang Siyiex keeing pex, baox kieh pex koe kaing rheng son, khaing pa nie haoh hun pex yam in mai nawb bwan piang pex, awm hoik yuh Nawh Cao sijax mukheu ka pex! 12Aux sang pon klawm pa taug mao pex, beeh glawm pex mai pa thung thiang pex nong nong yuh ka mawx? 13Laug pui koe pingnya cuyi, pui lhak lhiem mai pui koe krax tawng yung khankix, khaing sinax ru pex mai aux tak yaog nawh mawh cao kaing piang pex, 14pex hoik pawk ka aux ah nin, ceu pa hoik krai maix ka yix, mawh pa mhawm sonsang yuh yix kah. 15Aux tom laug cao kaing khaing daux doeh ru pex, ka pui pa koe pingnya cuyi mai pa koe krax tawng yung mai kieh kix mawh cao kaing piang pex, pa mawh cao kaing piang pui kaing rheng, cao kaing piang pui kaing yieh, cao kaing piang pui tixphwan kaux, cao kaing piang pui kao kaux mai cao kaing piang doeh ru pex khankix. 16Yam an aux tawx lox ka cao prawng see pex khankix, nghiet ka grawng see pa koe sinax puxaik pex mai prawng ca pa rahsee ka sinax pui mai puxaik nawh mai nyo sinie pa ot tau mai nawh. 17Pex tak ang pon jhak pakngai pui tix kaux kawx ka daux pa prawng see, pex tak nghiet ka see pa iak mai see pa ting awm paox tix, paw pex lhat ka pui tix kaux kawx, mawh kheu krax prawng ca mawh cie Siyiex, can see pa nu ka pex viex hoek ka aux, mai aux tak nghiet ka see an, 18yam an aux tak tawx lox ka can ceu pa khaw pex ti yuh khawmuik.
Tiang Tix Laig Daux Haktiex
(Si 13:1-33)
19“Ex lih khaing Hawrax mai hu phlat daux tiag ting pa koe krax lhat awm pa hoik yaox pex, ka krax hu gawng haktiex Amawrix, awm pa hoik tawm Simiang Siyiex ka ex, mai ex hoek ka haktiex Kadesha Bana. 20Aux ah nin ka pex, pex hoik hoek ka gawng Amawrix pa tawx Simiang Siyiex ex ka ex. 21Jhak heue, Simiang Siyiex pex hoik deuh haktiex ka plak sivoe pex, haok mai teei ti cie, awm hoik krai Simiang Siyiex keeing pex ka pex, paw lhat graung mai paw laux rhawm ka, 22pex ku kaux greed tix dex aux ah nin, kieh ex ploi pui hu sivoe ex mai jiang ka haktiex son ex mai kieh kix deeh viex lox satang hoek ka ex, sonsang tawng ex krax pa sang khaw ex tix haok mai sonsang hoek ex ka veng yuh ka mawx, 23grawng an aux khaw rhawm ka, aux tom laug pui kao ra kaux, khaing daux ru pex tix cub tix kaux, 24kix veeh tix mai haok piang gawng, tom hoek daux ngawd Eshakawlax mai jiang ka dee an. 25Kix pieh ti viex plix khaox hoek daux taix tix tiblah mai viex hoek ka ex mai kix viex lox satang hoek ka ex ah nin, an mawh haktiex pa mhawm pa sang tawx Simiang Siyiex ex ka ex. 26Viang mawh nan pex ang cu ti haok mai tieh feen lox tawm Simiang Siyiex pex, #Pi 9:23; He 3:16 27mai pex bawgbe ka daux nyiex gox tix ah nin, mawh kheu Simiang Siyiex koeng ka ex, Nawh Cao hoik viex ex lih khaing daux meung Ejiptux, sonsang ap ex daux tawm taix pui Amawrix, sonsang yuh ex laux leeing. 28Ex sang haok yuh ka mawx? Puxaik ex khankix hoik kieh ex laux rhawm ah nin, “Pui haktiex an kied ting lhaong khaing ex, veng kix kawx ting mai guh veng lhaong cux raoma, lheu khaing an yix hoik yaox kawn simex Anakax khankix ot tan.” 29Khaix an aux ah nin ka pex, paw yaoh paw yee mai paw lhat ka kix. 30Simiang Siyiex pex pa hu sivoe pex, tak puing son pex, awm hoik yuh Nawh Cao ka son pex daux meung Ejiptux plak sivoe ngai pex, 31mai daux tiag, #Cau 13:18 pex hoik yaox kliien Simiang Siyiex tix, awm kliien pui ka kawn tix, daux krax pa hoik lawng pex tom sidah hoek pex dee in. 32Viang yuh nan kawx, pex ang yum rhawm ka Simiang Siyiex tix, 33Kaw pa hoik hu sivoe pex, sonsang jhi krax hu pex mai sawg dah dee sum pex nyiex gox mai ka plak ponsawm ka rong ngu mai ka plak ponngaix ka rong paiawm.
Krax Ciyang Siyiex Piang Isarelax
(Si 14:20-35)
34Simiang Siyiex mhong ka lox pex mai Nawh Cao song rhawm mai tiextu ah nin, 35“Haktiex mhawm pa tiextu Aux ti tawx ka keeing pex#He 3:18 khankix, ceu pui pa caox in tak ang pon ti yaox ka tix kaux kawx, 36mawh ngie Kaliep kawn simex Yephunie, pa yaox ka haktiex an mai Aux tak tawx haktiex pa hoik dig nawh ka caong tix ka nawh mai kawn praix nawh khankix, mawh kheu nawh hoik hawt grawng lawng khaix Simiang Siyiex khawm rhawm tix, 37mawh kheu jao pex Simiang Siyiex song rhawm ka aux ah nin, maix tak ang pon ti laig tan, 38Yawsux kawn simex Nun, pa cung ka sivoe maix, tak yaox ti laig tan, tawx riang rao ka nawh, mawh kheu nawh tak kieh pui Isarelax teei ti cie sinngao an. 39Lheu khaing an kawn nyawm iak maix khankix, pa ah maix mawh pa tud rhim, pa mawh kawn praix maix pa ang nyang tawng pa mhawm mai pa caox daux in singaix, kix tak laig ka dee an, pa sang tawx Aux ka kix mai kix tak pon ti cie an. 40Viang mawh nan, phan mawh pex, deeh veeh ti hu ka daux tiag, ka krax rawm sigrit sigra raoh, an mawx rawm sigrit sigra Edom. 41Khaix an pex deeh pawk lox ah nin ka aux, yix hoik lud ka Simiang Siyiex, yix tak haok puing awm lox pa hoik tawm Simiang Siyiex ex ka yix, pui ku kaux nhawt ka kraung naing tix mai khre rien tix haok piang gawng. 42Simiang Siyiex ah nin ka aux, krai ka kix, paw haok paw puing mawh kheu Aux ang ot sinax pex, phan ang mawh nan, pex tak som ka pui koeng tix, 43aux hoik krai ka pex, viang mawh nan, pex ang nghiet ka, mai pex tieh feen lox tawm Simiang Siyiex mai haok piang gawng tau mai rhawm kwa rhawm vao tix. 44Pui Amawrix pa ot piang gawng puing mai pheet ka pex, awm pheet phung hia ka pui mai yuh pex laux jah ka Sirax tom hoek ka veng Hawma. 45Pex deeh ing mai yiiem ka plak sivoe Simiang Siyiex, viang mawh nan, Simiang Siyiex ang cu tix nghiet ka lox pex, mai ang lai daong yhaok ka pex. 46Pex dah tix ot ka Kadasha tom rheung singaix, awm bawg yam pa yaox pex tix ot tan heue.
Currently Selected:
PINGNYAP 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012