3 Juan 1
1
Cu yúuchul t'aan ma'alob tu yo'olal Gayo
1Teen le ancianoo', quin dzíibtic le ju'una' ti' in yaabilaj amigo Gayo, máax in yaabilmaj jach tu jaajil.
2In yaabilaj sucu'un, in payalchi'e' u ti'al ca xi'ic teech utzil ti' tuláacal ba'al yéetel u ti'al ca yanac teech toj óolal, je'el bix táan u bin teech utzil ti' a pixane'. 3Tumen jach qui'imacchaj in wóol le ca j taal dze'edzec ti' le sucu'uno'obo' ca tu tzicbaltajo'ob teen a chuca'an óolal, tumen táan a cuxtal je'el bix cu ca'ansic to'on le jaajo'. 4Ya'ab u láak ba'al ca u dzáa teen mas qui'imac óolal le in wojéeltic in paalalo'obe' táan u cuxtalo'ob je'el bix u ca'ansic le jaajo'.
5In yaabilaj sucu'un, yéetel chuca'an óolal táan a meyajtic le sucu'uno'obo', táanilbe'en le máaxo'ob táanxel tu'uxilo'obo'. 6Tu táan le Iglesiao' leti'obe' dzo'oc u tzicbaltico'ob le yaacunaj yaan techo'. Quin káat óoltic teech ca a wáanto'ob yéetel ba'ax kabéet ti'ob je'el bix utz tu t'aan Kue', u ti'al u bino'ob táanil. 7Tumen leti'obe' jóoko'ob tu yo'olal u yaacunajo'ob ti' u meeyjul Jesucristo, yéetel ma' tu yóolto'ob u kamo'ob mix jun p'éel áantaj ti' le máaxo'ob ma' u kaj óolo'ob Kuo'. 8Le o'olale' to'one' unaj c táan óoltico'ob, u ti'al c áantico'ob ti' u tze'equil le jaajo'.
U kaakas ccuxtal Diotrefes
9Tene' tin dzíibtaj jun p'éel ju'un ti' le Iglesiao' ba'ale' Diótrefese' ma' tu kamico'on, tumen leti'e' utz tu t'aan u beetic u nojochil ichilo'ob. 10Le o'olale', wa quin bine', yaan in ka'ajsic ti' ba'ax cu beetic iquil u máan u ya'al ba'al kaas yéetel tuuso'ob t contra. Ma' qui'imac u yóol yéetel lelo', ma' táan u kamic le sucu'uno'ob cu kuchulo'obo'; le máaxo'ob u káat u kamo'obo', cu wet'ic ti'ob u beetico'ob yéetel cu tojolch'intico'ob ti' le Iglesiao'.
11In yaabilaj sucu'un, ma' a bin tu paach le ba'ax kaaso', ba'ale' tu paach le ba'ax utzo'. Le máax cu beetic ba'ax utze' u ti'al Ku, ba'ale' le máax cu beetic le ba'ax kaaso' ma' u yilmaj Kui'.
U ma'alob cuxtal Demetrio
12Tuláacal máax cu t'aan ma'alob tu yo'olal Demetrio, bey xan le jaajo' cu t'aan tu yo'olal. To'on xane' jaajcunajo'on ti' lela', te'ex xane' a wojele'ex táan c a'alic u jaajil.
U dzo'oc t'aano'ob
13Tene' ya'ab ba'axo'ob yaan teen u ti'al in wa'al teech, ba'ale' ma' in káat in beet dzíibil ju'uni'; 14tumen quin pa'atic in wiliquech séeba'an, leti' túun quéen t'aanaco'ono' t chi'il.
15Ca yanac teech jéedzel óolal. Le amigo'ob yano'ob waya' cu túuxtico'ob teech tziquil t'aano'ob; quin káat óoltic teech ca a tziquil t'ant ta chi'il cada jun túul ti' c amigo'ob.
Currently Selected:
3 Juan 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992