Eleabwa 9

Saalo bɛ̀rɛ ene Yeso Kristo

1Efwɔ antiri endzobo zɔnɔ, Saalo à na wu̧ru é ngo yɛrɛ zhudu bɔ bɛɛrɛ abwa Masakɛ, éngɛ è ngɔɔ ebe angwa zhiri. 2Saalo à bii angwa zhiri kpe engɔ ndɛʼɛ aŋwɛʼrɛ énde shi mbè ngɔɔ efwɔ ndɔrɔ bɛɛrɛ atsɛrɛ bɔ Juu a Damaskɔs, mbɔʼtye mbè zɔ gho deʼ wɛ ma kìrì aghɛʼnji Masakɛ ngɛ, ka de mwɔ anɔm kà aye mbè bere sàa achim a Jerusalɛm. 3Aŋu engɔ à sa zamma bwɛn a Damaskɔs ngɛ, sa klikɔ̀ʼ, ekɛʼ deʼ nyɛn zeʼe ezob gɛ̀rɛ̀ pɛ ekwa engɔ. 4Saalo go a chwâ gɛ̀rɛ̀ zo etsoʼ deʼ ma gà ebe engɔ kpe, “Saalo! Saalo! Ngwo na nyii angu kpe ayɛ?” 5Saalo biiri kpe, “Masakɛ, na ngwo wɛ?” Engɔ gíì kpe, “Na mmɛ Yeso wɛ ngwo ma nyii ngɛ. 6Enjitsɔ tam ekere ngɔ̀ɔ efwɔ abɛ, e ba tòʼrò ebwa wɛ ngwo ma ngo sa fwɛʼ ngɛ.” 7Abɔ byɛ â mwɔ nè Saalo ngɛ tamma aŋu ne le ebwa deʼ é ga bo. Angɔ à zo etsoʼ wɛ, shi ne zɔ gho deʼ bo. 8Saalo à tam a chwâ, bɛʼngɛ èndzobo chɛ à pɛɛ aghɔɔ mɔ ngɛ, è ne ma zɔ akwâ bo. Éngɛ e klini engɔ ma abwo ngɔ̀ɔ abɛ Damaskɔs. 9Engɔ à tsɔmɔ efwɔ enji tɛd ne ma zɔ akwâ bo. Engɔ à gɛrɛ ke nde kà ŋwɔ ala deʼ bo.

10Gho kristo deʼ à na a Damaskɔs ekumu ngɔ ma Ananyas. Masakɛ zeʼe ebe engɔ ene nklama nchi, zɔʼrɔ engɔ kpe, “Ananyas.” Engɔ gíì kpe, “Masakɛ, mmɛ wu.” 11Masakɛ gâ ebe engɔ kpe, “Tam ekere ngɔ̀ɔ afwɔ deʼ yɛ e ma zɔʼrɔ kpe Street Strit, efwɔ ndɔ gho deʼ wɛ ekumu ngɔ mwɔ Judas ngɛ. Biiri aŋu kpe egho wɛ me zeʼe efwɔ abɛ Tasɔs ekumu ngɔ mwɔ Saalo ngɛ è we? Engɔ wa tsàʼrà Ngwe. 12Saalo a shi le nklama nchi, è zɔ aŋu gho deʼ wɛ ekumu ngɔ à mwɔ Ananyas ngɛ à zeʼ tɛʼ abwo mɔ ato ngɔ kpe è sa wa zɔ akwâ.” 13Ananyas gíì kpe, “Masakɛ, mmɛ shi zo abwa akɛkɛ mbɔʼ egho wunɔ. Bɔ shi sɛɛrɛ abwa bɔɔbɔɔ yɛ engɔ shi fwɛʼ ekwa bɔ pɛ mbyɛ a Jerusalɛm ngɛ. 14Aŋu engɔ me zeʼe anɔ nɔ, à shi nu ekama ebe m̀fɔ̀rɔ̀ zhiri é bèddè bɔ gimkpaʼ byɛ e ma zɔʼrɔ ekumu ngwɛ ngɛ.” 15Masakɛ gâ ebe Ananyas kpe, “Ngɔɔ mbɔʼnga mmɛ à shi chi egho wunɔ é mwɔ gho afwɛʼ ngu. Engɔ wa ngo le ebɛbɔ mane m̀fɔ̀rɔ̀ àmɔ̀ mane bɔ Israel nɛɛ ekumu ngu. 16Mmɛ mɔmbwo wa ngo tee enyii yɛ engɔ ma ngo zɔ mbɔʼ ekumu ngu ngɛ.” 17Éngɛ Ananyas ngɔɔ enduʼndɔ aŋu, gɛ̀rɛ̀ nyii efwɔ ndɔ. Engɔ à tɛʼ ebwo mɔ ekwa Saalo gà ebe engɔ kpe, “Ghongwaanɔm ngu Saalo, Masakɛ Yeso wɛ à gli efàarà njɛ aŋu ngwo à ma zeʼe anɔ ngɛ we tɔmɔ angu engɛ̂. Engɔ ne saa angu kpe mmɛ zeʼ le ngwo sa wa zɔ akwâ, shi azhwɛɛrɛ pɛ gɛrɛ shwe ekwa ngwɛ.” 18Ekyɛ ŋwaʼ, ela deʼ na ezebe nɔ gli aghɔɔ Saalo turu, engɔ sa wa zɔ akwâ. Engɔ à tam ekere gɛ̀rɛ̀ nu ndim. 19Èndzobo chɛ engɔ à nde ngɛ engɔ gɛrɛ wu le ekama.

Saalo sɛɛrɛ ega Ngwe efwɔ abɛ Damaskɔs

Saalo à tsɔmɔ efwɔ enji deʼ ne bɔ bɛɛrɛ abwa a Damaskɔs. 20Ekyɛ ŋwaʼ Saalo ngɔɔ efwɔ ndɔ bɛ̀ɛrɛ atsɛrɛ bɔ Juu, klada sa sɛ̀ɛrɛ̀ ega Ngwe kpe Yeso na ŋwɔ Ngwe. 21Bɔ gimkpaʼ byɛ â zo aŋu engɔ à ma gà ngɛ kɔ̂n sa biiri kpe, “Ewùnɔ ke mwɔ egho wɛ à ma zhudu abɔ byɛ â ma zɔʼrɔ ekumu Yeso efwɔ abɛ Jerusalɛm ngɛ bo? Engɔ gɛrɛ ke me zeʼe anɔ é bwɛ abɔ byɛ na bɔ dzɔm nɔ é ngo ndɛʼ ebe m̀fɔ̀rɔ̀ zhiri bo?” 22Ega Ngwe wɛ Saalo à ma sɛ̀ɛrɛ̀ ngɛ, à ne le ekama. Engɔ le abwa tsɛrɛ akɛkɛ é tee apɛpɛ kpe Yeso à na Ǹtɔmzhwaʼa. Bɔ Juu byɛ â ma tsɔmɔ efwɔ ebɛ Damaskɔs ngɛ â ke le ega deʼ e wu gii ebe engɔ bo.

23Aŋu enji à shi fɔɔ ngɛ, bɔ Juu sɔŋɔ, sa zɛʼ aghɛʼ é zhudu Saalo. 24Bɛʼngɛ bɔ â zo mbɔʼ ebwa wɛ angɔ à ma ke é le ngɛ gɛ̀rɛ̀ toʼro ebe Saalo. Bɔ Juu â tsɔmɔ ene enduʼnkɛmɛ wɛ â ma nyii ngɔɔ efwɔ abɛ ngɛ ǹklì mane nchi ma ke é zhudu Saalo. 25Bɔ kristo ngɔ â nu engɔ ǹklì gè efwɔ ànkàm, tyɛ enduʼ anyi, chwee engɔ sàa a chwâ ene ekɛʼɛ deʼ à me toʼo eba ndɔ.

Saalo efwɔ abɛ Jerusalɛm

26Èndzobo chɛ Saalo à ngɔ̀ɔ abɛ Jerusalɛm ngɛ, engɔ zɛʼ aghɛʼ kpe mbè buumu angbe nè bɔ bɛɛrɛ abwa. Angɔ bɔ gimkpaʼ â na bumu engɔ. Angɔ à ke ne bɛrɛ kpe engɔ na gho bɛ̀ɛrɛ abwa éŋwaʼa bo. 27Éngɛ Banabas kpede nu engɔ ngɔ̀ɔ ebe bèmpwɔnɔntɔm. Engɔ à dù toʼro aŋu Saalo à zɔ Masakɛ anji a Damaskɔs, Masakɛ gɛrɛ gà ebe engɔ ngɛ. Éngɛ à gɛrɛ gà ebe angɔ aŋu Saalo à sɛɛrɛ ega Ngwe ene ekumu Yeso efwɔ abɛ Damaskɔs ene ndzɛ̀rɛ̀ ne le ebum bo ngɛ. 28Éngɛ Saalo à tsɔmɔ ma yɛrɛ zhiri nè angɔ efwɔ abɛ Jerusalɛm ma zhìn à sɛ̀ɛrɛ̀ ega mbɔʼ ekumu Masakɛ ene ndzɛ̀rɛ̀. 29Engɔ à gɛrɛ na gà ma fɛ̀ɛrɛ abwa nè bɔ Grik byɛ â ma gà atsoʼ bɔ Juu ngɛ, bɛʼngɛ â na zɛʼɛ aghɛʼ é zhudu engɔ. 30Èndzobo chɛ bɔ kristo â nɛɛ kpe e ba ke é zhudu Saalo ngɛ, e nu engɔ kla ngɔ̀ɔ a Kaysarya, sàa engɔ abɛ Tasɔs. 31Éngɛ bɔ kristo efwɔ ndɔrɔngwe efwɔ ebɛɛ ebɛ Judeya, Galilii mane Samariya tsɔmɔ a m̀bwarambwad. Abɔ kristo byɛ â ne le ebum ene Masakɛ, Azhwɛɛrɛ pɛ ma twàʼrà gɛ̀rɛ̀ ma ndɛʼ ekama ebe angɔ, nuru bɔ ma zhiiri.

Petoro gli Ayenas mane Tabita

32Aŋu Petoro à ma yɛrɛ zhiri efwɔ abɛɛ abɛ yɛ gimkpaʼ ngɛ, engɔ ngɔɔ é zɔ bɔ Ngwe efwɔ abɛ Lydda. 33Engɔ à dù zɔ gho deʼ ekumu ngɔ ma Ayenas. Egho wunɔ à shi glaba, shi tsɔmɔ ene aŋwan zɔnɔ efwɔ enɔ̂m fwɔ̧ɔ ne me né tam etan bo. 34Petoro gâ ebe engɔ kpe, “Ayenas, Yeso kristo shi gli awɛ. Tam ekere ndèerè etan ngwɛ.” Ekyɛ ŋwaʼ Ayenas tam ekere. 35Bɔ gimkpaʼ byɛ â ma tsɔmɔ efwɔ ebɛ Lydda mane Sharɔn ngɛ zɔ engɔ gɛ̀rɛ̀ ghɛɛbɛ le ebɛrɛ ene Masakɛ. 36Gho bɛ̀ɛrɛ abwa deʼ à na tsɔmɔ efwɔ abɛ Jopa ekumu ngɔ ma Tabita. Â gɛrɛ na zɔʼrɔ engɔ kpe Dookas, ǹji me ga kpe ǹgɛb. Engɔ à na le abwa ǹchwɔ̀ efwɔ endzobo mɔ gimkpaʼ gɛrɛ ma kpèdè bɔ ndzaŋa. 37Efwɔ endzobo zɔnɔ, aye wunɔ à go aŋwan gɛ̀rɛ̀ ku. Â sô akudugho ngɔ ngɔ̀ɔ shi efwɔ atwɔndɔ, efwɔ ndɔ ekere. 38Antiri abɛ Lydda à ne ebara antiri abɛ Jopa. Èndzobo chɛ bɔ bɛɛrɛ abwa â zo kpe Petoro wa fɔɔ abɛ Lydda ngɛ, e saa bɔ fyee ebe engɔ nè ekɔn wunɔ “Àgho, zamma zeʼe endyɛɛ.” 39Petoro ngɔɔ nè abɔ bɔnɔ. Èndzobo chɛ engɔ à bwɛn ngɛ, e nu engɔ ngɔ̀ɔ efwɔ atwɔndɔ ekere yɛ. Âyeti â ne kɛɛrɛ Petoro sɔ̀, ma ku̧u à tee ǹdiri chɛ Dookas à ghɔ ebe angɔ èndzobo chɛ engɔ à mwɔ ekɔʼɔ ngɛ. 40Petoro à fli angɔ bɔ gimkpaʼ sàa ese, ngɔɔ a chwâ ene etongu mɔ tsàʼrà Ngwe. Èndzobo chɛ engɔ à mɛɛrɛ tsàʼrà Ngwe ngɛ, è ghɛɛbɛ amɔ gà ebe akudugho yɛ kpe, “Tabita, tam!” Engɔ pɛɛ aghɔɔ mɔ. Èndzobo chɛ engɔ à zɔ Petoro ngɛ e tam. 41Petoro klini abwo ngɔ, taama engɔ ekere. Éngɛ engɔ zɔʼ bɔ kristo mane ayeti, gɛ̀rɛ̀ ndɛʼ Dookas ebe angɔ ekɔʼɔ. 42Â sɛɛrɛ ekɔn ǹchwɔ̀ wunɔ efwɔ abɛ Jopa gimkpaʼ, bɔ akɛkɛ gɛ̀rɛ̀ le ebɛrɛ ene Masakɛ. 43Petoro tsɔmɔ efwɔ abɛ Jopa efwɔ enji deʼ efwɔ ndɔ Shimun wɛ à ma ndèerè ela ene goboro nyɛm ngɛ.

Currently Selected:

Eleabwa 9: nbt

Highlight

Copy