Eleabwa 5

Ananyas mane eye mɔ Safira

1Gho deʼ à na aŋu ekumu ngɔ mwɔ Ananyas mane eye mɔ Safira. Angɔ à bɛrɛ é fɛ̀n ekwâ àmɔ̀. 2Ananyas tsɛrɛ ekɛb shi, ngɔ̀ɔ ndɛ̀ʼ abɛɛ ebe bèmpwɔnɔntɔm kpe ne ekɛb wɛ e me fɛn afwɔ yɛ anyi ngɛ. Eye ngɔ Safira me nɛɛ. 3Éngɛ Petoro gâ ebe engɔ kpe, “Ananyas, ngwo ne shi etaa mfyɛ ebe asatan è ga andɔɔ ebe azhwɛɛrɛ pɛ aŋu ngwo me tsɛrɛ ekɛb nɛŋɛ ngɛ ene yɛ? 4Afwɔ ekwâ yɛ à na anjɛ, ekɛb wɛ ngwo à fɛn akwâ anyi ngɛ mwɔ èngwɛ, ayɛ le ngwo zhuŋu m̀pè ebwa zɔnɔ? Ngwo ke shi ga andɔɔ tye ebe gho bo, ngwo shi ndooro Ngwe gɛrɛ.” 5Èndzobo chɛ Ananyas à zo ebwa wunɔ ngɛ, engɔ go a chwâ è ku. Èklɔ̀ bere abɔ byɛ â zo ebwa wunɔ ngɛ. 6Éngɛ àghobo deʼ zeʼ furu akudugho beʼ ngɔ̀ɔ kpa. 7Enyɔ̀m à fɔɔ ne ètɛd nɔ, eye ngɔ nyii zeʼe ne me nɛɛ ebwa wɛ à me gli ngɛ bo. 8Petoro gâ ebe engɔ kpe, “Ne ekɛb wɛ mbɔn à fɛn akwâ anyi nè enɔm ngwɛ ngɛ e wuwu?” Aye wɛ bɛrɛ kpe, “Ɔ̧̀ɔɔ, ewɛwɛ.” 9Petoro gâ ebe engɔ kpe, “Engwo mane enɔm ngwɛ shi kwa̧ʼra azhwɛɛrɛ Masakɛ. Kɔʼɔ ande, abɔ byɛ a beʼe akudugho enɔm ngwɛ ngɛ bli enduʼndɔ ese, e gɛrɛ ba beʼ awɛ é ngɔ̀ɔ ese.” 10Ekyɛ ŋwaʼ yɛ aye wɛ gɛrɛ gò a chwâ ku, àghobo yɛ gɛrɛ nyii zɔ kpe engɔ shi ku. E nu akudugho ngɔ ngɔɔ ese è kpa ebara enɔm mɔ. 11Èklɔ̀ kɛ́ bere bɔ gimkpaʼ byɛ â mwɔ efwɔ ndɔngwe mane angɔ byɛ â zo ebwa wunɔ ngɛ.

Bèmpwɔnɔntɔm glì bɔ akɛkɛ

12Bèmpwɔnɔntɔm â fwɛʼ enɛ̂ abwa akɛkɛ abwaʼ bɔ. Abɔ byɛ â le ebɛrɛ ene Ngwe ngɛ ma bwo à sɔ̀ŋɔ̀ efwɔ afwɔ deʼ efwɔ ndɔngwe yɛ â ma zɔʼrɔ kpe aghɔɔnduʼ Saramu ngɛ. 13Bɔ â na kede angɔ na bɔ kɛ́ nɔ, shi me tsɛʼ gho deʼ à me né ngo buumu angɔ bo. 14Bɛʼngɛ anɔm mane aye akɛkɛ le ebɛrɛ ene Masakɛ, nuru bɔ angɔ sa ghɛʼghɛʼ. 15Éngɛ bɔ sa bwɛ abɔ byɛ â ma gwɔnnɔ ngɛ zeʼe bwɛɛrɛ angɔ edɔm etan àmɔ̀ a njikɛ̀ mbɔʼtye Petoro sa fɔɔ, ka de mwɔ azhi ngɔ, a fɔɔ edɔm angɔ, a le angɔ bwada. 16Ebaŋabɔ à gli efwɔ ebɛ byɛ â mwɔ ebara Jerusalɛm ngɛ. Petoro mane Eyɔɔ gli abɔ byɛ â ma gwɔn mane angɔ byɛ â me le ezhwɛɛrɛ bɔɔbɔɔ ngɛ.

E nyíì bèmpwɔnɔntɔm

17Angwa zhiri mane abɔ byɛ engɔ à ma fwɛʼ nè angɔ, wɛ à ma bɔ Sadusii ngɛ â ku m̀bog ene bèmpwɔnɔntɔm. 18Angɔ bedde bèmpwɔnɔntɔm byɛ ngɔ̀ɔ koo a ndɔdzɔm yɛ à mwɔ efwɔ abɛ ngɛ. 19Bɛʼngɛ angere Masakɛ deʼ zeʼ ǹklì anji yɛ, è fùʼ enduʼ ndɔdzɔm ebe angɔ, sàa angɔ ese, gà ebe angɔ kpe 20“Mbɔn ngɔɔ efwɔ ndɔngwe kɛ̀, sɛ̀ɛrɛ̀ ekɔn mbɔʼ etyê ebe bɔ.” 21Aŋu akwâ à pɛ enchwenchwe ngɛ, bèmpwɔnɔntɔm byɛ nyii ngɔ̀ɔ efwɔ ndɔngwe kɛ̀, klada sa sɛ̀ɛrɛ̀ ekɔn wunɔ na aŋu angere à ga ngɛ. Èngwa zhiri mane abɔ byɛ â ma fwɛʼ nè angɔ ngɛ zɔʼ eto ebe bɔ Juu gà ebe angɔ kpe e sɔŋɔ sɛʼ ebwa wɛ efwɔ ndɔ m̀pàrà àmɔ̀, éngɛ e sàa bɔ efwɔ ndɔdzɔm kpe e ngɔɔ chidi bèmpwɔnɔntɔm byɛ zeʼe. 22Èndzobo chɛ abɔ bɔnɔ â bwɛn ngɛ, e ne zɔ bèmpwɔnɔntɔm byɛ efwɔ ndɔdzɔm bo. Angɔ wu ghɛɛbɛ ngɔ̀ɔ achim ngɔ̀ɔ gà kpe 23“Èndzobo chɛ mbyɛɛ a bwɛn aghɔɔnduʼ ngɛ, ndɔdzɔm me gwɔbɔ, bàkɔ̀ʼ akwâ me ghara, bɛʼngɛ èndzobo chɛ mbyɛɛ à fuʼu ndɔ ngɛ mbyɛɛ ne zɔ gho deʼ efwɔ bo.” 24Èndzobo chɛ m̀fɔ̀rɔ̀ zhiri mane gho kɛ ebe abɔ byɛ â ma kɔʼ ndɔngwe kɛ̀ â zo ebwa wunɔ ngɛ, èklɔ̀ bere angɔ, e sa di àmɔ̀ kpe e shi ne ngɔɔ ngɛ ma awe ngà? 25Éngɛ gho deʼ nyii gà ebe angɔ kpe, “Mbɔn zhuru! Abɔ byɛ mbɔn à me ge a ndɔdzɔm ngɛ be efwɔ ndɔngwe kɛ̀ ma tee abwa ebe bɔ.” 26Éngɛ ato mane bɔ mɔ ngɔ̀ɔ nu angɔ ene m̀bwarambwad mbɔʼnga angɔ à ma bumu kpe e be né timmi angɔɔ ene atye. 27Angɔ à nu bèmpwɔnɔntɔm byɛ zeʼe efàarà bɔ m̀pàrà. Angwa zhiri sa biiri ebe angɔ kpe, 28“Mbyɛɛ shi gbeʼre eto mbɔn kpe mbɔn ke wu sɛ̀ɛrɛ̀ ebwa deʼ mbɔʼ ekumu egho wunɔ bo. Mbɔn kede abwa mbɔn ma fwɛʼ ngɛ. Mbɔn shi sɛɛrɛ abwa mbɔʼ egho wunɔ efwɔ abɛ Jerusalɛm gimkpaʼ gɛrɛ ma le kpe bɔ nɛɛ kpe na mbɔɔ à me zhudu engɔ!” 29Petoro mane bèmpwɔnɔntɔm abê gâ ebe angɔ kpe, “Mbyɛɛ na zo ma Ngwe, mbyɛɛ ke ma zo ma gho bo. 30Ngwe ètɛ sam mbyɛɛ à zhwɛɛmɛ Yeso ene ewu, Yeso wɛ mbɔn à zhudu aŋu mbɔn à kɔmmɔ engɔ ene azɔd baʼra ngɛ. 31Ngwe à zhwɛɛmɛ engɔ shi abɛɛ abwo nde mɔ na ato mane Àsaase nɔ, ndɛ̀ʼ afwɔ ebe bɔ Israel é kobo eleabwa àmɔ̀ mbɔʼtye e dzɛd abwa bɔɔbɔɔ angɔ. 32Mbyɛɛ ne entsɛ ene abwa zɔnɔ gimkpaʼ. Azhwɛɛrɛ pɛ yɛ Ngwe me tɔ̧ɔrɔ ebe abɔ byɛ e ma zo engɔ ngɛ gɛrɛ mwɔ antsɛ.” 33Èndzobo chɛ abɔ efwɔ ndɔ m̀pàrà â zo ebwa wunɔ ngɛ, eboo angɔ kwaʼ, e sa ke aghɛʼnji é zhudu bèmpwɔnɔntɔm byɛ. 34Bɛʼngɛ egho bi abwaʼ angɔ à na aŋu wɛ ekumu ngɔ à mwɔ Gamaliyɛl ngɛ. Engɔ à na gho Farisii gɛ̀rɛ̀ mwɔ àtee atsɛrɛ. Â na ghɔ egho wunɔ ghɛʼ. Gamaliyɛl wunɔ à tam ekere efwɔ ndɔ m̀pàrà gâ kpe, e nu bèmpwɔnɔntɔm bɔnɔ ngɔ̀ɔ ese ene antiri endzobo deʼ. 35Éngɛ engɔ gâ kpe, “Bwɔngwa mbu, bɔ Juu mbɔn zɔmmɔ angɔn ene ebwa wɛ mbɔn ma ke é fwɛʼ ekwa abɔ bɔnɔ ngɛ. 36Mbɔn be nɛɛ kpe èndzobo chɛ Teyodas à zeʼe kpe mbè na gho kɛ̀ ngɛ, ako bɔ kwɛ̀ â buumu engɔ. Bɛʼngɛ efwɔ antiri endzobo deʼ e zhudu engɔ, abwa ngɔ bɔɔ, abɔ byɛ â ma kìrì engɔ ngɛ sam. 37Nyɛrɛ aŋu, Judas gho Galilii zeʼe mɔ èndzobo chɛ â ma ta bɔ ngɛ. Ebaŋabɔ kiri engɔ, afwɔ sa ndada engɔ ku, abɔ ngɔ byɛ â ma kìrì engɔ ngɛ sam. 38Éngɛ ene ebwa wunɔ, mmɛ gâ endɔn kpe, mbɔn chi abwo ndzɔn ekwa abɔ bɔnɔ. Mbɔn saara angɔ. Mala ebwa wɛ angɔ ma ke é fwɛʼ ngɛ mwɔ ezhuŋu gho, shi e yà nyim. 39Bɛʼngɛ mala e me zeʼe ebe Ngwe, shi mbɔn ke né yà fɔɔ angɔ bo. E mwɔ engɛ̂, shi mbɔn ba ngo sa ngwè nè Ngwe.” Abɔ byɛ â mwɔ efwɔ ndɔ m̀pàrà ngɛ zhuru ebwa wɛ Gamaliyɛl à ga ngɛ. 40Angɔ zɔʼ bèmpwɔnɔntɔm byɛ, wuru angɔ gɛ̀rɛ̀ ga ebe angɔ kpe e ke wu sɛrɛ mbɔʼ ekumu Yeso bo, è sàarà angɔ. 41Èndzobo chɛ bèmpwɔnɔntɔm byɛ â gli efwɔ ndɔ m̀pàrà sa ngɔɔ ngɛ, e sa zhiri à gɛnɛ àmɔ̀ mbɔʼnga angɔ shi zɔ kpe Ngwe shi kede kpe mbɔɔ be koʼro é zɔ ǹgoʼ mbɔʼ ekumu Kristo. 42Enyɛrɛ éngɛ, enji gimkpaʼ angɔ sa zhiri à sɛ̀ɛrɛ̀ ekɔn ǹchwɔ̀ mbɔʼ Yeso efwɔ ndɔngwe kɛ̀ mane efwɔ ndɔrɔ bɔ, ma gà ebe bɔ kpe Yeso na Ǹtɔmzhwaʼa.

Currently Selected:

Eleabwa 5: nbt

Highlight

Copy