1 Kɔ̀rintìyà 9

Hwètɛ̀mèlì hwe i àpɔ̀rzìtòlò nà hwèwòlò hwe awu

1Nà rza ohvì wònjà nàa tɔ̀ ima mòtò e? Nà rza enjè ndì àpɔ̀rzìtòlò e? Ìmba nà rzì ɛnɛ Yerzù Rzàŋgo wa arzu na e ma amì mirzɔ̀ e? Rzeke inyɔ ndi e hwèlì e mbako ya èwòlò ema na gbèelì Rzàŋgo e? 2Tɔ̀ è hwɛ ndi nanù ema lòŋgo la hwatò hwa rza emelì ema na hwèlì ndì àpɔ̀rzìtòlò, ndi o inyɔ na hwèlì ndi mɔ̀kɔ. Nà oma e hwèlì nà Rzàŋgo, inyɔ hwiti e hwèlì ndi nàa ɛ̀mɛ̀nɛ̀nì yà ami ema nà hwèlì ndi àpɔ̀rzìtòlò. 3Jà alàhwɛ̀ ja amì jɔ inì ò hwàŋgà hwatò ema hwa teŋgɛ̀nɛ̀yi lìkànèyà la ami. 4Irzɔ̀ i rza hwɛnì wònjà ò lì lìya o màandà mà anyu o lì làalɛ̀nɛ na lì nyɔ̀lɛnɛ na inyɔ e? 5Irzɔ̀ ì rza hwɛnì wònjà ya lì ahwànà jòjìyɛ̀ ema e hwèlì ndì mɔ̀nɔ̀ŋgèlì mɔ̀kɔ wa ama Krirztò na irzɔ e? Nà oma inɛyi àpɔ̀rzìtòlò i gbeyà e? Rzeke nanù ndi wònyanyàŋgò wa ama e Rzàŋgo na Pètrò hwa gbeyà e? 6Ŋga Bànàbàrzì na ìmba mɛnɛ ndi i hwɛnì lì gbeyà hwèwòlò ema hwe hwɛnì lì jo tembɛ e? 7Ima ŋmànèlì hwa njùma a hwèlì, ema mɔndi à hwɛnì lì gbèeyà èwòlò na lì awòmbɛ̀ mɔ̀ ŋmìti e? Ima mòònèlì wa mbòta a hwèlì ema a òna màyi ma hwehvùma rzi a rzì le lòŋgo la hwèŋge hwehvùma e? Ima mɔ̀ɔ̀ŋgèlì wa mɛ̀lɛ̀ŋgù a hwèlì, ema a tànɛyi lì ɔŋgeya lì hwèmba la mɛ̀lɛ̀ŋgù, rzìi a rzi nyɔ lòŋgo la màŋga mànyɔ̀ŋgɔ̀ ma mèŋge mɛ̀lɛ̀ŋgù ma eni e? 8Rzeketɛ o lì rzɔ̀ŋgìtɛ̀nɛ̀ la màlùtèyà ma ami ma mòtò wa hwènàmà, ɔ̀ndeŋgàtɛ̀ na ohwa hwenè hweyà, nanù mɛnɛ ndi e mbenda ya ama Morzè yɔhvɛ e ohwi. 9Èhwanja e mbenda ya ama Morzè e ohwa nanù ema, “O rza hwɛnì lì kaka e wàna ya e nyàkà na oma yɔ e hwèlì o lì làalà iŋgi mbarzì, o lì ji nyùŋgùwà.” È hwèlì ndi ema Lohwɛ̀ Mɔ̀ à mà hwɛ ndi lì ohwa nanù èhwanja à mà lùteyà ndi lì hvomɛ̀nɛ̀ i nyàkà mɛnɛ e? 10Rzèkɛ ìrzɔ̀ ndì Mɔ̀ à mà hwɛ lì ohwìrzɛ̀nɛ nanù e? Ɛ̀ɛ, e ma tìlahwa ndi o gbamù hwa arzu. Aŋga nanù e mòtò ema a rzàrzà e waŋga, na e mɔ̀ hvɛ ema a rzaŋga èŋge mbòtà, hwa arzɛ hwa àhvìtɛ̀ lìkayi o èŋge mbòtà. 11Nà oma ima lome lì ona hweyà hwe hwèlìŋgɛ̀ hwe eyà ya Lohwà o ìtììtènì ja anyu, e hwɛ ndi wòhwe e hwèlì tɛ ema irzɔ ji ijòwa tɛ hwèèmà hwe ene rze ya mɔ̀nyɛ̀ e? 12È hwèlì tɛ ema lòŋgo la hwatò hwa hwɛnì wònjà ya lì e ijòwa hwèèmà, rzeke irzɔ i hwɛnì wònjà rzayì-rzayì o lì e ijòwa hwèèmà lì hwa aka e? Ndi irzɔ i rzi gbeyànì a gbeyàna enè wònjà tɔ̀ wùnyà. Irzɔ ima àjùlɛ̀nɛ̀ mètàkà me arzɛ aŋga nanù, ene e rza hwɛ ndi ekèkànì na oma jo òhwa Ŋmɛ̀ndì mò Gbamù lì hvomɛ̀nɛ̀ Krirztò. 13Inyɔ è rza ayèmbɛ nanù ema hwaŋga hwatò ema hwa gbeyà èwòlò ò Ndawò yà Lohwà, hwa lùhweyà ndi mòlelì mò awu ò mòrzànjɛ ema mò jànɛ̀lɛ̀hwɛ̀ ò Ndawò yà Lohwà e? Ndeŋga hwaŋga hwatò hvɛ ema hwa gbèeyà o ètàwò yà màhwèyà wɔhvɛ hwa lùwa ndi lòŋgo là lì kàyi ema lì jànɛ̀lɛ̀hwɛ nàa jàhwèyà. 14Molandako mɔ̀kɔ mɛnɛ ndi e Rzàŋgo à mà kòkòwɛlɛyì nanù ema, hwaŋga hwatò ema hwa ohwa Ŋmɛ̀ndì mò Gbamù, mo ama Lohwɛ̀, hwa hwɛnì ndi lì wòŋgòwahwa na hwaŋga hwatò ema hwa lùwa mòŋgo Ŋmɛ̀ndì mò Gbamù. 15Ndì tɔ̀ nanù, imba na rzi gbeyànì ini wònjà tɔ̀ wùnyà. Ndèŋgana, na rza tìla naŋgɛ nanù, o lì lùtèyà ema na arza lì wòteya naŋgɛ o lì ji gbeyàna. Ò jɔ̀kɛ̀, na emelì lì ŋwa, lì aka ema tɔ̀ mòtò tɔ̀ mɔ̀kɔ a no gbeyà nanù ema imba na rza hwɛnɛ kumba ya lì àyekìrzɛ o èwòlò ya ami. 16Ndi tɔ̀ nanù, o lì ohwa Ŋmɛ̀ndì mò Gbamù mo òma Lohwɛ̀, mo rza enje ndi eyà ema na hwɛnì lì ayèkìrzɛ̀lɛ̀lɛ̀. Nà kɔ̀mɛ̀lɛ̀hwɛyi ndi na Lohwɛ̀ o lì ohwa Ŋmɛ̀ndì mò Gbamù mo ama Lohwɛ̀. È hwèlì ndi èwoma na imba e hwèlì tɛ ema imba na rza ohwi mono Ŋmɛ̀ndì mò Gbamù mo ama Lohwɛ̀! 17Èma hwɛ tɛ nanù ema imba ndi nà mà ahvɔ̀rzɛ̀ o lì gbeyà ene èwòlò, o ma na lùwa mòrzàhwèlì. Ndi na rza e hvɔ̀rzì, Lohwɛ̀ mɛnɛ ndi à no ŋgbelì ene èwòlò ò lì gbeyà. 18Màmɛ rzɔ̀ e hwèlì etàŋgì ya amì e? Ètaŋgi ya ami e hwèlì ndi, o lì ohwa Ŋmɛ̀ndì mò Gbamù mo ama Lohwɛ̀, e rzi hwɛ tɔ̀ mòtò tɔ̀ mɔ̀kɔ lì no taŋgeya. Èya èŋge ndeŋgatɛ na rza gbeyàna è wònjà ya ami na ohwa tɛ Ŋmɛ̀ndì mò Gbamù mo òma Lohwɛ̀. 19Nà hwèlì ndi imba mbiti, na rza enje o rze ya tɔ̀ mòtò tɔ̀ mɔ̀kɔ. Nà ma ayèŋgowɛ̀ ndi mokome mo hwatò hwa arzɛ, o lì jànà rzayì-rzayì ja hwatò òma Krirztò. 20È hvonda ema nà mà hwɛ na hwatò hwa wònyà Yudà, nà mà gbeyà hweyà hwe ami nàa imba hvɛ na hwèlì ndi mɔ̀kɔ wa awu, aŋga nanù hwa lòkɛ̀ Krirztò. È hvonda ema nà mà hwɛ na hwaŋga hwatò ema hwa ika i mbenda ja hwatò hwa wònyà Yudà, imba hvɛ nà mà ika ndi iŋgi mbenda. Tɔ̀ nɛ na rzi hwɛ o rze ya iŋgi mbenda. Nà ma gbeyà ndi nanù, aŋga nanù hwaŋga hwatò hwa lòkɛ̀ Krirztò. 21È hvonda ema na hwèlì na hwaŋga hwatò ema hwa rza ènje o rze ya e mbenda ya ama Morzè, imba hvɛ na gbeyà hweyà hwe ami nàa wɔ̀, o lì arza nanù ema hwa lòkɛ̀ Krirztò. Ndi ene e rzi hwɛ nanù ema na rzi ika imbenda ja ama Lohwɛ̀. Ò jɔ̀kɛ̀ na hwèlì ndi o rze ya e mbenda ya ama Krirztò. 22Nà hwèlì tɛ na hwaŋga hwatò ema hwa rza imbamɛ o lì lòkɛ̀, imba hvɛ na hwɛ ndi nàa mɔ̀kɔ hwa awu ema a rza imbamɛ o lì lòkɛ̀, èhwanja na arza ema wɔ̀ hwa lòkɛ̀ Krirztò. Ɛ̀ɛ, na hwèlì na keka o lì arza ema na hwɛ nàa tɔ̀ ima mòtò ema na ùŋmanɛlɛyi. O lì gbeyà hvɛ hweyà hwe arzɛ ema na tànɛyi lì gbeyà o lì rzùŋgà lòŋgo la hwatò. 23Nà gbeyà hweyà hwe arzɛ nanù, ò lì nyàlìrzɛ̀ Ŋmɛ̀ndì mò Gbamù mò ama Lohwɛ̀, aŋga nanù imba hvɛ na lùwa mònàmɛ̀ ema mo hwèlì o monò Ŋmɛ̀ndì mò gbamù. 24È rza hwi nanù ema o lìhwaŋgi tɔ̀ ima mòtò a hwaŋga, ndi mòtò mɔ̀kɔ mɛnɛ ndi à rzuwa rzi a lùwa morzawelì e? O èŋgànɛ̀lɛ̀ e hwaŋge lìhwaŋgi e luwe morzawelì. 25Tɔ̀ ima mohwaŋgelì ema a hwɛnì lì hwaŋga lìhwaŋgi, à àjùlɛ̀nɛ̀ mètàkà me arzɛ. Hwa wòŋgirzɛnɛ ndi nanù, o lì wɔ̀tìrzɛ̀hwɛ ekooto ya èluhwe ya mbonji ema e rza hwɛ natɛ̀ɛ na o mòlìkɛ̀, ndi irzɔ i gbeyà ndi èwòlò ema i lùwàna morzawelì mò mòlìkɛ̀. 26Ɔ̀ndeŋgàtɛ̀ na rza hwaŋga tɔ̀nɛtɔ̀nɛ. Nà rza enje ndi nàa mò uŋma hwerzilawo ema à ùŋma mùulù mo ŋgundu. 27Nà òkòlɛ̀yi e nyo ya ami ò lì ajùlɛ̀nɛ̀ mètàkà me lìhwaŋgi. Ène ŋgàna e èŋgànɛ̀lɛ̀ imba na oka wɔ̀ŋgɔ̀ ema nà mà òhwèyà tɛ hwahvɛhvɛ hwatò eyà yà Lohwà, rzìi imba na tìmba eyoyo.

Currently Selected:

1 Kɔ̀rintìyà 9: bri

Highlight

Copy