Lûm 8

Ndam zɛ ə zuʼsə Fezhə̀sè fo

1Zhə̀fè nə̀ va nə wùə pfɨ saʼ ezhoghɛ ə è nyì sə afɨa àmɔ̀ʼ yî ghə̀ Njisə̀s Klâys. 2Kûmə̀ nə lâŋ ə se zuʼ kɛ ə ke pə̂ ghâsènì èndamze kə ghâsènì nyì sə afɨa àmɔ̀ʼ è Njisə̀s Klâys, ə fɨsê mi ə alàŋ ə ghɛ pighe è kwuze. 3Ghɛ zɛ lâŋkè tè vayn kàʼa ə ke nəyn, kûmə̀ nə wiyn ə wûə m̀sɔ̀ŋve tè kiva tyaʼke se njiə tsɨ̀sè ə pi. Nyiəmə Zhə̀fè ə tə nə̀yn ghɛze mə lâŋkè tè vayn kàʼa ə ke nəyn. È və tə tom Vâ vəyn ewìyn ə wûə m̀sɔ̀ŋ vɛ ə ve nə̂ pi nə È mɨse tyaʼa ghɛ pike. Kə Zhə̀fè tè nəyn nyiəmə, È və mɨ̀sə̀ àtyaʼ əghɛ ə pighe ə wùə m̀sɔ̀ŋ ewìyn. 4Zhə̀fè tè nəyn zɨnə mə kə ghɨ ghɛ ə ghe chûmtə̀ va tyaʼa ghɛ ewìynke, pîza pɨlə chumtə̀ ə̀ghɛ atyaʼ ə sezuʼ sə Fezhə̀sè, ghənə tə nə̂ ə nə̂ ə̀ghɛ chichi eghɨ kə lâŋkè kyiŋə nə ghənə nəyn. 5Ghɨ ghɛ ghe ndamə kə njà se ewìynse kyiŋə, ndə̂mə̀ ə̀təm ə ghənə̂ghè əghɛ ghɛ ə njà se ewìynse kyiŋə nə ghənə ə nə̂. Pîza ghɨ ghɛ ə ghe ndamə kə Zuʼsə Fezhə̀sè kyiŋə, ndə̂mə̀ ə̀təm ə ghənə̂ghè ə zuʼsə Fezhə̀sè. 6Ə wùə ndə̀m təm ə vəynghe əghɛ ə senjà se wìynse, ə è tə kwu. Pîza ə wùə ndə̀m təm ə vəynghe ətə ə̀ghɛ ə sezuʼ sə Fezhə̀sè, ə è tə kyî èndam zɛ ə ze tə mîə va è kɨsè pɔ̂ynè. 7Ghɨ ghɛ ə ghe ndamə kə njà sewìynse kyiŋə nyi sèpàyn sə Fezhə̀sè, kûmə̀ nə ghənə ndə̂mə̀ va lâŋ ə Fezhə̀kè, mə ə vayn kaʼa ndəʼ ndəm kəynke. 8Ghɨ ghɛ ə nə̂ kə njà sewìyn sə ghənə̂sè kyiŋə vayn kàʼa nəyn nə Zhə̀fè ə saŋnə̂.

9Pîza ghàyn ndamə va kə njà saynse wìynse kyiŋə. Ghàyn pɨlə ndamə kə zuʼse kyiŋə, ezhoghɛ ə zuʼsə Fezhə̀sè ndɨŋ nyi ə ghàyn ətəm. Nâʼàpî ndè vɛ ə è kiva zuʼsə Klaysè, va yî vəyn. 10Pîza, ə Klâys nyi ə ghàyn ə fètəyn, ə ghàyn ə kyi èndam kûmə̀ nə Klâys ə nə̀yn ghàyn e nyi chichi ə Zhə̀fè əshi, pî kə wîyn mâynm̀ tə kwuə kûmə̀ ə̀ghɛ əpi ghɛ ə ghàyn nə̀yn. 11Ə zuʼsə Fezhə̀ sɛ ə se tè zòmse Njisə̀s ekwu nyi ə ghàyn ə fètəyn, nyiəmə, nâʼàpî m̀wiyn mâynm̀ mɛ m̀ nyi mə m̀ mə kàynè kwu, Zhə̀ fɛ ə fe tè zòmse Klâys tə zômsə̀ kəpi m̀wiyn nə mɛ. È tə nə̂ zɨnə mə è tyaʼa sezuʼ kɛ ə ke kayne nyi ə ghàyn ə fètəyn.

12E za tyə̀nə̀ ə ghɔnyìə ghɨmə nə, ghɛze nyîə nyi mə ghâsènì kyi se nə̀yn, ə̀ vachi se ndam kə njà ewìyn ə ghâsènì kyiŋə. 13Kûmə̀ nə ə ghàyn ndam kə njà saynse wìynse kyiŋə, ə ghàyn tə kwu, pîza ə ghàyn zhwi ghɛ ə pi ghaynghe è tyaʼa sezuʼ sə Fezhə̀sè, ə ghàyn tə kyî èndam. 14Ghɨ ghɛ ə ghe chûmtə̀ ndom vɛ ə zuʼsə Fezhə̀sè tyə̀nə̀ nyi əghɔ Fezhə̀ghè. 15Kûmə̀ nə zuʼ sɛ ə Zhə̀fè nyi mə fə fo se ghàyn nə̀ chîəva nə ghàyn ə nyi èkɔ̂s, pi se nə̀yn nə ghàyn ə fânə̀. Se pɨlə nə̂ nə ghàyn ə nyi ə̀ghɔ Fezhə̀ghè, famə atyaʼ ə sezuʼke, ghâsènì chìə fɨsə̂ ndûə se Zhə̀fè nə, “Pɨ̀a! Pɨ̀a Vɨ̂mvè” 16Zuʼsə Fezhə̀sè tsɨ̂yntə̀ ngɨŋə̂ vəyn è zuʼsə ghasènìse, se tsàyn nə ghâsènì nyi ə ghɔ Fezhə̀ghè. 17Kə ghâsènì se nyi ə̀ ghɔyn ə vəynghe, ghâsènì tə kyîə ndò pɔsê tɛ ə È ndə̀m sê ghɔ vəynghe, ə kyi kepî ghasènyìə ghə̀ Klâys fɨa vɛ ə Zhə̀fè nyi mə fə ndə̀m se Vəyn, kûmə̀ nə ə ghâsènì zɨ tsôsvè ghasènyìə ghə̀ Klâys, ə ghâsènì tə kyî kepî èpomsê ə vəynze.

Epomsê zɛ ə ghɨ ə Fezhə̀ghè tə kyiə

18M njîə va nə tsôs vɨ̀yn ə ghâsènì fe zôyn fa ashìŋə̀ nyì nâʼà eghɛ zhîze, ə ghâsènì fɨ̀aʼnè vəynve è pomsê zɛ ə tə tyə̂nə̀ paynsə̂ sê ghâsènì ashìŋə̀ kɛ ə ke nyi se tə pə̀yn. 19Nâʼà efɨa èkɨ̂m vɛ ə Zhə̀fè Pom nyîə lɨmtə̂ se shîŋə̀ nə kɛ ə Zhə̀fè tə tyə̂nə̀ paynsə̂ ghɔ Vəynghe. 20Ze tè nyi nə fɨa vɛ ə pom, nyi ke èfɨa sə ndô. Ə̀ vachi èfɨa nə vɨ̂yn sə vəyn və ngɨŋ ə ve tè nə̀yn sə nyi zamə, pîza ə̀ tè nəyn Fezhə̀ nə və nyi zamə. È tè nəyn nyiəmə è kwâʼtèzè nə, 21zhi nə̀ fɨsə̂ èfɨa nə vɨnə mə etyə̂ àtyaʼ kɛ ə ke nə̂ nə fɨave ə fîə, ə ghənə ə kyi kepî èndom se fiə kəpì epomsê zɛ ə Zhə̀fè nyi mə Fe ə fo sê ghɔ Vəynghe. 22Ghâsènì ke ndô nə se kɔʼɔ fɨ zôyn, nâʼà èfɨa èkɨ̂m kə Zhə̀fè tè pom, nyiə tsɔ̂ynə̀, zɨə ètɨm kə zɛ ə wùzhɔyn zɨə shîŋə̀ kɛ ə è kyiŋə se pîə. 23Pîza, ə va ke èfɨa nə vɨ̂yn ə ve tsɔ̂ynə̀, ghâsènì ghɛ ə kyi zuʼ sɛ ə Zhə̀fè nyi mə fə fo se ghâsènì kə emaʼte ə shive, ghâsènì tsɔ̂ynə̀ kəpi ndò ə ghâsènì ətəm. Ghâsènì ə ndə̀m təm ə ghasènìghe əkɨ̂m se lɨmtê ashîŋə̀ kɛ ə Zhə̀fè tə paynsə̂ nə̂ nə ghâsènì ə nyi ə̀ghɔ vəynghe, se fiə zà mwiyn mə ghasènimè, se fɨnə fo ghâsènì è wiyn mə èfemè. 24Kə ghâsènì kyi sɔzaze, ghâsènì ə ndə̀m təm ə ghasènìghe nə ghâsènì tə kyîə ndò ghɛ zɛ ə Zhə̀fè pì nə zhi tə nə̂ ndò. Pîza ə fe fɨa kɛ ə ghâsènì nyi mə ə ndə̀m təmghe nə ə tə kyîə ndò, ə zɛ mə ə pâynsê va èkwaʼtè zhîze. Ə̀ kàʼa kyi ndè kwâʼtèzè se kyî àfɨa kɛ ə è nyi mə è və kàynè kyî ə? 25Pîza ə ghâsènì kyi kwâʼtèzè se fɨa kɛ ə ghâsènì fe va, ghâsènì ə kolə ə̀təm ə lɨmtə̂ kəynke.

26Kèpî èghɨ, zuʼsə Fezhə̀sè pə̂ kəpi ndò se tsàmtə ghâsènì pî kə ghâsènì tɛ va tyaʼke. Ghâsènì keva kə kyi se tsə̀m, pîza ə̀ nyi sezuʼ sə səynsə ngɨŋ ə se tsə̂mə̀ sê è tsɔ̂yn zɛ ə ze tsɨ̂ə tsɛ pîzè. 27Zhə̀fè fe ndzɨsə ndò təm ə ghasènìghe, ke èghɛ zɛ ə zuʼse kwaʼtə̀ kûmə̀ nə zuʼse tsə̂mə̀ ndò ə ghɨə Fezhə̀ghè elùʼ endom vɛ ə Zhə̀fè kyiŋə.

28Ghâsènì kendô nə nâʼà pi èghɛ èkè zɛ ə ze kyâynə̀, Zhə̀fè nə̀ zəynze sə chùŋ ə̀ghɨ̀ ghɛ ə kɔ̂ŋə̀ Fəynfe. Ə ghənə ghɛ è nyi mə È və tɔŋɔ nə ə nəyn kə È kyiŋə. 29Ghɨ ghɛ ə Zhə̀fè tè nyi mə fe ə kàynè chitê nə tsɨnè ə̀ ghənə ə nyi kə zə Vâ Vəyn, kə vayn nə vɨnə mə tə pəyn ə è və nyi Vâ ə̀shi se ghɔnyì ə vəynghe. 30Nyiəmə, ghɨ ghɛ Zhə̀fè tè nyi mə fe ə kàynè chitê ndəm, È və tə tɔŋɔ ghənə nə ə nyi ə̀ghɨ ə vəynghe. Ghɛ ə È nyi mə È və tɔŋɔ, È pi nə ə̀ nyi ghɛ ə ghe nyi chichi ə zhi shi. È və fo pomsê ə vəynze sê ghɛ ə ghe nyi chichi ə və shi.

Zhə̀fè tyə̂nə̀ èkɔ̂ŋ ə Vəynze tɔynə̂ ə Njisə̀s Klâys

31Ghâsènì nyiə kàʼa pi nə ghe kûmə̀ ə̀ghɛ nə ghɨnə̀ ə? Ə Zhə̀fè nyì ghasènyìə ghə̀ ghənə, ə̀ nyi ndè vɛ ə è kàʼa è və tɔʼə̀ va ghâsènì ə? 32Ə̀ vayn kàʼa ndəʼ nyi Fèzhə̀, ə fɛ ə fe tè tàʼa ghə̀ʼtè se fo Vâ vəyn se ghâsènì əkɨ̂m. È tè nji vəyn ə fo nə È kwu ə ghâsènì ətu ə̀kɨ̂m, nyiəmə, È tə fo va zayn fɨave ekɨ̂m vɛ ə ghâsènì pfɨfə sê vəyn ə? 33Ə̀ tə pîə ndè nə ghɨ ghɛ ə Zhə̀fè chitê nyi mə ə pfɨ̀ saʼa? Ə̀ pi Fezhə̀ è ngɨŋə̂ vəyn nə ghâsènì nyi əghɨ ghɛ ə ghe nyi chichi ə və shi. 34Ə̀ tə pîə ndè nə ghâsènì ə pfɨ̀ saʼa? Njisə̀s Klâys tè kwu, ə zòmə̀, ə tsɨsə̂ ə Zhə̀fè ekɔyn twɔve, ə̀ nyi fumə ə è tə nə̂ ə è və chyatə̂ Fèzhə̀ ə ghâsènì elùʼ. 35Ə̀ kàʼa ə̀ chyase nâʼà ndè ghâsènì ə Klâys e kɔ̀ŋ ə? Ə̀ kàʼa ə̀ chyase tsôsvè mə, əghɛ kə ghe tɛ mə, ə̀ nyi etsə̂fsè mə, ə chɨ̀ŋ kə è zafə ghâsènì mə, afɨf mə, əghɛ ə kwəmnəghe kə ghe tsɨŋsə̂ ghâsènì mə, nâʼà èkwu zɛ ə ze nyi se tə pə̀yn sê ghâsènì mə? 36Ŋwàʼlè ə̀ Fèzhə̀ pi nə,

“Ghàs tyəm ke əkwuze cho tuʼmè m̀kɨ̂m kûmə̀ ghò.

Ə naynə̂ ghàs kə pfɨ ə̀ ndzè ə ndûə se se.”

37Ngaŋngaŋ, ghɛ nə ghɨnə mə əkɨ̂m kyànə̀ ndò pîza, ghâsènì ə tɨm zhi tɔynə̂ sê Klâys vɛ ə È kɔ̀ŋə̀, tsâmtə̀, ghâsènì. 38M kendô səmɔʼ nə fɨa kyîke vayn chyàsə ghâsènì ekɔ̀ŋ zɛ ə Klâys kyi sê ghâsènì, kɨ̀sə ə nyì pî èkwu kɨ̀sə ə̀ nyi endam, kɨ̀sə ə̀ nyi sètsì kɨ̀sə ə̀ nyi etu ə tendâʼàvè, kɨ̀se ə̀ nyi etwɔʼ ekwùtwəyn. Kɨ̀sə ə̀ nyi ashîŋə̂ kɨ̂ynə̀ ə ghâsènì nyi ətəyn, kɨ̀sə ə̀ nyi kɛ ə ke tə pə̂. 39Kɨ̀sə ə̀ nyi atyaʼ ə mbi kɛ ə ke nyi ekwùtwəyn, kɨ̀sə ə̀ nyi kɛ ə ke nyi ə chi, fɨa kyîke va əfètə̂ èfɨa vɛ ə Zhə̀fè nyi mə Fe ə pom kɛ ə ke kaʼa ə ke chyase ghâsènì ətê èkɔ̀ŋ zɛ ə Zhə̀fè kyi sê ghâsènì tɔynə̂ sê Njisə̀s Klâys Pɛ̂pɛ ə̀ ghâsènì.

Currently Selected:

Lûm 8: bfm

Highlight

Compare

Copy