YouVersion Logo
Search Icon

Matyò 3

3
Ə ezaʼlê ə Njɔyn Foə M̀mòze
(Mâk 1.1-8; Lûk 3.1-18; Njɔyn 1.19-28)
1Ə shɨŋ nə zɛ, Njɔyn Foə m̀mò ə ndùə elùʼ endaʼ ashəshəze ə Njòndyâ ə zhə̀tə̀ sə̂ ndàʼà ə eghɛ ə Fezhə̀zè. È tè ndàʼa pîə nə, 2“Ghàyn kəmne ə ghànə sepi, kûmə̀ nə fɔ̂nə Fezhə̀ və paʼsê.” 3Njɔyn tè nyi wùə vɛ ə fɨ̀aʼtè Èsayà tè wàmnə̀ kûmə̀ vəyn kə è pì nə:
“Wùə viu ndàʼà elùʼ ashəshəe nə,
‹Ghàyn pɨaʼte sê pə̂yn ə Pɛ̂pɛze.
Ghàyn nəyn ə ndom mə vəynve ə nânə̀.›”
4Ndzɨsə Njɔynse tè nyi mə ə tɨm è nyuŋsə nyâm zhizè e tɔŋtə̂ nə Kamɛ̀l.#3.4 Kamɛ̀l: Ə̀ nyi nyàm mə è nyi kə nyàmə̀ mbɔ̀lɔʼ pɨaʼtè èfɨa elùʼ ashəshəve È tè kol fekô fə pfɨ̀ə nyàmfè ə və chɨ̀ŋə fèkò. Fɨazhiə ə vəyn tè nyi sepɨyn è ndûvè 5Ghɨghe ə pə̀ sê vəyn mə ndo ə Njèlusalɛ̀m, è pɨ̂as endaʼ ə Njòndyâvè ekɨ̂m, è ndaʼ tekɨ̂m etipì ə tsô èghaʼâ ə̀ Njondàyn. 6Ə pə̀ kə ghənə tsɛ̂ fɨ̀aʼtè tə ghənə̂tè, è və fo m̀mo sê ghənə ə tsô Njondàyn.
7Ə pə̀ kə Njɔyn fe tsɨ̀tsɨ̂ ə̀ ghɨ̀ə Falàsîə è ghɨə Sandùsîə ghe pə̂ nə è fo môm sê ghənə, è və pìə sè ghənə nə, “Mbam sɨ̂nə̀! Ə̀ tɔfse nde ghàynə, kə ghànə mɔ̂msə̀ se tə epɔynsê zɛ ə Zhə̀fè nyi se tom sê ghàyn ə? 8Ghàyn nəyn ghɛ ghɛ ə ghe nə̀ chwîtə̀ nə ghàyn ə kə̀mnè ə ghànə sepi. 9Kə ghàyn ə kwâʼtə̀ nə ghàyn kàʼa ə ghàyn tə pɔynsə̂ ə Fezhə̀zè kûmə̀ nə ghàyn pìə nə ghàyn nyi əghɔ ghɔnə sê Aplàghâm. M tsâ sê ghàyn nə Zhə̀fè kàʼa ə fe nəyn ə chi ghɨnə kɛse sə ghɔyn sê Aplàghâm. 10Njàm nyîə nyi è pɨaʼtêzè se kwə̀lə̂m mkâʼ ə te ghàŋ. Ə faŋ pî fèkâʼ fèkè se mu etwɔm echûŋvè, ə kwə mâʼà ewùs. 11M fo m̀mo sê ghàyn è môm mə tsòm se tyə̀yn nə ghàyn ə kwiynê ə ghànə sepi. Pîza vɛ ə è pə̀ ə mì epàm nə̀ fo m̀mo sê ghàyn è Zuʼse Ŋwaʼase è wusve. È tsɛ̂ ndò mi. M kwənə pî va se pɨ̀aʼà sepfɨ sə vəynse. 12È kyi ke àshə̀ʼ ə vəynke ə və gho lɨmtə̂ se foptê əsesɔ̀f. Shɨ̂ŋə̀ kɛ ə è shə̀ʼ mɨ̂sè, ə è nji sɔ̀fsè ə è ndəm ə vəyn etwəyn. Pîza nyi se nyɔ̀ʼɔ epfɨ̂ŋ ewùs, mə ve pɛ̂ ndɨmə̂ va.”
Njisə̀s ə fi môm
(Mâk 1.9-11; Lûk 3.21-22)
13Ə̀ tè nyì fumə ashìŋə̀, Njisə̀s ə ndò apàs endaʼa Ngalìlîkè ə pə̀ sê Njɔyn ə tsò Njondàyn nə Njɔyn fo môm sê Vəyn. 14Pîza Njɔyn e mɔ̂msə̀ se nə̀yn nə Njisə̀s kwiyne kwâʼtè ə Vəynze pîə nə, “Ə̀ kyi ghò se fo m̀mo sê mi, ə pɨlə pə̀ ghò nə m fo môm sê ghò zayn zə?”
15Pîza, Njisə̀s ə pə̀ynsə̀ sê vəyn nə, “Za ə zə nyi ke zamə kè fa ashìŋə̀. Famə endom, ə ghâsènì nə nəyn ə̀ghɛ ə̀kɨ̂m ghɛ ə Zhə̀fè kyiŋə.” Njɔyn ə se pomə̂ se fo Vəyn è môm.
16Njisə̀s tè fi mɨsè m̀mo, ə fɨə pə̂ ə tsô. Kwutwəynve ə chwìə, È və fe Sèzuʼ sə Fezhə̀sè se tso pə̂ nyi ke kə akwɨ̀l ə masə̂ ə və atu. 17Kè sə ashìŋə̀, kyə̀ ə fɨ pə̀ ekwùtwəyn ə piə nə, “Ə̀ vɨ̀nə nyi Va èkɔ̀ŋ vɨ̂m, È nə̀ Mi M saŋnə̂ tsɛ̂sə̀.”

Currently Selected:

Matyò 3: bfm

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy