Ətefɨ̂aʼ 24

Ghɨ Njûs ghə pì ghɛghe ə Pɔ̂l ə tu

1Ə̀ tè nyi epàm ə mtuʼ mtâyn, Ànàniyàs wùə èkɔʼsə nə èshyə̀ engaŋtə kwəynə ə ndò tso ndûə ə Kàisalyà, è chəʼ shîse è wùə èsaʼa nə̂ sèsaʼ zə vəynze nyi Tètulùs. Ghənə ə pə̀ ə tu apàs endaʼke əshi Felès ə tsà èghɛ zɛ ə ghənə tè pi nə è nə̀yn pofsê ndò. 2Ə pə̀ kə tɔŋɔ pə̂yn Pɔ̂l, Tètulùs ə zhə̀tə̀ se pì eghɛ zɛ ə è nə̀yn pofse mə è pìə nə:

“Pɛ̀ apɨəyn èghaʼâ, ndom etɔfə vɛ ə ò nyi mə o chisê kɔʼ pəyn ətəyn sə aghaf etyâkè nyi mə və pə̀yn ghàs è pɔ̂ynè, ghɛ etsɨəghe e nyi mə ə nə̀yn sə chùŋ èndaʼ ə ghasènìze. 3Nâʼà pi ghayn, è nâʼà pi endom èkwə̀ ə pɛ̀ àpɨəyn Felès, ghàs lotə̂ saŋnə̂ ndò se ghò. 4Endom se tàʼa tsɛ̀sè ashîŋə̀ kɛ ke, pîza m chyatə̂ ghò nə o kyi wəynsê ewìynze se zɨtê eghɛ zɛ ə ghàs kyiŋə se taŋə kɔʼɔ pə̀yn. 5Ghàs ə tè fe nə wùə vɨ̀nə nyi wùə ə̀ ngəʼ, səʼə̀ ngəʼ əghɨə Njûs ghə fètəyn kè mbi èkɨ̂m. Ə̀ nyi vəyn ètuke se nɔ̂yn əghɨ̀ ə Nazalɛ̀tkè 6-7mɔ̂msə̀ kəpi se pofsə̂ ndɛ ètsə̀mə, ghàs ə ko vəyn. 8Ə ò pfɨf ghɛ sê wùə vɨ̀nə, ə nâʼà ghò è ngɨŋ zɛ̂zè nə ke sê vəyn nâʼà ə̀ghɛ ə̀kɨ̂m ghɛ ə ghàs pìə nə è və nə̀yn pofsê.” 9Ghɨ Njûs ghè ə tsɨ̀yntə̀ piə kə nə, ə̀ ndɨŋ nyi èghɛ səmɔʼ nə è və tè nə̀yn pofsê.

Pɔ̂l ə wàmnə̀ se tsàmtè ngɨŋ ə vəyn fu ə Felès Ngômnò əshi

10Tu apàs endaʼ nə kɛ ə fo èndom nə Pɔ̂l wamne, è və pìə nə, “M ke ndo nə ò saʼ ndaʼ zɨ̂nə̀ zôyn sə sepìŋ setsɨəse, m nyîə saŋnə̂ kə m tyəm əghò shi zôyn se wàmnè se tsàmtè ə ngɨŋ zɨ̂mè. 11Ò kàʼa ò kyiŋ fe è ngɨŋ zɛ̂zè nə ə̀ tè nyi mə tuʼm̀ paʼà tsɨ̀ tsɛ m̀ghɨm njòse pɛ̀, mə kɔʼɔ ə Njèlusalɛ̀m se ngɨmnê. 12Ghɨ Njûsə̀ tè paʼà fe m wamnə̀ saʼnə̂ èghɛ ghasè wùə vîvè ə ndɛ ètsə̀mə, pi se fe mi mə m ndwisə̀ èno ə ndɛ àtsɨ̂ynte, pi elùʼ vîve ə fètə̂ èndaʼ. 13Ghənə vayn kàʼa ə tyəyn kə chwìə ghɛ zɛ ə ghənə pîə nə mə nə̀yn pofsê. 14Pîza m pomə̂ ndò nə m nyîə ngɨmnə̂ Fèzhə̀ fə ghə̀pɨ̀a əshi fasfe, chumtə̀ èndom nə vɨnə mə, ghənə e pîə nə ə̀ nyi endom akaŋve. Pîza m pomə̂ kəpi ndò nâʼà pi èghɛ èkè zɛ ə nyi mə ə nyàʼ ə Mosîs alàŋ è ŋwàʼlè sə se fɨ̀aʼtèsè. 15M kyi kepî èkwaʼtè èghɨ sê Zhə̀fè kə ghɨ ghɨ̀nə kyi, te nyi nə, ghɨ ghəkɨ̂m kɨ̀sə ghe chûŋə̀ kɨ̀sə ghe pighe tə kɛsə̂ zômə̀. 16Kûmə̀ zɨnə mə, m mɔ̂msə̀ se nə̀yn nə təm ghɨmghe ə saʼa va mi ə Zhə̀fè shi è kɨsè ə ghɨghe əshi.

17Ə tè nyi kə m tsɛsè pìŋsè setsɨ̀ mə m va ə Njèlusalɛ̀m, mə ndùə fumə kə tom nə m pəyn fo èkɛ sê ghɨ ghɨmə, ə m fɨyn fo èfo se Zhə̀fè. 18Ə̀ nyì kə m tè nə zɨnə mə kə ghənə tè pə̀yn fe mi ə ndɛ ètsə̀mə mə mə nə̀yn mɨsè ghɛ nə ghɨ̂yn. Nɔ̂yn kyîke tè va fu, tâsè zhize va kepî. 19Pîza ghɨə Njûs yîghe mə ghe fɨ endaʼa Esiyàzè tè nyîə nyi fu. Ghənə è ngɨŋ sə ghənə̂sè fə nyì sə̂ nyi fayn se tsàyn sê ghò nə m tè nə̀yn pofsê ndò ghɛ zhîzə. 20Ə̀ va za, ə ghɨ ghɨnə fayn tsayn pi zɛ ə ghənə tè fe mi mə mə nə̀yn kə ghənə tè fe mi ashi ə saʼke. 21Ə̀ tsɛ̂ kə va ghɛ zɨ̀nə̀ èmɔ̀ʼ m tè tɔŋte fɨsê kə m tè tyəm ashi ə se saʼa: ghàyn saʼa mi ndâyn kûmə̀ nə m pomə̂ nə ghɨə tə fɨnə zômə̀.”

22Felès kə ə̀ tè nyi mə ə fɛtê tsayn sê vəyn kûmə̀ tèndom tə Fezhə̀tè, è və tyəmsə̂ saʼà təyn. “Ə pə̀ kə Lìsiyàs tuə sesokə̀ʼ ke pə̂yn,” È və tsà se ghənə nə, “M nə̀ tsâ kə saʼ zâynzè tsɛ̀.” 23È və tsɛ̀sə̀ sə àlâŋ nə tuə sesokə̀ʼ kɛ ə ke tè naynə Pɔ̂l nə kə tsɨ̀ŋnə̀ vəyn, pîza ə kə fo vəyn èndomve nə soyn sə vəynse ə pə̂ tɔ̀ʼnə̀ è vəyn.

Pɔ̂l ə wàmnə̀ sê Felès ə Ngômnò

24Ə pə̀ kə tuʼ mîmè tsɛ̀ Felès ə pə̀ yî zhwîə vəyn Ndusilà mə ə̀ tè nyi wùə Njûs. È və tomə nə ə pəyn è Pɔ̂l ə zɨtə̂ kə è wàmnə̀ kûmə̀ èsamsê ə Klâys Njisə̀szè. 25Kə Pɔ̂l tè wàmnə̀ kûmə̀ èndam ə chichize, è ndom vɛ ə wùə kàʼa è və chisə̂ ngɨŋə̂ vəyn ətəyn, è saʼ zɛ ə ze nyi se tə pə̀yn, fâynzè ə ko Felès, è və pìə nə, “Zə kwəyn za! Ò kàʼa ò ndo zôyn. M nə̀ tɔŋɔ̂ kwəynsə̂ ghò ashìŋə̀ kɛ m kyi zhəmke. 26Ə̀ tè nyì fumə ashìŋə̀ è ve kwâʼtə̀ kə nə Pɔ̂l nə̀ fo vəyn ègho epàmke, kûmə̀ zɨnə mə, è ve zâŋsə̀ tɔŋɔ̂ vəyn kâ ə̀ghɛ yî vəyn.

27Ə pə̀ kə Pìŋsè tsɛ̀ sepɛ̀, Posiyùs Festùs ə pə̀ njiə eluʼ ə Felèsvè kə atu apàs endaʼke. Pîza Felès ə ndò ndɔ̀ʼɔ è fɨse Pɔ̂l ə ndɛ ə̀ chaʼ kûmə̀ nə è tè kyiŋə nə ghɨə Njûs ghə kɔ̂ŋɔ̀ vəyn.”

Currently Selected:

Ətefɨ̂aʼ 24: bfm

Highlight

Compare

Copy