Ətefɨ̂aʼ 22

1“Ghɔnyì ghɨmə è pɨ̀a ghɨmə, ghàyn zɨte ghɛ zɛ ə m tyəm ə ghàyn əshi se pì se tsàmtè ə ngɨŋ zɨ̂m.” 2Ə pə̀ kə ghənə zɨ è ve wâmnə̀ se ghənə ə ewàmnè ə Ipilòzè, ghənə ə fɛtə̂ kɨmə̂ kə mɔŋ. Pɔ̂l ə pìə nə:

3“M nyi wùə ə Njûs, mə ə tè piə mi endaʼ ə Tasùszè, ə Sìlisyà, pîza m ndəmə kɔʼ fâ Njèlusalɛ̀m kə wâ və ndɛ ə̀ ŋwàʼlè ə̀ Ngàmàlyâ. È və tə tyə̀ynsè saʼ tə ghə̀pɨ̀a ghâsènì ghəshiə sê mi nâʼà tèkɨ̂m. Ghe ə Fezhə̀zè tè tɨ̂mə̀ ə mì ewiyn kè eghɨ kə ze tɨ̂mə̀ sê ghàyn ndâyn. 4Mə tə nyàplè è ghɨ pomə ghɛ ə ghe tè chùmtə ndom vɨ̀yn ə ndə̀mə̀ ndûə kə ekwu. Mə tə ko zənə è ndômnèghè ndə̂mə̀ ghənə ə ndɛ ə̀chaʼ. 5Wùə èkɔʼsə nə èshyə̀ è ngaŋtə kwəynə è chəʼse endaʼ sekɨ̂m kàʼa ə se tɔʼte nə m pîə èghɛ səmɔʼ. Mə tə fi ŋwàʼlèsè mə se ndo sê ghənə, mə ə nyaʼ sê ghɨ ə Njûsə̀ ə Ndàmakùsghè, mə ndùə fu ə ko ə̀ghɨ nə ghɨ̂yn, ə pə̀yn è ghənə ə sechaʼ ə Njèlusalɛ̀m nə ə pɔynse ghənə.

Pɔ̂l ə tsàyn ghɛ zɛ ə ze kyàyn, kə è kɛse ə è və nyi wùə èpomə

6Ə tè nyi kə m kwi sè paʼsə̂ ndùə ə Ndàmaskùs, payn zhîze ə fɨə ekwùtwəyn, tɛ kə nyi, ə ŋwàŋà elùʼ vɛ ə m tè nyi ətəyn. 7Mə pfɨ̀ ə chi ə zɨə kə kyə̀ pì sê mi nə, ‹Sɔ̂l, Sɔ̂l, ò tsə̀fsə̀ Mi kûmə̀ ghè?› 8Mə pfɨfə sê vəyn nə, ‹Ə̀ nyì ghò ndè ə Pɛ̂pɛ?› È və pə̀ynsə̀ nə, ‹Ə̀ nyi Mi Njisə̀s ə̀ Nazalɛ̀t vɛ ə ò fo ngəʼ sê Vəyn za.› 9Ghɨ ghɛ ə ghâsè ghə̀ ghənə tè nyi əmɔʼ ə fe epayn ətəynze pîza ə tàʼa zɨə kyə̀ wùə vɛ ə è tè wàmnə̀ sê mi. 10Mə pfɨf sê vəyn nə, ‹M kwi zayn zôyn ə Pɛ̂pɛ?› È və pìə sê mi nə, ‹Ndwi ə nji ndùə əfètəyn endaʼ ə Ndàmaskùszè, kə ə tsayn ghɛ zɛ ə Zhə̀fè kyiŋə nə ò nəyn.› 11M tè nyi mə mə fòf kûmə̀ èpayn eghaʼâ zɛ ə ze tè fɨ ə mì ekyàʼ, ghɨ ghɛ ə ghasè ghənə tè nyi əmɔʼ ə kyiə mi akɔyn ə njìə njiə ndûə è mi ə Ndàmaskùs.

12Wùə vîvè tè nyîə nyi fumə endaʼ zə vəynze nyi Ànàniyàs, ə̀ nyi wùə Fèzhə̀ ndəmə̀ àlâŋ, nâʼà ə̀ghɨ ə Njûs ghɛ ə tè ndamə fumə e kɔʼsə̂ vəyn àchûŋ. 13È və pə̀ tyəmə̂ ə mi ngwùŋ ə pìə sê mi nə, ‘Ànyì vɨ̂m Sɔ̂l, kɛse fe luʼte.’ Kè fumə ashìŋə̀, mə fɨnə fe ə naynə̂ ə fe vəyn. 14È və pìə sê mi nə, ‹Zhə̀ fɛ ə pɨa ghasènìə tè kɔʼsə ə chɔʼ ghô nə ò nəyn kwâʼtè ə Veynze, ə ò fe wùə èfɨaʼa ə̀ Vəyn vɛ ə è nyi chichi, ə ò zɨ kə è wàmnə̀ è kyə̀ vəyn zə ngɨŋ. 15Kûmə̀ nə ò tə tyəmə kə tsɛ̀ èsaʼ sê vəyn, ə ò tsayn sê nâʼà pîndè ghɛ zɛ ə ò fe ə fɨnə zɨə. 16Pî zôyn nyi, ò lɨmtə̂ ghè? Ndwi kɔʼ ə fiə m̀mo kə ə shu tsɨsè sèpi sɛse, mə ò tsə̀mə̀ ndûə sê Vəyn.›

Pɔ̂l ə tsàyn kə Pɛ̂pɛ tom vəyn sê ghɨatumə

17Mə kɛsə ndùə ə Njèlusalɛ̀m ə ndùə ə ndɛ̂ ètsə̀mə sè tsə̂mə̀, ə fe ə̀ghɛ ə telaynəlayn. 18Mə fe Pɛ̂pɛ, È və ə pìə sê mi nə, ‹Zàŋse ndwi ə ndò fɨə ə Njèlusalɛ̀m kûmə̀ nə ghɨ nə ghɨ̂yn nə̀ pomə̂ va ghɛ zɛ ə ò pìə kûmə̀ Mi.› 19Mə pə̀ynsə̀ nə, ‹Pɛ̂pɛ, ghənə nyîə ke nâʼà àchuŋ nə mə tə ndù ə sendɛ sə atsɨ̀yntese, ə ko pusə ə̀ghɨ ghɛ ə tè pomə sê Ghò. 20Ə̀ tè nyi kə ə zhwi Shìtifɨ̀yn kə̂ è tè tyəm kə tsɛ̀ èsaʼ nâʼà mi è ngɨŋ zɨ̂mè tè nyîə nyi fumə, pîə nə ə zhwi vəyn.› 21Pɛ̂pɛ ə pìə sê mi nə, ‹Nduə, kûmə̀ nə M nə̀ tomə ghò nâʼà sə aghaf sê ghɨ ghɛ ə̀ vachi ə̀ghɨ ə Njûsghè.›”

22Nɔ̂yn ətəynke ə zɨtə̂ se Pɔ̂l se kɔʼɔ zaʼâ andiŋ kyîke, ghənə e puʼə m̀pɔ̂ŋ è kyə̀ se tɛse pîə nə, “Ghàyn ndo è vəyn! Ghàyn zhwi vəyn! È kwəynə̂ va se ndam.” 23Kə ghənə tè puʼə pɔ̀ŋə̀m, pɨlə̀ sèndzɨs sə ghənə̂sè ekwùtwəyn, maʼà kɔʼsə̂ àpɨ̂l ekwùtwəyn. 24Tuə sesôkə̀ʼ nə kɛ ə tsɛ̀sə̀ àlâŋ sè ghɨə vəynghe nə ə nji nji è Pɔ̂l əfètəyn mbàyn ə pus vəyn nâʼà àchûŋ kə è tsayn nə ghɨ Njûsə̀ tè puʼlə m̀pɔ̂ŋ kûmə̀ vəyn nyi kûmə̀ ghè ə. 25Ə pə̀ kə ghənə kol vəyn kyiŋə se pus, è və pìə se tu ə se sokə̀ʼke nə, “Lâŋkè pomə̂ ndò nə ə pus wùə Lûm ndɔ̀ʼɔ ə saʼ vəyn se fe eghɛ zɛ ə è pofse ə̂?”

26Tuə sesôkə̀ʼ nə kɛ ə zɨə zɨnə mə ə ndùə pfɨfə sê tuə sesôkə̀ʼ eghaʼâkè nə, “Ò nə̀ kwiə zàynzə? Wùə vɨ̂nə nyi wùə Lûm.”

27Tuə sesôkə̀ʼ nə kɛ ə ndùə sê Pɔ̂l ə pfɨfə sê vəyn nə, “Tsàyn sê mi nə ò nyi wùə Lûm ə.” Pɔ̂l ə pə̀ynsə̀ nə zhi nyi wùə Lûm.

28Tuə sesokə̀ʼ kɛ ə pìə nə, “M tè pə̀yn sə wûə Lûm mə mə ndàʼ kɛ etsɨəve.” Pîza Pɔ̂l ə pìə nə ə tè lote pîə zhi endaʼa lûmzè.

29Kè sə ashìŋə̀, ghɨ ghɛ ə tè nyì se pfɨftê əghɛ se vəyn, ə kɔ̀ytə̀ pə̂ epàm. Nâʼà pi àtu ə sesokə̀ʼ ke è nyi è fâynzè nə zhi ndəm Pɔ̂l ə sechaʼ mə ə̀ nyi wùə Lûm.

30Tuʼfe komtəfe, kə tu ə sesokə̀ʼke tè kyiŋə se kote nə ghɨə Njûsə̀ fe ghâmə̀ Pɔ̂l sə ghe ə, è və zà Pɔ̂l, ə tsɛ̀sə̀ àlaŋ nə ghɨ kɔʼsə nə eshyə̀ ə ngaŋtəghe, è chəʼse kɨ̂m Zuŋte. È və njìə pə̂ è Pɔ̂l ə ghənə əshi.

Currently Selected:

Ətefɨ̂aʼ 22: bfm

Highlight

Compare

Copy