Profet Sekaraea 14
14
Lord ginauna funei fruni nauthoglu igne
1-2Filou, nogna narane Lord na ginauna mei. Ka narane tuana, mana ginauna kafe atha mei naiknodi keha kantri are mala salo fodu mala magra ka namono biꞌo Jerusalem. Aonu, armi ginauna uluni atha namono igne. Mare ginauna tei lamna suga ka namono igne mala atha fajifla nodi gobigna lepore, eghuteuna tufa glepo igre kate thofno filodi naiknore. Aonu mare goigonidi goro gaꞌase re. Eghuteuna mare ginauna huhurudi keha mae nalhaꞌu nei goro gaꞌase teu igre mala tei baludi, eghuteuna keha re mala lisei faleghu ka namono biꞌo Jerusalem. 3Aonu Lord ginauna jifla tei mala magra ka kantri igre jateula puhi te sughu eni fabrahu mana tifa kate magra na. 4Ka narane tuana, mana ginauna kegra kligna ka Thogele Gaju Olivi ke kosi Jerusalem ke maghati, eghuteuna thogele igne ginauna fnota farihotei. Kaisei vido na ginauna thugha tei ke raru, eghuteuna keha vido na thugha tei ke mata, eghuteuna glogu biꞌo ginauna au farihotei, funu maghati tei posa ke mosu. 5Ghotilo ginau rikha tei salaꞌu ka glogu igne, glogu igne ghilei tei thoke ka namono Asal. Uve, ghotilo ginauna rikha faghose jateula kuꞌemi ghotilo teke rikha ka narane gna King Iusaea, mae ihei teke king gna Juda tifa. Aonu nogu Lord God iara ginauna mei balu nogna engel blahi.
6Kate mei narane tuana, ginauna theo kaisei naphae, eghuteuna ginauna na theome reka fara, eghuteuna ginauna theo aes. 7Ginauna na theo keha narane na jateula narane tuana teuna. Ginauna na theo kaisei naphae fei hamerane nei theo kaisei gromno fei bongi. Nu fei grafi na, naphae ginauna nake pulo mei. Eghuteuna Lord kolho te laseni narane igne na thoke mei na.
8Kate mei narane tuana, khoꞌu te tusu mei karha na ginauna loloro mei funu Jerusalem. Kaisei vido gna na ginauna loloro sukha fei Thongna Lehe, eghuteuna keha vido na loloro tei fei Thongna Mediterenian. Neubane nakhete ba theome nakhete, khoꞌu igne ginauna loloro fabrahu. Ginauna na theome tangomana te krango na.
9Lord ginauna King ka nauthoglu igne. Ka narane tuana, Lord ngala God na, eghuteuna naikno te gnafa heva te heva ka nauthoglu igne ginauna pogho soru ka mana kolho.
10Eghuteuna ka vido te gnafa ka glose igne, funu ke raru Geba tei posa ke mata Rimon, ginauna nake sare. Nu Jerusalem ginauna au thegna ka nogna vido kligna ka thogele. Gringni gna na ginauna funu ka Grengatha gna Benjamin tei ka Grengatha Tifa na tei posa fei Grengatha Sulukhu. Eghuteuna funu ka nogna suga mala toetoe mae Hananel, tei thokeni nogna vido mala ei waen malagna king. 11Naiknodi Jerusalem ginauna au fakeli fabrahu. Theo kaisei glepo tangomana nate mei goigoni ni na.
12Lord ginauna snakreni kaisei fogra te diꞌa mala thokedi naikno te gnafa teke magrini Jerusalem. Thinidi naiknore ginauna megei nga boto, eghuteuna tathadi nei glapidi teu naiknore jaola ginauna megei nga boto. 13Ka narane tuana, naiknore ginauna mhaghu nodi fara balu bobolo biꞌo. Eghuteuna mare ginauna magra fari thedi, eghuteuna fariuriu mala aknu falehe kheradi thedire. 14Naiknodi Juda ginauna jaola magra Jerusalem. Eghuteuna famane glepodi keha kantri te au falithui Jerusalem jateula gol, nei silva, nei pohe te kmana fara teu igre naiknodi Jerusalem ginauna salo gobigna lepo igre ka mare. 15Eghuteuna nafnata fogra te igne la ginauna thokedi hose, mule, kamel, dongki, nei keha nodi glepo tautagu mare te au ka nodi vido mae naoka te lisei haghe mare nodi suga tapuale tagna na.
16Aonu leghu finogha na, naiknodi keha kantri teke mei magra Jerusalem igre karhau, mare ginauna mei Jerusalem mala kilo fnaknoni Lord, King ihei te au nolaghi fateote'o, nei mala eni Narane biꞌo te mala Au ka Grorofe Ikoi. 17Jame naikno gna kaisei kantri tirogna mei Jerusalem mala kilo fafnaknoni Lord, King ihei te au nolaghi fateote'o igne, ginauna theo kaisei nakhete nate soru ka nodi kantri na. 18Eghuteuna jame naiknodi Ijep tirodi mei te mala eni Narane biꞌo te mala Au ka Grorofe Ikoi igne, Lord ginauna theome kuru mei nakhete ka mare. Eghuteuna Lord ginauna kuru mei fogra te diꞌa na mala thokedi mare, jateula teke kuru mei mana ka keha kantri teke tirodi mei ka gaghamu igne ra eghu. 19Tutuani fara, igne papara nate thokedi naiknodi Ijep, nei naiknodi keha kantri te tirodi mei te mala eni Narane biꞌo te mala Au ka Grorofe Ikoi.
20Ka narane tuana, belo te gefe ka nhughadi hose, mare ginauna rioriso eghu cheke igre, “Fablahi malagna Lord.” Eghuteuna suspen te au lamna ka Sugablahi, ginauna blahi, thofno jateula dis blahi te au rhegna olta. 21Eghuteuna nodi suspen te gnafa naiknodi Jerusalem nei nodi keha naiknodi Juda, ginauna blahi malagna Lord. Naiknore ginauna hata suspen mala kuki nafnahi blahi mala fafara. Eghuteuna ka narane tuana, mae bisnis ginauna nake theome tangomana teke eni bisnis lamna ka nogna Sugablahi Lord mae ihei te au nolaghi fateote'o.
Currently Selected:
Profet Sekaraea 14: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
