Profet Sekaraea 1
1
Lord kilo fapulodi nogna naiknore
1Ka fahana nhigra gna fapea finogha te King Darius te funei fruni kantri Pesia, cheke gna Lord na ne mei ka Profet Sekaraea, thugna Berekaea, gragna Ido.
Mana ne cheke eghu, 2“Iara Lord iara neke diꞌatagu fara ka kuꞌemi ghotilo ra. 3Naugna puhi igne, iagho mala cheke eghu ka naiknore: Lord mae ihei te au nolaghi fateote'o igne, mana ne cheke eghu, Tore! Ghotilo mala ke figri ke pulo ka iara! Jame te eghu ghotilo na, iara ginauna nake pulo mei mala ke au balumi ghotilo. 4Ghotilo ginauna thosei leghudi puhidi kuꞌemi ghotilo tifa ra. Tifa na, mae profet neke chekeni nogu cheke iara na ka mare gnafa mala lilisei puhi te diꞌa re nei nakhibodi re. Nu mare tirodi fanomho ka nogu cheke iara na, eghuteuna mare jaola tirodi te leghu ghau iara na. 5Kuꞌemi ghotilo ra, mare la lehehi. Eghuteuna mae profet igre, gognarona theo kaisei ka mare te karha na. 6Nu gobigna lepo teke cheke lao iara ka nogu mae profet tifa, mala cheke ka kuꞌemi ghotilo tekura, mare neke tirodi fanomho ka nodi cheke mare igre. Eghuteuna ka puhi igne, iara neke paradi mae kuꞌemi ghotilo ra.
“Aonu mare lilisei puhidi mare te diꞌa igre, eghuteuna neke cheke eghu, Lord mae ihei te au nolaghi fateote'o igne, mana doglo kolho te para ghita tahati eidi puhida tahati te diꞌa re. Glepo igre, mana neke ghathodihi mala thoke mei tekuna, eghuteuna glepo igre la thoke meihi ne horoghoto ka unha teke chekeni mana na.”
Mifi ululahu: Hose
7Ka varadaki fati narane ka fabotho kaisei nhigra, igne nhigra Sebat, ka fapea finogha King Darius te funei fruni Pesia, Lord neke cheke mei nogna cheke na ka iara Profet Sekaraea, thugna Berekaea, gragna Ido.
8Ka bongi, iara ne filoni kaisei mifi. Ka mifi igne iara ne filoni kaisei engel nogna Lord ne gnokro ka hose ukru te kegra ke paridi gaju ikoi te kiloni mare matel ka kaisei glogu ikoi. Ke leghugna mana keha mae gnokro ke kligna hose te ukru, nei hose te via, nei hose te vegha.
9Eghuteuna iara ne ghusna eghu ka engel igne, “Mae biꞌo, unha eghu gaoghatho gna glepo igne?”
Nu keha engel na ne cheke eghu ka iara, “Iara ginauna fakakhana gaoghathodi re ka iagho.”
10Aonu engel te kegra fari hoteidi gaju matel igre ne cheke eghu, “Lord neke kuru mei mae igre mala filo tafri ka nauthoglu igne.”
11Eghuteuna mae te gnokro ka hose igre ne cheke eghu ka engel igne, “Ghehati neke tei tafrihi ka nauthoglu igne, eghuteuna ghehati filoni nauthoglu igne au kmu nei naikno au fakeli.”
12Engel nogna Lord igne ne cheke eghu, “Lord, iagho au nolaghi fateote'o. Nabagna fitusalei finogha te diꞌatamu iagho ka naiknodi Jerusalem nei ka keha namono lithui ni Juda. Niha fata diꞌatamu eghu fabrahu ka mare sagho ia? Niha nau nate falalase iagho te kokhonidi mare na?” 13Eghuteuna Lord ne famane cheke tughu ka fapea engel teke cheke balugu iara na, mala pala hagheni gaoghathogna engel.
14Aonu engel igne neke cheke eghu ka iara, “Iagho mala eha fabiꞌo ka Lord mae ihei te au nolaghi fateote'o igne, cheke eghu, ‘Namono Jerusalem te au ke kligna Thogele blahi Saion, nogu namono iara, eghuteuna iara au nogu gaoghatho rheta tagna! 15Nu iara diꞌatagudi fara naiknodi keha kantri te fahaehaghe fara nei ghathoni nakarha na blagna kolho teu igre. Tifa na iara neke theome raꞌe diꞌatagu kolho ka mare, nu gognarona mare paradi nogu naiknore salaꞌuni unha te magnahagheni iara na.’
16“Aonu, Lord ne cheke eghu, ‘Iara ginauna nake pulo mei Jerusalem, mala fakakhana nogu diꞌanagnafa na ka mare. Eghuteuna mare ginauna babana fapulo nogu Sugablahi iara na, eghuteuna jaola ke eni fakeli namono igne.’
17“Iagho jaola cheke eghu, ‘Igne unha te chekeni Lord mae ihei te au nolaghi fateote'o: nogu namono iara igre ginauna nake famane keli. Iara Lord ginauna nake toghodi naiknodi Jerusalem, eghuteuna vahini namono igne mala nogu iara.’ ”
Fapea Mifi: Fati hona nei fati mae mala loku ka aean
18Iara neke filoni keha mifi na, ka mifi igne iara ne filodi fati hona buluka. 19Eghuteuna iara ne ghusna eghu ka engel te cheke balugu iara igne, “Unha eghu gaoghathodire glepo igre?”
Mana ne cheke eghu, “Igre keha kantri te au nodi nolaghi, te ngolhi fajifladi naiknodi Juda, nei naiknodi Israel, nei naiknodi Jerusalem.”
20Aonu Lord ne fakakhana ka iara fati mae mala loku aean te louloku teu fati hama biꞌo. 21Eghuteuna iara ne ghusna eghu ka engel igne, “Mae are mei mala ei unha sarea?”
Mana ne cheke eghu, “Hona are eidi kantri te au nodi nolaghi te roꞌeni Juda eghuteuna famamhaghudi mala theo kaisei te kegra haghe ka mare na nu ngholi fajifladi kolho. Nu mae te mala horo aean are mare mei mala famamhaghudi kantri igre, nei mala thofno goigonidi mare.”
Currently Selected:
Profet Sekaraea 1: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
