Eksodas 40

Mare fakegra haghe Suga Tapuale te Blahi na

1Lord ne cheke eghu ka Moses, 2“Ka narane ulu lahu, ka nhigra ulu lahu gna keha finogha na, iagho ginauna fakegra haghe Suga Tapuale te Blahi mala Thafo ghau iara na. 3Iagho atha Bokis Blahi gna Nhaꞌa Cheke. Nabotho Vetula te au ka phei thina tataba igre mala nhaꞌa lao lamna ka Bokis Blahi igne, eghuteuna lilisei lamna Suga Tapuale te Blahi igne, eghuteuna fagefe lao pohe igne mala fofota chogho igne ka phei vido, mala fofotho chogho te au teu Bokis Blahi igne. 4Iagho atha Tevo te mala lilisei Bret Blahi igne mala nanhaꞌa ke demei gna pohe igne, eghuteuna nanhaꞌa glepo gnare balugna. Eghuteuna iagho atha mei thaba mala nanhaꞌa juta na, eghuteuna nanhaꞌa haghe juta igre tagna. 5Iagho atha mei Olta mala Gahu Insens te ghiha tafru ka gol, eghuteuna lilisei ke ulugna pohe biꞌo te fofotho Bokis Blahi Nhaꞌa Cheke. Eghuteuna iagho atha keha pohe na bobotho grengatha gna Suga Tapuale te Blahi na mala fagegefe ka grengatha na.

6“Eghuteuna iagho ginauna atha Olta mala Gahu Fafara na, mala nhaꞌa lao ke ulugna grengatha gna Suga Tapuale te Blahi te mala Thafo ghau iara. 7Eghuteuna iagho atha mei Dis Biꞌo mala wasi ia, mala nanhaꞌa fari hoteidi Olta mala Gahu Fafara nei Suga Tapuale te Blahi, eghuteuna iagho fafodu koꞌu tagna. 8Eghuteuna iagho fakegra haghe bara balu pohe brahu falithuini glalaba gna Suga Tapuale te Blahi na, eghuteuna fagefe haghe pohe biꞌo mala bobotho gna grengatha na.

9“Iagho ginauna atha oel blahi mala tofa katha ka Suga Tapuale te Blahi baludi gobigna lepore, eghuteuna fakelidi mala thofno blahi fara. 10Eghuteuna iagho tofa lao katha oel blahi ka Olta mala Gahu Fafara, baludi gobigna lepo gnare, mala fakelidi eghuteuna olta igne ginauna thofno blahi fara. 11Eghuteuna iagho mala jaola tofa lao katha ka dis biꞌo mala wasi igne balu pesi gna, mala thofno blahi fara.

12“Iagho ginauna atha mei Eron baludi thugna ka grengatha gna Suga Tapuale te Blahi mala titihi di ka khoꞌu, mala klino mare ka tathagu iara na. 13Iagho ginauna falao nogna pohe Eron ia mala fahaghe mana. Eghuteuna iagho atha oel blahi ia mala tofa lao katha tagna, mala fablahi ni mana, eghuteuna mana ginauna pris mala loku ranghi ghau iara. 14Iagho atha mei thugna mana ra, mala fahaghe mare nodi pohe re, 15mala fablahi di jateula teke fablahi iagho kmadi mare ia eghu mala loku ranghi ghau iara. Puhi te fablahi mae pris igne ginauna eghu fabrahu, eghuteuna iheire nate karha mei ke leghudi mare igre mala pris mala loku ranghi ghau iara.” 16Eghuteuna Moses ne edi gobigna lepo igre thofno leghuni unha teke cheke ni Lord ka Moses.

17Aonu ka fapea finogha ke leghu gna narane naiknodi Israel teke jifla Ijep, ka narane ulu lahu gna nhigra ulu lahu gna finogha tuana, Moses nei naiknore eghu ne fakegra haghe Suga Tapuale te Blahi igne. 18Ka narane tuana, mare ne lilisei pesidi re ka vido mala au dire, eghuteuna mare ne fakegra haghe thaba, eghuteuna lilisei thaba te mala loku famakudi re, eghuteuna jokra haghe khegradi re. 19Aonu mare ne lisei haghe pohe biꞌo igne ke kligna di thaba igre, eghuteuna lisei laoi keha thotoku na ke kligna gna, igne thofno leghuni unha teke chekeni Lord ka Moses.

20Moses atha phei thina tataba, teke rioriso Lord ke klignadi Nabotho Vetula igre, eghuteuna mana nhaꞌa lao lamna ka Bokis Blahi na nogna Nhaꞌa Cheke Lord. Eghuteuna mana atha phei gaju mala palagna Bokis Blahi igne ne toghu lao ka ring gna na, eghuteuna mana nhaꞌa lao thotoku gna Bokis igne. 21Aonu Moses atha Bokis Blahi igne ne lisei lao lamna ka Suga Tapuale te Blahi na, eghuteuna mana atha pohe biꞌo igne mala fofota chogho na ka phei vido, eghuteuna fagefe lao mala bobotho vido aheva te au Bokis Blahi tagna na, igne thofno leghuni unha teke chekeni Lord ka Moses.

22Eghuteuna mana nanhaꞌa lamna Suga Tapuale te Blahi Tevo gna Bret Blahi na, ke raru, ke demei gna pohe biꞌo igne. 23Eghuteuna kligna ka Tevo igne, mana nanhaꞌa Bret Blahi na ke ulugna vido aheva nate au Lord tagna na, igne thofno leghuni unha teke chekeni Lord.

24Moses atha thaba mala lilisei juta na ne lilisei lamna ka Suga Tapuale te Blahi na, ke mata ka chogho aheva Tevo igne ke raru na. 25Mana lilisei juta igre ke kligna gna Thaba igne, ke ulugna vido aheva Lord nate au tagna, igne thofno leghuni unha teke chekeni Lord.

26Eghuteuna mana atha Olta mala Gahu Insens te ghiha tafru mare ka gol igne ne lilisei lamna ka Suga Tapuale te Blahi na, ke ulugna pohe aheva te bobotho Bokis Blahi gna Nhaꞌa Cheke na. 27Mana atha insens blahi te famane sisiri keli gna na ne gahu ke kligna olta, igne thofno leghuni unha teke chekeni Lord.

28Mana atha pohe biꞌo mala bobotho grengatha gna Suga Tapuale te Blahi na ne fagefe haghe ka grengatha na. 29Mana atha Olta mala Gahu Fafara na ne lilisei ke kosi ke ulugna gna grengatha gna Suga Tapuale te Blahi na. Eghuteuna mana ne gahu kaisei buluka ne fafara eghuteuna mana jaola ne gahu flaoa te ngigno balu oel, igne thofno leghuni unha teke chekeni Lord.

30Eghuteuna mana atha Dis Biꞌo teke eni ka bras igne ne nanhaꞌa fari hoteidi Olta ghe Suga Tapuale te Blahi na, eghuteuna mana toho fafodu ka khoꞌu dis igne mala titihi mae pris. 31Aonu Moses ghe Eron baludi thugna Eron igre atha khoꞌu ne titihi ghahedi nei khame di teure. 32Eghuteuna leuleghu fata na ihei te magnahaghei tei lamna ka Suga Tapuale te Blahi na ba te magnahaghei tei rhegna Olta na, leuleghu fata na mana mala titihi fagae khame gna nei ghahe gna teure ka khoꞌu igne, igne thofno leghuni unha teke chekeni Lord.

33Mana fakegra haghe bara igne, eghuteuna mana fagefe haghe pohe brahu na ne lithui ka glalaba gna Suga Tapuale te Blahi igne nei Olta, eghuteuna mana fagefe haghe pohe biꞌo mala bobotho gna grengatha igne. Ka puhi igne, Moses ne loku fahui gloku te gnafa ka Suga Tapuale te Blahi igne.

Nogna khoveo biꞌo Lord na ne mei toku tafruni Suga Tapuale te Blahi na

34Aonu nogna grokho biꞌo Lord na ne mei toku tafruni Suga Tapuale te Blahi te mala mei thafoni God, eghuteuna siasigla gna nogna nolaghi biꞌo Lord na ne fodu ka Suga Tapuale te Blahi igne. 35Eghuteuna naugna igne, Moses theome tangomana te ruma ka Suga Tapuale te Blahi igne.

36Ka narane naiknodi Israel te nolo tafri ke lamna namono nagou na jateula igne eghu: kate haghe grokho igne te tei kokoni Suga Tapuale te Blahi na, naiknore leghuni ne jifla ka nodi vido na mala ke tei ka keha vido na. 37Nu jame grokho igne toku tafruni fabrahu Suga Tapuale te Blahi igne, naiknore na au kolho ghilei thokeni narane grokho igne teke haghe na. 38Eghuteuna ka narane te nolo tafri naiknore ke lamna gna namono na teuna, leuleghu fata na naiknore tangomana te filoni nogna grokho biꞌo Lord igne ne toku tafru fabrahu Suga Tapuale te Blahi igne ka narane na. Eghuteuna leuleghu fata bongiro na, naiknore tangomana te filoni kaisei khaꞌaghi te phae fabrahu ke lamna gna grokho tuana.

Currently Selected:

Eksodas 40: mrn

Highlight

Copy

Compare