Eksodas 25
25
Lord ne toredi naiknore mala atha mei glepo mala eꞌei nogna suga tapuale God
1Aonu kate au teu mae Moses ka thogele igne, Lord ne cheke eghu ka mana, 2“Chekedi naiknodi Israel ra mala atha mei nodi fafara re ka iara. Eghuteuna iagho atha mei unha te magnahaghei totogho mare ka nafnata gaoghatho te keli.
3“Igre u nafnata glepo te mala atha te mei ghotilo ka iara re: gol nei silva nei bras, 4nei koten te blu nei ukru, nei pohe vegha teke hohoro ka khakla sipu, nei famane pohe teke hohoro ka khakla nanigot, 5nei guli sipu nalhaꞌugna te eni faꞌukru, guli vena, thaba gaju akesia, 6oliv oel mala juta, sitha mala gahu insens, nei oel blahi mala taofidi mae pris, 7famane thina ukru te kiloi soham, baludi keha nafnata famane thina mala famamhaku ka nodi phoko blahi te brahu hatimare mae pris te kiloi efod, nei paos te fagefe soru mare ka babango dire.
8“Iagho ginauna chekedi naikno ra mala hohoro kaisei nogu vido blahi iara, eghuteuna iara ginauna au fari hoteidi mare. 9Eghuteuna ghotilo mala horo Suga Tapuale te Blahi igne nei gobigna lepo te mala au ke lamnagna suga igne, thofno leghuni unha nate falalase iara ka iagho igne.”
Bokis Blahi eigna nogna nhaꞌa cheke Lord
10Lord ne cheke eghu ka mae Moses, “Iagho ginauna chekedi naikno ra mala eni kaisei bokis blahi ka thaba akesia, brahugna na kaisei gobi nabotho glima sentemita, eghuteuna krepagna na namno salei fitu sentemita. Eghuteuna haghegna na namno salei fitu sentemita. 11Ghotilo ghiha ka famane gol vido te gnafa ke lamna nei ke kosigna teure. Eghuteuna ghotilo ginauna eni kaisei nhugha ka gol lithui bokis igne. 12Eghuteuna ghotilo ginauna edi fati ring ka gol, eghuteuna ghotilo fagefe haghe fati ring igre ka fati gahegna bokis igne, phei ka keha phile na nei keha phei ka keha phile na. 13Eghuteuna ghotilo edi phei gaju brahu mala pala ka thaba gaju akesia, eghuteuna ghotilo ghiha tafru ka gol. 14Aonu ghotilo toghu tei phei gaju igre ke lamnadi ring igre ka phei philegna bokis igne mala pala. 15Eghuteuna ghotilo ginauna thosei koko phei gaju igre, nu phei gaju igre mala au fabrahu ka ring igre. 16Eghuteuna phei thina tataba te rioriso soru nogu Nhaꞌa Cheke iara ke klignadi igre, iara ginauna tusu ari ka ghotilo, eghuteuna ghotilo mala lilisei phei thina igre ke lamna bokis.
17“Ghotilo ginauna horo fofothogna bokis igne ka famane gol. Brahugna na thokeni kaisei gobi nabotho glimai sentemita, eghuteuna krepagna na thokeni namno salei fitu sentemita. 18Ghotilo ginauna horo phei mumuju engel ka gol eghuteuna baghi gna na tutu famaku ka hama. Eghuteuna ghotilo lilisei phei engel igre kligna ka phei khukrudi thotokugna na, 19eigna phei igre thofno vidogna thotokugna na. Kaisei engel kegra fei nheta, eghuteuna keha engel na kegra fei mairi. 20Phei engel igre fari totoi ke kligna bokis, eghuteuna filo soru ka thotokugna bokis igne. Eghuteuna baghidi re fnerha ke kligna bokis. 21Ghotilo ginauna hata phei thina nate tusu ari iara ka iagho igre mala lilisei lamna ka bokis igne, eghuteuna ghotilo atha thotokugna mala bobotho famaku. 22Iara ginauna thafo nigho nei cheke balumu iagho eghu ke kligna gna bokis igne, farihoteidi phei engel igre. Iara ginauna mei thafo nigho ka vido igne, iara ginauna tusu ari nogu chekere ka iagho mala leghudi ghotilo naiknomi Israel.”
Tevo malagna Bret Blahi na
23Lord ne cheke eghu ka mae Moses, “Ghotilo ginauna horo kaisei tevo ka thaba gaju akesia. Brahugna na thokeni nheva salei sentemita, eghuteuna krepagna na thokeni phiatutu glima sentemita, eghuteuna haghegna na thokeni namnosalei fitu sentemita. 24Ghotilo sesere thabagna re ka famane gol, eghuteuna ghotilo eni kaisei nhugha ikoi ka gol mala lalaoni ligoho tevo igne. 25Kligna ka tevo igne, ghotilo horo kaisei reil lithui, eghuteuna haghegna reil igne thokeni fitusalei glima milimita. Eghuteuna ghotilo horo kaisei nhugha ikoi ka gol mala lalaoni faligohoni reil ikoi igne. 26Ghotilo edi fati ring ka gol malagna tevo igne, eghuteuna fagegefe ka fati khukru rhedi ghahegna re. 27-28Ring igre mala loku famakudi phei gaju te mala palagna tevo igne, eghuteuna au rhegna reil ikoi igne. Eghuteuna ghotilo edi phei gaju brahu mala pala tevo igne ka thaba gaju akesia eghuteuna toku tafru ka gol. 29Eghuteuna ghotilo edi gobigna lepo tuare ka tevo igne ka thofno famane gol. Igre tapera nei dis, baludi kapu nei botol eghu nate edi ghotilo te mala lilisei waen te mala fafara ghotilo ka iara na. 30Eghuteuna ghotilo lilisei ka tevo igne Bret Blahi te mala fagaglana gna te au iara balumi ghotilo na, bret igne ginauna au fabrahu ke ulugna vido te au iara na.”
Vido mala lilisei juta
31Lord ne cheke eghu, “Ghotilo atha famane gol mala horo keha thaba mala lilisei juta. Eghuteuna ghotilo tutu gol igne mala ei pesigna nei khegragna eghu. Kapu mala lilisei juta oel ke kligna gna, ghotilo edi kapu igre mala jateula flaoa eghu, eghuteuna thinigna te gnafa mala kaisei vido gol kolho. 32Ghotilo edi namno grege ka khegra igne, thiloi ka keha phile na eghuteuna keha thiloire ka keha phile na. 33Ka namno grege igre, ghotilo edi thilo sisi ka gol te jateula sisi gaju amon teu filodi re. 34Eghuteuna ka khegra igne, ghotilo edi fati sisi ka gol te jateula sisi gaju amon teu filodi re. 35Iagho lilisei kaisei sisi ka thilo vido aheva te loku fodu namno grege igre ka khegra igne, eghuteuna kaisei sisi ke kligna gna khegra igne. 36Ghotilo tutu famaku thaba te mala lilisei juta baludi sisi nei grege teu igre ka kaisei vido gol kolho.
37“Ghotilo edi fitu juta oel malagna frem igne, eghuteuna lilisei kligna mala phae ke ulugna. 38Ghotilo ei phapala mala chochomi khaꞌaghi nei tapera ka famane gol. 39Ghotilo atha tolufulu fati kilo famane gol mala horo thaba igne mala lilisei juta nei thua nafnotu tagna. 40Kate edi ghotilo glepo igre, ghotilo mala thofno leghu fakelidi unha teke chekedi iara ka ghotilo ke kligna thogele ra.”
Currently Selected:
Eksodas 25: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
