Tashches Pedros 1
1
Tashches voryedyeꞌ Pedros muꞌ
1Yụ nash Pedro jutactyiꞌ Jesucristoty muꞌ, yụ vorjeyac räj miꞌin tsimꞌtactyiꞌ Jenꞌtyiꞌ miꞌin, paiꞌ bäꞌyity miꞌin yocsiꞌĉaĉan bäꞌyedyeꞌ jam ĉụiꞌsiꞌ miꞌin: Pontoĉan bäꞌyity miꞌin judyeyaꞌ Galaciaĉan, judyeyaꞌ Capadociaĉan, judyeyaꞌ Asiaĉan judyeyaꞌ Bitiniaĉantyiꞌ chimeꞌ miꞌin, muꞌĉaĉan bäꞌyi miꞌin. Ọij sánacdyeꞌ miꞌindyes jananaj ĉụiꞌ bäꞌyity miꞌin. 2Jenꞌ Ạvatusinꞌtyiꞌ tsun, muꞌ ĉụiꞌsiꞌyaꞌ dyijyedyeꞌ muꞌ jäꞌmiij tsimꞌtyinac jiquej miꞌin. Ĉụiꞌsiꞌ Ạꞌedyeꞌ muꞌ yuꞌtyinac miꞌin paj qui muꞌdyety Jenꞌdyety miꞌin. Yuꞌtyinac chimeꞌ paj qui chiquetinte muꞌ Jesucristo judyeyaꞌ chimeꞌ paj qui c̣hiconꞌjibunac ĉojtyiꞌ miꞌin ĉụiꞌsiꞌyaꞌ chäsh muꞌ Jesucristos. Yụ cọdyete Jenꞌ paj qui ñịbeꞌjitidyes muꞌ soꞌminac miꞌin, paj qui chimeꞌ soꞌminac maꞌjodyeꞌ ĉojtyiꞌĉandyes miꞌin, paj qui jam quijadyeꞌtum soꞌminac.
Bisjaꞌ mọꞌ soꞌmisinꞌsiꞌ Jenꞌ
3Timaꞌqueja muꞌ Jenꞌ, muꞌ Jesucristoty Jenꞌ muꞌ, Ayoꞌ tsun. Muꞌ där ñịbeꞌ ĉúsinꞌtyiꞌ tsun, mọꞌdyes qui tsun jiꞌnaꞌibusinꞌ cuvij, aty vañinjebajteyaꞌ muꞌ Jesucristo, tsun chimeꞌ tsạꞌchusinꞌ Jenꞌdyes. Q̂uinꞌ aty jam mọꞌ fibis anicyedyeꞌ tsun, Jenꞌ raꞌ soꞌmisinꞌ mọꞌ bisvaꞌquejas tsun. 4Mọꞌ soꞌmisinꞌsiꞌ raꞌ tsun muꞌ Jenꞌ anic där jämꞌsiꞌ mọꞌ, mạyedyeꞌches, mọꞌ raꞌ jam junꞌ tạbaiꞌsiꞌ mijam raꞌ mọtsis, mijam raꞌ jụꞌñisĉan mạyedyeꞌ jadyic mọꞌ, muꞌ Jenꞌ jämꞌ yuꞌtyiyinacsiꞌ, muꞌ jiꞌbisiyinacsiꞌ miꞌin. 5Anicyedyeꞌyaꞌ miꞌin muꞌ Jenꞌ ferdyeꞌyaꞌ raꞌ muꞌ yejĉoij ĉujcanac miꞌin junꞌ quiꞌ chuc ayijbanꞌyaꞌ jadyiquisĉan tupudyeꞌ, chat qui raꞌ soꞌminac c̣honꞌdyedyes mạyedyeꞌches.
6Dyijtutiñeꞌ jụijyaꞌ mọꞌ q̂uinꞌ, tupuj maꞌjodyeꞌtum raꞌ bäꞌyi miꞌin. Meꞌ tsanꞌ q̂uinꞌ ñịbeꞌ cạvetiñeꞌ miꞌin, meꞌ tsanꞌ yịjyi ñịbedyes jịꞌĉojtiñeꞌyaꞌ miꞌin, jemoñeꞌ qui namꞌ mọꞌ jịꞌĉojtacdyeꞌ jịꞌĉojtiñeꞌ miꞌin. 7Mọꞌ raꞌ jorojĉanyiꞌ chị́yac jam fibis mọꞌ anicyedyeꞌ miꞌin, mọꞌ anicsis mọꞌ. Jeshaꞌ, muꞌ mọtsity oro, tŝijyaꞌ qui namꞌ jämi, paj qui yedyej muꞌ shupqui, meꞌ buꞌyiꞌdye mọꞌ chimeꞌ anicyedyeꞌ tsun, mọꞌ chị́yac ñịbedyesyaꞌ. Jam farajjejaꞌ anicyedyeꞌ Jenꞌcheꞌ jụijyaꞌ tsun aty jiꞌjiijaꞌyaꞌ ñịbedyes, mọꞌ jorojĉan jiꞌĉuyisinꞌ jam fibis mọꞌ anicyedyeꞌ shupquiꞌ tsun, anicsis mọꞌ. Meꞌ shupquiꞌ anicyedyeꞌ jụijyaꞌ tsun, Jenꞌ raꞌ maꞌjotyisinꞌ judyeyaꞌ raꞌ timaꞌquisinꞌ tsun aty atsijbanyaꞌ muꞌ Jesucristo, chat qui raꞌ muꞌcheꞌ bäꞌjaꞌ tsun muꞌsiꞌĉan mạijquedyeꞌ muꞌ.
8Miꞌin meꞌ tsanꞌ jambiꞌ cạvetinte muꞌ Jesucristo q̂uinꞌ, mạꞌjetinte qui namꞌ. Meꞌ tsanꞌ jam cạvetinte miꞌin, anicjetinte qui namꞌ miꞌin, judyeyaꞌ därsiꞌtum maꞌjodyeꞌ cäc̣häꞌchutinte miꞌin, aty jam ọ́yaꞌ junꞌdyemꞌ tupuj chaꞌshejaꞌ mọꞌ maꞌjodyeꞌ miꞌin, 9ĉaĉaij na aty jiꞌc̣honnac Jenꞌ, anicyedyeꞌyaꞌ Jesucristocheꞌ miꞌin, soꞌmac miꞌin c̣honꞌdyedyes miꞌin.
10Muꞌin jasoꞌmitity p̂eyacdyeꞌ Jenꞌ jiquej in jäꞌmiij tashcheꞌ p̂iijbusinꞌ in c̣honꞌdyedyes tsun, junꞌ chuc raꞌ jiꞌc̣honsinꞌ tsun q̂uinꞌ muꞌ. Muꞌin fer tsanꞌ dyijtuiꞌ in, judyeyaꞌ jiꞌchäyiti in ọij p̂eyacdyeꞌ muꞌ, mạꞌjeꞌ tsanꞌ chị́yeꞌ in junꞌ buꞌyiꞌ chuc raꞌ mọꞌ c̣honꞌdyedyes ñịbeꞌjisinꞌsiꞌ raꞌ tsun q̂uinꞌ muꞌ Jenꞌ. 11Mọꞌ qui namꞌ Ạꞌedyeꞌ muꞌ Cristos ĉojtyiꞌĉansiꞌ muꞌin jasoꞌmititysiꞌ p̂eyacdyeꞌ Jenꞌ jiquej in, mọꞌ jịꞌchiqueyacsiꞌ tashcheꞌ junꞌ chuc raꞌ ñịbeꞌ cạveꞌ muꞌ Jiꞌc̣honacsity Muntyiꞌ, aty raꞌ meꞌsiꞌ chat q̂uinꞌdyemꞌ raꞌ mujuꞌchaꞌ fer buꞌyi yụꞌtac muꞌ, judyeyaꞌ raꞌ timaꞌcac juban. Muꞌindye jasoꞌmitity p̂eyacdyeꞌ Jenꞌ in mạꞌjeꞌ tsanꞌ chị́yeꞌ jämꞌ in tyi buty raꞌ muꞌ, chimeꞌdye junꞌsiꞌ buty raꞌ tupudyeꞌ ayij muꞌ. 12Jam qui namꞌ junꞌ tupuj chị́yeꞌ in, Jenꞌ qui namꞌ jéyacsi junꞌ chuc mọꞌ p̂eyacdyeꞌ sáñeꞌsiꞌ in, mọꞌ jam muꞌindyes in, jambiꞌ raꞌ muꞌindyes in cạ̈tsiꞌ, tsundyes qui namꞌ mọꞌ p̂eyacdyeꞌ. Anicdye meꞌ, miꞌin q̂uinꞌ aty seꞌvacsebi miꞌin p̂eyacdyeꞌ muꞌin voroꞌtacsity in jämꞌsiꞌ Jenꞌsiꞌ p̂eyacdyeꞌ muꞌ. Muꞌin soꞌmac in Jenꞌsiꞌ Ạꞌedyeꞌ muꞌ, mạyedyeꞌcheꞌ jijtuiꞌsiꞌ muꞌ, mọꞌsiꞌyaꞌ ferdyeꞌ voroꞌtacsi in. Muꞌin na anjer in mạꞌjeꞌ tsanꞌ chäyibusinꞌ in mọꞌ c̣honꞌdyedyes tsun muntyis tsun.
Jenꞌ fayisinꞌ paj qui rụij bäꞌjaꞌ tsun
13Mọꞌdyes jemoñeꞌ jiꞌfercaqui dyijyedyeꞌ miꞌin, judyeyaꞌ raꞌ jämꞌ ĉujcati miꞌin. Dyijtuvac jäꞌmij ñịbeꞌyedyes raꞌ miꞌin, mọꞌ soꞌminacsiꞌ raꞌ Jenꞌ aty atsijbanyaꞌ muꞌ Jesucristo, mọꞌ bisvac. 14Chiquemac Jenꞌ, muꞌ Ạvatunactyiꞌ miꞌin. Yacchuvac tashches dyijyedyeꞌ miꞌin, jam raꞌ jeñej jiquej bäꞌyi miꞌin jambiꞌdyemꞌ chị́yetiñeꞌyaꞌ miꞌin mọꞌ p̂eyacdyeꞌ, q̂uinꞌ aty yocdye. 15Muꞌ Jenꞌ fayinactyiꞌ miꞌin, anic rụijtyity muꞌ, jemoñeꞌ miꞌin chimeꞌ räjĉan rụij bäꞌjamꞌ, mijam raꞌ täjtiñeꞌ aꞌc̣his jedyeꞌ, 16ĉaĉaij na yiꞌ sánacdyeꞌ: "Rụij bäꞌjamꞌ ĉaĉaij nash yụ rụijtyity", yi muꞌ Jenꞌ.
17Junꞌsiꞌ chuc cọdyetinteyaꞌ muꞌ Jenꞌ meꞌ jétinte miꞌin: "Tsunsiꞌ Jenꞌ", jétinte. Muꞌ jịꞌcäts yụꞌtacsity juchadyeꞌyaꞌ räj jacchety muntyiꞌ in, anic cäts cạvacsi muꞌ, junꞌ chuc bäꞌyi in. Mọꞌdyes jemoñeꞌ yejĉoij irijjetinte muꞌ, junꞌ quiꞌ chuc farajjetiñeꞌyaꞌ ọij jac. 18Chịj miꞌin muꞌ Jenꞌ aty jiꞌc̣honnac miꞌin judyeyaꞌ meijjityinac aꞌc̣his dyijyedyeꞌ miꞌin, mọꞌ jiꞌchäyinacsiꞌ vóshiꞌvun miꞌin. Chịj tyuꞌ u miꞌin mọꞌ mọtsis jedyeꞌ jacches, querec̣ha, oro judyeyaꞌ plata, jam joꞌmesyaꞌ jiꞌc̣honnac muꞌ Jenꞌ, 19meꞌdye Cristosyaꞌ chäsh muꞌ, mọꞌ mọjoꞌchaꞌ yaꞌiꞌsiꞌ, mọꞌyaꞌ jiꞌc̣honnac muꞌ Jenꞌ. Ĉụiꞌsiꞌ chäsh muꞌ yụꞌtaqui muꞌ Cristo, jiꞌijatiyaꞌ jiquej muntyidyes juchaj, jeñej jam jụꞌñis oveca, meꞌ buꞌyi muꞌ. 20Jambiꞌdyemꞌ jämꞌtacyaꞌ ọij jac jiquej, aty muꞌ tạꞌcaty jatsimꞌtaque muꞌ Cristo paj qui ijac tsundyes. Jadyiquisĉan qui namꞌ tupudyeꞌ, q̂uinꞌdyemꞌ jiꞌcaviti muꞌ paj qui jiꞌc̣honnac miꞌin. 21Q̂uinꞌ aty Cristoyaꞌ miꞌin anicjetinte Jenꞌ miꞌin, muꞌ vañinjebajtety judyeyaꞌ mujuꞌchaꞌ qui fer buꞌyi yụꞌte. Q̂uinꞌ chat miꞌin anicjetinte Jenꞌ, chịj miꞌin muꞌ raꞌ jịꞌcätseꞌ p̂eyacdyeꞌ muꞌ.
22Q̂uinꞌ chat aty chiquebitinte rụijsis p̂eyacdyeꞌ Jenꞌsiꞌ muꞌ, chicacdyeꞌyaꞌ miꞌin c̣hiconꞌjibunac ĉojtyiꞌ miꞌin. Q̂uinꞌ aty rụijsisyaꞌ dyijyedyeꞌ vaj meij mạꞌjiti miꞌin vaj vojity miꞌin. Meꞌ bäꞌjamꞌ mạꞌjitiĉamꞌ räj ĉojtyiꞌ miꞌin. 23Miꞌin aty quivij naꞌebantyiꞌ miꞌin, aty jam jacchetycheꞌ jenꞌ miꞌin sänꞌdyedyety. Q̂uinꞌ tsạꞌtyiꞌcheꞌ Jenꞌ naꞌeban miꞌin, muꞌ jam jụꞌñisĉan mạyedyeꞌ säñity, muꞌ ạvatunactyiꞌ p̂eyacdyeꞌyaꞌ muꞌ. Mọꞌ p̂eyacdyeꞌ muꞌ tsạꞌchucsis, mọꞌ raꞌ jam jụꞌñisĉan mạyedyeꞌ mọtsis. 24Mọꞌdye yiꞌ sánacdyeꞌ:
"Jacchety muntyiꞌ in jeñej buꞌyi däräꞌ in,
mọꞌ fer buꞌyedyeꞌ muꞌin mọꞌ jeñej buꞌyiꞌ däräꞌsiꞌ jáme mọꞌin.
Mọꞌ däräꞌ jam men meꞌ buꞌyiꞌ chat qui sacñiꞌ mọꞌ,
mọꞌ na jáme mọꞌ vaiꞌjoiꞌ.
25Ayoꞌsiꞌ na p̂eyacdyeꞌ muꞌ,
jam raꞌ jụꞌñisĉan mạyedyeꞌ mọtsimꞌ", yiꞌ sánacdyemꞌ.
Mọꞌdye mọmoꞌ jämꞌsiꞌ p̂eyacdyeꞌ mọꞌ voroꞌtyinacsiꞌ jiquej in.
Currently Selected:
Tashches Pedros 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
Tashches Pedros 1
1
Tashches voryedyeꞌ Pedros muꞌ
1Yụ nash Pedro jutactyiꞌ Jesucristoty muꞌ, yụ vorjeyac räj miꞌin tsimꞌtactyiꞌ Jenꞌtyiꞌ miꞌin, paiꞌ bäꞌyity miꞌin yocsiꞌĉaĉan bäꞌyedyeꞌ jam ĉụiꞌsiꞌ miꞌin: Pontoĉan bäꞌyity miꞌin judyeyaꞌ Galaciaĉan, judyeyaꞌ Capadociaĉan, judyeyaꞌ Asiaĉan judyeyaꞌ Bitiniaĉantyiꞌ chimeꞌ miꞌin, muꞌĉaĉan bäꞌyi miꞌin. Ọij sánacdyeꞌ miꞌindyes jananaj ĉụiꞌ bäꞌyity miꞌin. 2Jenꞌ Ạvatusinꞌtyiꞌ tsun, muꞌ ĉụiꞌsiꞌyaꞌ dyijyedyeꞌ muꞌ jäꞌmiij tsimꞌtyinac jiquej miꞌin. Ĉụiꞌsiꞌ Ạꞌedyeꞌ muꞌ yuꞌtyinac miꞌin paj qui muꞌdyety Jenꞌdyety miꞌin. Yuꞌtyinac chimeꞌ paj qui chiquetinte muꞌ Jesucristo judyeyaꞌ chimeꞌ paj qui c̣hiconꞌjibunac ĉojtyiꞌ miꞌin ĉụiꞌsiꞌyaꞌ chäsh muꞌ Jesucristos. Yụ cọdyete Jenꞌ paj qui ñịbeꞌjitidyes muꞌ soꞌminac miꞌin, paj qui chimeꞌ soꞌminac maꞌjodyeꞌ ĉojtyiꞌĉandyes miꞌin, paj qui jam quijadyeꞌtum soꞌminac.
Bisjaꞌ mọꞌ soꞌmisinꞌsiꞌ Jenꞌ
3Timaꞌqueja muꞌ Jenꞌ, muꞌ Jesucristoty Jenꞌ muꞌ, Ayoꞌ tsun. Muꞌ där ñịbeꞌ ĉúsinꞌtyiꞌ tsun, mọꞌdyes qui tsun jiꞌnaꞌibusinꞌ cuvij, aty vañinjebajteyaꞌ muꞌ Jesucristo, tsun chimeꞌ tsạꞌchusinꞌ Jenꞌdyes. Q̂uinꞌ aty jam mọꞌ fibis anicyedyeꞌ tsun, Jenꞌ raꞌ soꞌmisinꞌ mọꞌ bisvaꞌquejas tsun. 4Mọꞌ soꞌmisinꞌsiꞌ raꞌ tsun muꞌ Jenꞌ anic där jämꞌsiꞌ mọꞌ, mạyedyeꞌches, mọꞌ raꞌ jam junꞌ tạbaiꞌsiꞌ mijam raꞌ mọtsis, mijam raꞌ jụꞌñisĉan mạyedyeꞌ jadyic mọꞌ, muꞌ Jenꞌ jämꞌ yuꞌtyiyinacsiꞌ, muꞌ jiꞌbisiyinacsiꞌ miꞌin. 5Anicyedyeꞌyaꞌ miꞌin muꞌ Jenꞌ ferdyeꞌyaꞌ raꞌ muꞌ yejĉoij ĉujcanac miꞌin junꞌ quiꞌ chuc ayijbanꞌyaꞌ jadyiquisĉan tupudyeꞌ, chat qui raꞌ soꞌminac c̣honꞌdyedyes mạyedyeꞌches.
6Dyijtutiñeꞌ jụijyaꞌ mọꞌ q̂uinꞌ, tupuj maꞌjodyeꞌtum raꞌ bäꞌyi miꞌin. Meꞌ tsanꞌ q̂uinꞌ ñịbeꞌ cạvetiñeꞌ miꞌin, meꞌ tsanꞌ yịjyi ñịbedyes jịꞌĉojtiñeꞌyaꞌ miꞌin, jemoñeꞌ qui namꞌ mọꞌ jịꞌĉojtacdyeꞌ jịꞌĉojtiñeꞌ miꞌin. 7Mọꞌ raꞌ jorojĉanyiꞌ chị́yac jam fibis mọꞌ anicyedyeꞌ miꞌin, mọꞌ anicsis mọꞌ. Jeshaꞌ, muꞌ mọtsity oro, tŝijyaꞌ qui namꞌ jämi, paj qui yedyej muꞌ shupqui, meꞌ buꞌyiꞌdye mọꞌ chimeꞌ anicyedyeꞌ tsun, mọꞌ chị́yac ñịbedyesyaꞌ. Jam farajjejaꞌ anicyedyeꞌ Jenꞌcheꞌ jụijyaꞌ tsun aty jiꞌjiijaꞌyaꞌ ñịbedyes, mọꞌ jorojĉan jiꞌĉuyisinꞌ jam fibis mọꞌ anicyedyeꞌ shupquiꞌ tsun, anicsis mọꞌ. Meꞌ shupquiꞌ anicyedyeꞌ jụijyaꞌ tsun, Jenꞌ raꞌ maꞌjotyisinꞌ judyeyaꞌ raꞌ timaꞌquisinꞌ tsun aty atsijbanyaꞌ muꞌ Jesucristo, chat qui raꞌ muꞌcheꞌ bäꞌjaꞌ tsun muꞌsiꞌĉan mạijquedyeꞌ muꞌ.
8Miꞌin meꞌ tsanꞌ jambiꞌ cạvetinte muꞌ Jesucristo q̂uinꞌ, mạꞌjetinte qui namꞌ. Meꞌ tsanꞌ jam cạvetinte miꞌin, anicjetinte qui namꞌ miꞌin, judyeyaꞌ därsiꞌtum maꞌjodyeꞌ cäc̣häꞌchutinte miꞌin, aty jam ọ́yaꞌ junꞌdyemꞌ tupuj chaꞌshejaꞌ mọꞌ maꞌjodyeꞌ miꞌin, 9ĉaĉaij na aty jiꞌc̣honnac Jenꞌ, anicyedyeꞌyaꞌ Jesucristocheꞌ miꞌin, soꞌmac miꞌin c̣honꞌdyedyes miꞌin.
10Muꞌin jasoꞌmitity p̂eyacdyeꞌ Jenꞌ jiquej in jäꞌmiij tashcheꞌ p̂iijbusinꞌ in c̣honꞌdyedyes tsun, junꞌ chuc raꞌ jiꞌc̣honsinꞌ tsun q̂uinꞌ muꞌ. Muꞌin fer tsanꞌ dyijtuiꞌ in, judyeyaꞌ jiꞌchäyiti in ọij p̂eyacdyeꞌ muꞌ, mạꞌjeꞌ tsanꞌ chị́yeꞌ in junꞌ buꞌyiꞌ chuc raꞌ mọꞌ c̣honꞌdyedyes ñịbeꞌjisinꞌsiꞌ raꞌ tsun q̂uinꞌ muꞌ Jenꞌ. 11Mọꞌ qui namꞌ Ạꞌedyeꞌ muꞌ Cristos ĉojtyiꞌĉansiꞌ muꞌin jasoꞌmititysiꞌ p̂eyacdyeꞌ Jenꞌ jiquej in, mọꞌ jịꞌchiqueyacsiꞌ tashcheꞌ junꞌ chuc raꞌ ñịbeꞌ cạveꞌ muꞌ Jiꞌc̣honacsity Muntyiꞌ, aty raꞌ meꞌsiꞌ chat q̂uinꞌdyemꞌ raꞌ mujuꞌchaꞌ fer buꞌyi yụꞌtac muꞌ, judyeyaꞌ raꞌ timaꞌcac juban. Muꞌindye jasoꞌmitity p̂eyacdyeꞌ Jenꞌ in mạꞌjeꞌ tsanꞌ chị́yeꞌ jämꞌ in tyi buty raꞌ muꞌ, chimeꞌdye junꞌsiꞌ buty raꞌ tupudyeꞌ ayij muꞌ. 12Jam qui namꞌ junꞌ tupuj chị́yeꞌ in, Jenꞌ qui namꞌ jéyacsi junꞌ chuc mọꞌ p̂eyacdyeꞌ sáñeꞌsiꞌ in, mọꞌ jam muꞌindyes in, jambiꞌ raꞌ muꞌindyes in cạ̈tsiꞌ, tsundyes qui namꞌ mọꞌ p̂eyacdyeꞌ. Anicdye meꞌ, miꞌin q̂uinꞌ aty seꞌvacsebi miꞌin p̂eyacdyeꞌ muꞌin voroꞌtacsity in jämꞌsiꞌ Jenꞌsiꞌ p̂eyacdyeꞌ muꞌ. Muꞌin soꞌmac in Jenꞌsiꞌ Ạꞌedyeꞌ muꞌ, mạyedyeꞌcheꞌ jijtuiꞌsiꞌ muꞌ, mọꞌsiꞌyaꞌ ferdyeꞌ voroꞌtacsi in. Muꞌin na anjer in mạꞌjeꞌ tsanꞌ chäyibusinꞌ in mọꞌ c̣honꞌdyedyes tsun muntyis tsun.
Jenꞌ fayisinꞌ paj qui rụij bäꞌjaꞌ tsun
13Mọꞌdyes jemoñeꞌ jiꞌfercaqui dyijyedyeꞌ miꞌin, judyeyaꞌ raꞌ jämꞌ ĉujcati miꞌin. Dyijtuvac jäꞌmij ñịbeꞌyedyes raꞌ miꞌin, mọꞌ soꞌminacsiꞌ raꞌ Jenꞌ aty atsijbanyaꞌ muꞌ Jesucristo, mọꞌ bisvac. 14Chiquemac Jenꞌ, muꞌ Ạvatunactyiꞌ miꞌin. Yacchuvac tashches dyijyedyeꞌ miꞌin, jam raꞌ jeñej jiquej bäꞌyi miꞌin jambiꞌdyemꞌ chị́yetiñeꞌyaꞌ miꞌin mọꞌ p̂eyacdyeꞌ, q̂uinꞌ aty yocdye. 15Muꞌ Jenꞌ fayinactyiꞌ miꞌin, anic rụijtyity muꞌ, jemoñeꞌ miꞌin chimeꞌ räjĉan rụij bäꞌjamꞌ, mijam raꞌ täjtiñeꞌ aꞌc̣his jedyeꞌ, 16ĉaĉaij na yiꞌ sánacdyeꞌ: "Rụij bäꞌjamꞌ ĉaĉaij nash yụ rụijtyity", yi muꞌ Jenꞌ.
17Junꞌsiꞌ chuc cọdyetinteyaꞌ muꞌ Jenꞌ meꞌ jétinte miꞌin: "Tsunsiꞌ Jenꞌ", jétinte. Muꞌ jịꞌcäts yụꞌtacsity juchadyeꞌyaꞌ räj jacchety muntyiꞌ in, anic cäts cạvacsi muꞌ, junꞌ chuc bäꞌyi in. Mọꞌdyes jemoñeꞌ yejĉoij irijjetinte muꞌ, junꞌ quiꞌ chuc farajjetiñeꞌyaꞌ ọij jac. 18Chịj miꞌin muꞌ Jenꞌ aty jiꞌc̣honnac miꞌin judyeyaꞌ meijjityinac aꞌc̣his dyijyedyeꞌ miꞌin, mọꞌ jiꞌchäyinacsiꞌ vóshiꞌvun miꞌin. Chịj tyuꞌ u miꞌin mọꞌ mọtsis jedyeꞌ jacches, querec̣ha, oro judyeyaꞌ plata, jam joꞌmesyaꞌ jiꞌc̣honnac muꞌ Jenꞌ, 19meꞌdye Cristosyaꞌ chäsh muꞌ, mọꞌ mọjoꞌchaꞌ yaꞌiꞌsiꞌ, mọꞌyaꞌ jiꞌc̣honnac muꞌ Jenꞌ. Ĉụiꞌsiꞌ chäsh muꞌ yụꞌtaqui muꞌ Cristo, jiꞌijatiyaꞌ jiquej muntyidyes juchaj, jeñej jam jụꞌñis oveca, meꞌ buꞌyi muꞌ. 20Jambiꞌdyemꞌ jämꞌtacyaꞌ ọij jac jiquej, aty muꞌ tạꞌcaty jatsimꞌtaque muꞌ Cristo paj qui ijac tsundyes. Jadyiquisĉan qui namꞌ tupudyeꞌ, q̂uinꞌdyemꞌ jiꞌcaviti muꞌ paj qui jiꞌc̣honnac miꞌin. 21Q̂uinꞌ aty Cristoyaꞌ miꞌin anicjetinte Jenꞌ miꞌin, muꞌ vañinjebajtety judyeyaꞌ mujuꞌchaꞌ qui fer buꞌyi yụꞌte. Q̂uinꞌ chat miꞌin anicjetinte Jenꞌ, chịj miꞌin muꞌ raꞌ jịꞌcätseꞌ p̂eyacdyeꞌ muꞌ.
22Q̂uinꞌ chat aty chiquebitinte rụijsis p̂eyacdyeꞌ Jenꞌsiꞌ muꞌ, chicacdyeꞌyaꞌ miꞌin c̣hiconꞌjibunac ĉojtyiꞌ miꞌin. Q̂uinꞌ aty rụijsisyaꞌ dyijyedyeꞌ vaj meij mạꞌjiti miꞌin vaj vojity miꞌin. Meꞌ bäꞌjamꞌ mạꞌjitiĉamꞌ räj ĉojtyiꞌ miꞌin. 23Miꞌin aty quivij naꞌebantyiꞌ miꞌin, aty jam jacchetycheꞌ jenꞌ miꞌin sänꞌdyedyety. Q̂uinꞌ tsạꞌtyiꞌcheꞌ Jenꞌ naꞌeban miꞌin, muꞌ jam jụꞌñisĉan mạyedyeꞌ säñity, muꞌ ạvatunactyiꞌ p̂eyacdyeꞌyaꞌ muꞌ. Mọꞌ p̂eyacdyeꞌ muꞌ tsạꞌchucsis, mọꞌ raꞌ jam jụꞌñisĉan mạyedyeꞌ mọtsis. 24Mọꞌdye yiꞌ sánacdyeꞌ:
"Jacchety muntyiꞌ in jeñej buꞌyi däräꞌ in,
mọꞌ fer buꞌyedyeꞌ muꞌin mọꞌ jeñej buꞌyiꞌ däräꞌsiꞌ jáme mọꞌin.
Mọꞌ däräꞌ jam men meꞌ buꞌyiꞌ chat qui sacñiꞌ mọꞌ,
mọꞌ na jáme mọꞌ vaiꞌjoiꞌ.
25Ayoꞌsiꞌ na p̂eyacdyeꞌ muꞌ,
jam raꞌ jụꞌñisĉan mạyedyeꞌ mọtsimꞌ", yiꞌ sánacdyemꞌ.
Mọꞌdye mọmoꞌ jämꞌsiꞌ p̂eyacdyeꞌ mọꞌ voroꞌtyinacsiꞌ jiquej in.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'