रूमी 12
12
ईसू मसी सुदा नँवा जीव
1हनालगा ईंगरिकुःआ अजी बोपोहकूतिंग, भगवान अबूय मयावारा हना कता उहियारकेडपेखन अपे एचेरे गोड़न पइयन घड़ीनिंग असेयतना। अपे अँननपेराः देह भगवान ननायगुःता हना सुद अरू जीयत बलिदान इया जमालेःआपे जिमागोड। नाःआ भगवान सेवाराः सताय लूर हवे। 2अपे चउंदीसरिकुःआ होड़कू इया अहापे सलाः। मनदो भगवान अपेराः ओंगोल नँवाकेडखन बदलाव ओवायपे, जेमहा अपे भगवान ननायगुःता अरू जमालेःआते सताय अरू ननपाय हवे, हाँयराः हनानाः हिछापे सुदी अवेय।
3दो भगवान ईंगे मयावारा। हना अते ईंग हाँयरीग मूक चेलायिंग बड़ाँवकियानखन अपेयिंग सेतावतना, अपे इदानपेःआ हना अते मरंग अँननपे अपे अहापे ओंगलुः। मनदो नाय नपायते ओंगोल बुझावकियानखन भगवान अपेय जिमावारा हिनिनमिन बिसवास इया अँननपे अपे फड़ियावगुः। 4देहरे एटाः एटाः दगलीकून इदा अरू मेमेडटोंगराः एटाः एटाः बुताकून दोहोनता। 5हनन इया अबू जमा बिसवासी होड़कू ईसू मसीराः देह इया मिनीकियानखन एटाः एटाः देह दगलीकून इया इदानबुःआ।
6भगवान अबूय मयावाडबूखन एटाः एटाः दहिने एमेवाडबुःआ। तोनोंगीग भगवानराः बड़रा कतायीग होड़ हवे दो हाँय भगवान एमेतेरा हना बिसवास इयाय कताय। 7तोनोंगीग होड़कू सेवा लगा दहिने पवावकियान दो हाँय नपायतेय सेवागोड ञवन, अरू तोनोंगीग चेडकू लगा दहिने पवावकियान दो हाँय नपायतेय चेडगोड ञवन। 8तोनोंगीग एटाःकू कता-बहालकू लगा दहिने पवावकियान दो हाँय कता-बाहालगोड ञवनकूय, अरू तोनोंगीग हहटिंग लगा दहिने पवावकियान दो हाँय मिनी जीवकियानखने हटिंगगोड ञवन। तोनोंगीग अगुवाइवाकू लगा दहिने पवावकियान दो हाँय, ईंगराः जिमेवारी इदा माःआन ओंगोलकेडखने अगुवाइगोड ञवन अरू मयावाकू लगा तोनोंगीग दहिने पवावकियान दो हाँय बनाहाल घड़ीने मयावाकू।
बिसवासी होड़कूराः लूर-नेवन
9तोनोंगीग मेड अंजउड़ी अलोपे दुलारगेय; बेलूर कताकूनपे हिनइस-बिनइसवा अरू नपायपे एचेगोड ञवन। 10अपे अँननपेरिकुःआ होड़कू इया एटाः होड़कू सुदापे अलार-दुलार होड़ेंग अरू अँननपे अते बगरा एटाः होड़कूपे मान मरजइत। 11तोनोंगाः बुतारे अलोपे ओडोसगुः, मनदो सुद बिरुवाराः अगुवाइते मिहनइत घड़ीन परबूपे सेवागोड ञवन। 12भगवान एचेरे असरा घड़ीन बहालतेपे दोहोन अरू कटसिया सहाव घड़ीन जमा बेलापे अरजीगोड ञवन। 13बिसवासी होड़कू लगा हुडिंग बगरा दोहोन मेला, हँकूपे संघरागोड ञवन अरू अनसिनहार होड़कू हों नेत-नेवारकू लगा सपड़ावतोपे दोहोन।
14अपेकू संतावता हँकुःआ होड़कू अहापे सती-सरापकू मनदो भगवान हँकूराः जीव-जहन नपायगेय लगापे अरजीगोड ञवन। 15बहालतेकू दोहोनता हँकुःआ होड़कू सुदा अपे होँपे बहालगुः अरू इयामतकुःआ होड़कू सुदा अपे होँपे इयाम। 16अपे जमा होड़कू सुदा हेल-मेलरेपे दोहोन। अपे अँननपे अपे कनहूनदारकू ओंगोलकियानखन अलोपे बड़वार, मनदो लचार होड़कू सुदा मिनीरेपे ननायगुः।
17बेनेलूरकू एचेयता हँकुःआ होड़कू लगा अपे हों बेलूर एचेकेडखन बदला अहापे कुदाय। मनदो जमा होड़कू मान मरजइतगे इयाःआ बुताकूनपे एचेगोड ञवन। 18होया अवेन हनामिन जमा होड़कू सुदा सलसतरेपे दोहो ञवन। 19भगवानराः कागदरे परबू कतायतना,
बदला कुदाय लगा ईंग इदानिंगा,
अरू इनिंग बदलायिंग कुदायता।#दो. नि. 32:35
हनालगा ईंगरिकुःआ अजी बोपोहकूतिंग, अपे अँननपे अपे बदला कुदाय लगा ओंगोल दोहोकेडखन अलोपे दिरुवागोड ञवन।
20मनदो,
“अपेरिकुःआ मुदइ होड़कू रंगेगतोकू दोहोन दो हँकू जोम लगापे एमेगोडवाकू,
हँकू दाः ततंगतेकू दोहोन दो ञूय लगापे एमेगोडवाकू।
नाःआ इयापे एचे दो अपे
हँकूराः पगरीपे उतरावगोडता।”#कनहूनकून 25:21,22
21दो अपे बेलूर नेवन इया अपेराः जीव अहापे सलाव ओवा, मनदो नपाय एचेकेडखन हना बेलूर नेवनकूनतेपे जीताव जुवाः।
Currently Selected:
रूमी 12: kfp
Highlight
Copy
Compare
Share
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
