मूक चेलाकू 27

पउलूस रूमी सहरकू वारगोतेडीग

1अले जहाजते इटली देस सेन लगा पिसतूस ओंगोल दोहोतेरा, दो पउलूस अरू एटाः तोलतो होड़कू अगुसतूस ञावराः सइना होड़कूराः गउदारीग हातपात होड़ उलियूस एचेरेकू जिमागोतेडकू।#27:1 नाःआ वरीते 28:16 रे रूमी सहरकू सुदरुः वरी लूका हों पउलूस सुदाय दोहोना। 2दो अले अदरमितियूम सहर अते वेजेडा मीटोंग जहाजरे देगनेनखन आसिया राइजराः सियाँ सरहद होरते समुंदररे सेन लगाले बुँहड़ीतेरा। अरू अले सुदा अरिसतरकूस होंय दोहोना। हाँय मकिदुनिया राइजराः तिसलूनिका सहररीग होड़े दोहोना।

3एटाः दिन सइदा सहररेले उतरावनेना अरू उलियूस, पउलूस एचेरे मयावातेडखन पउलूसरिकुःआ सउंगताकू हाँयकू संघरावा लगा हँकू एचेरेय सेने ओवातिरिया। 4हंडा अते अले अरू समुंदररेले सेना। होय अले अगी मुरुक सलाःआ हना अते अले सइपरास डुगुराः ओधा ओधारेले सेना। 5दो अले किलिकिया अरू पंपुलियाते लेनेसानराः समुंदर पारनेनखन लुकिया छतरराः मुरा सहररेले उतरावनेना। 6दो हंडा सिकंदिरिया सहरराः मीटोंग जहाज इटली देस अगी सेना हना जहाजरे, हाँयग सइनाकूरीग हातपात होड़ अलेय एचे देगतेरा। 7अले मुरुक दिन गते-गात सिकिसताते सलाव घड़ीन कनिदूस सहररेले सोदोरनेना। होयते अले मड़ंग अगी मेरले सेने अवेना। हनालगा अले सलमोन सहरराः लेनेसानते करेत डुगुराः ओधारेले सेना। 8अरू अले मुरुक सिकिसताते लसेया सहरराः लेसानाः सुबलंगबारी ञावराः ततेररेले सोदोरनेना।

9उपासराः दिन#27:9 नाःआ उपास एहूदाकूराः परोब मेलारे दोहोना अरू हना दिन बराव एंडागेराः मरंग दिन दोहोना। नाःआ परोब सितंबर महिना सहे अकटूबर महिनारे होयाःता। हना तयोमरे मारच महिना वरी समुंदररे सेन लगा गराह कटसिया होयाःता। चबानेना अरू समुंदरते सेन लगा गराह कटसिया होयाःआ अरू मुरुक दिन होयानेना, दो पउलूस नाःआ इया कताकेडखन जहाज सलावदारकूय कता बुझावतेडकुःआ, 10“ने साहेबकू, ईंग सुदीयतना नाःआ सेन दूररे मुरुक कटसिया होयाःता। नाःआ जहाजराः जिनिसकून लगा अरू अबू जीव लगा हों हनी होनोया जुवाःता।” 11मनदो सइनाकूरीग हातपात होड़ पउलूसराः कता अयुमे अते हना जहाजरीग मालिक अरू सलावदार, हँकिन बना होड़राः कताय मनेवातेरा। 12जहाजकूनकू रोंकावता हना ततेर ररंगराः बेला गुदराव लगा नपाय मेर दोहोगान, हनालगा जहाजरे दोहोना हँकुःआ होड़कू अते मुरुक होड़कू कताया, “अबू नाःआ ततेर अते सेन लगा इदा। दो अबू पिनीस सहरराः जहाजकूनकू रोंकावता हना ततेररे ररंग बेला अते मड़ंगरेबू सोदोर जुवाःता।” हना सहर करेत डुगुराः दखिन-पछिम अरू उतर-पछिम अगी दोहोना।

समुंदररे गड़रा घटा

13दखिन अगीते होय गुन लकन सलाःआ, दो हँकुःआ जहाज सलावदारकू ओंगोलतेड, अबूराः ओंगोल इया होयाःतना, माःआन। हनते हँकू हना लंगर जहाजरेकू रेमगोतेड अरू करेत डुगुराः धरी धरीकू सेना। 14मनदो गुनहोन तयोमते करेत डुगु अगी उतर-पछिम होरते गड़रा घटा सलावनेना। 15हना गड़रा घटा जहाजरे तुकड़ावनेन दो जहाज हना अते मेर पार अवेगान अरू जहाज हनानाः गड़रा घटा अगीकू सेने ओवाड।

16हनते कउदा ञावराः मीटोंग हुडिंग डुगुराः ओधारे सलाःआ अरू मुरुक मिहिनइततेडखन जहाजराः हुडिंग डोंगा टोटाःगुः अतेकू बनसावतेरा। 17दो हना जहाज सलावदार होड़कू डोंगा जहाजरेकू रेम बोलोतेरा अरू जहाज टोटाःगुः अते बनसावगे लगा डोरातेकू तोल रहावतेरा। समुंदररे जुमावतो सुरतीस ञावराः बितीलरे जहाज गडावगुः अते बनसावगे लगा अरू जहाज गते-गात सलाः लगा जहाजराः लंगर दाःरेकू सोलोंगगोतेड अरू हँकू जहाज अँननतेकू सेने ओवातेरा।

18एटाः दिन गड़रा घटाते जहाज झिकोड़तेरा दो अले जहाज अते मुरुक जिनिसकूनले तेके उडुंगगेःआ। 19अरू पेय दिनरे जहाजराः अदोम लदावतो जिनिसकून हँकू अँननकू तिःईतेकू तेके उडुंगगोतेड। 20हनते मुरुक दिन वरी बेर अरू इपीलकू मेरले ञेलगाडकू अरू मुरुक गड़रा घटा सलाव ञवना। दो तयोमरे बनसावगुः लगा अलेराः असरा टुटीगगुःआ।

21मुरुक दिन वरी तोनोंगीग तोनोंगाः मेरकू जोमगाड दो पउलूस हँकू तलारे चड़ाँनेनखने कताया, “ने वपक बोपोहकूतिंग, अपे मड़ंगरे ईंगराः कतापे मनावकुः अरू करेत अते जहाज मेरबू सलावकेःआ दो नाःआ कटसिया अरू टपसियारे ओरोबू परावकुःआ। 22मनदो नुँहू ईंग अपे एचेरेयिंग कतायतना, अपे अते तोनोंगीग होड़राः जीव ओरो कहीनेना, मनदो जहाज एकला अडुःता। हनालगा अपे डीड़तेपे दोहोन। 23ईंग सेवागेयतना ईंगरीग मालिक भगवान हाँयरीग बराहील तिसिंग रइत ईंग एचेरे वेगनेनखने कताकेरा, 24ने पउलूस, अहम बोर। आम कइसर मरंग राजाराः मड़ंगरे फड़ियाव लगा चनाँड़न इदा। आम सुदाकू सलाःतना, हँकुःआ जमा होड़कू भगवान आमे जिमावारा, माःआन। 25दो ईंग वपक बोपोहकूतिंग, ईंग भगवान एचेरेयिंग बिसवासगेतना, ईंग एचेरे सेरमो देसरीग बराहील कतातेरा हनन इया होयाःता। हनालगा अपे डीड़तेपे दोहोन। 26मनदो अबूराः जहाज तोनोंगाः डुगूरे तुकड़ाव जुवाःता।”

27चउदाह रइतले गुदरावतेड अरू अले अदिरिया समुंदररे हलकोयग चुवेरगुःआ दो जहाज सलावदारकू हटिंग बरा रइतरेकू सुदीगोतेड, अले समुंदर धरीले सुदरुःतना, माःआन। 28दो हँकू समुंदरराः गहीरकू नपाःआ दो बीस पुरसाकू नपातेरा। हनते हँकू गुनहोन अरू तोरे सेनेवाडखनकू नपातेड, दो पंदरह पुरसाकू नपातेरा। 29दो हँकू जहाज चटइनरे तुकड़ाःराः बोतोरते हँकुःआ होड़कू जहाजराः तयोम गतर चइरगोटोंग लंगरकून समुंदररेकू जुवांग लोजोरगोतेड। हनते हँकू अंगुः लगाकू अरजीगोड ञवना। 30अरू जहाज सलावदारकू जहाज अते ञीर लगाकू ओंगलेःआ। हनालगा हँकू जहाजराः मड़ंग अगीते लंगरकू जुवांग लोजोरगे लगा बुइद तुलातेडखन हुडिंग डोंगा समुंदररेकू उतरावगोतेड। 31दो पउलूस, सइना होड़कूरीग हातपात होड़ अरू सइना होड़कू एचेरेय कतातेड, “नँकुःआ होड़कू जहाजरे मेरकू दोहोन दो अपे ओरोपे बनसाव अवेनेन।” 32हनते सइना होड़कू हुडिंग डोंगाराः डोराकून गेड एंडातेडखन हना डोंगा अनतेकू सेने ओवाड।

33अंगू फइड़साःआ मेला पउलूस जमाकू तोनोंगाः जोम लगा लहरावतेडकूखने कताया, “तिसिंग चउदाह दिन होयायना। अरू अपे सगर दिन ओंगोल घड़ीन अपे तोनोंगाः मेरपे जोमगाड। 34नननलगा अपे तोनोंगाः जोम लगायिंग फुसलावपेतना। अपे तोनोंगाःपे जोम होले जंगरपे पवाःता। अपे अते तोनोंगीगराः मीटोंगाः ऊब हों ओरो रवीगनेना।” 35हाँय नाःआ इया कतातेडखन रुटीय गोःतेरा अरू भगवान जागतेडखन जमाकू मड़ंगरे रुटी डुंडीग घड़ीने जोमा। 36दो हँकुःआ जमा होड़कू डीड़नेनखनकू जोजोमा। 37(जहाजरे अले जमाकू बार सव सतरगोटोंग होड़कूले दोहोना।) 38दो जमा होड़कू जोम बीनेनखन जहाज हलुकागुः लगा बनसावतो गोहोम समुंदररेकू तेके एंडागोतेड।

39आंगयान अरू तोनोंगीग हना ततेर मेरकू सिनहा अवेगेःआ। मनदो हँकुःआ जहाज सलावदारकू मीटोंग बितील ओधाकू ञेलतेरा अरूकू ओंगोलतेरा, होनोयाःकून करे हना ततेररे जहाजबू रोंकाव अवेयता, माःआन। 40हनालगा हँकू जहाजराः लंगरकूनकू बोंगोरतेडखन समुंदररेकू अड़ाः एंडागोतेड। अरू हनन मेला पतवारकून दाःरे अरूकू सोलोंगगोतेड। हनते जहाजरे तोलतो दोहोनता हना मरंग सोनहे जहाजराः मड़ंग होरकू कलथावगोतेड अरू ओत अगी जहाजकू सलावतेरा। 41मनदो जहाज समुंदर दाः पेंदाराः टुकूरे हटकावयान अरू जहाजराः मड़ंग गतर सकसावयान। अरू मुरुक सटी हलकोयगगुःआ हना अते जहाजराः तयोम होर टोटाःयान।

42दो सइना होड़कू तोलतोकू दोहोना हँकुःआ होड़कू अते तोनोंगीग अहा पउराव उडुंगकेडखन ञीरगुः अते हँकू ञेड एंडाकू लगा बुइदकू तुलातेरा। 43मनदो सइना होड़कूरीग हातपात होड़ पउलूस बनसावगे लगाय चहाःआ। हनालगा हाँय हँकूय रोंकावगोतेड अरू नाःआ इयाय कतातेरा, “पउराव अवेनतकू, हँकुःआ होड़कू मड़ंग दाःरे डेगा लोजोरकियानखन धरीरेपे पार जुवाः। 44अरू एटाः होड़कू पटरारे अरू जहाजराः टोटाःतो जिनिसकूनराः भरसातेपे उडुंग जुवाः।” नाःआ इया अले जमाकू ओतरेले बनसाव उडुंगनेना।

Currently Selected:

मूक चेलाकू 27: kfp

Highlight

Copy

Compare