मूक चेलाकू 24

पेलिकस मड़ंगरे पउलूस

1पाँच दिन तयोमरे मूक पुजउरी हनानियाह, एहूदा मूक होड़कू अते अदोम होड़कू, तिरतुलूस ञावीग मी होड़ उकील सुदा कइसरिया सहररेकू सेनेडा। हँकू मरंग हातपात होड़ एचेरे पउलूसकू बदीतेरा। 2पेलिकस मड़ंगरे पउलूसकू इदीतेरा दो तिरतुलूस पउलूस बदीतेडखने कताया, “ने अगम मान मरजइतगेयीग मरंग पेलिकस, आमते अले मुरुक सलसतरेले दोहोनतना अरू नाःआ जइत होड़कू लगा आम कनहूनतेम एचेकेरा हनाते अले नपायतेले दोहोनतना। 3नाःआ लगा अले जमा ततेररे अरू जमा बेलारे, जमा इया आम धनियाबादले एमेवामतना। 4नननलगा आम अरू हलकइनमे लगा मेरले चहाःतना अरू ईंग आम एचेरेयिंग असेयता, मयावाडमेखन ईंगराः कता गुनमिन अयूमयामे।

5अले नाँयग होड़ सिकिसता एमे होड़ अरू चउंदीसरिकुःआ जमा एहूदाकू बहकावतोले ञेलकिरिया अरू नाँय नासरी ञावराः गारबारतेःआ गउदारीग अगुवा होड़ हवे। 6हाँय भगवानराः ओड़ाः सात-भाड़गे लगाय कुरनिसतेरा, मनदो अले हाँयले साबतिरिया। [हाँय अले नियम इयाले डंडियावकेःआ, 7मनदो सइना होड़कूरीग मरंग हातपात होड़ लुसियास हाँय अले तिःईतेय तोतकाव गोःयाडीग। 8अरू हाँयकू बदीतेरा हँकुःआ होड़कू आम मड़ंगरे वेग लगाय हुकुमतेरा।] नाँयग होड़ जासकेडखनमे सुदीगोडता नाँय एचेयतना माःआन बदीकेडखनले कतायतना हना जमा कताकून सताय हवे, माःआन।”

9दो एहूदा अगुवा होड़कू हों हाँयग उकील सुदा मिनीनेनखनकू कताया, “नाःआ कता सनाताय हवे।”

पउलूस अनँयग बनसाः लगाय कतायतना

10दो मरंग हातपात होड़ पउलूस उदुःगे लगाय अकियावतिरिया दो पउलूस कतातेरा, “ने साहेब, ईंग सुदीयतना आम मुरुक बरिस वरीते अले एहूदाकूरीग फड़ियावदार इदानमेःआ। हनालगा ईंग कता कुदागे लगा बहालरे इदानिंगा। 11आम अनम नपायते जासकेडखनमे सुदी अवेयता, बारह दिन मड़ंगरे एरुसलेमरे भगवान जाग लगायिंग सेनेडा। 12भगवानराः ओड़ाःरे तोनोंगीग होड़ सुदा मेरिंग अड़ा-चउकीगान अरू भगवानराः ओड़ाःरे सहे अरजी ओड़ाःकूनरे सहे सहररे होड़कू कड़ीग लगा मेरिंग एचे जुमावगाडकुःआ। 13अरू नँकुःआ होड़कू ईंग बदीतेडखनकू कतायतना हना कताकूनराः सताय आम एचेरे हँकू ओरोकू उदुः अवेतेरा। 14मनदो ईंग नाःआ कता आम मड़ंगरेयिंग मनाव जुवाःतना, ईंग ईसूराः दूर इया, मोसेसराः नियमकून अरू भगवानराः बड़रा कता होड़कूराः कागदकूनरे ओजाःतो इदा हना जमाकून ईंग बिसवास घड़ीन अलेरिकुःआ खुटिपरिया होड़कूरीग भगवानिंग जागतना। नाःआ दूररिकुःआ होड़कू बदीरे नँकुःआ होड़कू गारबारतेःआ गउदा माःआनकू कतावातना। 15अरू भगवान नपाय होड़कू अरू बेलूर होड़कू गोएग गुराः तयोमरेय जियाव रेमकूता, हना नँकुःआ होड़कू इया ईंग हों भगवान एचेरेयिंग असरागोड ञवनतना। 16हनालगा भगवान अरू होड़कू मड़ंगरे सगर बेला ईंगराः इंदरी सुद दोहोन लगायिंग कुरनिसगोड ञवनता।

17मुरुक बरिस तयोमरे ईंगरिकुःआ गरीब एहूदाकू संघरावाकू लगा अरू भगवान बलिदान देगगे लगा एरुसलेमरेयिंग सेनेडा। 18अलेराः रिती-बिधी इया सुदकियानखन नाःआ जमाकूनिंग एने एएमेःआ मेला आसियारिकुःआ अदोम एहूदाकू भगवानराः ओड़ाःरे ईंगकू वेग ञामतेरा। अरू हनमेला ईंग एकलायिंग दोहोना अरू तोनोंगाः हलो-गदोड़ीरे मेरिंग मेसागान। 19आसियारिकुःआ हँकुःआ एहूदाकू एचेरे ईंग बदीरे तोनोंगाः कता दोहोकुः दो हँकू नंडा आम मड़ंगरे वेगकियानखनकू कता उदुःकेःआ। 20मनदो ईंग मरंग पंचाइतरे चड़ाँतिंग दोहोना, हनमेला नँकुःआ होड़कू ईंग एचेरे चिला कसूरकू ञामकेरा, हनानाः नुँहू नँकू उउदुः इदा। 21हनमेला ईंग मिनीटोंग कता हँकूराः तलारे चड़ाँकियानखनिंग कतातेरा, गोएगतो होड़कू जियाव रिमुःता हना बदीरे तिसिंग अपे मड़ंगरे ईंगराः फड़ियाव होयाःतना, माःआन।”

22हनते ईसूराः दूररिकुःआ होड़कू बदीरे नपाये सुदीया हाँयग पेलिकस अनँयगराः फड़ियाव रोंकावतेडखने कताया, “सइनाकूरीग मरंग हातपात होड़ लुसियास वेग दो आमराः नाःआ कतायिंग फड़ियावगोडता।” 23हनते हाँय मी सव सइनाकूरीग हातपात होड़ एचेरे पउलूस अगुरागेय लगाय हुकुमवातेरिया। मनदो हाँयरिकुःआ सउंगताकू हाँय संघरावाय अते मेरेय रोंकावगाडकू लगा अरू हुडिंग हुडिंग दँड़ा-पटे ओवाय लगा होंय हुकुमवातेरिया।

24तोनोंग दिन तयोमरे पेलिकस आँयग एंगातुकू दुरसिला ञावीग एहूदा अइमी सुदाय वेजेडा। हाँय पउलूसे एचे राःतेरा अरू ईसू मसीरे करा इया बिसवासगे लगा इदा हना बदीरे पउलूस हँकिने कता उदुःवातेरा। 25भगवानराः ओंगोल इया जियाः लगा अरू अनँयग आँयगते ओंगोल बुझावकियानखन जियाः लगा अरू दरवाःआ हना फड़ियावराः बदीरे पउलूस कता उदुःगेःआ। हनमेला पेलिकस मुरुके बोरोनेनखने कताया, “निनिन मिनाः बगरायना। नुँहू सलाव जुवाःमे। एटाः बेला अरूयिंग एचे राःमेता।” 26हाँय पउलूस अते ढिबुवा गोः लगाय ओंगलेःआ। हनालगा हाँय अरू एचे राः घड़ीन हाँय सुदाय बड़रागोड ञवना।

27दो बार बरिस होयानेन तयोमरे पुरकियूस पिसतूस, पेलिकसराः बदलारे मरंग हातपात होड़े बड़ाँवयान। मनदो पेलिकस एहूदाकू एचे बहालकू लगा पउलूस तोलतो इयाय दोहो ओवातिरिया।

Currently Selected:

मूक चेलाकू 24: kfp

Highlight

Copy

Compare