К Титу 2

Ипапигыт Апыҳтӯсят Ухпықанун

1Иўырңа лъпык апыҳтӯсяқики ухпықанун ипапигыт апыҳтӯсят. 2Апыҳтуҳқи нуйыклъӣт югыт нуқынъыҳтусқылъюки, сӣвакналӷӣңулюки, сюмыҳтаӷаюсқылъюки, айыпсюгитысқылъюки ухпықилъыҳқун, пиниқылъыҳқун, нуқынъыҳтулъыҳқун. 3Таўатыҳпигақ апыҳтуҳқи нуйыклъӣт аӷнат кияҳтысқылъюки тӯнңалюки Кияӷныӷмун. Сыӷлытун акузиткысяҳқақынӷитӣт илятың, налиӷмың мыӷыҳлъяфқӣта виномың. Апыҳтуӷияҳқа̄гут пинитун кияҳта̄лъыҳқамың, 4ынка̄м пыҳқиҳлъықӣт уюқлъӣт аӷнат пиниқысқылъюки угиңитлъю, авақутӣтлъю. 5Сюмыҳтаӷақыхсяҳқа̄гут, пылюңисяҳқа̄гут кияҳта̄лъыӷмыхни, қыпҳақыхсяҳқа̄гут нымыхни, наңлъыхтаӷьяҳқа̄гут, қа̄ткусяҳқа̄гут угимыхнун. Ынка̄м китум алңунак сыӷлықӯӷна̄нӷитӣ Кияӷныӷым апыҳтӯсӣ.

6Таўатыҳпигақ қылыҳқи нукалъпигат нуқынъыҳтусқылъюки. 7Лъпык сялъыҳпыгун тамаҳа̄кун, успута̄ўи лъңитнун аныӷныҳқилъыҳпыгун. Апыҳтуӷӣқи ипапиҳқылъютын, пира̄мсилютын. 8Ўатаҳлъяк апыҳтӯсяқыхкан ылъқуӷутңали ынка̄м китум алңунак сыӷлықӯнӷилъилъю. Таўатын пикувык кипулъхина̄ҳтыт сыӷлытун акузиткынъа̄нӷитӣлъю, кипулъхина̄лъҳиталъю кайңуюхтыслъықӣ. 9Апыҳтуҳқи қыпҳаҳтыля̄ӷыт қа̄ткысқылъюки пилӣтыстыңит, ыфқуҳтыңъўа̄ӷысқылъюкилъю. Выӷуснаӷьяҳқақынӷитӣт, 10налиӷмың тыглыгвиксяҳқақынӷитӣт. Йыӷлыги қӯнпың пинитун, ата̄сӣӷмылъютың пияҳқақӣт. Ынка̄м сялъыӷмыхтыхун тамаҳа̄кун пиюкнаңлъяҳлъықӣт апыҳтӯсӣ Кияӷныӷым Югулиӷистымта.

11Таўатын кияҳсяҳқа̄гукут қаюҳлъяк Кияӷныӷым алӣҳтыкақа̄ пиниқылъыни югулилъыңысқылъюку ю̄к тамаҳа̄н. 12Та̄м пиниқылъҳым апыҳтуӷӣлъю пыхтысқылъюку кияҳта̄лъық Кияӷныӷмун аюқынӷилңуқ, иҳсякысқылъюки нунам юган пиюкылъҳи сыӷлыҳқыңъалӷӣт. Апыҳтуӷӣлъюлъю нуқынъыҳтусқылъюта, ылъқуӷутңалюта, кияҳтысқылъюта Кияӷныӷым пиюкылъҳатун нунами хўани. 13Таўатын кияҳтылъта утақӣмалюта қуяналӷӣмың сиӷималъыӷмың. Сиӷималъқаҳпут ниӷуҳқыңъалӷӣ алӣлъыҳқа̄ Иисус Христосым Кияӷныҳлъямта, Югулиӷистымта. 14Лъминың тӯныхка̄гуқ югулиналюта тамаҳа̄ның сыӷлыҳқылъыӷмың. Таўатын пика̄гуқ қаюҳлъяк пылюңиҳсяӷьюкаңилъю лъңанун югулюта, сягиқлъюта аныӷныҳқисқылъюта югнун.

15Апыҳтӯсяқики тама̄кут ухпықанун. Кияӷныӷым қылӷусӣ атуқлъюки кайымики, аӷулӣҳтикилъю сыӷлытун пиңуката. Йықай китумун алңунак укаваҳтыстыхпынаң.

Currently Selected:

К Титу 2: ess2

Highlight

Compare

Copy