К Римлянам 7

Ухпықатлъю, Лӣлиҳтӯсятлъю

1Ухпықа̄лгутымни, письмомамси лӣсимакилӷӣни Лӣлиҳтӯсяның. Ынка̄м лӣгикаси Лӣлиҳтӯсят қылӷақӣт югыт кияҳтыңъулюки. 2Угӣқақ аӷнақ успута̄гуқ. Лӣлиҳтӯсям қылылъҳани аӷнақ угиминисяҳқа̄гуқ тахталңатун угими кияҳтылъҳан. Иўырңа туқукан угини, та̄ўа итымылъықуқ Лӣлиҳтӯся̄ның ныңуҳтылъҳым. 3Иўырңа, угини уңувалюку алъями югми кияҳтыкуми гылгаӷнӣҳтыңулюни атиӷьяҳқа̄гуқ. Иўырңа угиңа туқумакан, итымылъықуқ та̄хкын Лӣлиҳтӯсямың. Гылгаӷнӣӷунӷитуқ угӣнқихтыкуми. 4Ухпықа̄лгутымни, лъпысилъю итымума̄си Лӣлиҳтӯсяның қаюҳлъяк туқука̄гуси Христосыми. Тама̄кын апалъюқлъюку Христосым пикӣси. Лъңаңӯқ Кияӷныӷым уңуваҳтыка̄ туқулъыӷмың, хўаңкунъун қыпҳа̄тысқылъюку Кияӷнық. 5Сивунӷани қа̄ткақапут сыӷлыҳқыңъалӷӣт пиюкылъҳи югусимта. Лӣлиҳтӯсят атуқистысюгақӣлъю тама̄куның. Ынка̄м атуқыхкумтыки туқуслъықӣлъю. 6Сивунӷани анусимиңлъяӷастун аюқсяҳтукут Лӣлиҳтӯсянун. Туқука̄тымнъың Христосыми, итымутка̄гукут қа̄ткусяҳқа̄лъымнъың Лӣлиҳтӯсянун. Ынка̄м қыпҳа̄тңўа̄ҳпут Кияӷнық уңувалъыӷраӷамтыхун Таӷныӷагныкун, нака̄н уңувалъылюмтыхун Лӣлиҳтӯсятхун.

7Сямыңʼңам пилъықыста? Лӣлиҳтӯся̄т сыӷлыҳқылъҳўа̄т? Йыӷлыгилъю! Та̄кут Лӣлиҳтӯсят лӣтыстыкақӣ хўаңамнун сыӷлыҳқылъҳыт сяңутаңи. Лӣнъаянӷитақа қилӣқытиқылъық сяңутаңа Лӣлиҳтӯсяқ хўатын қылӷимаңисяқан: «Қилӣқытиқыхпынаң». 8Иўырңа атуқлъюку та̄на қылӷусяқ, сыӷлыҳқылъҳым алъя̄ҳӣнаӷның қилӣқытаңлъяқақа̄ңа. Лӣлиҳтӯсяңунатың сыӷлыҳқылъҳыт туқуңа̄т. 9Сивунӷани кияҳтыңъуяҳтуңа Лӣлиҳтӯсяңуна̄н; иўырңа лӣсяқыхка та̄на қылӷусяқ, сыӷлыҳқылъық уңуваӷлюни ынка̄м туқӯңа. 10Қылӷусяқ уңувастияҳқа̄ялӷӣ хўаңамнун, йыӷлыги туқуста̄ңа. 11Та̄хун қылӷусякун, сыӷлыҳқылъҳым пӯҳсяқлъыгуҳта̄ңа. Ынка̄м атуқлъюку қылӷусяқ сыӷлыҳқылъҳым туқута̄ңа.

12Иўырңа Лӣлиҳтӯсят аглыӷналӷӣңӯт, қылӷусяқлъю аглыӷналӷӣңӯқ, ылъқуӷутңа̄лӷилъю, пиниҳтуқлъю. 13Та̄м қылӷусям пинилӷӣм, туқустаңа̄? Йыӷлыгилъю! Сыӷлыҳқылъҳым туқута̄ңа атуқлъюку сяңўа̄ пинилӷӣ. Ынка̄м лӣтаҳпут қылӷусякун сыӷлыҳқылъық ынңа̄талъ сыӷлыпигӯқ.

Пиңигатақа Пиюкылъқа

14Лӣсимакапут Лӣлиҳтӯсят Кияӷныӷым Таӷныӷа̄ның пиңӯт, иўырңа маӷьяҳқӯнӷита̄ңа Таӷныӷам. Маӷьяҳқӯңўа̄ңа югусима пиюкылъҳан, ынка̄м қыпҳаҳтыля̄ӷӯңа сыӷлыҳқылъыӷмун. 15Лӣгикигатақа ся̄қутка қаюҳлъяк атуқигатақа сяңўа̄ атуқсюкақа. Итупилъ атуқақақа сяңўа̄ угумикыхкақа. 16Иўырңа атуқыхкумки угумикыхканка атуқсюнӷитыӷңа̄мки, та̄ўа итагнақақанка Лӣлиҳтӯсят пинӣтаңи. 17Ынка̄м хўаңаңунӷитуқ таўатын пӣқылӷӣ, итупилъ сыӷлыҳқылъық илюмнилңуқ таўатын пӣқуқ. 18Лӣсимакақа аваңитуңа пинилӷӣмың илюмни, югусимни. Пинитун пиюгақсяӷңа̄ӷма, пипагниңитақа. 19Пиңигатақа пинилӷӣ пиюкыхкақа, йыӷлыги сыӷлық пӣқақа пиюкынӷиткақа. 20Ынка̄м пиюкынӷиткақа пинымкун, та̄ўа хўаңаңунӷитуқ таўатын пилӷӣ. Итупилъ сыӷлыҳқылъҳўа̄қуқ илюмнилңуқ таўатын пӣқылӷӣ.

21Ынка̄м лӣтақа та̄на: пинитун пинақыӷңаӷма, паниның сыӷлық таўантақуқ. 22Қа̄мкырухлъяк пиниӷью̄гусиқанка Кияӷныӷым Лӣлиҳтӯсӣ. 23Иўырңа лӣтақа та̄ўа иляңа лӣлиҳтӯсяқ югусимнитуқ. Пилъюўақаңи Кияӷныӷым Лӣлиҳтӯсӣ умьюгама итагнақыхкӣ. Лӣлиҳтӯсям югусимнилңӯм сыӷлыҳқыстақа̄ңа, ынка̄м анусимиңлъяӷастун аюқуңа та̄мун лӣлиҳтӯсямун. 24Сыӷлыӷўа̄ӷӯңа! Китумңам итымулъықаңа хўакын югусимың туқустияҳқамың хўаңамның? 25Игамсиқанаҳалык Кияӷныӷмун итымускаңаңа Иисус Христосыкун Атанымтыхун!

Ынка̄ңам қа̄тканка Кияӷныӷым Лӣлиҳтӯсӣ умьюгамкун, иўырңа югусимкун қа̄ткақа лӣлиҳтӯсяқ сыӷлыҳқыстилӷӣ хўаңамның.

Currently Selected:

К Римлянам 7: ess2

Highlight

Compare

Copy