Откровение 21

Қиляграӷақлъю, Нунаӷраӷақлъю

1Та̄хкын ысҳаӷахка қиляграӷақлъю, нунаӷраӷақлъю. Қиляксюхўа̄ӷӣсима̄қ, нунаксюхўа̄ӷӣсима̄қ, кылъӣңӣтка̄гуқлъю. 2Ысҳаӷақалъю Аглыӷналӷӣ Ныҳлъяк, Иерусалимыӷраӷақ, укилӷӣ Кияӷныӷмың қилягмылңуӷмың. Ныҳлъяк ята̄ҳқылъюни угӣӷнақылӷӣм улъңақылъҳатун угиминун. 3Нагақуӷақа ма игляхтупихлъыҳӣ умӣлгусигның ақумутагның пилӷӣ: «Ысҳақаҳуқун, Кияӷныӷым кияҳфига югнитуқ! Кияҳфикылъықӣ ынка̄м лъңит юкылъықӣ. Кияӷнық лъңа катам лъңитнилъықуқ ынка̄м лъңа Кияӷнықылъықа̄т. 4Қуниңиҳлъықӣ қамахлъюки. Туқуңӣлъықа̄, қивӷуңӣлъықа̄, қияңӣлъықа̄, талўа ақниҳқыңъӣлъықа̄ қаюҳлъяк тама̄кут атуқсяқаңит атуқнаниҳлъықӣт».

5Та̄хкын умӣлгусигнилңуқ ақумутагни пӣқ: «Ысҳақаҳқиқун, улима̄қанка сяңўа̄т қамахтыңъўа̄ӷлюки нутаӷа̄люки!» Хўатынлъю пӣқ: «Игақики тама̄кут а̄пқанка лъпынун қаюҳлъяк тама̄кут акузитыт ипаңӯт, ухпықсяҳқа̄гутлъю». 6Пӣңалъю: «Апыӷӣҳтуқ! Хўаңа Альфаңӯңа, Омегаңӯңа, хўаңа пӣнлыӷӯңа, кынлыңӯңа. Кина алңунак мықсюлӷӣ, акиңуна̄н мыҳсилъықақа сыңъулӷӣмың уңувалъыңыстикаюгмың мыӷмың. 7Китум алңунак кая̄лъқӣлӷӣм алъхыҳлъықӣ тама̄кут хўаңамның. Кияӷнықылъықа̄тңа ынка̄м лъңит авақутақылъықанка. 8Иўырңа тама̄кут қуюҳталӷӣт, ухпықилъҳилңӯт, сыӷлылъыҳпигаӷның сыӷлыҳқылӷӣт, юхтаҳтыт, ныңуҳтыхпынатың атуқулъҳӣт, алигналӷӣт, манигӯткаюгыт кияӷныңлъяқанун, қамахлъютыңлъю иқлъыңалӷӣт, ныкаҳқа̄т на̄йва̄гуқ кумаӷулӷӣ кыныӷмыңлъю, уқумьякмыңлъю. Та̄наңӯқ тӯңлӣ туқулъҳым».

Иерусалимыӷраӷақ

9Та̄хкын яқулгыт ма̄ӷраӷвинлыгның сягнылгыт ыслъықңалӷӣның киңулиӷның сыӷлылӣлъыҳлъягның, ата̄сим та̄куның такўа̄ңа. Пӣңа: «Таги, кылгувикнақамкын Угӣӷнақылӷӣмың, нулӣҳқа̄ Пынъӣӷаҳа̄м». 10Кияӷныӷым Таӷныӷахкынкун яқулгым тугулюңа агля̄та̄ңа ӯсқалъыҳпига̄нун на̄йӷам. Таўани кылгута̄ Иерусалим, Аглыӷналӷӣ Ныҳлъяк укилӷӣ Кияӷныӷмың қилягмылңуӷмың. 11Кӯкхутңаӷми Кияӷныӷым ниӷуҳқылъҳаның. Ныҳлъяк кӯкхутуқ акитуҳлъялӷӣтун уйӷахтун, ясписытун, мыӷра̄кыхтуткаӷми кристаллытун. 12Ӯсқаҳлъягмың миңлъютылык, қуля ма̄лӷук сӣпнықлъюку амихлъялга̄тақ. Қуля ма̄лӷук сӣпнықлъюку яқулгыт амихлъягнитыфтут. Ата̄сикаҳтаӷмың амихлъягыт игақфикңафтут атыӷмың қуля ма̄лӷук сӣпнықлъюку рамкыни Израилым. 13Миңлъютаңа ныҳлъягым қуля ма̄лӷук сӣпнықлъюку амихлъялык, пиңают асиваӷми, пиңают айўа̄ни, пиңают икываӷми, пиңают пакфалъями. 14Ныҳлъягым миңлъютаңа тунымиқа̄фтуқ қуля ма̄лӷук сӣпнықлъюку уйӷагның. Ата̄сикаҳтаӷмың уйӷагыт игақфикңафтут атыӷмың қуля ма̄лӷук сӣпнықлъюку апостолаңаның Пынъӣӷаҳа̄м.

15Яқулык алыҳқуҳтыка золотамың успуталгуфтуқ успутаӷналюку ныҳлъяк, амихлъягилъю, миңлъютаңалъю. 16Ныҳлъяк улъювӣӷракыхтыфтуқ тахталңа, патыҳтулңатун аюқыфтуқ. Яқулгым ныҳлъяк успутаӷьяқминигу: 2,400 километра тахталъкыфта̄, патыҳтулъкыфта̄, ӯсқаҳтулъкыфта̄лъю. 17Миңлъютаңалъю успутаӷьяқминигу, 65 метраңуфтуқ ӯсқаҳтулңа. Яқулгым успуталъҳатун аюқыфтуқ югым успуталъҳа. 18Миңлъютаңа улима̄ӷуфтуқ ясписымың. Ныҳлъяк улима̄ӷуфтуқ золотапырыгўа̄ӷмың. Маникаҳқақ мыӷра̄кыхтыпихлъыҳӣ сиқинӷўа̄ҳтун. 19Ныҳлъягым миңлъютаңан тунымӣ пиниӷна̄қусиӷлютың алъя̄ҳӣнаӷның акитуҳлъягның уйӷагның. Сивулиқ ясписыңуфтуқ, тӯңлиҳа̄ сапфирыңуфтуқ, пиңая агатыңуфтуқ, стама̄ смарагдыңуфтуқ, 20талъима ониксыңуфтуқ, аӷвинлыга сардисыңуфтуқ, ма̄ӷраӷвинлыга хризолитыңуфтуқ, пиңаюның иңлюлга вириллыңуфтуқ, стаманың иңлюлга топазыңуфтуқ, қӯлңуӷутаңа хризопрасыңуфтуқ, қуля ата̄сим сӣпнӣӷа гиацинтыңуфтуқ, қуля ма̄лӷугым сӣпныӷан аметистыңуфтуқ. 21Қуля ма̄лӷук сӣпнықлъюку амихлъягыт жемчугыңуфтут, тамаҳаӷмың амихлъягыт ата̄симың жемчугмың улима̄ӷуфтут. Ныҳлъягым тӯмңи золотапырыгўа̄ӷуфтут; золото мыӷра̄кыхтыпихлъыҳӣ сиқинӷўа̄ҳтун.

22Ныҳлъягми ысҳа̄нъыӷитуңа Храмымың, қаюҳлъяк Храмыңа Атанӷӯқ Кияӷнық Аҳтуӷьяҳқаҳа̄нӷилңуқ, Пынъӣӷаӷа̄гуқлъю. 23Ныҳлъяк сиқиныҳсюӷнӣтуқ, налиӷмың танқиҳсюӷнӣтуқ ниӷухкамың, қаюҳлъяк ниӷуҳқылъҳа Кияӷныӷым ниӷукыхкаңа, Пынъӣӷаҳақлъю кынылӷутақыхкаңа. 24Қамахтыңъўа̄ӷлютың нунам юги кияҳлъықут ниӷугакун кӯкхутңалӷӣкун. Нунамлъю умӣлгита аклъюңитың тагиқӯтӣт ныҳлъягмун. 25Ныҳлъягым амихлъяги умыгна̄нӷитут аӷныӷым на̄ңныӷани қаюҳлъяк унугна̄нӷилңуқ тама̄ни. 26Нунам югита ныҳлъягмун тагиқӯлъықӣт пиниӷнаҳлъягыт аклъюңитың. 27Иўырңа ныҳлъягмун итыӷьяҳқа̄нӷитуқ сяңўа̄ сыӷлық, талўа кина алңунак сыӷлыӷнатун писта, налиӷмың иқлъыңиқыста. Иўырңа ныҳлъягмун итыӷьяҳқа̄гут тама̄куңинаҳа̄т а̄тҳит игақңалӷӣт Ига̄кун Уңувалъҳым. Та̄кут Игат Пынъӣӷаҳа̄м пикӣ.

Currently Selected:

Откровение 21: ess2

Highlight

Compare

Copy