К Филимону 1

1Укут посланият Павелымың пиңӯт, анусимиңлъяӷақ Христос Иисус апалъюқлъюку, ухпықа̄лгутымнъыңлъю Тимофейемың.

Пиниқыхкамтыгнун қыпҳалгутымтыгнун Филимонымун, 2ухпықанунлъю қырңуӷуткаюгнун мыңтыӷаҳпыни, Апфиямунлъю наямнъун Христосыкун, Архиппымунлъю пилъюўалӷутымтыгнун.

3Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Филимоным Пиниқилъҳалъю, Ухпықилъҳалъю

4Филимоными, қӯнпың игамсиқаюгвикақақа Кияӷнықа юӷа̄ткынъымкын, 5қаюҳлъяк нагақуӷақақа пиниқылъҳын тамаҳӣтнун Кияӷныӷым югитнун, ухпықилъҳынлъю Атаныҳқун Иисусыкун. 6Юӷа̄ткақамкын уңипа̄тысқылъюки илятың ухпықилъымнъың Христосыкун. Таўатын пикувык лӣгикатаӷаҳлъықатын қамахлъюки қуястылъҳыт алъхыҳтыкапут Христосыкун. 7Ухпықа̄лгутымни, пиниқилъыҳпык Кияӷныӷым юганун қуястыҳлъяга̄ңалъю, кайыма̄ңалъю! Пиниқылъыҳпык қуястӣ Кияӷныӷым юги.

Павелым А̄пускаңа Онисим

8Тытугна̄нӷитуңа қылыӷналютын Христосыкун атуқысқылъюку ылъқуӷутңалӷӣ, иўырңа таўатын пина̄нӷитуңа. 9Пиниқутылъыҳпуң апалъюқлъюку а̄пфикамкын атуқысқылъюку ылъқуӷутңалӷӣ. Хўаңа, Павел, нанывга̄гуңа, анусимиңлъяӷа̄гуңалъю апалъюқлъюку Христос Иисус. 10Хўаңаңӯқ а̄путилӷӣ иӷнымнун, Онисимымун. Анусимиңлъяӷвигми аталӣткақа̄ңа Христосыкун. 11Сивунӷани сясӣнӷисяҳтуқ лъпынун, иўырңа хўа̄ каютңуҳтыпихсима̄қ хўаңкутыгнун.

12Онисим лъпынун агляҳтыснақақа, лыганқун илюка малигунъақуқ лъңакун. 13Хўаңамнитысюгуяӷақа каюсӣтысқылъюңа анусимиңлъяӷвигми, катам лъпык каюсӣнъаяқывңа ма̄нсяқувык. Лӣсимакыхкынқун анусимиңлъяӷа̄лӷӣңа Пинилӷӣт Уңипат апалъюқлъюки. 14Иўырңа хўаңамнитысна̄нӷитақа ўыткуқун сивуклъютын а̄птаҳлъютын. Итагнақумакувгу хўаңамнитысқылъюку та̄ўа лъпык пиюкылъқылъықан, қаюҳлъяк қылӷунӷитамкын таўатын писқылъютын.

15Ынтақун Онисим иқитаҳтыка̄гуқ лъпынисяҳқа̄люни қӯнпырухлъяк. 16Лъңа паниның қыпҳаҳтыля̄ӷӯқ. Иўырңа қыпҳаҳтыля̄ӷумалъыӷминың аңлӣӷатаӷа̄ма̄қ қаюҳлъяк пиниқыхка̄ҳсима̄қ ухпықа̄лгута. Пиниқыпихтақа, иўырңа лъпык пиниқатаӷаҳлъықан қыпҳаҳтыля̄ӷулюку, ухпықа̄лгутңулюкулъю Атаныҳқун.

17Ынка̄ңам тугуклъӣмакувңа қыпҳалгутңулюңа, тугуклъиӷнакын Онисим хўаңаңуслъюку. 18Сямың сыӷлытун пимакаңатын налиӷмың асыңымакаңатын, асыңыңа хўаңа лъивикылъықақа. 19Хўа̄, хўаңа катам ӣхымның игаҳтуңа хўатын: хўаңа, Павел, лъивикылъықамкын. Иўырңа пуйгухпына̄н уңувалъҳын асыңылюку аюқан хўаңамнун. 20А̄а, ухпықа̄лгутымни, а̄пфикамкын Атаныҳқун тугуклъӣсқылъюку Онисим. Таўатын пикувык қуяслъықаҳпыңа Христосыкун! 21Письмогамкын лӣсимакңўа̄ӷлюку қа̄ткысяҳқақан қылӷуткақа лъпынун, рыпалъ қа̄йӷулъюку пилъықутын. 22Атхўай, ныкаҳқаңлъя̄таҳнакывңа қаюҳлъяк сиӷимаңӯңа Кияӷныӷым кӣмсиҳлъықӣ юӷалъыси, ынка̄м лъпысинун пилъықуңа.

Павелым Та̄қнӣтаңи

23Епафрасымңуқ пиниқӣси; анусимиңлъяӷалгуткақа апалъюқлъюку Христос Иисус. 24Қыпҳалгутмалъю Маркымлъю, Аристархымлъю, Димасымлъю, Лукамлъю лъңиталъюңуқ пиниқӣси.

25Пиниқылъҳа Атанӷым Иисус Христосым тамаҳаҳпысинилъи.

Currently Selected:

К Филимону 1: ess2

Highlight

Compare

Copy