От Иуды 1

1Укут посланият Иудамың пиңӯт, Иисус Христосым қыпҳаҳтыңаның, Иаковым уюӷа̄ның.

Письмоӷақуңа Кияӷныӷым накмикыхкӣтнун. Кияӷныӷым Атамта пиниқӣси, Иисус Христосымлъю афлъыңакақӣси.

2Кияӷныӷым наңлъыхталъҳалъю, ныкыхмылъҳалъю, пиниқылъҳалъю нуляли лъпысини.

Иудам А̄пқаңи Апыҳтуӷистысиӷўа̄ӷыт

3Пиниқыхкамни, письмоӷьюпихтақамси югулилъымнъың. Иўырңа нагақуӷьямки апыҳтуӷистысиӷўа̄ӷыт лъпысинилңӯт, апыӷьюкақа лъпысинун симиӷақа. Лӣсимакаси Кияӷныӷым каяхтыкақӣ апостолынилъю, иляңилъю югыт апыҳтӣсқылъюта ухпықсяҳқамнъың. Ынка̄м китум алңунак алъяңуҳсяҳқақынӷитӣт лъңита апыҳтуӷилъҳит. Тама̄кын апалъюқлъюку письмоңӯңа қывӯлъюси кипулъхина̄ӷысқылъюки апыҳтуӷистысиӷўа̄ӷыт. Апыҳтуӷистыхпынаки ипаңунӷилңуӷның апыҳтӯсӣтның. 4Қырңуӷунъыҳпысини малигутақут, иўырңа уңипа̄сигатӣси сямың апыҳтуӷьюгақнилюси. Тама̄кут югыт тугуклъиӷьюгигата̄т Иисус Христос та̄наңинаҳақ Иглыӷутистывут, Атаныҳпутлъю. Ынка̄м алъяңуҳтақа̄т апыҳтӯсяқ Кияӷныӷым наңлъыхталъҳаның аюқылӷӣ. Хўатын пӣқут: «Кияӷнық наңлыхтаҳлъяхтуқ, сыӷывутикаюгӯқ ынка̄м итагнаҳтуқ распутствагңамта». Қавңарухлъяк Кияӷныӷым уңипа̄ткақӣлъю аӷью̄ҳлъықнилюку кина алңунак апыҳтуӷилӷӣ таўатын.

5Уңипа̄тка̄яӷңа̄ҳпыси сивунӷани Кияӷныӷым аӷью̄ӷилъҳаның сыӷлыҳқыстынун, нықаңуҳсюгамси алъямың та̄кут успутақлъюки. Нықамиклъюку Атанӷым югуликақӣ Израилыӷмӣт Египетыӷмӣның, аӷуляқыстыкақӣ Египетмың. Иўырңа киңуңаның та̄м иляңи Израилыӷмӣт ухпықинаниӷьята, қа̄ткунъаниӷьята лъңанун, туқустыкақӣ. 6Нықамиклъюки яқулгыт Кияӷныӷым писқыхка̄ нагныӷусимаңитка̄т, унитка̄тлъю ныйың қиляк. Тама̄кын апалъюқлъюку Кияӷныӷым асиҳқыхкӣ қӣпшаӷутның ныкыгңаяҳқаның қӯнпырухлъяк, ныкыхтыстыкӣ мамлыхлъяхкун. Таўантыснақңўӣ кынляңа аӷью̄лъыҳқаминун Нанқихтивигым Аӷныӷани. 7Нықамиклъюки Содомыӷмӣтлъю, Гоморраӷмӣтлъю, увитаңитнилңӯтлъю нунат. Яқулгыстун сыӷлыҳқыхка̄гут. Алъя̄ҳӣнақ блудодействылъық пика̄т, талўа югыт юлгуткулъҳӣт атуқутақлъютың, сяңўа̄тлъю сыӷлыӷатаӷа̄т атуқыхкақӣт. Успута̄гут Кияӷныӷым аӷьюӷилъҳаның сыӷлыҳқыстынун кынлыңилңуҳқун кыныҳқун.

8Апыҳтуӷистысиӷўа̄ӷыт таўатытут. Пӣқут қаваңулъҳитаңуқ блудникыстақит, қа̄ткысигатӣтлъю югыт иглыӷутистыт, сыӷлытунлъю акузиткыстақӣт яқулгыт иглыӷутистыт. 9Нақам Михаил, яқулгыт иглыӷутистыңита иляңат, таўатын пилъҳитуқ. Туӷныӷа̄нкук а̄ҳтӣра̄ӷуткақңамыхтыху Моисейем югусӣ, Михаилым сыӷлытун акузиткумаңита̄, анахусиманилюкулъю пилъҳита̄. Йыӷлыги пикақа̄: «Атанӷым аӷью̄ӷмиглитын». 10Иўырңа тама̄кут апыҳтуӷистысиӷўа̄ӷыт сяңўа̄ алңунак лӣгикынӷилъкысың сыӷлытун акузиткақа̄т. Сяңўа̄ иляңа лӣгикақа̄т тыӷикусястун сюмыҳтаӷӣгалңуӷыстун. Тыӷикусят пиюкылъыӷмыгыстун пикаюгӯт. Таўатыҳпигақ апыҳтуӷистысиӷўа̄ӷыт пикаюгӯт. Ынка̄м сыӷлыҳқыстыңуҳтаӷаӷақут. 11Сыӷлыӷўа̄ӷунақңӯт лъңит! Каинытун пиңӯт, туқуткақа̄ аңлыгутни. Алъхыӷутықаҳналютың манимың сыӷлытун пика̄гут Валаамым пилъҳатун. Корейтун пиңӯт, қа̄ткысюнӷиткақыхкаңи иглыӷутистыт Кияӷныӷым накмикыхкӣ. Ынка̄м Кияӷныӷым на̄фқыхкақа̄ лъңа, апыҳтуӷистысиӷўа̄ӷытлъю на̄фқысяҳқақӣ.

12Нықынӷаҳқусяҳтуныҳпысини, причастиямаҳпыси, тама̄кутлъю апыҳтуӷистыт пӣқут. Якуӷнаҳтут ухпықанун катам таўатын уйӷахлъяк мыӷым асиңанилңуқ якуӷналӷӣ аңьянун. Ныӷақут қырңаӷмың ныңляҳқасимаӷмың, акузимаӷмың ныпухлъягыт кайңуюхпынатың. Лъңинаӷмың ныӷақут килъю тӯныхпынаки. Сясӣнӷитут қиляўа̄ӷыстун ыслъялъюгилңуӷыстун аюқут, ануқым наӷуӷускаңи қӯлңакун нунам мыӷисяхлъягым. Сясӣнӷитут пӣтыстиңигалңуӷыстун уқфигыстун аюқут, унатаӷвигми. Пӣтыстиңигалңӯт уқфигыт туқукастун аюқут. Тама̄кын апалъюқлъюку пӣтысиӷаҳтым нусюгақӣ паныҳналюки. Ынка̄м ма̄лӷугыгның туқукалъҳӯӷақут. 13Кайңуналӷӣт наңаӷныӷит қагиҳлъягыстун аюқут, тымңи пӯхлъюңлъят. Иӷалықыта̄ӷыстун қапшакаюгыстун аюқут, қаюҳлъяк таўатылңӯт иӷалықыта̄ӷыт налъюнӣӷутңуяҳқа̄нӷитут иглыӷанун. Таўатыҳпигақ иглыӷусяҳқақынӷита̄т кина алңунак апыҳтуӷилъысиӷўа̄лъыӷмыхтыхун. Тама̄кын апалъюқлъюку Кияӷныӷым ята̄ҳқуткақӣ писяҳтӣҳлъягмың ныкаҳқамың кынлыңилңуӷмың.

14Енохыңуқ ма̄ӷраӷвинлӣткыхкаңат киңунӷита Адамым, лъңан ӯкналиқуткыхкақӣ тама̄кут югыт. Хўатын пика̄гуқ: «Ысҳаҳтык, Атанық тагияҳқа̄гуқ аглыӷналӷӣт яқулылӷутыҳлъяни кылъқылъюки, 15нанқихналюки қамахтыңъўа̄ӷлюки югыт. Қайвиҳқысяҳқақӣ қамахтыңъўа̄ӷлюки сыӷлыҳқыстыт сыӷлыҳқылъҳит, сыӷлыпыста̄тунлъю акузилъҳӣт лъңаның. Тама̄кын апалъюқлъюку Атанӷым аӷью̄ӷьяҳқақӣ сыӷлыҳқыстыҳлъягыт».

16Тама̄кут югыт қӯнпың тымңи акузилгаҳлъягыт, ыфқуӷуткигалъкаңит сяңўа̄т алңунак. Сяңўа̄т алңунак сыӷлыҳқусит атуқсюныӷмыхтыки атуқақӣт, пинӣюгныҳлъягыт, усюқңӯҳтақӣтлъю килъю сямың қилӣӷвикныӷмыхтыки.

Кылыңася̄лъҳытлъю, Апыҳтӯсятлъю

17Пиниқыхкамни, нықамиклъюки Атанӷым Иисус Христосым апостолыңита а̄пқӣт сивунӷани. 18Уңипа̄ткақӣси хўатын: «Киңулиӷни аӷныӷни ныңляӷьюхсяҳтылгуяҳқа̄гуқ Кияӷныӷым ипапиҳқылъҳаның аюқылӷӣның. Сяңўа̄т алңунак югусим пиюкылъҳи атуқсюныӷмыхтыки пӣқӣт». 19Тама̄кут югыт а̄ҳтӣра̄ӷутыстиюгақут ухпықаның. Малихтақӣт югусимың пиюкылъҳит сыӷлыҳқылъыӷмун аюқылӷӣт, Аглыӷналӷӣгның Таӷныӷагның аваңитутмыхның. 20Иўырңа пиниқыхкамни, ўата икнақуҳся̄маңинаҳтыху ухпықа̄малъыҳси, ухпықилъыҳпысигун Кияӷныӷым аглыӷналӷӣтхун апыҳтӯсӣтхун. Юӷаӷақитык Аглыӷналӷӣгныкун Таӷныӷагныкун. 21Кияӷныӷым пиниқылъҳанитыкыстаҳтык, утақӣмалюси Атанымнъың Иисус Христосымың тӯнысқылъюси кынлыңилңуӷмың уңувалъыӷмың наңлъыхталъыӷмикун.

22Наңлъыклъюки тама̄кут малӷуклъиңалӷӣт Кияӷныӷым ипапиҳқылъҳаның. 23Югулитыки акуқақалъҳӯлӷӣстун кынӷыгның. Наңлъыкақлъюки иляңитлъю иўырңа пира̄мсиңўа̄ӷлюси лю̄рақ сыӷлыҳқылъҳистун пӣқся̄ҳтуси. Угумиклъюки сыӷлыҳқылъҳит катам угумикылъыҳпысистун нукыхнаҳқыҳлъякӣт а̄ткатың сыӷлыҳқыңъулютың.

Усюқилъық Кияӷныӷмун

24Кияӷныӷым кылыңаксяҳқақӣси сыӷлыҳқылъыҳқаҳпысиның, сыӷлыҳқылъҳӣтысяҳқақӣсилъю. Ынка̄м қуяҳлъяхлъықуси ныкывыхкуфси сивуңакун ниӷуҳқылъҳан. 25Кияӷныӷым та̄наңинаҳа̄гуқ Кияӷныгым, югуликақӣлъю Атанымтыхун Иисус Христосым туқулъҳакун. Има тазимакырухлъяк, ма̄тын, қӯнпырухлъяк кынлыңуна̄н Кияӷнық а̄ңыҳлъяхтуқ, аҳтуӷьяҳқа̄нӷитыҳлъяхтуқ, иглыӷутңўа̄ сяңўа̄ қамахтыңъўа̄ӷлюку, аҳтуӷьяҳқақынӷита̄ сяңўа̄ қамахтыңъўа̄ӷлюку. Кияӷнық усюқлъи. Аминь.

Currently Selected:

От Иуды 1: ess2

Highlight

Compare

Copy