К Ефесянам 3

Павелым Қыпҳа̄тилъҳа Язычнигнун

1Тама̄кын апалъюқлъюку, хўаңа, Павел, анусимиңлъяӷвигмытуңа қаюҳлъяк қыпҳа̄скыхка Христос Иисус лъпыси апалъюқлъюси язычнигни. 2Ынтақун нагақӯма̄ҳси Кияӷныӷым наңлъыхталъыӷмикун қыпҳақалиткақа̄ңа лъпысинун. 3Кияӷныӷым лӣтыста̄ хўаңамнун қайвиҳтылъҳилңуқ успықылъыни. Қавңанҳақ письмоткаҳтыкақақа та̄на. 4Атиҳтуқуфсигу письмоткыхкақа лӣлъықаҳси лӣгикылъқа қайвиҳтылъҳилңуқ успықылъық Христосымың аюқылӷӣ. 5Сивунӷани Кияӷныӷым уңипа̄тылъҳитӣ югыт қайвиҳтылъҳилңуӷмың успықылъыӷминың. Иўырңа укуни аӷныӷни Аглыӷналӷӣгныкун Таӷныӷагныкун қайвиҳта̄ успықылъыни аглыӷналӷӣнун апостолыминунлъю, ӯкналиқистыминунлъю. 6Хўатытуқ успықылъҳа: язычнигыт ухпықилъыӷмыхтыхун Пинилӷӣның Уңипаның илясима̄т Иудеянун Кияӷныӷым қуястылъҳанун. Налиӷнықа̄ҳсимӣ ата̄сим югусим, ынка̄м илятут Кияӷныӷым акықуся̄нун Христос Иисусыкун.

7Кияӷныӷым наңлъыхталъыӷмикун, аҳтуӷьяҳқа̄нӷилъыӷмикунлъю тунусялита̄ңа қыпҳаҳтыңулюңа уңипақысқылъюки Пинилӷӣт Уңипат. 8Укалиҳпига̄гуңа тамаҳӣтның Кияӷныӷым юганың. Таўалъӣма Кияӷныӷым наңлъыхталъыӷмикун тунусялита̄ңа хўатын: накмика̄ңа язычнигнун уңипақысқылъюки Пинилӷӣт Уңипат Христосым аклъюңиңаның аюқылӷӣт. Аклъюңиңи иңья̄тңа̄т югыт лӣгикылъҳитның. 9Кияӷныӷым накмикыхкақа̄ңалъю лӣгикыстысқылъюки қамахлъюки югыт қайвиҳсимаңилңуӷмың успықылъыӷминың. Кияӷныӷым, улимаӷикам сямың тамаҳа̄ның, қайвиҳтылъҳита̄ успықылъыни пӣнлиӷьюха̄лъыӷмың ма̄тымун. 10Та̄хкын қилягнилңӯт: иглыӷутилӷӣтлъю, аҳтуӷьяҳқа̄нӷилъылгытлъю, Кияӷныӷым лӣтыслъықӣ алъя̄ҳӣнаӷмың пыҳқинылъыӷминың. Таўатын пилъықуқ югмикун юӷаӷвигнилңуҳтыхун. 11Тама̄куңӯт Кияӷныӷым успықыхкӣ сялин нунаңлъялӷилъюни. Апыӷӣӷумӣ Христос Иисусыкун Атанымтыхун. 12Ухпықилъымтыхун Христосыкун агляӷьяҳқа̄ҳсима̄кут Кияӷныӷмун тытулъңуна̄мталъю, алиңылъңуна̄мталъю. 13Ынка̄ңам ӣлъқаягутыхпына̄н ухпықилъыҳси апалъюқлъюку икфиқуткыңъукымси. Икфиқылъыӷма қӯлваҳтыслъықӣси.

Пиниқылъҳа Христосым

14Ынка̄м та̄на апалъюқлъюку сыгысқуҳтуңа сивуңани Атам. 15Лъңаңӯқ атиӷилӷӣ тамаҳӣтның ныңлъюгутның қилягмылңуӷныңлъю, нунамылңуӷныңлъю. 16Юӷаҳтуңа Кияӷныӷмун аклъюңиҳлъяганың аҳтуӷьяҳқа̄нӷилъылитысқылъюси икнақуҳсӣсқылюки илюси қа̄мкут Таӷныӷахкынкун. 17Юӷа̄ткамси Христос кияҳтысқылъюку илюхпысини ухпықилъыҳпысигун. Юӷа̄ткамси акулгусқылъюсилъю, тунымалгусқылъюсилъю пиниқылъыҳқун. 18Юӷа̄ткамси, қамахлъюкилъю Кияӷныӷым юги, лӣгиксяқлъыгусқылъюку Христосым пиниқылъҳан, иқытуляңа, тахталяңа, ӯсқаҳтуляңа, сямавныҳтуляңалъю. 19Лъпысинун лӣсимакысқысюгақа Христосым пиниқылъҳа, қайўа пияқнаӷңа̄н лӣгикңўа̄лъыҳқа̄. Та̄хкын пиниқылъҳакун, Кияӷныӷым наңаӷныӷатун ўата лъӣҳлъықуси. 20Кияӷныӷым аҳтуӷьяҳқа̄нӷилъҳакун қыпҳалӷӣкут илюмнъи, лъңан пияқлъыгўа̄ қа̄йӷулъюку сяңўа̄ алңунак а̄птыкаҳпут налиӷмың сюмыҳтаӷа̄ткыхкаҳпут. 21Кияӷнық усюқылъыңли ухпықатхун юӷаӷвигнилңуҳтыхун, Христос Иисусыкунлъю. Усюқитыху қӯнпырухлъяк кынлыңуна̄н. Аминь.

Currently Selected:

К Ефесянам 3: ess2

Highlight

Copy