Деяния 10

Петырылъю, Корнилийлъю

1Кесариямиңуқ та̄ўа ю̄к а̄тҳа Корнилий. Умӣлгат Римым пилъюўаҳтыңита Италиямың пикақ. 2Ю̄к пинилӷӣ, каюсиӷимаҳлъяк аклъюмалӷӣнун, юӷатуқақлъю Кияӷныӷмун. Ныңлъюгуткулъҳӣт, қыпҳаҳтыкулъҳӣт манигӯткаюгыт Кияӷныӷмун. 3Ата̄сими аӷныӷми пиңаюмикылъя̄гми ысҳаӷўа̄қақ. Хўатыҳлъюўа̄қ ысҳақа̄ Кияӷныӷым яқулга итылӷӣ, яқулгым туқлъюқа̄: «Корнилий!»

4Алиңрӯӷумаӷми ысҳапахтуӷлюку яқулык а̄птыка̄: «Атанық, сямың пизин?»

Яқулгым пика̄: «Кияӷныӷым нагақӯмӣ юӷалъыҳтын, ыфқуқыпихта̄лъю каюсиӷилъҳын аклъюмалӷӣнун ынка̄м нықамика̄тын. 5Иоппиямун ақфастигу ю̄к а̄тқылӷӣ Симон Петырымың. 6Симонынкунитуқ сянаҳтистыми, мыңтыӷа̄ ыснымытуқ». 7Яқулгым таўатын пилюку унитка̄. Та̄хкын Корнилийем туқлъюқакык ма̄лӷук қыпҳаҳтыгни, пилъюўаҳталъю. Та̄на пилъюўаҳта Корнилийем каютаңа манигӯткаюк Кияӷныӷмун. 8Тагията уңипа̄тңўа̄қӣ ысҳаӷўа̄лъыӷминың, та̄хкын кывгақыхкӣ Иоппиямун.

9Уна̄миңани аӷныӷым қука̄ни кывгат ка̄сяҳтуӷақутлъю Иоппиямун, Петр маюқақ мыңтыӷам қа̄йңанун юӷаӷналюни. 10Та̄хкын игатақақ, сямың ныӷьюкақ. Сяма нықмың ята̄ҳқумалюки Петр ысҳаӷўа̄қақ. 11Ысҳақа̄ қиляк қылъпылӷӣ, та̄хкын ысҳақа̄ қӣпаӷаҳлъяхсюгнилңуқ укихтыкаңат нунамун стаматхун тыкышқа̄кун. 12Та̄ўаңуқ имақыфтуқ алъя̄ҳӣнаӷның тыӷикусяның, пресмыкающеесяның, қаўа̄гныңлъю тыңа̄каюгның. 13Та̄хкын мым пика̄: «Петр, макылъютын туқутилютын ныӷи!»

14Иўырңа Петырым пика̄: «Йыӷлыгилъю, Атанық! Ныӷигатуңа ӣнӷуткамың укмаңинъыӷилңуӷмың тыӷикусямың».

15Мым пиля̄тақа̄: «Кияӷныӷым укмаңиқақӣ та̄кут, укмаңинъыӷинъилюки пихпынаки». 16Таўатын пикақ пиңаюның кытхўылъ. Та̄хкын таўаниңинақ та̄на ӣңунаӷми қилягмун маю̄ткақ.

17Петырым кукшиқуткыхка̄ сямың писӣтаңа ысҳаӷўа̄лъыни. Таўатын пималюку Корнилийем кывгӣта лӣтка̄т Симоным мыңтыӷа̄ на̄нтуляңа, ынка̄м мануӷа̄нун ка̄ткат. 18Қамавык а̄птыкӣт: «Хўани ақылъқа̄нӷита̄ ю̄к а̄тҳа Симон Петр?»

19Петырым паниның сюмыҳтаӷа̄ткумалюку ысҳаӷўа̄лъыни, Таӷныӷам пика̄: «Уюқ, югыт пиңают иваӷақа̄тын. 20Укиглютын қақилъқафқа̄вык малихтики, қаюҳлъяк хўаңа каяхтанка лъпынун». 21Ынка̄м Петырым укиглюни пикӣ: «Хўаңаңӯқ ивақаҳси. Сямың пистыңъа?»

22Кӣмсиқа̄т: «Корнилийем кывгақӣнкут, умӣлган Римым пилъюўаҳтыңитнун. Ю̄к пиниҳлъяхтуқ манигӯткаюк Кияӷныӷмун, қамахлъютыңлъю Иудеит сӣвакыпихтақа̄т. Кияӷныӷым яқулган пикақа̄ Корнилий: “Ақфастигу Петр лъпысинун писқылъюку, нагатысқылъюку сямың пилъыҳқа̄ лъпынун”». 23Та̄хкын Петырым ӣтҳысқыхкӣ, таўанилъю қавӣсқыхкӣ.

Уна̄миңани ята̄ҳқылъюни малихтыкӣ Корнилийем кывгӣ, ухпықатлъю иляңи Иоппиямың малигуткат. 24Та̄хкын уна̄миңани ка̄ткат Кесариямун. Корнилийем илякўа̄нилъю, илякумта̄нилъю тагиляӷа̄тыслъюки лъмыхнун утақака̄т Петр. 25Петр ӣтҳақуқлъю Корнилийем пайыӷлюку сыгысқуҳфикыхка̄ манигуӷналюку. 26Иўырңа Петырым ныкывыстуткылъюку пика̄: «Ныкыви, хўаңалъю югӯңа». 27Ӣтҳуткылъюку Петырым алыҳқуқа̄ Корнилий. Итыӷьялӷӣми та̄ўа ю̄к қырңуӷутыҳлъягумалӷӣ таўани. 28Петырым пикӣ: «Лӣсимакңўа̄ӷаҳси хўаңкута Иудеяни Лӣлиҳтӯсямта иныҳтыкақӣлъю илятыфқа̄мта писқылъюта язычнигнун, талўа ля̄лиҳфикыснаниқақӣ. Иўырңа Кияӷныӷым кылгувика̄ңа кина алңунак укмаңинъыӷинъилюку сюмыҳтаӷа̄ткыфқа̄н писқылъюку. 29Ақфасяфсиңа тагӣңа қақилъқахпынаңа. Сяңама пӣқыстыңъа?»

30Корнилийем пика̄: «Хўатын лъӣӷума̄н акуўа̄қ пӣқылъымтун юӷа̄малюңа пиңаюмикылъя̄гми, ю̄к манумкун ныкывуқ а̄ткӣ ниӷухлъягыт. 31Хўа̄ пӣңа: “Корнилий! Кияӷныӷым юӷалъыҳтын нагақӯмӣ, нықамикӣлъю аклъюмалӷӣнун каюсиӷилъыҳтын. 32Иоппиямун кина кывгақигу ақфасқылъюку Симон Петр. Симонынкунитуқ сянаҳтистыми, мыңтыӷа̄ ыснымытуқ”. 33Ынка̄м таўаниңинақ ақфасқамкын, қуякамкын тагилӷӣтын. Лӣсимаклъюку Кияӷныӷым наюқылъҳа қамахлъюта хўа̄нлыңуӷни нагақуӷьюгаҳпут сяңўа̄ қамахлъюку Атанӷым лъпынун а̄пҳысқыхка̄ хўаңкунъун».

Петырым Акузилъҳа

34Та̄хкын Петырым пикӣ: «Та̄ўа ипа лӣгикақа Кияӷнық танӣлъҳитыфтуқ, таўатыңўа̄қ пикаюгуфта̄ тамаҳаҳлъяган ю̄к ата̄систун. 35Тугуклъиӷьяҳқақа̄ кина алңунак накумӣңуяӷңа̄н аликилӷӣ лъңаның, пинитунлъю пикаюк. 36Лӣсимакаҳси Кияӷныӷым уңипа̄ уңипақыхкақ Израилыӷмӣнун, та̄на Пинилӷӣ Уңипақ югыт ныкыхмылъыңусиҳқақа̄т Кияӷныӷмун Иисус Христосыкун. Иисус Христос, Атанқа̄ тамаҳаӷўа̄ӷми югым. 37Лӣсимакаҳси та̄на уңипақ миңитка̄гуқ Иудеялъқа̄ӷаӷми, пӣнлиқақ Галилеями Иоанным уңипақақңагу крестиӷылъық. 38Лӣсимакаҳси Иисус Назаретыӷмӣ, Кияӷныӷым имиқа̄ Аглыӷналӷӣгның Таӷныӷагның, аҳтуӷьяҳқа̄нӷилъыӷмыңлъю. Навык алңунак пиныӷмини пинитун пӣқыхкаңи югыт, на̄лъҳуқуқӣлъю тама̄кут Туӷныӷа̄м а̄ҳқутақыхкӣ, қаюҳлъяк Кияӷнық Иисусымылңуқ. 39Хўаңкута апостолыни лӣсимакистыңӯкут тамаҳа̄нун таўатын пилъҳанун Иудеит нунаңитни, Иерусалимымилъю. Туқуткақа̄т туқӯқа̄лъюку қақӯракун. 40Иўырңа пиңайӣтаңани аӷныӷым Кияӷныӷым уңуваҳтыстыкақа̄ туқулъыӷмың, ысҳаҳтыстыкақа̄лъю югнун. 41Иўырңа қамахлъюни югым ысҳа̄маңита̄. Хўаңкута ысҳақақаҳпут қаюҳлъяк Кияӷныӷым накмикыхкақӣнкут лӣсимакистыңулюта. Талўа ныӷылгусиқақаҳпутлъю, мыӷылгусиқақаҳпутлъю киңуңаның уңуваҳтыстылъҳан туқулъыӷмың. 42Та̄хкын каяхтыкақӣлъю уңипақысқылъюку Пинилӷӣ Уңипақ, а̄пҳысқыхка̄гуқлъю Кияӷныӷмун накмикыхкақнилюни нанқихтистыңулюни уңувалӷӣнунлъю, туқуканунлъю. 43Қамахлъютың ӯкналиқистыт пика̄гут, китумңуқ алңунак ухпықыхкумигу а̄тҳакун, сыӷывутылъыңьяҳқа̄гуқ сыӷлыҳқылъыӷминың».

Язычнигыт Алъхыӷутылъҳат Аглыӷналӷӣгның Таӷныӷагның

44-46Петр паниның акузималюку қамахлъюки нагалъҳӣт уңипа̄мың Аглыӷналӷӣм Таӷныӷам ӣтқӣ, ынка̄м алъя̄ҳлъюхўатун акузистыкӣлъю, усюқистыкӣлъю Кияӷныӷмың. Обрезаниякат ухпықат Иоппиямың малигуткат Петырымун сяӷӣӷаюкат нагасямыхтыки таўатын акузилъҳӣт. Лӣгикыхка̄т Кияӷныӷым Аглыӷналӷӣк Таӷныӷак тунусяқыхкык талўа язычнигнун.

Та̄хкын Петырым пикӣ: 47«Укут югыт алъхыӷутут Аглыӷналӷӣгның Таӷныӷагның хўаңкутыҳпигаӷыстун. Китумңам крестиӷиснаниӷнақаки мыҳқун?» 48Та̄хкын қылъқӣ крестиӷисқылъюки А̄тҳакун Иисус Христосым. Та̄м киңуңаның лъмыхнитаӷӣсқыхка̄т Петр.

Currently Selected:

Деяния 10: ess2

Highlight

Copy