1е Фессалоникийцам 4

Кияҳтылъық Ыфқуӷналӷӣ Кияӷныӷми

1Ухпықа̄лгутымнъи, аляӷраң хўатын пинақамси, лӣтивикыхкақамси натын кияҳтылъыҳқамың ыфқуӷнаӷлюси Кияӷныӷмун, ысҳа таўатын кияҳлъыҳӣси. А̄тҳакун Атанӷым Иисусым кайымамси ўатақа̄ӷақ таўатын писқылъюси. 2Лӣсимакаси сяңўа̄т қылӷуткапут лъпысинун писқылъюки Атаныҳқун Иисусыкун. 3Хўатытуқ Кияӷныӷым пиюкылъҳа лъпысинун: пылюңитысюгӣси сыӷлыҳқыстысюнӷитӣси атуқутылъыҳқун. 4Лӣтысюгӣсилъю тамаӷаҳпыси нуқытутысқылъюки югусиси пинилъыӷмун ынка̄м кияҳлъықуси пылюңилъюси, ыфқуӷнаӷлюси Кияӷныӷмунлъю, югнунлъю. 5Иляпхатыхпынаси югусиҳпыси атуқиюлъҳанун ухпықа̄нӷилңӯт пилъҳистун налъюкилӷӣт Кияӷныӷмың. 6Китум алңунак сякусӣқыфқа̄н пилигу ухпықа̄лгутми иңлюңа атуқилъыӷмун. Атанӷым аӷью̄ҳлъяхлъықӣ таўатын пикаюгыт. Сивунӷани кылыңася̄ҳлъякақамси тама̄кын. 7Кияӷныӷым накмикыхкақӣлъю кияҳтысқылъюта пылюңилъюта, сыӷлыҳқылъңуна̄мта. 8Ынка̄ңам китум алңунак қа̄ткынӷилъкумики тама̄кут апыҳтӯсят, Кияӷныӷӯқ қа̄ткынӷилъкаңа нака̄н ю̄к. Кияӷныӷӯқ тӯнистызи Аглыӷналӷӣгның Таӷныӷагның.

9Китум алңунак письмонӷисяӷңа̄ӷмиси аюқӣси уңипа̄нъалюси пиниқысқылъюки ухпықа̄лгутыси, қаюҳлъяк Кияӷныӷым апыҳтуқақӣси пиниқутысқылъюси. 10Ипаңӯқ пиниқыхкаси қамахлъюки ухпықа̄лгутыси тамаҳа̄ни Македониями. Иўырңа ухпықа̄лгутымнъи, қылӷамси пиниқутаӷӣсқылъюси. 11Пинақылъҳаҳси қамахлъюку кияҳтык ныкыхмылъылиӷлюси, лъпыси сяяҳқаси пӣқитыки, авылӷаӷлюки иляхпыси сяяҳқӣт. Қыпҳаҳтык алъхыӷусяҳқа̄люси аклъюкыхкаҳпысиның катам хўаңкута қылылъымтыстун. 12Таўатын пикуфси ныӷьюкна̄нӷитасилъю алңунак аклъюкыхкаҳси, ухпықа̄нӷилңӯтлъю сӣвакылъықӣси.

Атанӷым Тагилъҳа

13Ухпықа̄лгутымнъи, лӣсимакысюгамси ухпықаның қавалӷӣның қивӷукыфқӣта писқылъюки сиӷималъҳилңуӷыстун. 14Ухпықаҳпут Иисус туқулюни уңувақа̄гуқ. Ынка̄м ухпықаҳпут Кияӷныӷым тагилъықӣ Иисусыкун тама̄кут қавақат ухпықилютың лъңаның.

15Уңипа̄тңўа̄ӷамси Атанӷым апыҳтӯтка̄ның. Атанық тагикан, хўаңкута паниның уңувалӷӣни иңьяӷаӷна̄нӷитапут тама̄кут қавақат. 16Атанық лъңа катам қилягмың укихлъықуқ, югыт нагақуҳлъықа̄т игляхтуқақ қылылъық, мыңа архангелым, қалӷиҳта̄таңалъю Кияӷныӷым. Тама̄кут ухпықилютың Христосымың туқуляӷа̄ткат уңуваӷьюха̄ҳлъықут. 17Та̄хкын хўаңкута уңувалӷӣни уныхтыкани, Кияӷныӷым қырңуӷутыслъюта, лъңитнун, ҳатаӷаҳта̄тыслъықӣнкутлъю қилягўа̄ӷнун па̄йӷысқылъюку Атанық ыслъями. Ынка̄м Атаныӷмылъықукут қӯнпырухлъяк. 18Тама̄кын апалъюқлъюку илютуҳся̄сиқақитыки та̄кут акузитыт.

Currently Selected:

1е Фессалоникийцам 4: ess2

Highlight

Compare

Copy