1е Фессалоникийцам 1

1Укут посланият Павелымың, Силамың, Тимофейемыңлъю пиңӯт, Фессалоникаӷмӣт ухпықӣтнун Кияӷныӷым Атам пиңи Атанӷымлъю Иисус Христосым. Кияӷныӷым наңлъыкилъҳалъю, ныкыхмылъҳалъю лъпысинилъик.

Фессалоникаӷмӣт Кияҳта̄лъҳатлъю, Ухпылъҳатлъю

2Қӯнпың игамсиқаюгвикақаҳпут Кияӷнық тамаҳаҳпысинун, ӣўлыңлъю юӷа̄ткақамси. 3Юӷанымта Кияӷныӷмун Атамнъун нықамикақаҳпут қыпҳалъыҳси ухпылъыҳпысигун, қыпҳалъыҳси пиниқылъыҳпысигун. Игамсиқаюгвикақаҳпутлъю ухпылъыҳси нагныӷускыси икнақлъюку қаюҳлъяк сиӷимаңулӷӣси Атанымтыхун Иисус Христосыкун. 4Ухпықа̄лгутымнъи, Кияӷныӷым пиниқыхка̄ни, лӣсимакаҳпут накмикыхкақӣси 5қаюҳлъяк Пинилӷӣның Уңипаның тагитақңамси, акузитыра̄ӷинаҳтыхун пимаңитукут, иўырңа аҳтуӷьяҳқа̄нӷилъыҳқунлъю, Аглыӷналӷӣгныкунлъю Таӷныӷагныкун пика̄гукут. Ынка̄м ухпықаси Пинилӷӣт Уңипат ипаңутаңи. Лӣсимакаҳсилъю натын кияҳтыка̄тфут лъпысинилъюта, таўатын каюсӣнъалюси кияҳтыка̄гукут. 6Ынка̄м хўаңкутыстунлъю, Атаныҳтунлъю лъӣҳтык. Қайўа икфиқыҳлъягңа̄ҳпыси, тугуклъиӷаси Пинилӷӣт Уңипат қуямалъылиӷлюси Аглыӷналӷӣгның Таӷныӷагның. 7Ынка̄м успута̄ҳтуси тамаҳӣтнун ухпықанун Македониямилъю, Ахаиямилъю. 8Атанӷым уңипа̄ миңитңӯқ лъпысиның Македониямилъю, Ахаиямилъю. Ухпықилъыҳсилъю Кияӷныӷмың лӣта̄т тамаңани. Ынка̄м хўаңкута сямың пинӷисяӷңа̄мтыху ухпықилъыҳси, қаюҳлъяк сӣңынлъю югыт нагақӯма̄т. 9Тамаңани а̄пҳақа̄т упуӷатилъыҳлъяхси хўаңкунъың лъпысинитңулюта. Қӣвуманилюсилъю уңувалӷӣмун Кияӷныпигмун қыпҳа̄нъалюку, пыхлъюки кияӷныңлъяқат. 10Утақа̄қаҳсилъюңуқ Кияӷныӷым Иӷныӷа, Иисус, тагияҳқақ қилягмың. Лъңаңӯқ Кияӷныӷым уңуваҳтыка̄ туқулъыӷмың, югулӣқа̄қалъю Кияӷныӷым сякша̄лъҳаның ка̄сяҳқамың.

Currently Selected:

1е Фессалоникийцам 1: ess2

Highlight

Copy