1е Иоанна 2

Христос Каютфут

1Таӷнуҳаҳамни, хўатын письмоңўа̄мси сыӷлыҳқыфқа̄фси писқылъюси. Иўырңа кина алңунак сыӷлыҳқыхкан Иисус Христосым ылъқуӷутңалӷӣм манигӯтутақӣлъю Атамун. 2Лъңаңӯқ иқитусиқ сыӷлыҳқылъымнъун, хўаңкуңина̄мта сыӷлыҳқылъымнъун пиңунӷитуқ, иўырңа тамаҳаҳлъяган югым сыӷлыҳқылъҳанун аюқуқ.

3Ысҳа хўатын ипапиҳқуткысяҳқаҳпут лӣсимакилъыҳпут Кияӷныӷмың, қа̄ткылъымтыхун қылӷусӣ. 4Кина хўатын пилӷӣ: «Лӣсимакақа Кияӷнық», нақам қа̄ткыхпынаки қылӷусӣ, иқлъыңиқыстыңӯқ, налъюка̄лъю ипапиҳқылъық. 5Иўырңа китум алңунак қа̄ткыхкумики Кияӷныӷым акузитаңи, пиниқылъҳа Кияӷныӷмун ипапыста̄п ӣгўақа̄гуқ, таўатын ипапиҳқуткысяҳқақаҳпут лъңанитулвут. 6Кина алңунак пилӷӣ кияҳтыңъунилюни лъңани, кияҳсяҳқа̄гуқ Иисус Христосым пилъҳатун.

Нутаӷақ Қылӷусяқ

7Пиниқыхкамни, уна қылӷусяқ письмоткыхкыхка лъпысинун нутаӷа̄нӷитуқ. Та̄наңӯқ ныӷиҳтақ қылӷусяқ нагаткаюхси има пӣнлиӷьюхўа̄лъыӷмың, та̄на уңипа̄гуқ нагаткаҳси. 8Иўырңа уна қылӷусяқ письмоткыхкыхка лъпысинун нутаӷа̄гуқ. Та̄м ипапиҳқылъҳа ысҳаӷлюни аюқуқ Христосыкунлъю, лъпысигунлъю қаюҳлъяк мамлык ага наӷуҳтыңъӯқ, ниӷупик кӯкхутңӯқ.

9Кина алңунак пилӷӣ ниӷугмынъилюни нақам угумиклъюку ухпықа̄лгутни, паниның мамлыгмылңӯгуқ. 10Китум алңунак пиниқыхкумигу ухпықа̄лгутни ниӷугми кияҳтыңъӯқ, ниӷугмытутминың на̄хтусиҳқӣтуқ. 11Иўырңа китум алңунак угумикыхкумигу ухпықа̄лгутни, мамлыгмытуқ. Иглыҳтыңъӯқ мамлыгми, талўа налъюкуқ навык пиңутни қаюҳлъяк мамлыгым ая̄стыкақа̄.

12Таӷнуҳаҳамни,

письмоӷақамси қаюҳлъяк сыӷлыҳқылъыси сыӷывутылъыңыхка̄гут апалъюқлъюку Христос.

13Атани, письмоӷақамси қаюҳлъяк лӣсимакыхкыси лъңа пӣнлиӷьюхўа̄лъыӷмың аюқылӷӣ.

Нукалъпигани, письмоӷақамси қаюҳлъяк кая̄лъқыхкақыхкыси Туӷныӷақ.

Таӷнуҳаӷни, письмоӷақамси қаюҳлъяк лӣсимакыхкыси Ата.

14Атани, письмоӷақамси қаюҳлъяк лӣсимакыхкыси лъңа има пӣнлиӷьюхўа̄лъыӷмың аюқылӷӣ.

Нукалъпигани,

письмоӷақамси қаюҳлъяк икнақылӷӣси,

акузитаңилъю Кияӷныӷым илюхпысинилңӯт,

кая̄лъқыхкақыхкысилъю Туӷныӷақ.

15Пиниқыхпына̄н нуна талўа сяңўа̄ алңунак нунам пӣңа. Китум алңунак пиниқыхкумигу нуна, пиниқылъҳитуқ Атамун. 16Укут ысҳа қамахлъюки нунам пиңи: сяңўа̄ югусим пиюкылъҳа сыӷлыҳқусиқақылӷӣ, ийым қилӣҳтыстылъҳа, сяңўа̄тлъю югыт қука̄югуткақыхкаңит нунами хўани. Та̄кут Атамың пиңунӷитут, нунамың пиңӯт. 17Нуна авӣӷутңӯқ, тама̄кутлъю сыӷлыҳқусӣўақылӷӣт югым пиюкақыхкаңи; иўырңа китум атуқыхкумигу Кияӷныӷым пиюкылъҳа кияҳсяҳқа̄гуқ қӯнпырухлъяк кынлыңуна̄н.

Аңуякилӷӣт Христосымың

18Таӷнуҳамни, кынля қантаӷалъӣӷаҳтуқ! Уңипа̄тка̄гуси Аңуякилӷӣ Христосымың тагилъықнилюку, хўа̄ ма̄тын угляпихлъыҳӣт аңуякилӷӣт Христосымың алъхыҳтӯтңўа̄ӷлютың аюқут, ынка̄м лӣсимакаҳпут кынля қантаӷалъӣӷаҳтуқ. 19Тама̄кут хўаңкунъисяҳтут иўырңа униткақӣлъю қаюҳлъяк илятңўа̄ӷумаңилңӯт хўаңкунъун. Илятңўа̄қа̄яқумың унинъаянӷитӣлъю. Унитылъыӷмыхтыхун лӣгикыстыңъўа̄ӷа̄т илятңўа̄ӷумаңитылъыҳтың хўаңкунъун.

20Иўырңа лъпыси, Христосым кӯвыхкақӣси Аглыӷналӷӣгның Таӷныӷагның ынка̄м қамахлъюси лӣсимакаҳси ипапиҳқылъық. 21Письмоңустымсӣи ипапиҳқылъық налъюкутыхпысиның? Нака̄, письмоңўа̄мси лӣсимакутыхпысиның. Лӣсимакыхкысилъю иқлъыңиқылъық ипапиҳқылъыӷмың пиңунӷилңуқ.

22Кина иқлъыңиқыстыңўа̄? Иқлъыңиқыстыңӯқ хўатын пилӷӣ: «Иисус, Христосыңунӷитуқ». Та̄наңӯқ аңуякилӷӣ Христосымың қаюҳлъяк иҳсякыхкык Атаңалъю, Иӷныӷалъю. 23Китум алңунак иҳсякыхкумигу Иӷныӷа, Атаңалъю иҳсяксяҳқақа̄; китум алңунак тугуклъиқумигу Иӷныӷа, Атаңалъю тугуклъиӷьяҳқақа.

24Ынка̄ңам ӣўлың нықамиклъюку апыҳтӯсяқ, апыҳтӯсяқыхкақ лъпысинун ухпыӷьюхўа̄лъыҳпысиның има. Атуқумаңинақуфсигу нагақуқаҳси та̄ўа ӣўлың Иӷныӷмылъықусилъю, Атамылъықусилъю. 25Унаңӯқ акықусяқыхка̄ тӯнылъықнилюку хўаңкунъун, кынлыңилңуқ уңувалъық.

26Письмосиқанка лъпысинун тама̄кут пӯҳтинақуткылӷӣт лъпысиның апалъюқлъюки. 27Иўырңа лъпыси Христосым кӯвикыхкақӣси Таӷныӷагминың. Таӷныӷакык илюхпысинитутмыгның алъя кина алңунак Апыҳтуӷистыксюгна̄нӷитаҳси, қаюҳлъяк Таӷныӷахкынка апыҳтуӷақӣси сямың тамаҳа̄ның. Апыҳтӯсӣ ипаңӯт, тымңиңунӷитут ынка̄м Таӷныӷам апыҳтулҳатун Христосымытыкыстаҳтык.

28Таӷнуҳамни, Христосымытыкыстаҳтык ынка̄м ука алӣқан илютуяҳқа̄люта, ӣӷнақыфқа̄мта кайңуюгым лъңаның пилӷа̄кут таўани Аӷныӷми тагилъҳани. 29Лӣсимакыхкыси Христос ылъқуӷутңалӷӣ. Ынка̄м лӣсимаксяҳқақасилъю алңунак ылъқуӷутңа̄н пикаюгыт Кияӷныӷым таӷнуҳақӣ.

Currently Selected:

1е Иоанна 2: ess2

Highlight

Compare

Copy