1 Corintio 9

Pablo pedea ũripataɨrãpa ichi k'aripadai p'anɨ

1¿Mɨchia oo k'ɨ̃ria bɨ ook'á bɨk'ãra? ¿Mɨ Jesucristopa peedawẽk'ãra? ¿Mɨa pida Tachi Chipari Jesú unusiwẽk'ãra?#Hecho 9:3-7. ¿Mãrapa mɨnepa Tachi Chiparide ĩjãasidawẽk'ãra? 2Waapẽarã ũpẽarãpa mɨ Jesucristopa peeda k'ɨ̃risiadawẽa p'anɨmina mãrapa k'awadai p'anɨma mɨ piarã ichia peedapɨ. Mɨa jarateadadepa mãrapa Tachi Chiparide ĩjãasida pẽra mãɨ unupi bɨma. 3Chi mɨ k'orea k'achia pedeapataɨrã́ mɨa nãɨya idiruma: 4¿Mɨa jaratea bɨdepa, mãra juadepema ne k'oiwẽa bɨk'ãra? ¿Ne toiwẽa bɨk'ãra? 5Waapẽarã Jesupa peedaɨrã, Tachi Chipari Jesú ũpẽarã, mãɨnepa Pedro ãchi k'imarã ome nipapatama.#9:5 Pedro. Griego pedeade nãɨya bɨ bɨma: Cep'a. Ara ãchi jĩra ¿mɨa Jesude ĩjãaparí wẽra atak'ari, mãɨ ome nipaiwẽa bɨk'ãra? 6Bernabé mãɨnepa mɨa pida Tachi Ak'õre pedea jaratea p'aneeutade, mimia awara oopatama ne uru p'ananai k'orea. Maamina ¿waapẽarã jĩra taipa jaratea p'anɨnepa ne jitadai p'anɨwẽk'ãra?

7¿Papaká bɨ ara ichi errearapa chõone wãparik'ãra? ¿Chi uva k'ãena uru bɨpa ichi uva jõiwẽk'ãra? ¿Chi oveja ak'ɨparipa oveja juba toiwẽk'ãra? 8¿Jõma mãɨ mɨ k'ɨ̃risiadepa jara bɨk'ãra? ¿Moisepa bɨdapa abarik'a jarawẽk'ãra? 9Mãɨ bɨdade nãɨya bɨ bɨma: «P'ak'apa trigo k'ɨmɨ edá pistiamaa bɨde ichi it'ae jɨ̃parí jɨ̃rãse».#9:9 Mãɨ ewaride chi ẽpẽerãpa p'ak'á trigo pistiapipachidama, chi trigo ek'ap'a ãarea oochoapimẽrá. Deuteronomio 25:4. Tachi Ak'õrepa mãɨ pedea jaraside ¿p'ak'adepuru k'ɨ̃risia basik'ãra? 10¿Tachi k'orea pida k'ɨ̃risia basiwẽk'ãra? Piarã tachi k'orea Tachi Ak'õrepa mãɨ Moisepa bɨda teasima. Chi net'a tau uuparí mãɨnepa chi baaparí mimiapatama ãchia mãɨnepema uru p'ananai k'awa p'anɨ pẽra. 11Ara mãɨ jĩra taipa mãrá Tachi Ak'õre pedea jarateasida pẽra ¿pia bɨwẽk'ãra taipa mãranepa ne jitadait'a? 12Waapẽarã jarateapataɨrãpa mãranepa ne jitadai p'anɨpɨra, taipa ãchi k'aepẽra ne atepe jitadai p'anɨma.

Maamina ne ididak'ama. Mãɨpari jõma choa p'anɨma ẽpẽrarãpa chi pedea pia Cristo k'orea piawẽa k'ɨ̃risiapidaemaapa. 13Mãrapa k'awa p'anɨma Tachi Ak'õre te minachia bɨde chi mimiapataɨrãpa ãchia oo p'anɨnepa jitapatama nek'odai k'orea. Chi ãnimara paateapataɨrãpa mãɨ k'iurudepema atapatama k'odai k'orea. 14Ara mãɨ jĩra Tachi Chiparipa jarasima chi pedea pia ichi k'orea jaratea nipapataɨrãpa chi mãɨnepema jitadai p'anɨ k'odai k'orea.#Mateo 10:10. 15Maamina mɨa mãɨ jitak'ama. Mãɨ k'orea nãɨ k'art'ade mɨa bɨwẽma mãrapa ne teadamẽrá. Mɨa jaratea bɨdepa ne jitak'a pẽra arapá bɨma. Mɨa k'ɨ̃riawẽma mi ãpia pida ne tea bɨdepa mãɨ arapá jõpiit'a. Mɨmá, mãranepema ne jitai k'aepẽra piui pia bɨma.

16Mɨa chi pedea pia Cristo k'orea jaratea bɨmina mɨ chi atepe bɨ jĩra k'ɨ̃risiak'ama, Tachi Ak'õrepuru jarateapi bɨ pẽra. Chi mãɨ pedea pia jarateaepɨra, mɨ mĩa chupuria beeipɨ. 17Mɨchia k'ɨ̃ria bɨdepa jarateadapara, ne jitai pasima. Maamina mɨchia k'ɨ̃ria bɨdepa jarateawẽa bɨma. Tachi Ak'õrepuru mɨá jarateapisi pẽra, mɨa mãɨya bai bɨma. 18Mãɨyara ¿mɨa jaratea bɨ k'orea, k'ãre jitaima? Ne jitaiwẽma. Sõ arapá bɨma chi pedea pia Cristo k'orea pari jaratea bɨ pẽra. Mɨa jaratea bɨ k'orea ne jitai bɨmina, ne idik'ama.

19Mɨ chi waapẽarã pae pari mimiapariwẽ pẽra, chi jõmãɨrã pae pari mimiaparí beesima chok'araɨrãpa mɨnepa Jesucristode ĩjãanamẽrá. 20Mɨ judiorã t'ãena bɨde judiorã jĩra baparima mɨnepa Jesucristode ĩjãanamẽrá. Chi Moisepa bɨda ũripataɨrã t'ãena bɨde mɨ mãɨ bɨdadepa bak'amina, mãɨya bɨ jĩra baparima ãchia mɨnepa Jesucristode ĩjãanamẽrá. 21Mãɨnepa Tachi Ak'õrepa chi Moisepa bɨda atua berã t'ãena bɨde mɨ ãchi jĩra baparima mɨnepa Jesucristode ĩjãanamẽrá. Maamina mɨa Moisepa bɨda itu bɨk'ama. Jõma Cristopa oopi k'ɨ̃ria bɨ jĩra ooparima. 22Chi ũpẽarã chi piarãpẽa pedea ãpia k'awa k'ede t'ãena bɨde ãchi jĩra baparima mɨnepa Jesucristo k'orea pia k'awadamẽrá. Mɨ wãrucha ẽpẽrarã t'ãena bɨde ãchi jĩra baparima mɨnepa waapẽarãpa Cristode ĩjãanak'ari mɨa ãchi nemietaadepema k'aripamẽrá. 23Mɨa jõma mãɨ jĩra ooparima chi pedea pia Cristo k'orea k'awapii k'orea. Mãɨya mɨa pida Tachi Ak'õrenepa nepia jitaipɨ.

24Mãrapa k'awa p'anɨma ẽpẽrarã p'irapatama k'ai chi atepe ɨbɨa p'ira bɨt'a k'awadai k'orea. Mãɨne chok'ará p'irapatamina chi naa chedapuru ne jitaparima. Mãra sida isapea p'irauta jĩra jõma pia oot'ɨ Tachi Ak'õrepa teai jarada jitadai k'orea. 25P'irapataɨrãpa ãchi k'ak'ua pia ak'ɨpatama chaarea p'ananai k'orea. Mãɨya oopatama waapẽarã k'aepẽra pia p'iradak'ari poro jũra jɨ̃parí jitadai k'orea. Mãɨ poro jũra jɨ̃parí isapea pɨɨparima.#9:25 Mãɨ ewaride chi poro jũra jɨ̃parí k'irú oodada teapachidama chi p'irapataɨrã́. Maamina tachia nejõma pia oopatama Tachi Ak'õrepa teai jarada pɨɨk'apɨ́ atadai k'orea. 26Mãɨpuru ẽpẽra paritua p'ira wãru jĩra mɨa ook'ama. Mãɨnepa ẽpẽra jɨ̃aramá sĩk'oapari jĩra mɨ mãɨ jĩra chõok'ama. 27Mãɨpari mɨ k'ak'ua chaarea oopi bɨ jĩra mãɨnepa mɨ k'ak'uapa ooemaa bɨt'a mɨa oopi bɨ jĩra, mãɨya jõma oopi bɨma Tachi Ak'õrepa teai jarada jitai k'orea. Mãɨya ooepɨra, mɨa ẽpẽrarã́ jaratea badamina Tachi Ak'õrepa teai jarada p'ue jitaiwẽma.

Currently Selected:

1 Corintio 9: tdc

Highlight

Copy

Compare