1 Corintio 2

Cristo k'urusude piuda k'orea Pablopa jarateada

1Ũpẽarã, mɨa Tachi Ak'õre k'orea mãramá jarateade wãside chi minachia k'awapataɨrã pia pedeapataɨ jĩra mɨ k'ɨ̃risiadepa mi ãpia pida jarateaé pasima. 2Mãra t'ãena baside mɨa abapuru Jesucristo k'orea mãɨnepa ichi k'urusude peadada k'awapi k'ɨ̃ria basima. 3Mãɨne mɨ ɨbɨwẽa bɨ k'ɨ̃risiasima. Mãɨnepa p'ue pia jarateawẽa k'ɨ̃risia bada pẽra wap'eapa k'ak'ua ãarea ore nɨbapachima. 4Mɨa Jesú k'orea jaratea baside mɨ k'ɨ̃risiadepa mãɨya ooé pasima mãrapa ĩjãanamẽrá. Mãɨpari Tachi Ak'õre Jaorepa ichi jua chaareadepa k'awapisima mãɨ pedea piarãt'a. 5Mãɨya mãrapa nãɨ ĩjũanepema k'ɨ̃risiadepa Jesucristode ĩjãanaé pasima, mãɨpari Tachi Ak'õre jua chaareadepa ĩjãasidama.

Chi Tachi Ak'õrepa naena k'awapiwẽa bada ichi Jaoredepa k'awapida

6Mãɨya taipa chi k'ɨ̃risia k'awaat'a jaratea p'anɨma chi Tachi Ak'õrene minachia ĩjãa berã́. Mãɨ k'ɨ̃risia k'awaat'a nãɨ ĩjũanepemawẽma mãɨnepa nãɨ ĩjũanepema minachia k'awa p'anɨrã k'ɨ̃risiawẽma. Ãchi tãaraa p'ananaiwẽma. 7Taipa chi Tachi Ak'õre k'ɨ̃risia naena k'awapiwẽa bada jaratea p'anɨma. Nãɨ ĩjũa ooi naena Tachi Ak'õrepa mãɨ k'ɨ̃risiadepa ne ooi bɨsima tachi ichi ome ará pia p'ananamẽrá. 8Chi nãɨ ĩjũanepema minachia k'awapataɨrã mi ãpia pida mãɨ k'ɨ̃risia k'awadaé pasima. K'awa p'ananapara, Tachi Chipari pia k'ɨrɨt'a k'urusude peadaiwẽ pasima. 9Maamina k'awadaé pasima Tachi Ak'õre pedeade nãɨya bɨ bɨ jĩra:

«Chi Tachi Ak'õrepa ichi k'ɨ̃ria berã pae pia ooda uru bɨ, mi ãpia pida wapida ununak'ama, k'ɨɨrɨpa ũrinak'ama mãɨnepa mi ãpia pida k'awa k'ɨ̃risiadak'ama».#Isaía 64:4; 52:15.

10Jõma makɨɨ Tachi Ak'õrepa ichi Jaoredepa tachiá k'awapisima. Ichi Jaorepa nejõma k'awa bɨma. Chi Tachi Ak'õre k'ɨ̃risia sida jõma k'awa bɨma. 11¿Ẽpẽra k'ɨ̃risiat'a k'aipa k'awa bɨma? Ara ichi tuabapuru k'awa bɨma. Ara mãɨ jĩra mi ãpia pida Tachi Ak'õre k'ɨ̃risia p'ue k'awadawẽma. Aba Tachi Ak'õre Jaorepuru mãɨ k'awa bɨma. 12Tachia nãɨ ĩjũanepema k'ɨ̃risiat'a atadaé pasima, mãɨpari Tachi Ak'õre Jaoret'u jitasidama jõma Tachi Ak'õrepa ichi sõpiadepa teada k'awadamẽrá. 13Ara mãɨ k'orea taipa pedea p'anɨma. Maamina nãɨ ĩjũanepema k'ɨ̃risiadepa pedea p'anɨwẽma, mãɨpari Tachi Ak'õre Jaorepa taiyá jaratea bɨ jĩra pedea p'anɨma. Mãɨya chi Tachi Ak'õre Jaorepa k'awapi bɨt'a taipa jaratea p'anɨma ichia pedeapi bɨ jĩra.#2:13 Ichia pedeapi bɨ jĩra. Griego pedeade jara bɨma: «Tachi Ak'õre Jaore uru berã́».

14Maamina Tachi Ak'õre Jaorepa k'awapi bɨt'a, chi Tachi Ak'õre Jaore nea bɨpa k'awai k'ɨ̃riak'ama, ichimá piawẽa bɨ pẽra. Mãɨnepa p'ue k'awak'ama, Tachi Ak'õre Jaoredepa mãɨ k'awapi bɨ pẽra. 15Chi Tachi Ak'õre Jaore uru bɨpa Tachi Ak'õre k'orea p'ue minachia k'awaipɨ. Maamina Tachi Ak'õre Jaore nea bɨpa chi Tachi Ak'õre Jaore uru bɨ k'ɨ̃risiat'a p'ue k'awaiwẽma. 16Tachi Ak'õre pedeade nãɨya bɨ bɨma: «¿K'aipa Tachi Chipari k'ɨ̃risia k'awa bɨma? ¿K'aipa ichiá jarateaima?»#Isaía 40:13. Maamina tachia Cristo k'ɨ̃risiat'a uru p'anɨma.

Currently Selected:

1 Corintio 2: tdc

Highlight

Copy

Compare