Romans 6

Tuqulleq Seghleghqelleghqun Iwernga Unguvalleq Christ‑akun

1Samengꞌngam pilleqesta? Seghleghqumanginaaltaa‑a Kiyaghneghem nangllegtallgha nulasqelluku? 2Nakaa! Qayughllak tuqukastun ayuqukut, enkaam tuqukaakumta naten seghleghqumanginaghnaqesta? 3Liisimakaghsi, qamaglluta paaptaayaaqngamta ilatkaagukut Christ Jesus‑mun. Ilatkaagutkutlu tuqullghanun paaptaayaaqngamta. 4Paaptaayellemteggun tuqukaagukutlu qunguqaagukutlu Christ‑ami. Aghtughyaghqaanghilleghllagmikun Atam unguvaghtekaqaa Christ‑a tuqulleghmeng. Enkaam kiyaghsaghqaaghllequkut kiyaghtaallelighraghaghluta.

5Kiyaghneghem ilasimakanginkut Christ‑amun tuqullghakun, taagken ilatestepestaaghlleqiinkutlu ellnganun unguvaghtesluta ellngatun. 6Liisimakaghput whangkuteluguyalghiit qaquuraatkaagut Christ‑akun igleqataqnaniisqelluta seghleghqellghem aghtughyaghqaanghillghanun, qepghaghtelaaghunanighnalutallu seghleghqelleghmun. 7Yuuk tuquneghmini itemaquq aghtughyaghqaanghillghaneng seghleghqellghem. 8Tuqumakumta Christ‑ami, ugpeqaghput kiyaghtelgusighyaghqaqaghputlu ellnga. 9Liisimakaghput Christ‑a unguvaghtestekaaguq tuqulleghmeng enkaam allamengllu tuquyaghqaanghituq qayughllak tuqulleq aghtughyaghqaanghillghiitkaaguq ellnganun. 10Ataasighhaghmeng tuqukaaguq kayaalqennaluku seghleghqelleq. Iwernga unguvatmineng, kiyaghtengnguuq Kiyaghneghmun. 11Tawateghpigaq sumeghtaghaghtek tuqukaalusi seghleghqellghem aghtughyaghqaanghillghanun, sumeghtaghaghteklu unguvangulusi Kiyaghneghmun Christ Jesus‑kun.

12Tamaaken apalluqluku seghleghqelleghmun igleqataqestegpenaki yugusisi tuqukayuget. Seghleghqellghem igleqataqegkaki yugusisi, qaatkesuglleqasi yugusighpesi seghleghqengngalghiit piyukellghi. 13Alngunak nalighneghi yugusighpesi tuunegpenaki seghleghqusiiluki, qayughllak tawaten pikufsi tuunelleqasi seghleghmun. Itupill tuunitek Kiyaghneghmun. Tuqukastun ayuqsaghtusi, iwernga Kiyaghneghem unguvaghtekaqiisi. Enkaam tuuniteki iinguniita yugusisi Kiyaghneghmun ellnganun atuqesqelluki elqughutngalleghmun. 14Seghleghqellghem igleqataqnaanghitiisi qayughllak igleqataqngwiisi Kiyaghneghem piniqellghan; igleqataqngunghitiisi Liilightuusat.

Qepghaghtelaaghi Elqughutngallghem

15Enkaam sanaqestangam? Itagnaghtaa‑a seghleghqelleghqaghput qayughllak Kiyaghneghem piniqellghan igleqataqngukanginkut nakaan Liilightuusat? Nakaa, itagnanghituq! 16Liisimakaqusi tuunegkufsi kitumun qaatkesaghqaaluku, taawa ellngan qepghaghtelaaqaaghlleqiisi. Qaatkegkufsigu seghleghqelleq, tuqusleqiisi. Iwernga qaatkegkufsigu Kiyaghneq, nallghusaghlleqiisi elqughutngalleghminun. 17Qepghaghtelaaghuyaghtusi seghleghqelleghmun. Iwernga iqamsiqayugvikaqa Kiyaghneq qayughllak maaten qamakerugllak qaatkegkesi apeghtuusaghraghaat apeghtuusaqegkat elpesinun. 18Itemutkaagusi seghleghqelleghmeng enkaam qepghaghtelaaghughtekaagusi elqughutngalleghmun. 19Tamaakut liigikneghllugutangitneng elpesinun, usputaqngwaanka qepghaghtelaaghetlu piliitestengitlu. Sivunghani tuunegkayuguyaghasi yugusisi qepghaghtelaaghuluki nukeggnalghiinunllu nulamanginalghiinunllu seghletun pilleghnun. Maaten tuuniteki yugusisi qepghaghtelaaghuluki elqughutngalleghmun kiyaghtesqellusi pelungillusi.

20Qepghaghtelaaghwaaqngafsi seghleghqelleghmun, elqughutngallghem igleqataqellghitiisi. 21Sivunghani seghletun pikaagusi, iwernga maaten kayngukaaghtasi tamaakut seghletun pikasi. Sangaawa allgeghtekaghsi tamaakut piluki? Allgeghtekaqaghsi tuqullghinaghhaq. 22Iwernga maaten itemullusi seghleghqelleghmeng qepghaghtelaaghughtekaagusi Kiyaghneghmun. Enkaam Kiyaghneghem pelungiightesimiisi, allgeghutesimiisillu kenlengilngughmeng unguvalleghmeng. 23Akileghtuusaa seghleghqellghem tuqullghuuq; iwernga Kiyaghneghem akingilnguq tunusaa kenlengilnguuguq unguvalleq Christ Jesus‑kun Atanemteggun.

Currently Selected:

Romans 6: ess

Highlight

Copy