Romanos 12

Dachi Akõre baita panásturu

1Mauba ãbarã, Dachi Akõreba machi kĩra chuburiasiid̶eeba, mʉʉba machimaa chi chuburia id̶iiruu ara machi Dachi Akõremaa dead̶amera, ãnimara baa deabadau kĩra. Mau ãnimara biud̶a audeara, ichi baita biꞌia panásturu machi biꞌia unumera. 2Nau iujãad̶ebenarãba waubadau kĩra nibarã́sturu, maumaarã kʉ̃risia wid̶i Dachi Akõreba dea b̶uu kakua jipa nibásturu. Maka machiba kuitaad̶ai chi Dachi Akõreba kʉ̃ria b̶uu. Joma ichiba kʉ̃ria b̶uu biꞌia b̶uu, jipa b̶uu maud̶e ichiba biꞌia unu b̶uu.

3Dachi Akõreba ichi sõbiad̶eeba mʉ b̶usii ichi baita ne wau b̶uamera. Maud̶eeba mʉʉba machimaa nau jaraaruu: ab̶au bid̶a kʉ̃risiabai b̶uu ara ichi chi mechiu nii. Machiba Cristod̶e ijãaped̶aad̶ad̶eeba Dachi Akõreba machicha aꞌawaraa deasii ne waud̶amera. Maud̶eeba ichiba dead̶a kĩra machiba wau panuu biꞌia kʉ̃risiásturu. 4Dachi kakua ab̶a b̶umina dachi kakuad̶e ãrea panuu: jua, jʉ̃rʉ, boro, maucha ne joma. Maamina dachi kakuad̶e nureerãba arab̶aud̶e waud̶akau. 5Ara mau kĩra dachi ãrea panumina, Cristo ome panuud̶eeba kakua ab̶aburu nii kĩra panuu. Maka dachi joma kakua ab̶ad̶e ãbua panuu.

6Dachi Akõreba ichi sõbiad̶eeba dachicha ne waud̶amera aꞌawaraa deasii. Ichiba chi nureerãmaa deasii ichi baita berread̶amera. Maka dead̶akasiibʉrã, ãchiba biawãra ijãa panuud̶eeba maka berread̶ai panuu. 7Chi nureerãmaa deasii waabenarã aid̶ad̶amera. Maka dead̶akasiibʉrã, waabenarã aid̶ad̶ai panuu. Chi nureerãmaa deasii ichi bed̶ea jaradead̶amera. Maka dead̶akasiibʉrã, ichi bed̶ea jaradead̶ai panuu. 8Chi nureerãmaa deasii ãbarã aid̶a panuud̶eeba biꞌia ijãad̶amera. Maka dead̶akasiibʉrã, ãbarã aid̶ad̶ai panuu biꞌia ijãad̶amera. Chi nureerãmaa deasii ne kaebea dea panuud̶eeba waabenarã aid̶ad̶amera. Maka dead̶akasiibʉrã, sõbiad̶eeba dead̶ai panuu. Chi nureerãmaa deasii chi ijãabadaurã jaradea ua b̶uabarii nuread̶amera. Maka dead̶akasiibʉrã, jipa wau nuread̶ai panuu. Maud̶e chi nureerãmaa deasii waabenarã kĩra chuburiad̶amera. Maka dead̶akasiibʉrã, kĩrajʉʉd̶eeba kĩra chuburiad̶ai panuu.

9Sõd̶eeba chiya kʉ̃ria panásturu. Joma kachirua ida b̶ústuru. Chi bia ãrea wau panásturu. 10Biawãra kʉ̃riad̶eeba chiya kʉ̃ria panásturu. Kʉ̃risia sõbiad̶eeba chiya wapeadee panásturu maud̶e waabenarã ʉ̃rʉbena biꞌia kʉ̃risiásturu. 11Koꞌoa panarã́sturu, maumaarã chokekea panásturu. Chi Dachi Mechiu Jesusba kʉ̃ria b̶uu sõd̶eeba joma wáusturu. 12Dachi Akõred̶ebena ne adoed̶ai kuitaa panuud̶eeba kĩrajʉʉ panásturu. Biꞌiwãe panuud̶e dauchia jãadua panásturu. Ewaricha Dachi Akõremaa ʉtaa id̶ísturu. 13Ẽbẽrarã Dachi Akõred̶erã chi nejarr barauwãe nuree aid̶ásturu. Chi machi ded̶e needuu biꞌia irsibísturu.

14Chi machi kachirua waud̶ai baita wãraabadaurãmaa biꞌia berreásturu. Dachi Akõremaa ʉtaa id̶ísturu, ichiba waabenarã biꞌia panabiamera; ʉtaa id̶irã́sturu ichiba ãchi kachirua panabiamera. 15Chi kĩrajʉʉ nuree ome kĩrajʉʉ panásturu. Chi kĩra nomaa nuree ome kĩra nomaa panásturu. 16Jomaurã ome biꞌia panásturu. Waabenarã audeara biꞌia nuree kʉ̃risiarã́sturu, maumaarã chi miichuburi nuree ome biꞌia panásturu. Kʉ̃risiarã́sturu machiba waabenarã audeara biꞌia kuitaa panuu.

17Ab̶auba machi kachirua wauruubʉrã, ara mau kĩra waurã́sturu. Jomaurã daad̶e biꞌia wáusturu. 18Machiba jʉrʉ́sturu jomaurã ome jirukaraayuwãe panad̶ai baita. 19Ãbarã, ab̶auba machi kachirua wausiibʉrã ara mau kachirua waurã́sturu. Maumaarã ida b̶ústuru Dachi Akõreba kastikamera. Dachi Akõre bed̶ead̶e naka b̶ʉ kub̶uu: «Mʉaburu chi nebʉra kastikai. Jomaurãmaa deai ãchiba wauped̶aad̶a kĩra», a jara b̶uu Dachi Mechiuba.#Deuteronomio 32:35. 20Maud̶e Dachi Akõre bed̶ead̶e naka b̶ʉ kub̶uu: «Bichi kĩramaabarii jarrbisia b̶uubʉrã kobise. Obisia b̶uubʉrã bania dease. Maka wauruubʉrã, ichi ãrea kĩra nejasia b̶uabii».#12:20 Ãrea kĩra nejasia b̶uabii. Griego bed̶ead̶e naka b̶ʉ kub̶uu: tʉbʉchia ichi boro ʉ̃rʉ b̶ui. Proverbios 25:21-22. 21Ab̶auba machi kachirua wauruubʉrã ara mau kĩra waurã́sturu. Maumaarã biꞌia wáusturu ichi kĩra nejasiaped̶a ichiba kachirua wau b̶uu ida b̶uamera.#12:21 Griego bed̶ead̶e naka b̶ʉ kub̶uu: Kachirua ida poyaabirã́se, maumaarã bichiba biꞌia wau b̶uud̶eeba kachirua poyaase.

Currently Selected:

Romanos 12: cmi

Highlight

Compare

Copy