Hechos 6

Ãbarã aid̶abadaurã 7 jʉrʉ adaud̶a

1Mau ewarid̶e chi Jesusd̶e ijãabadaurã maucha aude baraasii. Maud̶e chi griego bed̶ead̶e berreabadaurã judiorãba chi hebreo bed̶ead̶e berreabadaurã kachirua jara kopaneesid̶au. Jarasid̶au ãbarãba pẽdrãarã ewaricha aid̶aaduud̶e ãchi pẽdrãarã aid̶ad̶akau. 2Maud̶eeba chi Jesusba bʉid̶arã 12 panuuba joma Jesusd̶e ijãabadaurã ãbua duanuud̶e naka jarasid̶au:

—Biꞌia b̶uwãema daiba Dachi Akõre bed̶ea jaradea panuu ida b̶ud̶ai pẽdrãarã aid̶ad̶ai baita.#6:2 Pẽdrãarã aid̶ad̶ai baita. Griego bed̶ead̶e naka b̶ʉ kub̶uu: Chiko dead̶akad̶ai baita maebʉrã chi nejarra juasiid̶ai baita. 3Maud̶eeba ãbarã, machid̶ebena 7 ẽbẽrarã jipa nuree jʉrʉ́sturu. Ãchi Dachi Akõre Jaurid̶eeba nuread̶ai panuu maud̶e kʉ̃risia kuitaa nuread̶ai panuu. Maarã daiba b̶ud̶ai pẽdrãarã maud̶e waabenarã aid̶ad̶amera. 4Maka wauduubʉrã daiba poyaa biꞌia Dachi Akõremaa ʉtaa id̶i panad̶ai maud̶e ichi bed̶ea jara panad̶ai.

5Ãchiba jaraped̶aad̶a jomaurãba biꞌia ũrisid̶au. Maud̶eeba Esteban jʉrʉ adausid̶au. Mau Estebanba Jesusd̶e ãrea ijãa b̶uasii; Dachi Akõre Jaurid̶eeba b̶uasii. Ichi awara Felipe, Prócoro, Nicanor, Timón, Parmenas maud̶e Nicolás Antioquía puurud̶ebena jʉrʉ adausid̶au. Mau Nicolás griego basii maamina judio kĩra b̶uabachii. 6Chi ãbarãba maarã Jesusba bʉid̶arãmaa adoesid̶aud̶e, Dachi Akõremaa ʉtaa id̶iiduud̶e ãchi jua maarã ʉ̃rʉ kub̶usid̶au.

7Maud̶e ãbarãba Dachi Akõre bed̶ea aude jarasid̶au. Maka chi Jesusd̶e ijãabadaurã Jerusalend̶e maucha aude baraasii. Mau awara ãrea paarerã bid̶a ijãasid̶au.

Judiorãba Esteban araa ãbua imibiabadaurã duanuumaa adoebiped̶aad̶a

8Dachi Akõreba ichi sõbiad̶eeba Esteban ãrea aid̶a b̶uasii. Ichi poyaabarii Estebanmaa deasii ẽbẽrarãba ne poyaa waud̶akau mechiu ẽbẽrarã tãed̶e wau b̶uamera. 9Maud̶e waabenarã judiorã Cirene druad̶ebena maud̶e Alejandría puurud̶ebena panasid̶au. Ãchi judiorã araa ãbua imibadau de “Chi chibari baita bari trajabarii enakuaped̶aad̶arã” abachid̶au. Waabena judiorã Cilicia druad̶ebena maud̶e Asia druad̶ebena panasid̶au. Joma mau judiorã Esteban ome oa kachirua berrea duaneesid̶au. 10Maamina ãchiba Esteban ome poyaad̶aabasii, ichi Dachi Akõre Jauri kʉ̃risia kuitaad̶eeba berreabachiid̶eeba. 11Maud̶eeba ãchiba waabenarã ẽbẽrarãmaa chi nejarra deasid̶au naka setaa waud̶amera: «Daiba ũrisid̶au jãu ẽbẽraba Moisés ʉ̃rʉbena maud̶e Dachi Akõre ʉ̃rʉbena kachirua berrea b̶uu».

12Maka ãchiba puurud̶ebenarã, judiorã chi chõrarã maud̶e chi Moisesba b̶ʉd̶a jaradeabadaurã kĩrubikasid̶au. Maud̶eeba Esteban jidaud̶aped̶a chi ẽbẽrarã araa ãbua imibiabadaurã duanuumaa adoesid̶au. 13Maud̶e waabenarã ẽbẽrarã araa adoesid̶au setaa jarad̶amera. Maarãba naka jarasid̶au: «Jãu ẽbẽraba Dachi Akõre de mechiu biꞌia b̶uu ʉ̃rʉbena maud̶e chi Moisesba b̶ʉd̶a ʉ̃rʉbena kachirua berrea b̶uabarii. 14Ichiba jarasii Jesús Nazaretd̶ebenaba Dachi Akõre de mechiu ãrii maud̶e Moisesba jaradea b̶uad̶a kĩra diware waui. Jãuba maka berrea b̶uu daiba ũrisid̶au».

15Chi judiorã mechiurã joma aria akʉ duanuuba Esteban ichiaduud̶e unusid̶au ichi kĩedarr ángel kĩedarr kĩra b̶uu.

Currently Selected:

Hechos 6: cmi

Highlight

Compare

Copy