2 Tesalonicenses 3
3
Pabloba id̶id̶a ichi baita ʉtaa id̶id̶amera
1Mau awara ãbarã, dai baita Dachi Akõremaa ʉtaa id̶ísturu Dachi Mechiu bed̶ea druacha isa wãmera maud̶e ẽbẽrarãba mau kakua biꞌia jarad̶amera machi tãed̶eeba makad̶a kĩra. 2Dachi Akõremaa ʉtaa id̶ísturu dai aid̶amera, ẽbẽra kachiruarãba kachirua wau kʉ̃ria panuud̶ebena. Chi nuree ẽbẽrarãba Cristod̶e ijãad̶ai kʉ̃riad̶akau. 3Maamina Dachi Mechiuba waui ichiba jara b̶uu kĩra. Ichiba machi aid̶a b̶uai dauchia jãadua panad̶amera maud̶e kachiruad̶ebena kariba b̶uai.#3:3 Kachiruad̶ebena kariba b̶uai. Griego bed̶ead̶e nau sid̶a jara b̶uu «Chi jai kachirua nii juad̶ebena kariba b̶uai». 4Dachi Mechiud̶eeba kuitaa panuu daiba jaradeaped̶aad̶a machiba biawãra wau panuu maud̶e waa wau paneed̶ai. 5Maud̶e kʉ̃ria panuu Dachi Mechiuba kuitaabiai machi ãrea kʉ̃ria b̶uu Dachi Akõre kĩra. Maud̶e kʉ̃ria panuu ichiba karibai Cristoba jãaduad̶a kĩra jãaduad̶amera.
Koꞌoawãe trajad̶ai panuu
6Ãbarã, Dachi Mechiu Jesucristo trʉ̃d̶eeba daiba machimaa jarabʉiduu ãbarã koꞌoa nuree ome ãbua panarãad̶amera. Daiba jaradeaped̶aad̶a kĩra waud̶akau. 7Machiba kuitaa panuu dai nibaped̶aad̶a kĩra machi nibad̶ai panuu. Machi tãed̶e panasid̶aud̶e dai koꞌoa panad̶aka basii. 8Daiba machid̶e chiko bari deaped̶aad̶a kod̶aabasii, maumaarã ãyadaa maud̶e ẽsabud̶e kʉrrjĩrud̶awẽa traju wau panasid̶au machid̶ebena ab̶au bid̶a daimaa ne kaebea dearãad̶amera.#3:8 Hechos 18:2,3. 9Biawãra machiba karibad̶amera poyaa id̶id̶ai panasmina id̶id̶aabasii. Maumaarã dai trajasid̶au kuitaabid̶ai baita machiba ara mau kĩra waud̶ai panuu. 10Machi tãed̶e panasid̶aud̶e daiba nau jarasid̶au: «Chi trajai kʉ̃riawẽa b̶uumaa kobirã́sturu». 11Daiba ũri panuu waabenarã machid̶ebena koꞌoa nuree. Maarã trajad̶akau maumaarã waabenarã nebʉrad̶e panabadau. 12Mau ãbarãmaa daiba Dachi Mechiu Jesucristod̶eeba chi chuburia id̶id̶ai jirukaraayuwãe trajad̶amera kod̶ai baita uru panad̶amera.
13Ãbarã, biꞌia wau panuud̶eeba kakua ãkaa panarã́sturu. 14Daiba nau kartad̶e jaradeaped̶aad̶a ab̶au bid̶a ijãawẽebʉrã, jomaurãmaa kuitaabiásturu mau kachirua wau b̶uu. Mau ome ãbua panarã́sturu kĩrakaya b̶eemera. 15Maamina mau machi kĩramaa kĩra uru panarã́sturu, maumaarã machi ãba baerã jarásturu jipa waumera.
Pabloba kaad̶eare b̶ʉd̶a
16Daiba kʉ̃ria panuu Dachi Mechiu jirukaraayuwãe panabibariiba machimaa ewaricha jirukaraayuwãe ne jomad̶e panabiamera. Kʉ̃ria panuu Dachi Mechiu machi ome b̶uamera. 17Mʉ Pablobʉ. Nau bed̶ea mʉ juaba b̶ʉʉruu. Joma mʉ kartad̶e naka b̶ʉbarii, kuitaabiai baita mʉaburu b̶ʉʉruu. Naka b̶ʉ kub̶uabarii. 18Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi biꞌia nu b̶uamera.
Currently Selected:
2 Tesalonicenses 3: cmi
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All Rights Reserved
