Luke 22

Иуда Иисус эԓпа аԉты кашащәԓ

1Пасхайа айәԓты, тўтәӈ ԋаԋ#22:1 Ӑт ԓыйәԓтәм ԓат эԓты верәм ԋаԋ. Ԋар ԓанта ԓат ԓыйәԓты ŏт (дрожи, сода) ӑт эсԓыԓа. Щӑԓта рўвтәм ԓат лавмәӈ рата пŏнԓа пӑ каврәм рат хишән, лавәмән лӑп хӑтәԓтәԓа пӑ щита йэтшәптыйәԓ. йэмәӈ хӑтәԓ ванамәты питәс,

2щиӈәԋща, Турма йир верты хŏйатәт ŏх икет пӑ Закона утәԓтәты икет ар сыр пищ кӑшсәт, хŏты Иисус пӑратты ԓуԓән, ԓыв мир эԓты пӑԓсәт, щишән.

3Сатана Иуда ԓыпийа ԓŏӈәс. Ԓўв Искариота нэмәтман уса, Кӑтхŏщйаӈ эԓты ит,

4Ԓўв щи мӑнәс, пӑ Турма йир верты хŏйатәт ŏх икет пиԓән па Турәм Хот шавиты кущайәт пиԓән пŏтәртәс, хŏты Иисус ԓыв йошԓаԓа мӑты.

5Ԓыв нŏх амәтсәт пӑ ŏх ԓўвеԓа сŏхәптәты кашащсәт;

6щӑԓта Иуда аԉты йастантәс пӑ кум кӑшты питәс, хун, хŏйатԓы уԓман, Иисус ԓыв йошԓаԓа мӑты питԓәԓы.

Пӑты хот йӑт ԓэщатты вер

7Тўтәӈ ԋаԋ#22:7 Тўтәӈ ԋаԋ йэмәӈ хӑтәԓ – щит Пасха йэмәӈ хӑтԓәт эԓты оԓәӈ хӑтәԓ. йэмәӈ хӑтәԓ йŏхтәс. Щи хӑтәԓән Пасха ош пŏшәх мосәс хŏрты,

8Иисус Петра па Иоанн китсәԓы, йастәман: "Мӑнатән пӑ Пасха ԓэтŏты пӑсан ԓэщататән, мўӈев ԓэты урәӈән".#22:8 Пасха - йэврейәт йэмәӈ хӑтәԓ. Египет мŏхет оԓәӈ ԋаврэмԓаԓ пӑратәмән, йэврей ԋаврэмәт пӑ сŏрәм эԓты ош ўр ŏнтасән нŏх пайәтсайәт. Щи ат нумман, кашәӈ тӑԓ щит постәԓа. Исход 12. Тӑта Пасха йэтән ԓэвәпса эԓты хӑшман уԓԓа. Пасха ԓапәт йэмәӈ хӑтәԓ кўтән оԓәӈ хӑтәԓ.

9Ԓын пӑ Ԓўвеԓа йŏхԓы йастәсӈән: "Хŏта минэмәна ԓэщатты партԓән?"

10Ԓўв пӑ ԓынана йастәс: "Щи, нын воша йŏхәттан пŏрайән, нын хŏщайән йиӈки пўт аԓты хŏйат уйтатәԓ; ԓўв йўпеԓән щи хота мӑнатән, хŏԓта ԓўв ԓŏӈәԓ,

11щӑԓта хотәӈ кущайа йастәԓтән: "Утәԓтәты Ху нӑӈен иԋщәсәԓ: мойәӈ хŏйат урәӈән уԓты хот йӑтэн хŏта уԓ, хŏта Ма утәԓтәты йохԓам пиԓән Пасха ԓэты ԓуԓән верәтсәм?"

12Щӑԓта ԓўв нынан ԓӑрпа ԓэрәмтәм нўм хот йӑт аԉәԓ; щита ԓэщататән".

13Ԓын мӑтсәӈән, щӑԓта хŏты Ԓўв йастәс, щиты уйәтсәԓән, пӑ Пасха лэтŏт ԓэщатсәтән.

Пасха йэмәӈ хӑтәԓ верты щир

14Щӑԓта, хун пŏра йŏхтәс, Ԓўв пӑ кӑтхŏщйаӈ апостоләт Ԓўв пиԓәԓән пӑсан сурыйа омәссәт,

15щӑԓта Ԓўв ԓывиԓаԓа йастәс: "Ма, шука питтэм йэԓпийән, тӑм Пасха нын пиԓанән йӑха ԓэты шек ԓӑӈхасайәм,

16нынана пŏтәртԓәм, па йэԓԓы ԓўвеԓ ԓэты ӑт питԓэм, щи унты, хун ԓўв Турәм Хон Уԓәпсайән ӑт пўншатәԓ".

17Ан ўйман, Турма пумащипа йасӈәт ԋухәмман, йастәс: "Тӑм ан ўйаԓән пӑ нын кўтәнән ортаԓән,

18нынана пŏтәрԓәм, тӑм ўш эԓты, Турәм Хон Уԓәпса йŏхәтты унты, ўна йищты ӑт питԓәм".

Турәм куща Йэтән ԓэвәпса парты вер

19Щӑԓта Ԓўв, ԋаԋ ўйман пӑ Турма пумащипа йасӈәт ԋухәмман, ԋаԋ ара морәтман, утәԓтәты йохԓаԓа мӑсԓы, щиты йастәман: "Тӑм Ма Эԓэм, нын урӈәна пӑратты мӑԓа; тӑмиты, Мӑнэм нумәԓмәты урәӈән, вераты".

20И щиты анәԓ йэтән ԓэтәт йўпийән ўсԓы, йастәман: "Тӑм ан - йӑԓәп йастантәм щир Ма кӑԓэмән, нын урӈәнән шошәмԓа.

Христос йэԓԓы питты вер аԉәԓ

21Щи хŏйат, хŏй Мӑнэм ӑԉԓәԓы, йошәԓ Ма йошэм пиԓән и пӑсанән ŏԓәԓ;

22Хŏйат Пŏх пиԓән иса щиты питәԓ, хŏты номәс верман уԓԓа, туп щи хŏйата шук, хŏйән Ԓўв аԉԓа".

23Щӑԓта ԓыв кўтԓаԓән иԋщәсты питсәт, хŏй ԓыв эԓтэԓ ԓуԓән щиты верты веритәс.

Утәԓтәты йох ўра вортԓәт, ԓыв эԓтыԓаԓ хŏй ԓӑтәӈшәк

24Ԓыв кўтэԓән ўрайа хŏйсәт, хŏй ԓыв эԓтэԓ мет ԓӑтәӈа ԓўӈтәсты верәԓ уԓ.

25Иисус пӑ ԓывиԓаԓа йастәс: "Хонәт мирәт нўмпийән кущайа уԓԓәт, мир кущайәт йӑм мӑты ŏтәта айәԓԓайәт,

26нын пӑ па щирән уԓаты: хŏй нын эԓтайән уншәк, щит айашәк aт уԓ, пӑ хŏй кущайа уԓ – щит митху иты ат уԓ.

27Хŏй уншәк: хŏй пӑсан сурыйән омәсәԓ, мўй пӑ хŏй пӑсан ԓэщатәԓ? Ӑнта мўй пӑсан сурыйән омәсты ŏт? Ма пӑ нын кўтәнән пӑсан ԓэщаттыйа уԓԓәм.

28Туп нын Ма пиԓэмән Мӑнэм артаԓәты верәт хŏща усты.

29Щишән Ма нынана Хон Уԓәпса мӑԓэм, хŏты Ащем Мӑнэма мӑсԓы,

30нын Ма пӑсанэм сурыйән Ма Хон Уԓәпсайэм хŏща па ат ԓэсты па ат йищсәты, хон омәсты тӑхайәтән омәсты пӑ Израиль кӑтхŏщйаӈ рут сўтәтты питԓәты".

Иисус Петра йŏхԓы ԓэԓәпты вер аԉәԓ

31Турәм Куща йастәс: "Симон, Симон! Сатана партәс, мӑтты ки нын ԋаԋ ԓат сэм иты ат пӑркатсайты,

32туп Ма нӑӈ урӈенән пойәкщәсәм, ԓуԓән нӑӈ эвәԓты верэн ӑт aт уштәсэн; щӑԓта хун нӑӈ Ма пеԓайэм керԓәԓән, йайԓан эвәԓты вер такамты".

33Петра Ԓўвеԓа йŏхԓы йастәс: "Турәм Куща! Нӑӈ пиԓэнән ма кўш касна хота, кўш сŏрма питты тӑхайа мӑнты верәтԓәм!"

34Туп Ԓўв йастәс: "Нӑӈена, Петра, пŏтәртԓәм, тӑм ат щищкурэк ўваԓтаԓ унты хŏԓна, нӑӈ Мӑнэм уйәтты верэн хуԓәм пўш лӑп ўратԓэн".

Христос утәԓтәты йохԓаԓа йӑԓәп партәпса мӑԓ

35Щӑԓта ԓывиԓаԓа йастәс: "Хун Ма нынан тўтхотԓы, хирԓы, кўр ԓумтәм такԓы китыԓысԓам, нын мўй нўшайа питыԓысты?" Ԓыв йŏхԓы йастәсәт: "Нэмәԓты хŏща".

36Щи йўпийән Иисус ԓывиԓаԓа йастәс: "Ин па, хŏй тўтхот тӑйәԓ ки, пӑтән ўйи, хир ищиты; хŏй ӑт тӑйәԓ ки, ԓумтәмен тыныйи пӑ аԓты кеши ԓута;

37нынана пŏтәртԓәм: пӑ тӑм хӑншәм ŏт Ма хŏщайэм йэтшәптәты мосәԓ: "Хŏрахщэт пеԓа Ԓўв ԓўӈәтман ус"; Ма йушем щи йэтшәԓ".

38Утәԓтәты йохԓаԓ йастәсәт: "Турәм Куща! Тӑм, тӑта кӑт аԓты кеши". Ԓўв утәԓтәты йохԓаԓа йастәс: "Мета".

Христос Гефсимания тӑйхайән пойәкщәԓ

39Вŏш эԓты ким этмаԓ кемән, Ԓўв, уԓԓытаԓ иты, Элеон нэмпи кев пай ԓоӈԓа хухты мӑнәс; утәԓтәты йохԓаԓ Ԓўв йўпеԓән мӑтсәт.

40Тŏхи йŏхәтмеԓ кемән, Иисус ԓывиԓаԓа йастәс: "Пойәкщаты, атәм хўщәпсайа ԓуԓән ӑт aт питсәты".

41Щӑԓта Ԓўв ԓыв эԓтыԓаԓ йэԓшәк, кев шук йўвәтты хўват кема, мӑнәс пӑ шанша ԓойман, пойәкщәс,

42пŏтәртман: "Турәм Ащи! Нӑӈ щи анэн Ма эԓтэм пўӈәԓта туты ԓӑӈхасән ки! Туп ӑнта Ма ԓӑӈхаты верэм щирән, Нӑӈ ԓӑӈхаты верэн щирән ат питәԓ".

43Щиӈәԋща Ангел турәм эԓты Ԓўв хŏщайәԓа сэма этәс пӑ Ԓўвеԓ такмәԓтсәԓы.

44Нŏпсәԓ ԓыпийән шукащман уԓман, таканшәк пойәкщәс, пӑ Ԓўв мўва посыты шӑкйиӈкәԓ ўр сэм хŏрпи ус.

45Пойәкщәты йэтшәмаԓ кемән, Ԓўв нŏх ԓойәс пӑ утәԓтәты йохԓаԓ хŏща йŏхтәс. Пӑ ԓывиԓаԓ шук эԓты иԓ вŏйәмтәма уйәтсәԓы,

46пӑ ԓывиԓаԓа йастәс: "Мўйа нын ŏԓԓәты? Нŏх киԓаты пӑ пойәкщаты, ԓуԓән атәм хўщәпсайа ӑт aт питсәты!"

Иуда Христос эԓпа аԉәԓ

47Хун Ԓўв хŏԓна щит пŏтәртәс, ар хŏйат йэщаԓт этәс, мир йэԓпийән кӑтхŏщйаӈ утәԓтәты ху кўт эԓты уԓты Иуда нэмпи ху, шушәс. Ԓўв Иисус хŏща вана йŏхтәс, Ԓўвеԓ мосәԓтәты урәӈән. Иуда ԓывиԓаԓа щимәщ пос аԉәс: "Хŏй ма мосәԓтәԓэм, Щит щи уԓ".

48Иисус пӑ ԓўвеԓа йастәс: "Иуда, мосәԓтәман мўй, Хŏйат Пŏх эԓпа аԉԓән?"

49Иисус пиԓән уԓәм ŏтәт, йэԓԓы тыйты вер мŏштәман, Ԓўвеԓа йастәсәт: "Турәм Куща, аԓты кешийән кўтәртԓув?"

50Щӑԓта ԓыв эԓтайэԓ ит Турма йир верты хŏйатәт ŏх ики митху аԓты кешийән рэскәсԓы пӑ ԓўв йӑм пеләк пӑԓәԓ хŏԓт тўвемәсԓы.

51Щи пўԉаӈ Иисус йастәс: "Хӑйаԓән, мета". Пӑ митху пӑԓа хӑнәмтыман, ԓўвеԓ йӑмәԓтэмәсԓы.

52Иисус Ԓўвеԓ ԋӑрэмәты ӑктәщәм Турма йир верты хŏйатәт ŏх икета пӑ Турәм Хот шавиты кущайәта пӑ уна уԓты икета, йастәс: "Ищи мӑтты нын хорахщи йэщаԓт аԓты кешэӈ пӑ йущәӈ йўхи тэԓән этсәты, Мӑнэм ўты урәӈән.

53Кашәӈ хӑтәԓ Ма нын пиԓәнән Турәм Хотән уԓԓысәм, нын Ма пеԓайэм йош нŏх ӑт аԓмиԓысты, ин пӑ нын пŏрайән пӑ хиԋ йура уԓ".

Петра Христос эԓты йŏвра керԓәԓ

54Щи кемән ԓыв Иисус кӑтԓәпсэԓ пӑ Турма йир верты хŏйатәт ŏх ху хота тусэԓ. Петра пӑ йэԓташәк шушәс.

55Хун ԓыв ов йэԓпи хӑр кўтәпән рат версәт пӑ йӑха омәссәт, Петра па ԓыв кўтэԓа опсәс.

56И митнэ, ԓўвеԓ тўт пўӈәԓән омәстаԓ шийаԓәс пӑ тŏрԓы ԓўв пеԓайәԓ ватман, йастәс: "Тӑми па Ԓўв пиԓәԓән ус!"

57Туп Петра Ԓўв эԓтэԓ пўӈԓа уратәс, митнэӈа щиты йастәман: "Ма Ԓўвеԓ ӑт уйәтԓэм".

58Йухәт йэшавәԓ кимет хŏйат, ԓўвеԓ шийаԓәмаԓ кемән, па йастәс: "Нӑӈ па ԓыв эԓтэԓ". Петра щи хŏйата йастәс: "Ӑнта!"

59Щос кем сыс мӑнмаԓ йўпийән, хŏԓна па ху па хӑрщийа пŏтәртәс: "Йӑна щи, тӑмен ищи Ԓўв пиԓәԓән ус, ԓўв Галилея мўв эԓты".

60Петра па щи хŏйата йастәс: "Ӑт уйәтԓэм, мўй эԓты нӑӈ пŏтәртԓән!" Щи кумат, хун ԓўв хŏԓна пŏтәртәс, щищкурэк щи ўваԓтәс.

61Щи пŏрайән Турәм Куща, йŏхԓы карэмәман, Петра пеԓа ӑӈкәрмәс. Петра щиӈәԋща Турәм Куща йасӈәт нумәԓмәсԓы, хŏты Ԓўв ԓўвеԓа йастәс: "Щищкурэк ўваԓтты йэԓпийән, нӑӈ Мӑнэм уйәтты верен хуԓәм пўш лӑп ўратысэн".

62Щӑԓта, ким этмаԓ кемән, шук щирән хŏԓԓаԓтәс.

Христос сэкԓа

63Иисус, Ԓўвеԓ кӑтәԓты хŏйатәтән, кӑмән щирән Ԓўв нухсәса пӑ сэкса;

64щӑԓта, ԓыв Ԓўв сэмӈиԓаԓ лӑп йӑрыԓысԓаԓ, вешәԓ эԓты Ԓўвеԓ рэскиԓысэԓ пӑ иԋщәсысэԓ: "Нӑӈ Турәм йасәӈ туты хŏйат, йаста, хŏйән рэскәсайән?"

65Па ар сыр атәм йасәӈ Ԓўв пеԓайәԓ йастәсәт.

Христос Синедрион йэԓпийән

66Туп аԓәӈ сӑхата йис, уна уԓты икет, Турма йир верты хŏйатәт ŏх икет пӑ Закона утәԓтәты йох йӑха ӑктәщсәт, пӑ ԓыв синедрионэԓа#22:66 Синедрион - Иудейәт мет вŏԓаӈ сўт верты щир пӑ сўт верты тӑха. Ԓўвеԓ ԓŏӈәԓтсэԓ

67пӑ йастәсәт: "Нӑӈ мўй Христос#22:67 Турәмән аԉәм мир нŏх пайәтты Хон (Мессия)? Мўӈева йасты". Иисус ԓывиԓаԓа йастәс: "Нынана йастәԓэм ки, нын ӑт эвәԓԓәты;

68нынан ищмәԓәм кепа, Мӑнэма йŏхԓы ӑт йастәԓты пӑ Мӑнэм хŏԓт ӑт эсәԓԓәԓән.

69Тӑԓта йэԓԓы Хŏйат Пŏх иса йурәӈ Турәм йӑм пеләк сӑхат омәсәԓ".

70Щӑԓта хŏԓ йастәсәт: "Щишән Нӑӈ Турәм Пŏх?" Ԓўв йŏхԓы ԓывиԓаԓа йастәс: "Нын пŏтәрԓәты, Ма уԓԓәм".

71Ԓыв пӑ йастәсәт: "Мўй сыр аԉәпса мўӈева хŏԓна мосәԓ? Мўӈ Ԓўв ўӈԓәԓ эԓты щи щит хуԓсув".

Currently Selected:

Luke 22: ХБ

Highlight

Copy