Acts 9

Савл Иисуса эвәԓты питты щир

1Савл пӑ, Турәм Куща утәԓтәты хŏйатәт пеԓа ԉикән кавәрман пӑ веԓтатты номәсән тэкәнман, Турма йир верты ŏх ху хŏща йŏхтәс

2пӑ ԓўв эԓтэԓ айкеԓ нэпек Дамаск вош иудейәт пойәкщәты хотәт урәӈән вохәс. Ԓўв хŏй, тӑм утәԓтәты вер йўпи туты хŏйат, уйәтәԓ, йохәт мўй пӑ нэӈәт мŏщатты пӑ Иерусалима йŏхтәптәты ат верәтсәԓԓы.

3Хун йушән ԓўв Дамаск воша ванамәты питмаԓән, шӑмкапан турәм хӑр эԓты ԓўв нŏвийән похәтса.

4Ԓўв мўва иԓ рӑкнәс пӑ тўр сый хуԓтмәс, ԓўв пеԓайәԓ пŏтәртты сый: «Савл, Савл! Мўйа Мӑнэм ԋухәԓԓэн?»

5Ԓўв йастәс: «Хŏй Нӑӈ, Турәм Куща?» Турәм Куща пӑ йастәс: «Ма Иисус, Хŏйтэн нӑӈ ԋухәԓԓән. Нӑӈен карты йущәӈ йўх йэщаԓт мӑнты ԓавәрт».

6Ԓўв, тӑрыман пӑ пӑԉщәмән иԉапман, йастәс: «Турәм Куща! Мўй верты мӑнэм партԓэн?» Щӑԓта Турәм Куща ԓўвеԓа йастәс: «Нŏх ԓойа пӑ воша мӑна; пӑ нӑӈена йастәԓа, мўй нӑӈен верты мосәԓ».

7Ԓўв пиԓәԓән шушәм хŏйатәт пӑ сӑм мӑнман ԓойсәт, тўр сый хуԓман, пӑ нэмәԓты хŏйат ӑт шийаԓәман.

8Савл мўв эԓты нŏх ԓойәс пӑ пелки сэмән ԓўвеԓа нэмәԓты ӑт ныса. Щӑԓта йош пелкәԓ эԓты катәԓман туты питса, пӑ Дамаск воша йŏхтәптәса.

9Щӑԓта хуԓәм хӑтәԓ ԓўвеԓа нэмәԓт ӑт ныса, пӑ ӑт ԓэс, пӑ ӑт йиԋщәс.

10Дамаскән и утәԓтәты хŏйат ус, нэмәԓән Анания; пӑ Анания вантәм верәԓ хŏща Турәм Куща ԓўвеԓа йастәс: «Анания!» Ԓўв йастәс: «Тӑм Ма, Турәм Куща».

11Турәм Куща пӑ ԓўвеԓа йастәс: «Ԓойа пӑ, щиты айәԓтты Тўӈ вош хўлыйа, мӑна, пӑ Иуда хот хŏща Тарс вошәӈ ху иԋщәсы, нэмәԓән Савл; ԓўв ин пойәкщәԓ.

12Пӑ вантәм верәԓ хŏща Анания нэмпи ху вантәс, ԓўв хŏйщайәԓ йŏхәтәԓ пӑ ԓўв эԓтэԓ йошәԓ пŏнԓәԓы, ԓўв сэмәӈа ат йис».

13Анания йŏхԓы йастәс: «Турәм Куща! Ма ар хŏйат эԓты тӑм хŏйат эԓты хуԓԓысэм, мўй арат атәм ԓўв Нӑӈ хŏйатԓана Иерусалимән верәс;

14Тӑта па Турма йир верты ŏх икет эԓты хŏԓ, Нӑӈ нэмен вохты хŏйатәт йӑрты, йур тайәԓ».

15Туп Турәм Куща ԓўвеԓа йастәс: «Мӑна, ԓўв Ма пирыйәм пўтэм, Ма нэмем мир пӑ хонәт пӑ Израиль пŏхәт йэщаԓт такан йастәты урәӈән.

16Пӑ Ма ԓўвеԓа этәԓтәԓэм, мўй арат Ма нэмем урәӈән ԓўвеԓа шукащты мосәԓ».

17Анания мӑнәс пӑ хота ԓŏӈәс, йошӈиԓаԓ ԓўв эԓтэԓ пŏнман, йастәс: «Савл хӑнам ху! Йушән, хŏԓща нӑӈ шушсән, нӑӈ хŏщайэн этԓыйәм Турәм Куща Иисус, мӑнэм китсәԓы, нӑӈ сэмәӈа ат йисән пӑ Йэмәӈ Ԓыԓән ат тэкәтсайән».

18Пӑ щи пўԉаӈ сэмӈиԓаԓ эԓты ищи мӑтты сом хŏԓт рӑкнәс, пӑ ԓўв шамкапан сэмәӈа йис; нŏх ԓойәс пӑ йиӈка ԓоӈәԓтыса,

19щӑԓта, ԓэтŏт ԓэвмаԓ йўпийән, такамәс.

Савл Дамаск вошән Иисус эԓты Йӑм Айкеԓ туты вер

Пӑ Савл кӑмәтса хӑтәԓ утәԓтәты йох пиԓән Дамаскән ус.

20Пӑ щи пўԉаӈ иудейәт пойәкщәты хотәтән Иисус эԓты айкеԓ туты питәс, «Ԓўв – Турәм Пŏх».

21Щӑԓта хŏԓ хуԓәнтәм хŏйатәт аԓ пакнысысәт пӑ пŏтәртсәт: «Тӑм ӑнта мўй щит, хŏй Иерусалимән тӑм нэм вохты ŏтәт воштыԓыйәс? Йӑна щи пӑ щи урәӈән ты йŏхтәс, ԓывиԓаԓ мŏщатты пӑ Турма йир верты ŏх икет хŏща туты».

22Савл пӑ щи киԋща па такамтыйәс пӑ Дамаскән уԓты иудей йох ԓыԓԓәты унты йŏхтәптәсԓы, такан аԉман, Тӑми – Христос#9:22 Христос -словарьән ванты;.

23Хун пӑ йӑм арат хӑтәԓ хӑщәм йўпийән, иудей йох ԓўвеԓ пӑратты нŏмәс версәт.

24Туп Савл ԓыв тӑм нŏпсэԓ мŏштәсԓы. Ԓыв пӑ атаӈ хӑтәԓ вош пушас ов хŏща ԓавԓәссәт, ԓўвеԓ веԓты урәӈән.

25Утәԓтыты йох пӑ атәԓән, ԓўвеԓ ўсэԓ пӑ вош кертәм пӑԓ пушас эԓты кураԋэк ԓыпийән иԓ эсәԓсэԓ.

Савл Иерусалимән

26Савл Иерусалима йŏхтәс пӑ утәԓтыты хŏйатәт хŏща ԓŏӈты ўратәс; туп хŏԓ ԓўв эԓтайәԓ пӑԓсәт, ԓўв утәԓтыты хŏйата уԓтыйа, ӑт эвәԓԓа.

27Варнава пӑ ԓўвеԓ ўсԓы пӑ апостоләт хŏща тусԓы пӑ ԓывиԓаԓа пŏтәртсәԓы, хŏты йуш хŏща ԓўв Турәм Куща ватсәԓы, пӑ мўй ԓўвеԓа Турәм Куща пŏтәртәс, пӑ хŏты ԓўв Дамаскән, ӑт пӑԓман, Иисус нэм урәӈән айкеԓ тус.

28Щӑԓта ԓўв ԓыв пиԓԓаԓән ус, лыпаща Иерусалим ԓŏватән йӑӈхиԓыйәс пӑ Турәм Куща Иисус нэм урәӈән ӑт пӑԓман айкеԓ тус.

29Ищиты грек йаcәӈән пŏтәрты иудейәт пиԓән пŏтәртәс пӑ ўра вортәс; ԓыв пӑ ԓўвеԓ веԓты ўтщисэԓ.

30Хӑнам йохԓаԓ, тӑми мŏштәмеԓ кемән, Кесарияйа ԓўвеԓ тусэԓ пӑ Тарс воша китсэԓ.

31Пŏйәкщәты мŏхет пӑ Иудея мўв ԓŏватән, Галилея пӑ Самария ԓŏватән рома усәт, утәԓтыман пӑ Турәм Куща эԓты пӑԓман усәт; щӑԓта Йэмәӈ Ԓыԓән такапман, арамисәт.

Петра Лиддайән пӑ Иоппияйән

32Щиты тыйәс, Петра, хŏԓ мŏхет лӑп йӑхман, Лидда вошән уԓты эвәԓты мŏхет хŏща йŏхтәс.

33Щита ԓўв Энея нэмпи и хŏйат уйтәс, хŏй ԋийәԓ тӑԓ ŏԓттӑхайәԓән, щащԓы питман, ŏԓәс.

34Петра ԓўвеԓ йастәс: «Эней! Нӑӈ Иисус Христосән тўмтака верԓайән; ŏԓттӑхайэн эԓты нŏх ԓойа». Пӑ ԓўв ищи мŏхты нŏх ԓойәс.

35Пӑ ԓўв Лиддайән пӑ Саронән уԓты хŏйатәтән хŏԓ ватса, пӑ Турәм Куща пеԓа ӑӈкәртсәт пӑ эвәԓсәт.

36Иоппия вошән и утәԓтәты нэ ус, нэмәԓ Тавифа - щит «газель#9:36 газель - щит хошәм мўвән уԓты ўԓы;»; ԓўв сӑмәӈ верәтән тэкәнман уса пӑ ар йӑм вер верәс.

37Щи хӑтԓәтән вер тыйәс, ԓўв кӑшаӈа йис пӑ пӑрәс. Ԓўв ԉŏхәтса пӑ нўм хот йӑта пŏтса.

38Лидда пӑ Иоппия вош ԉэпән ванән ус, утәԓтәты йох Петра щита уԓты хуԓмеԓ кемән, ԓўв хŏщайәԓ кӑт хŏйат китсайтән, ԓўвеԓ вохты, ԓыв хŏщайэԓ йŏхәтты ԓўв ӑт ат рŏнәс.

39Петра ԓойәс пӑ ԓын пиԓанән мӑнәс; пӑ хун ԓўв йŏхтәс, нўм хот йӑта ԓўвеԓ тусэԓ, пӑ хŏԓ шукаԓт нэӈәт, хоԓԓәман, ԓўв йэԓпәԓа ԓойсәт, йэрнасәт аԉиԓыман, Тавифа ԓыв пиԓԓаԓән уԓмаԓән верыԓыйәм ŏтԓаԓ.

40Петра мŏхет хŏԓ ким партсәԓы пӑ, шанша иԓ эсԓәщман, пойәкщәс, пӑ, мотавтәԓ пеԓа ватман, йастәс: «Тавифа! Нŏх ԓойа». Щӑԓта ԓўв сэмӈиԓаԓ пел пўшсәԓы пӑ, Петра шийаԓәмаԓ кемән, нŏх опсәс.

41Ԓўв, йошәԓ ԓўвеԓа мийман, нŏх ԓощәԓтәсԓы пӑ, эвәԓты мŏхет пӑ шукаԓт нэӈәт, вана вохман, ԓыв йэщаԓтэԓ ԓўвеԓ ԓыԓӈат ԓощәԓтәсԓы.

42Тӑм вер Иоппия ԓŏватән иса уйәтты питса, пӑ ар хŏйат Турәм Кущайа эвԓәс.

43Пӑ йӑм арат хӑтәԓ ԓўв Иоппия вошән и мŏԓты Симон ԋўки верты ики хŏща ус.

Currently Selected:

Acts 9: ХБ

Highlight

Copy